Likumbi limwe Don napuwenyi Margaret * vavatambukilile kuli mwanavo wapwevo natanga yenyi. Omu valingile vanashikama makumbi amwe, ava vangeji vasakile jino kukinduluka. Ngocho Margaret uze azachilenga milimo yakutelejeka, awahishile kulya chamwaza mangana alisalise navazukulu jenyi vavali.

Omu valingile vosena vanatwame kumesa, Margaret ambachile lilonga lyavyakulya nakulitumbika hakachi kamesa. Hakufukununa halilonga, amwene hali kaha musoji. Margaret avulyamine kuhaka kulya chivene muze mumusoji, nakuchichingasana mangana awahise kulya vazanga vatu kulifuchi kana.

Chamokomoko namyaka tuli nayo chipwe vyuma tunamono mukuyoya, tuvosena tweji kulimbenjanga. Lwola lumwe tunahase kuhanjika mazu amapi, chipwe kulinga vyuma vyavipi, chipwe kuliula vyuma vimwe, chipwe vene kuvivulyama. Mwomwo ika tweji kulimbenjelanga? Vyuma muka twatela kulinga nge tunalimbenje? Tunahase kulihenda ngachilihi kukulimbenja? Kupwa navishinganyeka vyamwaza kutalisa kukulimbenja nachitukafwa tukumbulule vihula kana.

Kachi nge tunalingi vyuma vyamwaza, tweji kwivwanga kuwaha nge vakwetu navatusakwilila nakutusangejeka. Chochimwe nawa, nge tunalimbenje chakuzeneka kutachikiza chipwe pamo vakwetu kavatumweneko, kaha twatela kwitavila tutenga twetu. Kulitavila chasakiwa kulinyisa.

Nge katwalinyisako, kaha tunahase kuputuka kulelesa tutenga twetu, chipwe kuvangijikila vakwetu, chipwe vene kukana ngwetu keshi yetu tunavilingiko. Kulinga ngocho kakavulu cheji kunehanga ukalu waunene. Ukalu umwe weji kwizanga mwomwo yakulimbenja chetu kaweshi kukumako, kaha tunahase kuhichikisamo navatu vanalitwamina. Numba nge katweshi kumona ukalu havyuma vimwe tunalimbenjeko, oloze twatela kwanuka ngwetu kulutwe “etu tuvosena mutu himutu mwakalyambulula ivene kuli Kalunga havilinga vyenyi.”—Wavaka-Loma 14:12.

Kalunga amona kulimbenja chetu mujila yeka. Mumukanda waJisamu, Kalunga vamulumbununa ngwavo apwa “wakeke nakutetela,” kaha nawa “keshi kuwanyina vatu tutenga lwola lwosenako, keshi kulamina vatu koko haya myaka yosenako.” Atachikiza ngwenyi katwakupukako, kaha twasemuka natutenga, kaha nawa “atachikiza ngwenyi twapwa tulukungu kaha.”—Samu 103:8, 9, 14.

Ngana mwachisemi wakeke, Kalunga asaka etu vana venyi tumonenga kulimbenja chetu nganomu achimona ikiye. (Samu 130:3) Mazu enyi atwama najindongi jamwaza jakutukafwa tuwane mwakulingila kachi nge tunalimbenje chipwe nge vakwetu vanalimbenje.

Kakavulu, mutu nge nalimbenje eji kufwilanga kuhana milonga vakwavo nakulisambisa ivene. Oloze nge mazu munahanjika analemeka mukwenu,  kaha mwatela kulikonekela chipwe kushimutwila mukuunda mangana usepa wenu utwaleho lika. Uno mwalingaho lyehi chuma chachipi nakulihaka muukalu chipwe kuhaka vakwenu muukalu tahi? Muchishishisa chakupihilila chipwe kuhana vakwenu milonga, nachiwaha nge namuzata nangolo mangana mukumise ukalu kana. Kufwila kulisambisa havyuma munalimbenje chinahase kutohwesa ukalu nakufutwisa vakwenu kumichima. Shikaho linangulenuko vyuma vimwe, nakwolola vyuma munalimbenje, nakutwalaho lika kulinga vyuma vyakwoloka.

