Uno Chiyoyelo Chenu chaKulutwe Chapendamina Haka?
Vatu vavavulu vafwelela ngwavo nge mutu atwama naluvinda, kaha keshi kukapwa nachiyoyelo chamwazako. Echi chavalingisa valinge vyuma vize vamona ngwavo navivanehela kutokwa.
VYUMA VAFWELELA VATU VAVAVULU
KUTAHISA VATANGANYIKA: Vatu vamwe vafwelela ngwavo jila vapwile nakusolokelamo vatanganyika halwola vasemukile, yikiko nayikavalingisa vakapwe nachiyoyelo chamwaza chipwe chiku. Shikaho veji kuzachisanga vatanganyika mangana vatachikize vyuma navikavasolokela kulutwe, nakulihenda kuukalu, chipwe kupwa vakufukila.
KUTAHA: Veka nawa vafwelela ngwavo nge navaya nakutaha kaha navatachikiza ocho chili nakulingisa vyuma vimwe vivasolokele, navyuma vatela kulinga. Vashinganyeka ngwavo hakusaka vafukile mukuyoya chavo, vatela kupwa navitumbo vize navivanehela kutokwa. Lo Wing, * wamuHong Kong ambile ngwenyi, “Muka-kutaha umwe angulwezele ngwenyi nge nanguhaka vitumbo vyatambikila muchitanda chami, kaha nangupwa najimbongo jajivulu.”
KULEMESA VAKULU: Vakwavo nawa vafwelela ngwavo vatela kusuulwisa vakulu chipwe tulunga mangana vavakinge nakuvakisula. Van wakuVietnam, ambile ngwenyi, “Ngwafwelelele ngwami nge nangusuulwisanga vakulu, kaha nangupwa nachiyoyelo chamwaza oholyapwa nakulutwe hamwe navana vami.”
KUFWA NAKUSEMUKILA MUCHUMA CHEKA: Vatu vavavulu vafwelela ngwavo nge mutu nafu, mwatwalaho lika kusemukilanga muvyuma vyeka. Vafwelela ngwavo kuwaha nakupihya veji kumonanga chapendamina havyuma valingile omu vapwile nakuyoyela muchuma cheka.
Numba tuhu vatu vavavulu kavafwelela muvyuma kanako, olozenyi veji kutahanga kuzachisa mifunda yamumavoko, nakuzachisa vatanganyika nakulinga vyuma vyeka vyangana. Vashinganyeka ngwavo vyuma kana vinahase kuvakafwa vatachikize chiyoyelo chavo chakulutwe.
VYUMA MUKA VINAFUMUMO?
Uno vaze vafwelela vyuma kana vali nachiyoyelo chamwaza oholyapwa nakukayoya kanawa kulutwe tahi?
Ivwenu vyuma ahanjikile Hào wakuVietnam. Atahishilenga vatanganyika nakutaha nakulemesa vakulu mangana vamutwaminyine. Uno afukililile mukuyoya chenyi tahi? Ambile ngwenyi, “Jimbongo jangukumine, ngwengilile mumukuli, nakupwa navikokojola mutanga, kaha ngwahombele chikuma.”
Qiuming wakuTaiwan nawa afwelelele mukutahisa vatanganyika, namukufwa nakusemukila muchuma cheka, namuluvinda nakutokwa, namukutaha kaha nawa alemeselenga vakulu. Omu akekesele vyuma afwelelele ambile ngwenyi: “Ngwamwene jino ngwami vyuma kana vyalimbalaka, kaha nawa vika-kuhungumwisa. Ngwamwene jino ngwami vyuma veji kutahanga vaka-kuzachisa vatanganyika kavyapwa vyamuchanoko. Kaha nawa, nge mutu eji kufwanga nakusemukila muchuma cheka, jino mwahasa ngachilihi kulingisa chiyoyelo chenyi chipwenga chamwaza okunyi katachikijile omwo chapwile chiyoyelo chenyi hakavangako?”
“Ngwamwene jino ngwami vyuma kana vyalimbalaka, kaha nawa vika-kuhungumwisa.”—QIUMING, TAIWAN
Ngana muze nalinangula Hào, naQiuming navatu veka, nayetu katweshi kuhasa kutachikiza chiyoyelo chetu chakulutwe hakutahisa vatanganyika nakulemesa vakulu nakufwelela mukufwa nakusemukila muchuma cheka chipwe luvinda nakutokwako. Uno echi chalumbununa nge katweshi kuhasa kulinga vyuma vyakutukafwa tukapwe nachiyoyelo chamwazako tahi?
Vatu vavavulu vamona ngwavo hakusaka vakapwe nachiyoyelo chamwaza, vatela kuya kumashikola ahelu nakupwa naluheto. Uno vyuma muka vinafumumo omu vatu vanasakulanga kulinga vyuma kana?
^ par. 5 Majina ali muchihande chino namuvihande vyeka navikavangizaho, vanawalumuna.
^ par. 16 Mazu kana atwama muMukanda waKalunga, hali Wavaka-Ngalesha 6:7. Chishina kana vachizachisa nawa kuli vatu vakumututuko waAsia ngwavo, Nge unatumbu mahapwa, naukaha nawa mahapwa. Nge unatumbu makunde, naukaha nawa makunde.
Pamo Nauzanga Nawa
KAPOSHI KAKUTALILA
Kuzachisa Vatanganyika Nakulyongela Upolofweto—Kumwena Chimweza vyaKulutwe
Kutala mwafwelela eji jijila jakutachikijilamo vyuma vyakulutwe tahi?
KAPOSHI KAKUTALILA
Vyuma Yahanjika Mbimbiliya Kutalisa kuKuyoya nakuKufwa
Uno kweji kupwanga vihanda vimwe vize vyeji kutwalangaho lika kuyoya nge tunafu tahi? Uno twatwama namwono uze kawafwako tahi? Vafu vali kulihi?
