Mbimbiliya kayanangula ngwayo mutu himutu atwama nakangelo uze eji kumukingangako. Yesu ambile ngwenyi: “Nyingililenu nakumona ngwenu kamweshi nakulumbilisa umwe hali ava vavandendeko [tumbaji twaKulishitu], mwomwo nangumilweza ngwami vangelo javo mwilu lwola lwosena veji kumonanga kumeso aTata uze ali mwilu.” (Mateu 18:10) Yesu kapwile nakulumbununa ngwenyi mutu himutu atwama nakangelo uze eji kumukingangako, oloze alumbunwine ngwenyi vangelo veji kuzakamanga chikuma tumbaji twenyi vosena. Ngocho vaka-kulemesa Kalunga vamuchano kaveshi kulinga chuma chize nachihaka kuyoya chavo muponde, mwomwo yakushinganyeka ngwavo vangelo navavakingako.

Uno echi chalumbununa nge vangelo kavakinga vatuko tahi? Nduma. (Samu 91:11) Vatu vamwe veji kushinganyekanga chikupu ngwavo Kalunga navakingi nakuvatwaminyina kuzachisa vangelo jenyi. Kenneth uze twavulukanga muchihande chakulivanga naikiye etavilile vishinganyeka kana. Numba tuhu katweshi naunjiho uveneko, oloze vishinganyeka kana vinahase kupwa vyakwoloka. Kakavulu Vinjiho jaYehova veji kumonanga unjiho wakusolola nge vangelo veji kuvakafwanga omu veji kwazananga mumulimo wakwambulula. Hakuwana nge vangelo katwavamonako, ngocho katweshi kutachikiza kanawa omu Kalunga eji kuvazachisanga mangana vatukafwe mukala vyuma tweji kulingangako. Ngocho, kacheshi kupwa chakuhenga kusakwilila Kalunga waNgolo Josena mujila eji kutukafwilangamoko.—Wavaka-Kolose 3:15; WaYakova 1:17, 18.