CHIHANDE CHACHINENE | OMU YAYOVOKELE MBIMBILIYA
Ovyo Vinalingisa Mbimbiliya Yiyovoke
Mbimbiliya yinayovoka. Ngocho echi chikiko chinalingisa tupwenga nayo nakuyitanga makumbi ano. Nge namusakula Mbimbiliya yize valumuna mujila yakwoloka, kaha mwatela kufwelela chikupu ngwenu muli nakutanga mazu vasoneka aze apwile mumikanda yakulivanga. * Jino vyuma muka vyalingishile Mbimbiliya yiyovoke kukupola nakukuyifumbukila, nakukusaka kuhengesa mujimbu watwamamo? Vyuma muka vyalingisa mukanda kana upwenga wakulipwila?
“Ngunatachikiza jino ngwami Mbimbiliya eyi nguli nayo yapwa wana wakufuma kuli Kalunga”
Vaka-kulinangula Mbimbiliya vavavulu vakukulula ngana muze ahanjikile kaposetolo Paulu ngwenyi: “Visoneka vyosena vavihwima kuli Kalunga.” (WaChimoteu 2, 3:16) Vafwelela ngwavo Mbimbiliya yayovoka mwomwo yapwa Mazu aKalunga akulipwila kaha nawa Kalunga ivene nayilamenga nakuheta kulelo lino. Faizal, uze twavulukanga muchihande chatete mumangazini yino, asakile amone nge chikupu vene mukanda kana waKalunga, ngocho aputukile kulinangula Mbimbiliya. Vyuma awanyine vyamukomwesele chikuma. Kaha awanyine jino nge vyuma vyavivulu vize veji kunangulanga mukwitava chaKulishitendomu kavyatwama muMbimbiliyako. Kaha nawa awahililile chikuma havyuma awanyine muMazu aKalunga kupandama kuvyuma ajina Kalunga hakutenga Mavu.
Ambile ngwenyi: “Ngunatachikiza jino ngwami Mbimbiliya eyi nguli nayo yapwa wana wakufuma kuli Kalunga. Uno nge Kalunga ahashile kutenga vyuma vyosena, kutala mwahona kupwa nangolo jakutuhana mukanda nakutulaminawo tahi? Nge mutu mwahanjika ngocho, kaha ali nakumona ngolo jaKalunga kupwa jakukuminamo. Kahaze ami yami iya numba nguhanjike ngocho?”—Isaya 40:8.
^ par. 3 Talenu chihande chamuKaposhi Kakutalila waChingeleshi waMay 1, 2008 chakwamba ngwavo “How Can You Choose a Good Bible Translation?”
Pamo Nauzanga Nawa
KAPOSHI KAKUTALILA
Mwomwo Ika Mwatela Kwivwishisa Mbimbiliya?
Vatu vavavulu vamona Mbimbiliya kupwa yayilemu, oloze kavatachikiza omwo yinahase kuvanganyalisako.
ESSENTIAL BIBLE TEACHINGS
Uno Tunahase Kufwelela Ngachilihi Ngwetu Mbimbiliya Yapwa yaMuchano?
Kachi nge mwenya-Mbimbiliya apwa Kalunga, kaha yatela kulihandununa namikanda yeka yize vasoneka kuvatu.
