Vatu vavavulu vashinganyeka ngwavo vaze vatanga navaka-luheto vatwama nachiyoyelo chamwaza. Vashinganyeka nawa ngwavo nge mutu mwaya kuyunivesiti kaha mwapwa muka-kuzata wakwipangweji, nakumufwelela mutanga nakupwa mutu wamwenemwene mulifuchi. Vashinganyeka nawa ngwavo kutanga mashikola ahelu, chinahase kulingisa mutu engile milimo yajimbongo jajivulu kaha nawa ngwavo kupwa najimbongo jajivulu cheji kunehanga kuwahilila.

Zhang Chen wakuChina ambile ngwenyi, “Ngwasakilenga kupwa nandingili yahayunivesiti mangana nguhone kupwa nguchihutu. Ngwamwene ngwami kwingila milimo yajimbongo jajivulu, nachingulingisa ngupwenga wakuwahilila mukuyoya chami nakupwa wakusuuluka.”

Vatu vavavulu veji kuyanga kujiyunivesiti jize jaya chikuma puho, pamo nakumafuchi eka mangana ngwavo vakapwe nachiyoyelo chamwaza. Oholyapwa vatu kaveshi nakuya chikuma nakutangila kumafuchi ekako mwomwo yamusongo waCOVID-19. Mu 2012 lipoti lyakufuma kuliuka lyaOrganisation for Economic Co-operation and Development lyambile ngwalyo: “Vatu vavavulu vaze veji kutangilanga mashikola kumafuchi eka vapwa vakuAsia.”

Visemi veji kuzatanga nangolo mangana vana vavo vayenga kujiyunivesiti jakumafuchi eka. Qixiang wakuTaiwan ambile ngwenyi: “Numba tuhu visemi jami kavapwile mahandoko, oloze vatutumine etu vana vavo tuvosena tuvawana kuUnited States, kushikola yakulinangula milimo.” Hakusaka eyi tanga yifwetele mashikola kana, yengilile mumukuli waunene ngana mwajitanga jeka.

Kutanga shikola chinahase kulingisa chiyoyelo chiwahe mujijila jimwe. Oloze lwola lumwe kachanehela vaze veji kuyanga kumashikola vyuma vatalililako. Chakutalilaho, chamokomoko nakuzata nangolo hamyaka yayivulu nakukongola jimbongo jakufwetela kumashikola, vavavulu kavawana milimo yize vapwile nakusakako. Rachel Mui ahanjikile mulipapilo lyamijimbu lyakuSingapore lyakwamba ngwavo Business Times ngwenyi: “Vatu vaze vali nakukumisa jiyunivesiti nakuhona kuwana milimo vali nakuvulilako.” Jianjie, wakuTaiwan uze atwama namapapilo amavulu akuyunivesiti ahanjikile ngwenyi, “Vatu vavavulu veji kuyanga kuyunivesiti kavawana milimo yize vakalinangwile kuzeko.”

Kaha nawa chiyoyelo chavaze vawana milimo yize valinangwile kuyunivesiti kachapwa nganomu vasakile chipwengako. Omu Niran wakuThailand afumine kuyunivesiti yakuUnited Kingdom awanyine milimo yize akalinangwile. Ambile ngwenyi, “Lipapilo ngwafumine nalyo kuyunivesiti lyangukafwile nguwane milimo yajimbongo jajivulu ngana muze ngwasakile. Chipwe ngocho, ngwatelelele kuzatanga chikuma kaha nawa hajiola jajivulu. Kutwala muze, kapani yafumishile vaka-kuzata vavavulu hamilimo kuhakilako vene nayami. Ngwamwene jino ngwami kakweshi milimo yinahase kukafwa mutu akapwe nachiyoyelo chamwaza kulutweko.”

Navatu vaze vatwama najimbongo jajivulu nakusoloka nge vali nachiyoyelo chamwaza, vatwama naukalu mutanga nakuvizaviza, nakulizakamina hajimbongo. Katsutoshi wakuJapan, ambile ngwenyi, “Ngwapwilenga najimbongo jajivulu oloze kangwapwilenga wakuwahililako, mwomwo vakwetu vangwivwililenga lwiso nakungulisa nachipekete.” Lam pwevo uze atwama muVietnam ambile ngwenyi, “Ngweji kumonanga vatu vaze veji kukilikitanga mangana vapwenga najimbongo jajivulu, mwomwo yakushinganyeka ngwavo navapwa nachiyoyelo chamwaza. Oloze kakavulu veji kulizakaminanga nakuviza nakuhomba chikuma.”

Ngana mwaFranklin, vatu vavavulu vamona ngwavo kwatwama vyuma vyeka vyavilemu keshi kutanga shikola yahelu nakupwa naluheto kahako. Muchishishisa chakufwila luheto, vatu vamwe veji kufwilanga kukapwa nachiyoyelo chamwaza, hakupwa namuchima wamwaza nakukafwa vakwavo. Uno kulinga vyuma kana nachikafwa mutu akapwe nachiyoyelo chamwaza tahi? Chihula kana navachikumbulula muchihande chanakavangizaho.