Mbimbiliya yapwa mukanda wakulipwila hamikanda yosena yamukwitava. Kakweshi mukanda weka unakafwe vatu vavavulu hamyaka yayivulu nganako. Kaha nawa kakweshi mukanda weka vanakekesanga chikuma nakwimanyina nakole ngana mwaMbimbiliyako.

Chakutalilaho, vaka-kulinangula vamwe vanahuhwasana ngwavo jiMbimbiliya jiliko makumbi ano kajatwama namazu amumikanda yakulivangako. Mutu umwe uze alinangula chikuma vyamukwitava ambile ngwenyi: “Katwejiva kanawa nge chikupu vene mazu atwama muMbimbiliya twawalumwine kanawa kweseka namuze apwile mazu akulivangako. JiMbimbiliya tuli najo japwa jakulimbenja, kaha jajivulu vajitungile omu mwahichile makulukaji amyaka kufuma haze kwapwililile mazu akulivanga, ngocho jalihandununa chikuma namazu kana awa akulivanga.”

Vatu vamwe vahuhwasana numba nge Mbimbiliya yapwa yakwoloka mwomwo yavyuma vafwelela mukwitava chavo. Chakutalilaho, Faizal vamunangwile kuli vaka-tanga yenyi vaze kavapwile vaka-Kulishituko ngwavo Mbimbiliya yapwa mukanda wajila oloze vayalumuna mweka. Ambile ngwenyi: “Ngocho, kangwasakile vatu vahanjike nayami vihande vyamuMbimbiliyako. Mwomwo ngwatachikijile ngwami kavapwile naMbimbiliya yize vasonekele hakavangako. Kaha nawa vayalumuna.”

Numba nge Mbimbiliya yinalumuka chipwe nduma, kutala chatela kutulingisa tuhone kuyifwelela tahi? Achishinganyekenu havihula vino: Uno munahase kufwelela vyuma vyamwaza vashika muMbimbiliya vize navikasoloka kulutwe kachi nge kamwatachikijile ngwenu vavisonekele mumazu amumikanda yakulivangako nyi? (Wavaka-Loma 15:4) Kutala munahase kuzachisa jindongi jamuMbimbiliya hakusakula vyuma vyavilemu vyakulinga vyakufwana nge milimo, natanga, nakulemesa Kalunga nge jiMbimbiliya jamakumbi ano kajapwa jakwolokako?

Numba tuhu mikanda yamuMbimbiliya yize vasonekele hakavanga kayasolokako, oloze tunahase kuzachisa mikanda yakushikulu kuhakilako najimanyusikilipiti jamuMbimbiliya jajivulu jize jiliko makumbi ano. Uno jimanyusikilipiti kana jayovokele ngachilihi numba jihone kupola nakuhona nawa kujenyeka kuli vaka-kole, nakuhona cheka kujalumuna mujila yakuhenga? Uno kuyovoka chajimanyusikilipiti kachatela kumikafwa mufwelele Mbimbiliya muli nayo makumbi anoko nyi? Kekesenu kanawa omu vanakumbulula vihula kanevi muchihande chinakavangizaho.