LUZIA ATENGUKA LIHINJI LYACHIMOSWE. Omu Luzia apwile kanyike wamundende chikuma aputukile kuviza musongo wakalepa, uze weji kwenyekanga mishisa mumujimba. Omu Luzia ahetesele myaka 16, pwevo umwe uze azachilililenga amulwezele ngwenyi: “Kalunga ikiye akuzangamishile namusongo wakalepa mwomwo walikangilenga kuli visemi jove.” Numba tuhu mwahichile myaka yayivulu kufuma haze Luzia vamulwezele mazu kana, oloze apwile lika nakwanuka omu evwile kupihya.

OMU DAMARIS ATACHIKIJILE NGWENYI ALI NAMUSONGO WAKASA YAKUWONGO, ise amwambile ngwenyi: “Vyuma muka unalingi numba ou musongo ukukwate? Pamo walinganga vyuma vimwe vyavipi chikuma. Shikaho, Kalunga anakukuzangamishila namusongo kana.” Mazu amwambile ise amwivwishile kupihya chikuma.

Vishinganyeka vyakwamba ngwavo misongo yapwa hijila yize Kalunga eji kuzangamishilangamo vatu vyafuma hahasuku chikuma. Mukanda waManners and Customs of Bible Lands wamba ngwawo, halwola ayoyelenga Kulishitu hano hamavu, vatu vashinganyekelenga ngwavo “misongo yakwachilenga mutu mwomwo yashili alingile yivene chipwe shili alingile kausoko kenyi. Kaha eyi misongo, yapwilenga hijila yakuzangamishilamo mutu kuli Kalunga.” Mukanda waMedieval Medicine and the Plague wamba ngwawo, kushikulu “vatu vamwe vashinganyekelenga ngwavo Kalunga anehelenga vipupu hali vatu mangana avazangamise mwomwo yajishili javo.” Omu vatu vavavulu vafwile mulikulukaji lyamyaka lyakusokesa 14 muEurope, kutala Kalunga ikiye avajihile mangana avazangamise nyi? Uno musongo kana wejile mwomwo yatututu, ngana muze vawana vaka-kuhehwojola tahi? Vatu vamwe vanahase kuhulisa ngwavo, uno Kalunga eji kuzachisanga misongo mangana azangamise vatu mwomwo yajishili javo tahi? *

SHINGANYEKENU HACHUMECHI: Mwomwo ika Yesu okililenga vatu misongo kachi nge yafumine kuli Kalunga mangana avazangamise? Uno kulinga ngocho, kachi kachapwile kulikanga kuchiyulo chaYehova chakwolokako nyi? (Mateu 4:23, 24) Yesu keshi kuhasa kuhonesa vyuma mwasaka kulinga Kalungako. Yesu ambile ngwenyi: “Ngweji kulinganga vyuma vyakumwivwisa [Kalunga] kuwaha.” Kaha nawa ngwenyi: “Nguli nakulinga nge muze angulwezele Tata.”—Yowano 8:29; 14:31.

Mbimbiliya yinalumbununa kanawa ngwayo, Yehova Kalunga “keshi kuhengesa chiyuloko.” (Lushimbi lwamuchivali 32:4) Chakutalilaho, Kalunga keshi kuhasa kulingisa ndeke yipwenga muponde nakujiha vatu vavavulu mwomwo yakusaka kuzangamisa mutu umwe kahako. Apalahama uze apwile ngamba yaKalunga wakushishika, ambile ngwenyi Kalunga keshi kuhasa kunongesa “vaka-kuhuka navaka-kwoloka hamwe[ko].” Kaha ambile ngwenyi Kalunga keshi kuhasa “kulinga ngochoko.” (Kuputuka 18:23, 25) Mbimbiliya ngwayo: “Kalunga keshi kuhasa kulinga mwakuhengako,” kaha keshi kuhasa ‘kulinga vyuma vyavipiko.’—Yopa 34:10-12.

Kuyanda tweji kumonanga kachapwa hijila yakutuzangamishilamo mwomwo yajishili jetuko. Yesu ahanjikile hatoma hachihande kanechi omu ikiye natumbaji twenyi vamwene lunga umwe uze asemukile kapuputa. Omu “Tumbaji twenyi vamwihwile ngwavo: “Ove Lapi, iya alingile shili numba ou mutu asemuke kapuputa, ivene tahi, nyi visemi jenyi?” Yesu akumbulwile ngwenyi: “Ou mutu kalingile shiliko, chipwe visemi jenyi vene kavalingile shiliko, oloze chapwile ngocho mangana milimo yaKalunga yisoloke kuhichila muli ikiye.”—Yowano 9:1-3.

Chasoloka nge tumbaji twaYesu valikomokelele chikuma omu avalwezele ngwenyi ou lunga kalingile shiliko, chipwe visemi jenyi nawa kavalingile shili yakumulingisa  asemuke kapuputako. Yesu okile uze lunga apwile kapuputa, kahechi chakafwile vatu vatachikize ngwavo kuyanda kachapwa kuzangamisa chakufuma kuli Kalungako. (Yowano 9:6, 7) Shikaho, muchano kanou unahase kuvendejeka vatu vaze vanakuviza misongo yakutekeleka vatachikize ngwavo Kalunga keshi ikiye eji kunehanga kuyandako.

Mazu aKalunga atufwelelesa ngwawo:

• “Kalunga kaveshi kumweseka navyuma vyavipiko, kaha ikiye nawa keshi kweseka mutu naumweko.” (WAYAKOVA 1:13) Chikupu vene ‘vyuma vyavipi’ vinasolokelanga vatu hamyaka yayivulu vyakufwana nge misongo, nakukola nakufwa kalinwomu vavifumiseko.

• Yesu Kulishitu “okile vosena vaze vapwile nakuviza.” (MATEU 8:16) Omu Yesu okilenga vaveji vaze vayilenga kuli ikiye asolwele hatoma vyuma naukatesamo Wangana waKalunga.

• “[Kalunga] mwakahunda masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako. Vyuma vyakulivanga vinafumuko lyehi.”—KUSOLOKA 21:3-5.

Mwomwo ika vatu veji kuyanjilanga? Vatu vavavulu vanashinganyekanga hali echi chihula hamyaka yayivulu. Nge Kalunga keshi ikiye eji kunehanga kuyandako, kaha iya twatela kuhana mulonga? Chihande chinakavangizaho chinakumbulula vihula kanevi.