NGE KUNASOLOKA UKALU, UNO MWEJI KULIHULISANGA NGWENU, ‘MWOMWO IKA OVE KALUNGA UNANGWECHELELA NGANA?’ KUTALA MWAPWILEKO MUUKALU UMWE UZE WAMILINGISHILE MUHUHWASANE NUMBA NGE KALUNGA AMIZAKAMA TAHI?

Pamo nayenu mweji kwivwanga ngana muze evwile Sheila, uze atwama muUnited States. Sheila vamulelelele mutanga yavaka-kwitava, kaha ambile ngwenyi: “Putu vene kuwinyike wami, ngwazangile Kalunga mwomwo apwa Tengi yetu. Oloze kangwapwile nausoko wamwaza naikiyeko. Ngwashinganyekelenga ngwami kanguhakile manganako. Kaha nawa, kangwejivile nge Kalunga anguhungile chipwe kunguzakamako.” Mwomwo ika Sheila ahuhwasanyinyinenga? Ambile ngwenyi: “Twamwenenga ukalu wakulisezaseza mutanga yetu uze walikavasanyinenga, kahechi chasolokele nge Kalunga kapwile nakutukafwako.”

Ngana mwaSheila, nayenu munahase kufwelela chikupu ngwenu Kalunga wangolo josena kwatwama. Chipwe ngocho, munahase kuhuhwasana numba nge amizakama nyi chiku. Lunga wakwoloka Yopa uze afwelelele chikuma Tengi naikiye nawa ahuhwasanyinenga. (Yopa 2:3; 9:4) Omu Yopa amwenenga ukalu uze walikavasanyinenga ahulishile Kalunga ngwenyi: “Ikaze uli nakuliswekela kuli ami nakungumona nge ngumuka-kole wove?”—Yopa 13:24.

Jino vyuma muka yahanjika Mbimbiliya? Kutala twatela kuhana Kalunga mulonga nge tunakumona ukalu waunene tahi? Uno kuli unjiho wakusolola nge Kalunga azakama vatu vosena nakuzakama mutu himutu tahi? Kutala etu vatu tunahase kufwelela chikupu ngwetu Kalunga eji kutumonanga, nakututachikiza kanawa, nakututetela chipwe kutukafwa nge tunakumona ukalu tahi?

Muvihande vinakavangizaho, natulinangula omu vyuma vyakutenga vyeji kutukafwanga tutachikize ngwetu Kalunga atuzakama. (Wavaka-Loma 1:20) Kufumaho, natukekesa tuwane ovyo yahanjika Mbimbiliya kutalisa kujila eji kutuzakaminangamo Kalunga. Omu ‘natutachikiza’ kanawa Kalunga kuhichila muvyuma vyakutenga naMazu enyi, kaha natufwelela chikupu ngwetu ‘atuzakama.’—WaYowano 1, 2:3; WaPetulu 1, 5:7.