Uno Kupwa naMuchima Wamwaza Chinahase Kumilingisa Mukapwe naChiyoyelo Chamwaza Tahi?
Hamyaka yayivulu, vatu vavavulu vanashinganyekanga ngwavo kupwa namuchima wamwaza nachilingisa mutu akapwe nachiyoyelo chamwaza. Vatu vaKumututuko vetavila mazu ahanjikile muka-kunangula Mangana autu Confucius (551-479 B.C.E.). Ambile ngwenyi “Mweshomwo kawasaka vakwenu vakulingeko kanda nauvalingamoko.” *
CHUMA VAFWILA VAVAVULU
Vatu vavavulu vafwelela ngwavo, kupwa namuchima wamwaza nachivakafwa vakapwe nachiyoyelo chamwaza. Veji kuvumbikanga vakwavo, nakupwa namuchima wamwaza, nakumona ngwavo vatu vosena vavalemu nakupwa nachivezu chamwaza. Linh pwevo wakuVietnam ambile ngwenyi “Ngwashinganyekelenga ngwami nge nangupwa wakushishika, kaha nangupwa nachiyoyelo chamwaza.”
Veka nawa veji kulinganga vyuma vyamwaza mwomwo yavyuma vavanangula mukwitava chavo. Hsu-Yun lunga umwe wakuTaiwan ambile ngwenyi, “Vangunangwilenga ngwavo nge mutu wavilinga vyamwaza nafu, mwapwa nachiyoyelo chamwaza haya myaka, oloze nge mwapwa navilinga vyavipi kaha navamuyekelesanga mukakahya.
VYUMA MUKA VINAFUMUMO?
Chikupu vene, kulingila vakwetu vyuma vyamwaza cheji kunehanga vyuma vyamwaza. Chipwe ngocho, vatu vavavulu vaze veji kulingilanga vakwavo vyuma vyamwaza, vawana ngwavo kavavula kuvalinga mwamwaza kuli vakwavoko. Shiu Ping wakuHong Kong ambile ngwenyi “Ngunamono ngwami vaze veji kulingilanga vakwavo vyuma vyamwaza, vyuma kavyavawahila lwola lwosenako. Ngwakilikichilenga nguzakame tanga yami, nakupwa navilinga vyamwaza oloze ulo wami wafwile kaha nawa ngwalelelenga mwanetu ukawami.”
Vatu vavavulu vawana ngwavo keshi nge vaka-kwitava vosena vatwama navilinga vyamwazako. Etsuko pwevo umwe wakuJapan ambile ngwenyi, “Ngwengilile muliuka limwe lyakwitava kaha ngwatetekelelenga milimo yavakweze. Oloze ngwalikomokelele chikuma mwomwo vatu vapwile navilinga vyavipi, nakulizungilila vihela nakwiva jimbongo jaliuka.”
“Ngwakilikichilenga nguzakame tanga yami, nakupwa navilinga vyamwaza oloze ulo wami wafwile kaha nawa ngwalelelenga mwanetu ukawami.”—SHIU PING, HONG KONG
Vatu vamwe vaze veji kuzatanga nangolo vapwenga navilinga vyamwaza, veji kwivwanga kukola kumuchima nge vyuma vyavipi vinavasolokela. Omu mukiko evwile Van pwevo umwe wakuVietnam, uze ambile ngwenyi, “Hakumbi hakumbi ngwalanjilenga mihako, najitemo, navyakulya nakuvihana kuli vakulu jami kupwa wana wakulumba, mwomwo ngwashinganyekelenga ngwami navakangukisula kulutwe. Chamokomoko navyuma vyamwaza ngwalingilenga hamyaka yayivulu, nakulumbila vakulu wana, lunga lyami avijile chikuma. Kufumaho mwanetu wapwevo uze apwile namyaka yakusemuka 20 afwile omu apwile nakutangila kulifuchi lyeka.”
Nge kupwa namuchima wamwaza kacheshi kukafwa mutu akapwe nachiyoyelo chamwazako, kaha vyeka vika navimukafwa? Hakusaka kukumbulula chihula kaha twatela kupendamina hachuma chamwenemwene chize nachikumbulula vihula vyetu nakutukafwa tukapwe nachiyoyelo chamwaza. Uno kulihi tunahase kuwana chuma kana?
^ par. 2 Nge muli nakusaka vyavivulu havyuma anangwilenga Confucius kaha talenu mukanda waMankind’s Search for God, kapetulu 7 palangalafu 31-35 uze vasoneka kuli Vinjiho jaYehova kaha nawa uli ha www.pr418.com.
Pamo Nauzanga Nawa
TONENU
Nangulenunga Vana Venu Vapwenga naVilinga Vyamwaza
Kunangula vana venu vilinga vyamwaza nachikavakafwa omu navakakola.
