KUTALA mwalivuluka kupwa vaka-Kulishitu tahi? Nge mukiko kaha muli hamukana wavatu vakuheta kujimbiliyoni jivali mukaye kosena, kafwe havatu vatatu mukaye kosena, umwe alivuluka kupwa muka-kukavangiza Kulishitu. Makumbi ano kuli mauka akwitava amavulu aze alivuluka kupwa avaka-Kulishitu oloze alihandununa muvyuma vafwelela nomu vashinganyeka vatu. Ngocho vyuma mwafwelela yenu vinahase kulihandununa navize vafwelela vakwenu vaze valivuluka kupwa vaka-Kulishitu. Uno chapwa chachilemu kukekesa vyuma mwafwelela tahi? Eyo, chikumanyi nge muli nakufwila kutachikiza vyuma vanangula muMbimbiliya kutalisa kuli vaka-Kulishitu.

Vaka-kukavangiza Yesu Kulishitu vakulivanga vavavulukilenga ngwavo “vaka-Kulishitu.” (Vilinga 11:26) Kavasakiwile kuvavuluka lijina lyeka lyakuvejivilahoko mwomwo vaka-Kulishitu vosena vafwelelele vyuma vyovimwe. Vaka-Kulishitu vakavangijilenga jindongi nakunangula chaYesu uze aputukile kwitava chavaka-Kulishitu. Nyi ngachilihi chachi yenu? Uno mwafwelela ngwenu muchachi yenu veji kunangulanga vyuma anangwilenga Kulishitu navize vafwelelele vaka-kukavangiza Kulishitu vakulivanga tahi? Munahase kutachikiza ngachilihi ngocho? Kuzachisa Mbimbiliya hijila yimwe yize nayimikafwa kutachikiza mwakukumbulwila vihula kanevi.

Achishinganyekenu hali echi: Yesu Kulishitu amwenenga Visoneka kupwa vyavilemu mwomwo hiMazu aKalunga. Ketavililenga vatu vaze vakanyine kunangula  vyuma yahanjika Mbimbiliya nakukakachila kuchisemwa chavoko. (Mako 7:9-13) Ngocho, tunahase kukukulula ngwetu vyuma vafwelela vaka-kukavangiza Yesu vamuchano vyapendamina haMbimbiliya. Ngachize, muka-Kulishitu atela kulihulisa ngwenyi, ‘Kutala vyuma veji kunangulanga kuchachi yami vyapendamina haMbimbiliya tahi?’ Hakusaka kukumbulula chihula kana, mwatela kwesekesa vyuma veji kunangulanga kuchachi yenu navize yahanjika Mbimbiliya.

Yesu ambile ngwenyi twatela kulemesa Kalunga mumuchano, kaha muchano kana watwama muMbimbiliya. (Yowano 4:24; 17:17) Kaposetolo Paulu ahanjikile ngwenyi kuyovoka chetu chapendamina hakupwa “nachinyingi chakwoloka chakutachikiza muchano.” (WaChimoteu 1, 2:4) Ngocho, chapwa chachilemu kumona ngwetu vyuma twafwelela vyapendamina hamuchano wamuMbimbiliya. Mwomwo ika? Mwomwo kuyovoka chetu chapendamina hamuchano kanou.

Tuli nakumilomba mutange vihula 6 vili muno muchihande navyuma yakumbulula Mbimbiliya havihula kanevi. Tangenu visoneka vyamuMbimbiliya vanavuluka nakushinganyeka havyuma vanakumbulula. Kaha lihulisenu jino ngwenu, ‘Kutala vyuma vanangula muchachi yami vinalitombola navyuma yahanjika Mbimbiliya tahi?’

Vihula kana navimikafwa mumone numba nge vyuma mwafwelela vyalitombola naMbimbiliya. Kutala muli nakufwila kukekesa navyuma vikwavo vanangula muliuka lyenu kuvyuma yahanjika Mbimbiliya tahi? Vinjiho jaYehova navawahilila chikuma kumikafwa mukekese kanawa muchano wamuMbimbiliya. Munahase kulweza Chinjiho chaYehova mangana mulinangulenga nenyi Mbimbiliya hawana wakanyombo, chipwe kuya hakeyala yetu ya jw.org.