Eyo, kuvatwama. Uno vafuma kulihi? Tachikizenu ngwenu Kalunga atengele vangelo nalisesa lyakulisakwila vyakulinga. Kufuma haze Kalunga atengele lunga napwevo vatete Alama naEve, kangelo umwe wakukupuka azachishile lisesa lyenyi mujila yakuhenga, nakuhungumwisa vatu hamavu vaputuke kulikanga. Kaha ahungumwishile Alama Eve valikange kuli Kalunga. (Kuputuka 3:1-7; Kusoloka 12:9) Mbimbiliya kayahanjika hatoma lijina lyou kangelo chipwe milimo azachilenga shimbu kanda alikangeko. Oloze omu alikangile Mbimbiliya yamuvulukile jino ngwayo Satana kulumbununa “Muka-kulikanga,” vamuvuluka nawa ngwavo Liyavolo kulumbununa “Muka-lusongi.”—Mateu 4:8-11.

Chaluvinda, kulikanga kanechi kachakuminyine hahaze veneko. Mumakumbi aNowa vangelo vamwe vafumine mutanga yaKalunga mwilu, kaha “vasezele kuze vatwaminenga.” Vejile hano hamavu nakuvwala mijimba yautu mangana valinge uvumbi, nakuhona kuzata milimo yize vavatengelelele.—WaYuta 6; Kuputuka 6:1-4; WaPetulu 1, 3:19, 20.

Vyuma muka vyasolokele kuli ava vangelo vakuhuka? Omu Kalunga anehele livaji lyalinene nakutomesa hamavu, ava vangelo vavwalile mijimba yakushipilitu nakukinduluka cheka mwilu. Chipwe ngocho, Kalunga ketavishile vangelo kana vakuhuka vakinduluke ‘kuchihela chavo chakulivangako.’ Oloze avahakile muchihela ‘chamilima [yakushipilitu]’ chize vavuluka ngwavo Tataluse. (WaYuta 6; WaPetulu 2, 2:4) Ava vandemone veji kuvatwaminyinanga kuli Satana Liyavolo uze apwa “muka-kuyula vandemone” uze nawa “eji kulyalumunanga ivene kupwa kangelo kamusana.”—Mateu 12:24; Wavaka-Kolinde 2, 11:14.

Mbimbiliya yanangula ngwayo Wangana waKalunga wauMeshiya, uze wapwa fulumende yamwilu, waputukile kuyula mu 1914. * Omu Wangana waputukile kuyula, Satana navandemone jenyi vavandandumwine mwilu nakuvambila hano hamavu, kaha nawa kavatwama nangolo jakulinga vyuma vyosenako. Shikaho vilinga vyakuhuka navyauvumbi vize vinalisale muno mukaye hiunjiho wakusolola nge Satana navandemone jenyi vanakuneha vyuma kana.—Kusoloka 12:9-12.

Chipwe ngocho, vyuma vyavipi naulyanyi vize vinavulu chikuma hano hamavu vinakusolola nge chiyulo chavo chaulyanyi kalinwaha chikume. Kalinwomu Satana navandemone jenyi vavatambule ngolo jakuyula. Kahomu naukalinga Wangana waKalunga unayulu lyehi hamavu hamyaka 1,000, ava vangelo vakuhuka navakavahana lwola lwamakumishilo lwakweseka cheka vatu. Kufumaho jino navakavanongesa haya myaka yosena.—Mateu 25:41; Kusoloka 20:1-3, 7-10.