Kafwe myaka 3,500 kunyima, Yehova Kalunga alwezele vaka-kumulemesa vyuma vatelele kulinga mangana vakapwe nachiyoyelo chamwaza. Ambile ngwenyi: “Ngunahake kuyoya nakufwa, najikisu navyangu kumeso enu. Sakulenuho kuyoya mangana enu navana venu muyoyenga.”—Lushimbi lwamuchivali 30:19.

Hakusaka vatu kana vakapwe nachiyoyelo chamwaza, vatelele kusakula kanawa vyakulinga. Omu mukiko chili namakumbi ano. Mbimbiliya yalumbununa vyuma atela kulinga mutu numba akapwe nachiyoyelo chamwaza. Yahanjika ngwayo: “Muzangenga Yehova Kalunga kenu, nakwivwilila mulizu lyenyi.”—Lushimbi lwamuchivali 30:20.

LINANGULENUNGA MBIMBILIYA: Hakusaka muzange Yehova, mwatela kuvangila kumutachikiza kuhichila mukutanga Mbimbiliya. Nge namulinga ngocho, kaha namumona ngwenu apwa Kalunga wazangi uze asaka kumilingila vyuma vyamwaza. Ali nakumilweza mulombenga kuli ikiye, “mwomwo amizakama.” (WaPetulu 1, 5:7) Mbimbiliya yamba ngwayo nge namukilikita mangana mupandame kuli ikiye, “kaha mwapandama kuli enu.”—WaYakova 4:8.

LINGENUNGA VYUMA NAMULINANGULA: Kwivwilila kuli Kalunga chalumbununa kukavangiza vyuma atulweza muMbimbiliya. Nge namulinga ngocho, ‘kaha namufukisanga jila yenu nakulinganga mwakwoloka.’—Yoshuwa 1:8.