Nge mukwetu nalimbenje, etu vatu twasaka kuhanjika vyuma vize navisolola nge vyuma nalingi kavyatelemoko. Oloze nachipwa chamwaza kukavangiza mazu ahanjikile Yesu Kulishitu ngwenyi: “Shikaho vyuma vyosena namusaka ngwenu vatu vamilingile, nayenu nawa valingilenuvyo.” (Mateu 7:12) Nge munalimbenje numba vene chachindende, mwasaka vakwenu vamitetele nakumikonekela. Shikaho omu mukiko mwatela kulinga nayenu nge vakwenu vanalimbenje.—Wavaka-Efwesu 4:32.

Mukanda umwe wamba ngwawo, mutu eji kulimbenjanga mwomwo “yakuhona kushinganyeka kanawa, chipwe kuhona kutachikiza vyuma, chipwe kuhona kuhaka mangana kuvyuma.” Twatela kwanuka ngwetu shimbu jimwe tuvosena tweji kulinganga vyuma kanevi vanalave. Oloze tunahase kukehesako kulimbenja kachi nge natukekesa hajindongi jimwe jajilemu jamuVisoneka.

Lundongi lumwe shina luze vasoneka hali Vishimo 18:13 ngwavo: “Kachi nge mutu mwakumbulula kuchihande shimbu kanda atachikize mashina namasongo, chinapu uleya nasonyi kuli ikiye.” Enga, kwivwilila kanawa kuchihande nakushinganyeka havyuma natuhanjika nachitukafwa tuhone kulusuka kuhanjika chipwe kulinga vyuma. Chinyingi namupwa nacho hakwivwilila kanawa kuchihande kana, nachimikafwa muchivatule kanawa nakuhona kulimbenja.

Lundongi lukwavo lwamuMbimbiliya lwamba ngwalwo: “Kachi nge chinahase, kweseka nomu namuhashila, twamenunga mukuunda navatu vosena.” (Wavaka-Loma 12:18) Zatenu nangolo mutwamenga mukuunda navakwenu nakuzachila navo hamwe. Nge muli nakuzata navakwenu, kaha mwatela kuvatetela, nakuvavumbika, nakuvasangejeka, nakuvakolezeza. Nge namulinga ngocho, kaha numba nge umwe nalimbenje, nachipwa chachashi kumukonekela chipwe kuliula katenga kenyi. Kaha numba munalimbenje mwamunene, nachipwa chachashi kushimutwila nakukumisa ukalu.

Fwilenu kulinangula kuvyuma namulimbenja. Muchishishisa chakutonda mwakulipekela havyuma vyavipi munahanjika chipwe munalingi, shinganyekenu vyuma namulinangulaho. Pamo muli nakusakiwa muchima wakutalilila chikoki, chipwe likoji, chipwe muchima wakulikanyisa, chipwe kuvova, chipwe kuunda, chipwe zangi. (Wavaka-Ngalesha 5:22, 23) Shinganyekenu nawa vyuma mwatela kulinga lwola lukwavo. Kanda kupihilila chikuma nakushinganyeka ngwenu kamwatelanga kulimbenjako. Lwola lumwe kuseha havyuma munalimbenje chinahase kukehesako matoto.

Kumona kulimbenja mujila yamwaza nachitukafwa tuhone kuhomba kachi nge tunalimbenje chipwe nge vakwetu vanalimbenje. Kahechi nachitulingisa tutwame mukuunda navakwetu. Nge natulinangulanga kuvyuma tunalimbenje, natupwa namangana, kaha nawa vakwetu navatuzanga. Katweshi kuhomba chipwe kulishinganyekela vyuma vyavipiko. Kutachikiza ngwetu vakwetu navakiko vali nakuzata nangolo mangana vahone kulimbenja nachitukafwa tulikate navo. Chachinenenyi, tunahase kunganyala kachi nge natulondezeza Kalunga uze apwa wazangi kaha nawa afwila kukonekela vatu.—Wavaka-Kolose 3:13.

Uno kulimbenja chaMargaret uze twavulukanga hakavanga chapihishile chiwanyino chatanga tahi? Nduma. Vosena vasehele havyuma vyasolokele, chikumanyi ivene Margaret, kufumaho vanwine uze vene musoji awahishile. Omu mwahichile myaka, ava vazukulu jenyi vavali valwezele vana vavo vyuma vyasolokele navyeka vize valivwishilenga kuwaha navakaka javo. Vosena vatachikijile ngwavo alimbenjele.