ACHISHINGANYEKENU Sala ali nakuzata, kaha himwoloka nakulyolola oku natale mumwe kaha. Vangamba jenyi nawa vazachilenga nakuwahilila mwomwo avatwaminyinyinenga kanawa. Sala naikiye apwile nyamalikita, pamo apwile nakutonga mahina mangana alamike hambalaka yavo yize yapwile namiteta. Achishinganyekenu jino ali nakwolola minwe mangana evwengako kanawa. Mahina amangona avapembe aze vatungishile mbalaka yavo apilukile mwomwo yamusana navula, kahechi chanukishile Sala nge vakimbwojokelenga chikuma hamyaka yayivulu. Omu likumbi lyapwile nakulauka, apwile jino nakushinganyeka Apalahama * hakuwana nge afumine hembo nachimene, shikaho atalile muze ayile lunga lyenyi. Omu amwene lunga lyenyi anakushikumuka hapili, awahililile nakumwesa kukanwa.

Mwahichile myaka yayivulu kufuma haze Apalahama atetekelele tanga yenyi navangamba jenyi nakuzauka Kalwiji Yufwalate nakuya kuKanane. Sala akundwijilenga lunga lyenyi omu vapwile nakuya kulifuchi lize katachikijileko, mwomwo atachikijile ngwenyi lunga lyenyi apwile namulimo waulemu wakutesamo kujina chaYehova hakusema mwana uze navakakisula nakupwa nawa muyachi. Uno Sala atelele kuzata mulimo muka? Sala apwilenga mumba, kaha halwola kanelu apwile namyaka 75. Pamo apwilenga nakuhuhwasana ngwenyi ‘Uno Yehova nahase kutesamo ngachilihi kujina chenyi okunyi nguchili pwevo lyaApalahama?’ Chapwile chakutamo nge ahuhwasanyine chipwe nge azeyele kutalilila chuma kana.

Nayetu nawa, shimbu jimwe tunahase kuhuhwasana nakwamba ngwetu, lwola muka navikatesamo vyuma atushika Kalunga? Kutalilila chikoki chinahase kupwa chachikalu, chikumanyi nge tunakuvandamina kutesamo chavyuma vyamwaza chikuma. Vyuma muka tunahase kulinangula kuli ou pwevo halufwelelo lwenyi?

Eyi tanga yakindulukile kufuma kuEjipitu. (Kuputuka 13:1-4) Tanga kana yatungile chilombo hajipili jakumulauko waMbetele chipwe ngwetu Luze kweseka namuze vayivulukilenga vaKanane. Kutwama kujipili kana chalingishile Sala amone kanawa Lifuchi lyaLushiko. Mulifuchi kana mwapwilenga membo avaKanane, namikwakwa yize vahichilenga vatu hakuya kuvihela vyakwakusuku. Numba tuhu amwene kanawa omu lyapwile nakusoloka lifuchi kana, oloze kalyalyesekele nalifuchi lize afumineko. Akolelele muUle nganda yaMesopotamya yize yapwile kafwe tunda yajikilomita (1,900) kufuma kuze apwile. Asezele vausoko wenyi, nachiyoyelo chauhando chamunganda muze mwapwilenga visakano, navitanda, nazuvo yaulangaji yize yapwile nafulumba yamwaza, pamo vene nameya amumiyengo. Shikaho nge natushinganyeka hali Sala ngwetu apihililile hakutala kumututuko nakushinganyeka chikuma hanganda yaUle muze asemukilile, kaha katwamutachikiza kanawako.

Achishinganyekenu hamazu aze kaposetolo Paulu vamuhwiminyine asoneke omu mwahichile myaka kafwe 2,000. Ahanjikile halufwelelo lwaSala naApalahama ngwenyi: “Kachi nge vapwile nakwanukanga chihela chize vasezele, kachi vakindulukile cheka.” (WavaHepeleu 11:8, 11, 15) Hakachi kavo naumwe wauchi afwililile vyuma vize vasezele kunyima. Nge vashinganyekelenga chikuma havyuma kana, kachi vakindulukile kwimbo lyavo. Kukinduluka kuUle kachi chalingishile Yehova ahone kuvahana mulimo wakulipwila  uze avahanyine. Kaha nawa kachi nou alinangula kuli vakiko vene wauchi, navatu nawa kachi vavavulyama lyehi.

