Achishinganyekenu hakulikata chavapasa vaze valifwana chikuma. * Vapasa kana valizanga chikuma. Nancy Segal uze apwa pasa kaha nawa mukulwane waliuka lyaTwin Studies Center lize lyatala omu vayoya vapasa, ambile ngwenyi: “Vapasa vamwe vatachikiza kanawa vyuma ali nakusaka pasa mukwavo chakuzeneka kuvalwezavyo.” Pwevo umwe uze apwa pasa, alumbunwine kanawa omu alikata napasa mukwavo ngwenyi: “Ami napasa mukwetu twalitachikiza kanawa muvyuma vyosena.”

Vyuma muka vyalingisa vapasa valitachikize kanawa? Numba tuhu vaka-kuhehwojola vawana ngwavo, chihela namujila navalelelamo vapasa vinahase kuvalingisa vapwenga navishinganyeka vyovimwe, oloze maselusi akulifwana vatwama nawo akiko eji kuvalingisanga valitachikize chikuma.

SHINGANYEKENU HACHUMECHI: Tengi uze atutengele ikiye atachikiza kanawa omu twapwa mutu himutu kuhambakana kala mutu. Shikaho, muka-kwimba jisamu Ndavichi ambile ngwenyi: “Wanguswekele mujimo lyamama. Omu wangutengele kupenge. . . . vifuwa vyami kavyaswamine kumeso oveko. Meso ove angumwene shimbu ngwapwile ngumuvisu. Vihanda vyami vyosena wavisonekele mumukanda wove.” (Samu 139:13, 15, 16) Kalunga ikiye kaha atachikiza kanawa maselusi azachishile hakututenga, atachikiza navyuma tunahichimo mukuyoya chetu vize vinalumuna vilinga vyetu. Hakuwana nge Kalunga atachikiza kanawa omu atutenga, ngocho twatela kufwelela chikupu ngwetu atachikiza vyuma vyosena hali etu.

Ndavichi alombele ngwenyi: “Ove Yehova, unanguhehwojola, kaha unangutachikiza. Ove weji kutachikizanga omu nangutwama nomu nangukatuka. Weji kumonanga vishinganyeka vyami numba nge uli hahasuku. Ove Yehova, shimbu kanda lilimi lyami lihanjike, ove unatachikiza lyehi mazu nanguhanjika.” (Samu 139:1, 2, 4) Tuyokutuyoku nawa, Yehova atachikiza vishinganyeka vyavatu nakutachikiza nawa “vyuma vyosena veji kujinanga mumichima yavo.” (Mijimbu 1, 28:9; Samwele 1, 16:6, 7) Uno eji jivesi jasolola ngachilihi omu apwa Kalunga?

Numba tuhu katweshi kuhasa kutufula mazu osena ali mumichima yetu mukulombako, oloze Tengi yetu eji kumonanga vyuma vyosena tweji kulinganga, nakutachikiza ovyo tunalingila vyuma kana. Chipwe ngocho, atachikiza vyuma vyamwaza tuli nakufwila kulinga, numba nge chiyoyelo chetu chinahase kutuhonesa kulinga vyuma kana. Chikupu vene, Kalunga atutengele namuchima wakusolola zangi, ngocho atachikiza kanawa vishinganyeka vyetu, novyo tweji kulingilanga vyuma vimwe.—WaYowano 1, 4:7-10.

 Mazu aKalunga atufwelelesa ngwawo:

• “Meso aYehova eji kutalanga vaka-kwoloka, matwitwi enyi eji kwivwililanga kukulembelela chavo.”—WAPETULU 1, 3:12.

• Kalunga ashika ngwenyi: “Nangukuhana kunangakana nakukulweza jila watela kutambukamo. Nangukulweza mangana oku nguli nakukutala.”—SAMU 32:8.

Uno kwijiva ngwetu Kalunga atachikiza kanawa ukalu wetu wosena nomu eji kwivwanga chinahase kutukafwa tupwenga vakumika tahi? Achishinganyekenu havyuma vyasolokele kuli Anna wakuNigeria uze ambile ngwenyi: “Ngwahuhwasanyinenga numba nge kuyoya chapwa chachilemu mwomwo yaukalu uze ngwapwile nakuhitamo. Hakuwana nge ngwapwile ngutuliwe kaha nawa ngwavijishilenga mwanami wapwevo muchipatela uze apwile namusongo wameya kuwongo vavuluka ngwavo hydrocephalus. Kufumaho, ami nawa vanguwanyine namusongo wakasa yakumavele, kaha vangupulile nakunguhakanga mulikina lyakwocha tututu vakasa. Changukaluhwilile chikuma, ami nguli muchipatela oku nguzakame mwanami apwile nakuviza.”

Vyuma muka vyakafwile Anna omike? Ambile ngwenyi: “Ngwashinganyekelenga havyuma yahanjika Mbimbiliya. Mukanda Wavaka-Fwilipi 4:6, 7 wamba ngwawo, ‘kuunda chaKalunga chize chahambakana kunangakana chosena nachikinga michima yenu navishinganyeka vyenu.’ Kala lwola ngwashinganyekelenga hali echi chisoneka, changukafwilenga ngupandame chikuma kuli Yehova, hakwijiva ngwami, Yehova angutachikiza kanawa kuhambana muze ngwalitachikiza ami yivene. Kaha vandumbwami muchikungulwilo vejilenga nakungukolezeza chikuma.

“Numba tuhu kangwalikangula kanawa kumujimbako, oloze misongo yami neyi yamwanami yinakeheko. Hakuwana nge Yehova natukafwenga shimbu yosena, ngocho katwalizakamina chikuma nge tuli muukaluko. Mukanda WaYakova 5:11 watwama namazu akutukolezeza, akwamba ngwavo: ‘Vaze vanakakachila twavamona kupwa vakuwahilila. Enu mwevwa lyehi lukakachila lwaYopa, kaha munamono omu Yehova alingile hakukuminyina ngwenu, Yehova atwama nazangi chikuma, [chipwe “wakeke chikuma,” kwinyikila chamwishi] apwa muka-kutetela.’” Yehova atachikijile kanawa ukalu apwile nakuhitamo Yopa, kaha nayetu tunejiva chikupu vene ngwetu Yehova atachikiza kanawa kala ukalu tuli nakumona.