Kutala muli nakwanuka lwola mwalimbukile omu mwapwile muvanyike tahi? Pamo mwalitwile mbandu halivoko chipwe kulipwesula mumambuli. Kutala munakwanuka omu chisemi chenu wapwevo amivendejekele tahi? Pamo amikosele hambandu nakukasaho lihina. Omu mwalilile, amivendejekele namazu amwaza nakumipakata mukasamba. Kahechi chamilingishile mwivwengako kanawa. Halwola kana, amivendejekele chikupu.

Oloze omu tweji kuyanga nakukola, kuyoya cheji kukaluhwanga. Ukalu weji kutohwelangako lika, kaha cheji kupwanga chachikalu kuwana mutu wakutuvendejeka. Chaluvinda ukalu veji kumonanga vakulwane kaweshi kuhasa kukuma hakuvakasa lihina hambandu chipwe kuvapakata mukasamba kuli chisemi chavo wapwevoko. Achitalenu vyakutalilaho vino.

• Kutala mwatachikiza omu mutu eji kwivwanga nge vanamufumisa hamilimo tahi? Julian ambile ngwenyi, omu vamuhangile hamilimo alikomokelele chikuma, kaha namangana amukumine. Alihulishilenga ngwenyi ‘Nanguzakama ngachilihi tanga yami? Mwomwo ika vananguhangila hamilimo okunyi ngunazatenga nakashishi hamyaka yayivulu?’

• Pamo muli nakwivwa kukola kumuchima mwomwo yakufwa chaulo wenu. Raquel ambile ngwenyi: “Munahichi tukweji 18 kufuma haze angusezele lunga lyami, chuma kana changuhombesele chikuma. Chapwile kwijiva nge muchima wami vanaupulu hakachi. Changukolele kaha nawa changwivwishile woma.”

• Nyi pamo muli nakuviza misongo yayikalu kuka. Pamo mweji kwivwanga ngana muze evwile kakuluka Yopa uze alyonyingile ngwenyi: “Ngunahungu kuyoya chami. Kangweshi nakusaka kuyoya likako.” (Yopa 7:16) Pamo mweji kwivwanga nawa ngana muze evwile Luis, lunga wamyaka yakusemuka yamuji 80 uze ambile ngwenyi: “Lwola lumwe ngweji kwivwanga nge nguli nakuvandamina kaha kufwa.”

• Pamo nawa munakusaka kumivendejeka mwomwo yakufwisa mutu mwazanga. Robert ambile ngwenyi: “Omu mwanami walunga afwile mundeke yize yaholokele, kangwafwelelele ngwami chuma kana chinasoloka chikupuko. Kufumaho ngwevwile jino kukola kumuchima, chize Mbimbiliya yafwanyisa kupoko yamukwale yayisuku yize nayituvasana mutu.”—Luka 2:35.

Robert, naLuis, naRaquel, naJulian vavavendejekele numba tuhu vapwile muukalu waunene. Vawanyine mutu wamwenemwene wakuvavendejeka, mutu kana shina Kalunga Wangolo Josena. Uno Kalunga eji kuvendejekanga ngachilihi? Kutala nahase kumivendejeka nayenu tahi?