Muchishishisa chakuliveya havyuma asezele, Sala atalilile vyuma vyakulutwe. Atwalileho lika kukundwiza lunga lyenyi muungeji wavo, nakumukafwa kulemuna jimbalaka, nakuzakama vimuna, nakulema cheka mbalaka kwosena kuze vatulililenga. Omikilenga muukalu amwenenga mukuyoya chenyi. Yehova anukishile cheka Apalahama lushiko luze amushikile, oloze kavulukile Salako.—Kuputuka 13:14-17; 15:5-7.

Sala ajinyine jino kuhanjika naApalahama mangana amulweze vyuma vize apwilenga nakushinganyeka. Achishinganyekenu jino anakuhanjika nakulishona ngwenyi: “Tala, Yehova nanguminyi lusemo.” Kaha alwezele lunga lyenyi aseme vana nangamba yenyi wapwevo Hangale. Achishinganyekenu omu evwile Sala hakulweza lunga lyenyi alinge chuma kana. Makumbi ano, tunahase kulikomokela hachuma kana, oloze halwola luze chapwile chakutamo mutu kumbata luhali chipwe kalumbu kalisano mangana aseme nenyi mwana uze mwakamuswana. * Uno Sala ashinganyekele ngwenyi lushiko luze Kalunga ashikile Apalahama lwakukasema muka-tanga uze mwakapwa muyachi nalutesamo hakulinga chuma kana tahi? Kala mweshomwo chapwile, Sala asolwele muchima wakulisuula hakulweza lunga lyenyi alinge chuma kana. Uno Apalahama alingile ngachilihi? Mbimbiliya yatulweza ngwayo “Apalama evwililile mumazu apwevo lyenyi [Sala].”—Kuputuka 16:1-3.

Uno mujimbu wasolola nge Yehova ikiye alwezele Sala alinge chuma kana tahi? Nduma. Vyuma alwezele lunga lyenyi kulinga vyasolwele vishinganyeka vyautu. Ashinganyekele ngwenyi Kalunga ikiye amulingishile ahite muukalu kana, kaha kejivile nge Kalunga apwile najila yeka yakukumishilamo ukalu kanako. Vyuma asakwile kulinga Sala vyamunehelele ukalu waunene. Chipwe ngocho, vyuma alwezele lunga lyenyi vyasolwele nge Sala kapwile namuchima walifwiko. Muno mukaye vatu vavavulu vahaka kulutwe vyuma vyavo, uno kutala vatu kaveshi kumona chakutalilaho chaSala kupwa chachilemuko tahi? Kachi nge natufwila kuhaka kulutwe vyuma ajina Kalunga mukuyoya chetu kuhambakana vize twafwila, kaha natulondezeza Sala uze apwile nalufwelelo lwakukola.

Kahahichile shimbu kufuma haze Hangale emichile lijimoko. Pamo chikiko chamulingishile alivwimbe nakuputuka kutoleka kaka yenyi Sala. Chuma kana chakolele chikuma Sala kumuchima. Apalahama etavishile Sala ayanjise ngamba yenyi Hangale, kaha nawa Kalunga kakanyishile Salako. Ngocho, Hangale asemene mwana walunga lijina lyenyi apwile Ishimele, kaha hahichile myaka yayivulu. (Kuputuka 16:4-9, 16) Kufumaho, Mbimbiliya yasolola nge Sala naApalahama vatambwile mujimbu wakufuma  kuli Yehova, halwola kanelu Sala apwile namyaka yakusemuka 89, kaha lunga lyenyi apwile namyaka yakusemuka 99. Mujimbu vatambwile wapwile wakukomwesa chikuma.

Kufumaho, Yehova ambile ngwenyi mwakavulisa vaka-tanga yaApalahama. Kaha Kalunga nawa alumwine lijina lyayou lunga. Shimbu kanda valumune lijina lyenyi vamuvulukilenga ngwavo Apalama. Oloze Yehova amulukile ngwenyi Apalahama, kulumbununa “Sevo yaLiyongomena.” Aha jino hakiko Yehova aputukile kuhanjika naSala nakumulweza mulimo mwakazata mulushiko luze avashikile. Kaha alumwine lijina lyaSalai lize pamo lyalumbunwine “Vikokojola” nakumuluka ngwenyi Sala lijina lize twatachikiza tuvosena. Uno lijina lyaSala lyalumbununa ika? Lyalumbununa “Mwangana.” Yehova alumbunwine ovyo vyamulingishile amuhane lijina kana hakwamba ngwenyi: “Nangumukisula, kaha nangukuhana mwana walunga wakusemena kuli ikiye. Nangumukisula nakumulingisa kupwa nevo yavaka-mafuchi, kaha kuli ikiye kukiko nakukasemuka vamyangana javatu veka naveka.”—Kuputuka 17:5, 15, 16.

