CHIHANDE CHACHINENE | VYAKUMWENESA VYASOLOLA VYAMUMELU
Vihula Veji Kuhulisanga Vatu Kutalisa Kuvyuma VyamuMelu
Kutala nayenu mwalihulisaho lyehi vihula kutalisa kuvyuma vyamumelu navaze vatwamamo tahi? Nge mukiko, kaha keshi yenu kahako. Hamyaka yayivulu yinahichimo, vatu vanahanjikanga vyakulisezaseza hachihande kana. Vamwe vafwelela ngwavo mumelu mwatwama vakakuluka vaze twatela kuvumbika. Vakwavo veji kuhumikizanga ngwavo mwilu mwapwa mwakuunda muze mwatwama vangelo navatu vavilinga vyamwaza vaze vafwa. Kaha veka vamona mumelu kupwa hilimbo lyamayevuyevu atulunga.
Vatu vavavulu veji kuhanjikanga ngwavo katweshi kuhasa kutachikiza kanawa vyuma vyamumeluko, mwomwo naumwe wauchi afumaho lyehi mwilu kwiza nakutulweza vyatwamamo. Vishinganyeka kana vyapwa vyakuhenga sulumunu. Yesu Kulishitu apwilenga mwilu shimbu kanda ezenga hano hamavu. Alwezele vatwamina vamukwitava vamulikulukaji lyamyaka lyakulivanga ngwenyi: “Nguneza kufuma mwilu mangana ngulingenga mwaya muchima wayauze angutumine, keshi nge mwaya muchima wamiko.” Yesu alwezele vaposetolo jenyi ngwenyi: “Muzuvo yaTata muli vihela vyakutwama vyavivulu.”—Yowano 6:38; 14:2.
Ise yaYesu ikiye Yehova Kalunga, kaha “zuvo” yaYehova yatwama mwilu. (Samu 83:18) Ngocho Yehova Kalunga naYesu Kulishitu vakiko kaha vanahase kulumbununa kanawa omu mwapwa mwilu. Valumbunwine vyuma vyavivulu kutalisa kumelu hakuzachisa vyakumwenesa vize vamweneselenga vatu vakushishika.
Chihande chinakavangizaho nachishimutwila hamijimbu yamuMbimbiliya yize yahanjika havyuma vamwene vatu muvyakumwenesa vyavivulu. Omu navalumbununa vyakumwenesa kana, anukenu ngwenu vyuma vyamumelu katweshi kuhasa kuvikwata chipwe kuvimonako. Ngocho, muchishishisa chakufwila kulumbununa vyuma kuzachisa mazu akushipilitu akujiminyina aze nawapwa amakalu kuli etu kwivwishisa, Kalunga azachishile vyakumwenesa mujila yayashi. Vyakumwenesa kana navimikafwa mutachikize kanawa vaze ‘vatwama muvihela vyamumelu vyavivulu.’
