Seth * ambile ngwenyi, “Ami napuwami vatufumishile hamilimo halwola lwolumwe. Hamyaka yivali, twayoyelelele kaha hatumawana vatuhanyinenga kuli vausoko nahakuzata tumilimo twakuwayawaya. Echi chalingishile puwami Priscilla ahombe chikuma, nakungulingisa ngulivwe nge nguwamokomoko.

“Uno vyuma muka vyatukafwile? Puwami Priscilla anukilenga mazu aYesu ahali Mateu 6:34. Ambile ngwenyi katwatela kulizakamina vyalikumbi lyahameneko, mwomwo likumbi lyahamene lili navyalyo vyakulizakamina. Kaha nawa kulomba chamujikijishile chikuma. Ami nawa chisoneka chaSamu 55:22, changuvendejekele chikuma. Ngana mwamuka-kwimba jisamu, nayami ngwambilile chiteli chami hali Yehova, kaha ngwamwene omu anguzamikishile. Numba tuhu oholyapwa ngunawane milimo, oloze tuchili lika nakwashiwisako chiyoyelo chetu ngana muze ahanjikile Yesu hali Mateu 6:20-22. Chachinenenyi, tunapandama chikuma kuli Kalunga nakujikijisa ulo wetu.”

Jonathan ambile ngwenyi, “ngwalizakaminyine chikuma hachiyoyelo chetu omu kusekasana chetu chaholokele. Mwomwo yakuhona kulema chajimbongo, vyuma twazachililile hamyaka 20 vyayile muwoya. Echi chalingishile ami napuwami tuputuke kulikokojwesa hajimbongo. Katwahashilenga chipwe kulanda vyuma hamukuliko, mwomwo twevwilenga woma ngwetu navatukanyina.

“Oloze Mazu aKalunga nashipilitu yenyi vyatukafwile tusakule kanawa vyakulinga. Ngwetavililenga kuzata kala mulimo ngwawanyine, nakukehesako vyakulandalanda. Hakuwana nge twapwile tuVinjiho jaYehova, vandumbwetu nawa vatukafwilenga. Vatukolezezele chikuma tuhone kulimona kupwa tuvamokomoko kaha nawa vatuzakamine halwola twapwile muukalu.”

Raquel ambile ngwenyi, “omu lunga lyami angusezele, ngwevwile kukola kumuchima, kaha ngwahombele  chikuma. Oloze ngwapandamine lika kuli Kalunga, kaha anguvendejekele. Kuunda chaKalunga changukafwile chikuma omu ngwalombelenga kuli ikiye hakumbi hakumbi. Chasolokele nge angukafwile nguhone kulyonyinga mumuchima.

“Ngweji kusakwililanga nawa Mazu enyi Mbimbiliya aze anangukafwe nguhonese muchima wamatoto nakulundundu. Ngwakavangijile nawa mazu ahanjikile kaposetolo Paulu hali Wavaka-Loma 12:21 ngwawo: ‘Kanda namwechelela upi umifungululeko, oloze fungululenunga upi hakulinganga mwamwaza.’”

“Sepa lyami umwe uze ngwazangile chikuma angukafwile nguwane mwakulingila. Angutangilile chisoneka chaMuka-kwambulula 3:6, nakungulweza ngwenyi kwatwama lwola lwakumona vyuma nge ‘vinajimbala kunahu.’ Chapwile chachikalu kwitavila mazu kana, oloze mazu kana apwile amuchano. Oholyapwa ngunalitomena jino kulinga vyuma vyeka mukuyoya chami.”

Elizabeth ambile ngwenyi, “nge ulo wenu unafu, tachikizenu ngwenu muli nakusakiwa kumivendejeka. Ngwapwile nasepa lyami uze anguvendejekelenga hakumbi hakumbi. Nge nguli nakulila naikiye alililenga, nakunguvendejeka, nakungusolwela zangi. Chikupu vene ngunatachikiza ngwami Yehova azachishile ou sepa lyami anguvendejeke.”

Luis uze twavulukanga muchihande chakulivanga, aviza musongo wamuchima, kaha nasakenga kufwa mapapa kafwe kavali. Oholyapwa eji kuyoyelanga kulikina lyaoxygen hajola 16 hakumbi hakumbi. Ambile ngwenyi: “Ngweji kulombanga kuli Yehova lwola lwosena. Kaha nge ngunakumisa kulomba kuli Kalunga ngweji kupwanga nangolo mwomwo yashipilitu yenyi yize yeji kungujikijisanga. Kulomba cheji kungukafwanga ngumike muukalu mwomwo yakufwelela muli ikiye nakutachikiza ngwami eji kunguzakamanga.”

