Ngana muze Kalunga apwa Shipilitu, navangelo nawa vatwama namijimba yakushipilitu yize kayatwama ‘nanyama navifuwako.’ Vangelo vakushishika vatwama mwilu, kaha nawa veji kumonanga Kalunga.—Luka 24:39; Mateu 18:10; Yowano 4:24.

Shimbu jimwe vangelo vanalyalumunanga mumijimba yautu hakwiza nakuzata milimo yize eji kuvahananga Kalunga hano hamavu, kufumaho veji kuvwalanga cheka mijimba yakushipilitu nakukinduluka mwilu.—Vaka-kuyula 6:11-23; 13:15-20.

Numba tuhu Mbimbiliya yafwanyisa vangelo kupwa himalunga, kaha nawa kakavulu vanasolokanga kupwa himalunga, oloze kakwatwama unjiho uze wasolola nge vapwa malunga chipwe mapwevoko. Kavambata chipwe kusema vangelo vakwavoko. Kaha nawa vangelo kavalivangile kuyoya mwavakemba, chipwe mwavanyike, chipwe vakulwane hano hamavu kufumaho numba vayenga mwiluko. Vangelo vavatengele kuli Yehova, ngocho Mbimbiliya yavavuluka ngwavo “vana vaKalunga wamuchano.”—Yopa 1:6; Samu 148:2, 5.

Mbimbiliya yavuluka “malimi avatu nawawa avangelo” kulumbununa nge vatu vakushipilitu vakwechi lilimi nahanjikiso yavo. Numba tuhu Kalunga nazachisanga vangelo hakuhanjika navatu oloze katwitavisa kuvalemesa chipwe kulomba kuli vakikoko.—Wavaka-Kolinde 1, 13:1; Kusoloka 22:8, 9.

Kwatwama mayongomena namayongomena avangelo, vaze pamo vaheta kujimbiliyoni jajivulu chikuma. *—Ndanyele 7:10; Kusoloka 5:11.

Vangelo ‘vakwechi ngolo chikuma’ kaha nawa vatwama mangana chikuma kuhambakana vatu. Vanahase kutambuka tunda yayisuku chikuma mulwola lwalundende kaha kuhambakana vyuma vyakutenga vyosena.—Samu 103:20; Ndanyele 9:20-23.

Numba tuhu vangelo vakwechi mangana nangolo chikuma oloze kwatwama nawa vyuma vimwe vize kavatachikizako.—Mateu 24:36; WaPetulu 1, 1:12.

Kalunga atenga vangelo nalisesa lyakulisakwila vyakulinga navilinga vyeka vyakulipwila. Ngana mwavatu navangelo vanahase kusakula kulinga vyuma vyamwaza chipwe vyakuhenga. Chaluvinda, vangelo vamwe valikangile kuli Kalunga.—WaYuta 6.