Lushiko luze Yehova ashikile lwakukaneha mwana uze mwakakisula miyachi yosena nalukatesamo kuhichila muli mwana uze mwakasema Sala. Lijina lize Kalunga alukile uze mwana lyapwile Isaka, kulumbununa “Kusehelela.” Omu Apalahama atachikijile lushiko lwaYehova lwakukakisula Sala hakumuhana mwana, “afukamine chameso hamavu, kaha aputukile kuseha.” (Kuputuka 17:17) Alikomokelele nakuwahilila chikuma. (Wavaka-Loma 4:19, 20) Nyi ngachilihi Sala?

Nakushimbula chiku, kumbalaka yaApalahama kwejile vangeji vamalunga vatatu. Numba tuhu kwapwile musana wanonga, oloze ava tushinakaji valovokele washi haweluka nakuvatambwokesa. Apalahama alwezele Sala ngwenyi: “Zanguwisako. Wahisa vyesekelo vyaunga wamwaza vitatu, kaha uchike nakwocha jimbolo.” Kushikulu, kuzumbula vangeji chapwile namulimo waunene chikuma. Apalahama kechelelele puwenyi azate milimo yosenako, oloze naikiye ayile nakujiha mwanangombe nakuwahisa vyakulya navyakunwa vyavivulu. (Kuputuka 18:1-8) Vaze “malunga” vapwile vangelo vaze atumine Kalunga. Atela nakaposetolo Paulu atachikijile chihande kana omu asonekele ngwenyi: “Kanda namuvulyama kusololanga chisamboko, mwomwo mukiko vamwe vatambwilile vangelo chakuzeneka vakiko kutachikiza.” (WavaHepeleu 13:2) Kutala munahase kulondezeza Apalahama naSala vaze vasolwele muchima wazumbu tahi?

Omu kangelo umwe ahanjikile cheka kuli Apalahama vyalushiko luze Kalunga ashikile Sala lwakukasema mwana, Sala apwile mumbalaka nakuvevwilila. Kushinganyeka kusema mwana muushinakaji chuma chize kachasolokako chamulingishile asehele mumuchima wenyi nakwamba ngwenyi: “Kutala ngunahase kupwa cheka nachipepa chamwana okunyi ami ngunazeye lyehi, kaha nawa mwata wami hanakulu lyehi?” Uze kangelo olwele vishinganyeka vyaSala hakwamba ngwenyi, “Kutala kuli chuma mwahona kulinga Yehova numba?” Oloze Sala evwile woma, kaha alihakwililile ivene, chuma kana chapwile chakutamo. Sala alihamikile ngwenyi: “Kangwaseheleko.” Kangelo amukumbulwile ngwenyi: “Nduma, wasehanga.”—Kuputuka 18:9-15.

Hakuwana nge Sala asehele, kutala chuma kana chasolwele nge kapwile nalufweleloko tahi? Nduma. Mbimbiliya yamba ngwayo: “Mwomwo yalufwelelo nawa, Sala vamuhanyine ngolo jakusema mwana, numba tuhu azombokele haseteko yakusema, mwomwo amwene Uze amushikile ngwenyi wakushishika.” (WavaHepeleu 11:11) Sala atachikijile ngwenyi Yehova nahase kutesamo kala vyuma mwashika. Kutala kamweshi kwivwa kuwaha kupwa nalufwelelo ngana mwaSalako tahi? Nachipwa chamwaza kuzata nangolo mangana tutachikize kanawa mazu aKalunga Mbimbiliya. Nge natulinga ngocho, kaha natutachikiza ngwetu Sala apwile chikupu nalufwelelo. Chikupu vene Yehova apwa wakushishika kaha nawa eji kutesangamo vyuma eji kushikanga. Shimbu jimwe eji kulinganga ngocho mujila yize yinahase kutukomwesa chikuma.

Omu Sala apwile namyaka yakusemuka 90, asemene jino mwana uze apwile nakutalilila mukuyoya chenyi chosena. Asemene mwana walunga nalunga lyenyi Apalahama. Halwola kana Apalahama apwile jino namyaka yakusemuka 100. Apalahama alukile uze mwana ngwenyi Isaka chipwe “Kusehelela,” ngana muze ambile Kalunga. Achishinganyekenu Sala nawahilila  chamokomoko naushinakaji nakwamba ngwenyi: “Kalunga nangulingisa ngusehelele, kaha weshowo mwevwako mwasehelela hamwe nayami.” (Kuputuka 21:6) Wana kanou wakukomwesa wakufuma kuli Yehova wamulingishile awahilile palanga nakukufwa chenyi. Chipwe ngocho, wana kana wamulingishile apwenga namulimo waunene chikuma.

