Kalinwomu Kalunga Afumiseko Kuyanda Chosena
Hambakuke lunga wavilinga vyamwaza uze evwishilenga Kalunga kuwaha ambile ngwenyi: “Ove Yehova, nangutwanga kawelele palanga nakumwaka uka chakuzeneka ove kungwivwa? Nangukulombanga ungupululule kuulyanyi palanga nakumwaka uka chakuzeneka ove kungukafwa?” (Hambakuke 1:2, 3) Uno mazu ahanjikile asolola nge kapwile nalufweleloko tahi? Nduma! Kalunga afwelelesele Hambakuke ngwenyi, Ikiye atongola lwola lwakufumisako kuyanda.—Hambakuke 2:2, 3.
Nge yenu muli nakuyanda chipwe mutu uze mwazanga ikiye ali nakuyanda chikuma, munahase kukukulula ngwenu Kalunga ali nakulangisa kufumisako kuyanda. Chipwe ngocho, Mbimbiliya yatufwelelesa ngwayo: “Yehova keshi kulangisa kutesamo lushiko lwenyiko, nge omu vamona vatu vamwe ngwavo nalangisa, oloze namitalilila chikoki, mwomwo kazanga mutu numba umwe akanongeko, oloze azanga vosena vapihilile nakwalumuka.”—WaPetulu 2, 3:9.
MWAKA UKA KALUNGA MWAKAFUMISAKO KUYANDA?
Kalinwomu vene ngana. Yesu ambile ngwenyi chisemunwino chimwe nachikamona vyuma vyosena vize navikasolola makumbi akukuminyina “nachikukulwishi chakatwamino kamyaka yino.” (Mateu 24:3-42) Upolofweto waYesu uli nakutesamo chikuma makumbi ano, kaha uli nakusolola nge kalinwomu Kalunga afumiseko kuyanda chosena. *
Uno Kalunga mwakafumisako ngachilihi kuyanda? Omu Yesu apwile hano hamavu, asolwele ngolo jaKalunga jakufumisako kuyanda. Talenu havyakutalilaho vinakavangizaho.
Ukalu Wakulijila: Omu Yesu navaposetolo jenyi vapwile muwato haKalungalwiji waNgalileya, kwejile peho yanyamanganda yize yasakile kuvombesa wato. Oloze Yesu asolwele hatoma nge ikiye naIse vanahase kuhonesa ukalu wakulijila. (Wavaka-Kolose 1:15, 16) Yesu ambile kukalungalwiji ngwenyi: “Unda! Hola kulu!” Vyuma muka vyasolokele? “Peho yatulile, kaha kwaunjile.”—Mako 4:35-39.
Misongo: Yesu apwile nauhashi wakutonesa tupuputa nakuka vitonji navaka-mbumba, navaka-kalepa navaze vapwile namisongo yakulisezaseza. Yesu “okile vosena vaze vapwile nakuviza.”—Mateu 4:23, 24; 8:16; 11:2-5.
Kukeha chaVyakulya: Yesu azachishile ngolo vamuhanyine kuli Ise mangana ahane vatu kulya. Mbimbiliya yamba ngwayo, Yesu alishile mayongomena avatu mapapa kavali.—Mateu 14:14-21; 15:32-38.
Kufwa: Ngolo jaYehova jakusangula vafu vajisolola hatoma mumijimbu vasoneka yize yahanjika havatu vatatu vaze asangwile Yesu. Havatu vaze Yesu asangwile hapwile namutu uze apwile muchimbumbe makumbi awana.—Mako 5:35-42; Luka 7:11-16; Yowano 11:3-44.
^ par. 5 Nge muli nakusaka mijimbu yayivulu, kutalisa kumakumbi akukuminyina, kaha talenu kapetulu 9 mumukanda wakwamba ngwavo Mbimbiliya Nayitunangula Vyuma Muka? vasoneka kuli Vinjiho jaYehova munahase nawa kuututulula ha www.pr418.com/lue.