CHIHANDE CHACHINENE | OMU YAYOVOKELE MBIMBILIYA
Mbimbiliya Yayovokele haKuhona Kupola
UKALU WAPWILEHO: Vaka-kusoneka Mbimbiliya navaka-kunungulula mazu vazachishilenga chikuma mateve namalambu hakusoneka mazu aKalunga. (WaChimoteu 2, 4:13) Vyuma kanevi vazachishile vyahakile ngachilihi Mbimbiliya muponde?
Mateve eji kusanyukanga kaha nawa eji kufumanga ulombo nakuliwa washi. Malunga valinangula vyakushikulu vaRichard Parkinson naStephen Quirke vambile ngwavo: “Mukuhita chalwola, mateve eji kupolanga nakusala kaha visasa. Mukanda wakuvunga wamateve nge naupwa nachikekeshi weji kukwatanga mbundu, kaha vanahase kuulya kumakenyi chikumanyi nge unavumbama mumavu.” Mikanda yimwe yamateve yize vawanyine vayisezelenga hamusana, kaha kuheta naufuku yawililile chikekeshi nalyume, kahechi chalingishile yipole washi.
Mikanda yamalambu yapwa yakukola kuhambakana yamateve, oloze nayikiko yeji kulyenyekanga nge kavayilamine kanawako chipwe nge nayipwa nachikekeshi chipwe kuyilamina muchihela muze munazumu chikuma. * Malambu nawa veji kuwalendanga kutututu. Echi chikiko chalingisa mikanda yakushikulu yayivulu yihone kuheta nakulelo lino. Nge Mbimbiliya yapolele, kaha namijimbu yosena yatwamamo kachi yanonga.
OMU YAYOVOKELE MBIMBILIYA: Kweseka naJishimbi javaYuleya, mwangana himwangana atelele ‘kunungulula Jishimbi’ jamumikanda yatete yitanu yamuMbimbiliya. (Lushimbi lwamuchivali 17:18) Kaha nawa vaka-kunungulula mazu vaze vapwa vasachitetahundu vanungulwile mazu mumikanda yayivulu, ngocho kuheta mulikulukaji lyamyaka lyakulivanga C.E., Visoneka vyamuMbimbiliya vyapwilenga mujisunangonga jamuIsalele josena nakuMasetonya. (Luka 4:16, 17; Vilinga 17:11) Uno jimanyusikilipiti jimwe jakushikulu jayovokele ngachilihi numba jihete nakulelo lino?
Jimanyusikilipiti jakushikulu vavuluka ngwavo Dead Sea Scrolls jayovokele makulukaji amyaka yayivulu mumilondo yize yapwile mumena akusendeveka mumakundu
Mutu alinangula chikuma vyaTesetamende Yayihya, Philip W. Comfort ambile ngwenyi: “VaYuleya vatulikililenga mikanda yakuvunga yaVisoneka mumilondo kuchina nayilyenyeka.” Chasoloka nge navaka-Kulishitu vatwalilileho lika kuzachisa jila kaneyi. Ngachize, jimanyusikilipiti jimwe jaMbimbiliya vajiwanyine mumilondo namutupete twatundende, namumena akusendeveka namumakundu.
VYUMA VYAFUMINEMO: Makombakaji avihanda vyaMbimbiliya vinayovoka nakuheta kulelo lino numba tuhu munahichi myaka yakuhambakana ha 2,000. Kakweshi mikanda yeka yakushikulu yikwechi jimanyusikilipiti jajivulu ngana mwaMbimbiliyako.
^ par. 5 Chakutalilaho, mukanda wafulumende wa United States Declaration of Independence vausonekele halilambu. Mukanda kanou unafuvalala jino numba tuhu kawahetele mumyaka 250 koko.
Pamo Nauzanga Nawa
KAPOSHI KAKUTALILA
Kuwana Chuma Chachilemu chaKushikulu haMulumba waSwali
Kachihanda kaMujimbu Wamwaza waYowano kakiko kanashimbula chikuma hajimanyusikilipiti jaVisoneka VyachiHelase vyaVaka-Kulishitu jize vanawanenga.
