Kalunga atengele mujimba wetu nauhashi wakulyuka uvene. Chakutalilaho, mukanda waJohns Hopkins Medicine wamba ngwawo, “nge mutu nalitu mbandu chipwe nge vanamupulu, mujimba weji kulitunganga mangana mbandu yikanguke.” Mujimba weji kulitunganga washi mangana manyinga echenga kuhita, kaha mishisa yamanyinga yeji kulingisanga misonyi yahambandu yilitunge cheka.

SHINGANYEKENU HACHUMECHI: Nge Tengi atengele mujimba wetu nauhashi wakulyuka uvene, kutala katweshi kuhasa kufwelela ngwetu nahase kutukafwa nge tuli muukaluko nyi? Muka-kwimba Jisamu ambile ngwenyi: “[Kalunga] eji kuhindulanga vaze vali nakulyonyinga mumichima. Eji kukasanga hajimbandu javo.” (Samu 147:3) Nge muli muukalu, kutala munahase kufwelela ngwenu Yehova mwakasa hajimbandu jenu oholyapwa nakulutwe tahi?

Kalunga ashika ngwenyi: “Kanda nawivwa womako, mwomwo nguli nayove. Kanda naulizakaminako, mwomwo nguKalunga kove. Nangukujikijisa, nangukukafwa.” (Isaya 41:10) Mutu uze atachikiza ngwenyi Yehova eji kumuzakamanga atwama navishinganyeka vyakuunda nakumulingisa apwenga wakumika muvyeseko vyavivulu navimuwana. Kaposetolo Paulu avulukile kuunda kanechi ngwenyi “kuunda chaKalunga chize chahambakana kunangakana chosena nachikinga michima yenu.” Ambile cheka ngwenyi: “Ngunajikiza muvyuma vyosena kuhichila muli ou eji kunguhananga ngolo.”—Wavaka-Fwilipi 4:4-7, 9, 13.

Mazu aKalunga eji kutukafwanga tufwelele chikuma Yehova uze ashika vatu kukavalingila vyuma vyamwaza kulutwe. Chakutalilaho, (tangenu) mukanda waKusoloka 21:4, 5 uze naumikafwa mutachikize vyuma mwakatulingila novyo mwakalingila vyuma kana:

• “Mwakahunda masoji osena kumeso” avatu vosena. Yehova mwakafumisako kuyanda nakulizakamina chosena naukalu weka uze vakwetu navahona kwivwishisa kanawa.

• Mwangana Wangolo Josena uze atengele vyuma vyosena ‘atwama halitanda,’ mwakazachisa ngolo jenyi mangana akafumiseko kuyanda chosena nakukatuhana vyuma vyamwaza vize twasaka.

• Yehova atufwelelesa ngwenyi jishiko jenyi twatela ‘kujifwelela mwomwo jamuchano.’ Kulumbununa nge afwila kukinga puho yamwaza yalijina lyenyi nakufwila kutesamo jishiko jenyi.

“‘Mwakahunda masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako. Vyuma vyakulivanga vinafumuko lyehi.’ Kaha Uze atwamine halitanda ambile ngwenyi: ‘Tala! Nangulingisa vyuma vyosena kupwa vyavihya.’ Ambile nawa ngwenyi: ‘Soneka, mwomwo mazu awa atela kuwafwelela, kaha amuchano.’”—Kusoloka 21:4, 5.

Mbimbiliya navyuma vyakutenga vyasolola vilinga vyaSetu wamwilu. Vyuma vyakutenga vyeji kutukafwanga tutachikize kanawa Kalunga nakupandama kuli ikiye kupwa sepa lyetu. Shikaho, Mbimbiliya yamba ngwayo: “Pandamenu kuli Kalunga, kaha mwapandama kuli enu.” (WaYakova 4:8) Kaha mukanda waVilinga 17:27 wamba ngwawo: “Kapwa kwakusuku nayetu tuvosena mutu himutuko.”

Omu namufwila kutachikiza Kalunga, namufwelela chikupu ngwenu “amizakama.” (WaPetulu 1, 5:7) Kutokwa muka chatwama hakufwelela Yehova?

Achishinganyekenu hali Toru, wakuJapan uze apwilenga mulizavu lyaukenya muJapan vavuluka ngwavo yakuza. Toru ambile ngwenyi: “Ngwashinganyekele ngwami Kalunga kanguzangileko, kaha kufwa chavatu vaze ngwazangile chasolwele nge Kalunga ikiye anakunguzangamisa.” Vishinganyeka kana vyangulingishile ngupwenga ngumutu “wakuhona keke nakutetela vakwetu.” Kaha anukile vyuma afwililile kulinga, ambile ngwenyi: Ngwasakile kujiha mutu uze aya chikuma puho mangana vatu vangwalisenga, oloze vyuma kana kachi pamo vyangulingishile ngufwenga washi.

Kutwala muze, Toru napuwenyi Hannah vaputukile kulinangula Mbimbiliya, kaha Toru alumwineko  vyuma vimwe mukuyoya chenyi. Puwenyi Hannah ambile ngwenyi: “Ngwamwene omu lunga lyami aputukile jino kupwa navilinga vyamwaza.” Oholyapwa, Toru etavila jino ngwenyi: “Kwatwama Kalunga uze eji kutuzakamanga mutu himutu. Kasaka mutu numba umwe afwengako, oloze afwila kukonekela vosena vaze navapihilila nakwalumuka. Eji kwivwililanga kuvyuma vize katweshi kuhasa kulweza kala mutuko, kaha nawa eji kutwivwishisanga kanawa kuhambakana kala mutu. Yehova mwakafumisako ukalu wosena, nakuyanda nakulyonyinga chosena tuli nakumona makumbi ano. Kaha makumbi ano nawa, ali nakutukafwa kuzachisa jijila jize katweshi kuhasa kutachikizako. Eji kutuzakamanga nakutukinga nahalwola tweji kuhombanga.”—Samu 136:23.

Nganomu nahanjika Toru, kutachikiza ngwetu Kalunga kalinwomu afumiseko ukalu wosena tunakumona nakuhunda masoji osena kumeso avatu vosena, nachitukafwa tupwenga nalufwelelo lwakukola nakupwa natwamiso yamwaza makumbi ano. Pundu vene, tuli nakuyoyela mukaye kazala naukalu oloze tunahase kunganyala hakutuzakama kuli Kalunga.