Omu Isaka apwile namyaka yakusemuka 5, vaka-tanga yenyi valingile chiwanyino chakumusumuna. Oloze vyuma vimwe kavyapwile kanawako. Tweji kutanganga ngwavo Sala “amwenenga” vilinga vyavipi. Ishimele mwana Hangale uze apwile namyaka yakusemuka 19 ahendelenga songo yenyi Isaka. Kuhenda kana kachapwile nge hikusesekako. Kaposetolo Paulu vamuhwiminyinyine asoneke vilinga vyaIshimele ngwenyi vyapwile luyanjisa. Sala amwenenga mwanenyi navamuyanjisa kuli Ishimele mujila yayipi, kaha ahungile chuma kana. Sala atachikijile ngwenyi mwanenyi Isaka vamuhanyine mulimo waulemu chikuma kutalisa kuvyuma ajina Yehova. Ngocho ahanjikile nakumika kuli Apalahama. Alwezele Apalahama ahange Hangale namwanenyi Ishimele.—Kuputuka 21:8-10: Wavaka-Ngalesha 4:22, 23, 29.

Uno vyuma muka alingile Apalahama hamazu amulwezele Sala? Mbimbiliya yamba ngwayo: “Mazu ahanjikile Sala halyou mwana evwishile Apalahama kupihya.” Azangile chikuma mwanenyi Ishimele, ngocho chamukaluhwilile kumuhanga. Chipwe ngocho, Yehova amwene ukalu kana, ngocho avakafwile. Mbimbiliya yamba ngwayo: “Jino Kalunga ambile kuli Apalahama ngwenyi: ‘Kanda nawivwa kupihya havyuma ali nakukulweza Sala hali ou mwana nahali ndungo yove wapwevoko. Mwivwilile mwomwo vaze navakavuluka ngwavo vaka-tanga yove navakafuma muli Isaka.’” Yehova afwelelesele Apalahama ngwenyi, Hangale namwanenyi Ishimele navavazakama. Kaha Apalahama evwililile.—Kuputuka 21:11-14.

Sala apwile pwevo lyaApalahama wamwenemwene, uze apwile muka-kumukafwa. Kalwezelenga lunga lyenyi vyuma vyosenako. Oloze omu amwene ukalu uze wakwachile hatanga yavo nahakuyoya chavo chakulutwe, ashimutwilile nalunga lyenyi mujila yamwenemwene. Kuhanjika chenyi hatoma kachasolola nge kapwile nakavumbiko. Omu mwahichile myaka, kaposetolo Petulu uze apwile napwevo naikiye ahanjikile hali Sala ngwenyi ahanyine chakutalilaho chamwaza chakuvumbika lunga lyenyi. (Wavaka-Kolinde 1, 9:5; WaPetulu 1, 3:5, 6) Nge Sala aholele kulu hachihande kanechi, kachi chasolwele nge kavumbikile Apalahamako, kaha chuma kana kachi chanehele ukalu waunene kuli lunga lyenyi natanga yavo yosena. Sala ahanjikile vyuma vize amwene ngwenyi vyatelemo kuhanjika.

Mapwevo vavavulu vamona chakutalilaho chaSala kupwa chachilemu chikuma. Kaha valinangulako kushimutwilanga kanawa namalunga javo nakuvavumbika. Mapwevo vamwe veji kushinganyekanga ngwavo Yehova nahase kuvakafwa ngana muze alingile kuli Sala. Chipwe ngocho, valinangula kupwa nalufwelelo, nazangi, namuchima wakutalilila chikoki kuli Sala.

Numba tuhu Yehova avulukile ou pwevo ngwenyi “Mwangana,” oloze Sala kasakile vatu vamumone kupwa wakulipwilako. Omu apwile namyaka yakusemuka 127 Sala afwile, kahechi chalingishile Apalahama ‘alishone nakumulila chikuma.’ * (Kuputuka 23:1, 2) Chikupu vene, Apalahama alishonene chikuma hakufwisa “Mwangana” uze azangile. Chakuzeneka kukakasana, Yehova Kalunga naikiye eji kushinganyekanga chikuma ou pwevo wakushishika, kaha ajina kukamusangula mangana akayoye cheka mupalachise hano hamavu. Sala mwakapwa nakuyoya chamwaza kulutwe hamwe kaha navosena vaze vanakulondezeza lufwelelo lwenyi.—Yowano 5:28, 29.