Petra uze ali namyaka yakusemuka yamuji 80 ambile ngwenyi, “Ngwasaka kuzata milimo yayivulu, oloze cheji kungukaluhwilanga. Ngweji kuhombanga hakutachikiza ngwami jingolo jami jinakukuma jino. Ngweji kuzeyanga chikuma nakuyoyela kaha havitumbo. Kakavulu ngweji kushinganyekanga hali Yesu uze alombele Ise ahonese vihuli vimwe, kweseka namwayile muchima waKalunga. Yehova ahanyine Yesu ngolo, ngocho nayami eji kunguhananga ngolo. Kulomba chapwa nge hivitumbo vyami vyahakumbi hakumbi. Ngweji kwivwanga kumuchima hwo nge ngunahanjika naKalunga.”—Mateu 26:39.

 Julian uze navijinga musongo waupi chikuma hamyaka 30, naikiye eji kwivwanga mwomumwe. Ambile ngwenyi: “Kangwahasa cheka kutwama muvitwamo vyamwazako, oloze ngweji kuzachisanga jino vitwamo vyakushindumuna. Chipwe ngocho, kuyoya chami chichili lika chachilemu mwomwo ngweji kukafwanga vatu. Kukafwa vatu cheji kukehesangako kuyanda chami kaha nawa Yehova eji kutujikijisanga nge tuli muukalu. Ngana mwakaposetolo Paulu, nangwamba ngwami: ‘Ngunajikiza muvyuma vyosena kuhichila muli ou eji kunguhananga ngolo.’”—Wavaka-Fwilipi 4:13.

Antonio ambile ngwenyi: “Omu tata afwile muponde, changukaluhwilile kwitavila ngwami nafu. Chapwile hiluvinda chikuma mwomwo apwile nakulihichila kwenyi mumukwakwa. Oloze kangwapwile nangolo havyuma vyasolokeleko. Shimbu kanda tata afwenga, apwile nakundoyoka makumbi atanu. Chipwe ngocho, omu ngwapwilenga hamwe namama kangwalililengako, oloze omu ngwapwilenga kwaukawami, ngwalililenga chikuma. Ngwalihulishilenga ngwami ‘Mwomwo ika? Mwomwo ika?’

“Halwola kanelu lwavihuli, ngwalombelenga kuli Yehova angukafwe ngupwenga navishinganyeka vyamwaza nakungukafwa ngupwenga wakuunda. Nakushimbula chiku ngwaputukile kuunda muchima. Ngwanukilenga nawa mazu amuMbimbiliya akwamba ngwavo ‘vyuma vyakwiza mukukasumuna’ vinahase kutuwana tuvosena. Hakuwana nge Kalunga keshi kwongako, ngunatachikiza ngwami nangukamona cheka tata omu nakukapwa kusanguka.”—Muka-kwambulula 9:11; Yowano 11:25; WaChituse 1:2.

Robert uze twavulukanga muchihande chamaputukilo, naikiye eji kushinganyekanga mwomumwe. Ambile ngwenyi: “Ami napuwami twaunjile muchima ngana muze vahanjika hali Wavaka-Fwilipi 4:6, 7. Kulomba kuli Yehova chikiko chatukafwile. Echi kuunda chatukafwile tulumbunwine kanawa vaka-kwazana mijimbu vyalutalililo twatwama nalwo kutalisa kukusanguka. Numba tuhu yize ndeke yaholokele nakujiha mwanetu, oloze tweji kwanukanga vyuma vyamwaza vize twalivwishilenga kuwaha omu apwile wamutonyi. Tweji kushinganyekanga chikuma havyuma kana.

“Omu vandumbwetu vatulwezele ngwavo vatumwene tuli nakulumbununa kanawa vyalufwelelo lwetu hachisaji chamivwimbimbi, twavalwezele ngwetu twahashile kumika mwomwo yakulomba chize vatulombelelengako vandumbwetu. Ngwafwelelele ngwami chikupu vene Yehova apwile nakutukafwa kuhichila mumazu akutukolezeza aze vatutuminyinenga vandumbwetu.”

Nganomu tunamono muvyakutalilaho evi, Kalunga nahase kuvendejeka vatu vaze vali nakuhita muvihuli naukalu wauvulu. Nyi ngachilihi yenu? Chamokomoko nakala ukalu namumona mukuyoya chenu, munahase kuwana kuvendejeka chize nachihasa kumikafwa mumike muukalu. * Ngocho mwatela kulomba Yehova amikafwe. Mwomwo apwa “Kalunga muka-kuvendejeka chosena.”—Wavaka-Kolinde 2, 1:3.