Naumwe wauchi atwama namuvwimbimbi waYesu. Kavamukopeleho kumutu numba umweko. Chipwe ngocho, hamyaka yayivulu vaka-kufunjejeka mivwimbimbi vanafunjikanga muvwimbimbi wenyi.

Ava vaka-kufunjejeka kavatachikiza chikupu omu asolokelenga Yesuko. Vatu kana vanafunjejekanga muvwimbimbi waYesu kweseka nachisemwa chavo, navyuma vyamukwitava vafwelela, navyuma vanavanangulanga kuli valongeshi javo. Oloze jila vali nakufunjikilamo Yesu yinahase kulingisa vatu vamone Yesu navyuma anangwilenga kupwa vyamokomoko.

Vaka-kufunjejeka vamwe vanasololanga Yesu kupwa mutu wakuzeya, wakuhokama, wajikambu jajisuku, waviwevu vyavivulu kaha nawa wamupi chihanga. Mumivwimbimbi yeka, Yesu vamusolola kupwa nge kangelo uze navwale uvwalo wakuvyakuma wandando yayinene, kaha keshi nakusaka vatu vapandame kuli ikiyeko. Uno omu mukiko asolokelenga Yesu tahi? Tunahase kutachikiza ngachilihi omu asolokelenga Yesu? Jila yimwe shina yakukekesa mazu vasoneka muMbimbiliya aze nawatulweza omu asolokelenga Yesu. Nawatukafwa nawa tumutachikize kanawa.

Chasoloka nge Yesu ahanjikile awa mazu mukulomba omu vapwile nakumumbapachisa. (WavaHepeleu 10:5; Mateu 3:13-17) Uno mujimba kana wasolokelenga ngachilihi? Kafwe myaka 30 kunyima, kangelo Ngavalyele asolokele kuli Maliya nakumulweza ngwenyi: “Nawimita lijimo, kaha naukasema mwana walunga, . . . MwanaKalunga.” (Luka 1:31, 35) Ngocho Yesu apwile wakukupuka mwosena, apwile nge Alama omu vamutengele. (Luka 3:38; Wavaka-Kolinde 1, 15:45) Yesu atela apwile lunga wamwaza, kaha nawa pamo alifwanyine nanaye Maliya uze apwile kaYuleya.

Yesu alaminenga wevu kweseka nachisemwa chavaYuleya halwola kana, oloze vaLoma vatewilenga wevu. Wevu kana wasolwelenga mutu kupwa wamulemu, oloze vaukambilenga mangana usoloke kanawa. Chakuzeneka kukakasana Yesu naikiye atewilenga wevu najikambu jenyi mangana asoloke kanawa. VaNajili, vakufwana nge Samasone vakiko kaha kavatewilenga jikambuko.—Kulava 6:5; Vaka-kuyula 13:5.

Kufuma kukusemuka chenyi nakuheta kumyaka 30, Yesu apwilenga muka-kusonga maliva. Halwola kana kakwapwile vinoma evi vali nakuzachisa vaka-kusonga makumbi anoko. (Mako 6:3) Ngocho apwile chikupu lunga wakujikiza. Kumaputukilo amulimo wenyi, likumbi limwe “ahangile vosena vaze vapwile namikoko navangombe mutembele, kaha amwangile jimbongo jachichele javaka-kutambasana nakukatumuna jimesa javo.” (Yowano 2:14-17) Mutu kuzata mulimo kana kuvanga wangolo kaha nawa wakujikiza. Yesu azachishile mujimba uze amuwahishilile Kalunga hakuzata mulimo amuhanyine. Ambile ngwenyi: “Ngwatela kwambulula mujimbu wamwaza waWangana waKalunga nakujinganda jeka nawa, mwomwo vikiko vene vangutuminyine.” (Luka 4:43) Yesu apwilenga chikupu lunga wakujikiza numbanyi ahase kutambuka hamavu mujinganda jamuPaleshitane nakwambulula mujimbu wamwaza.

Yesu apwilenga wachisambo kaha nawa walikoji shikaho vatu vaze vapwile “nakufulyangila nakulemuwa naviteli” vakasunukile nakwiza kuli ikiye. (Mateu 11:28-30) Likoji nachisambo chenyi vikiko vamulingishile afwelelese vaze vafwililile kulinangula kuli ikiye ngwenyi mwavahizumuna. Navanyike vakasunukile nakwiza kuli Yesu, mwomwo Mbimbiliya yatulweza ngwayo: “Asachile vana.”—Mako 10:13-16.

Numba tuhu Yesu ayanjile chikuma shimbu kanda afwenga, oloze kahombeleko. Chakutalilaho, alumwine meya nakupwa vinyo vyamwaza hachifupawenga chapwile muKana. (Yowano 2:1-11) Haviwanyino vyeka nawa, anangwilenga vatu vishina vize kavavulyamineko.—Mateu 9:9-13; Yowano 12:1-8.

Yesu akafwile vatu vapwenga vakuwahilila hakuvanangula vyakuyoya chahaya myaka yosena kulutwe. (Yowano 11:25, 26; 17:3) Omu tumbaji twenyi 70 vamuhichilililemo vyuma valiwanyine navyo omu vayile nakwambulula mujimbu wamwaza, Yesu “awahililile chikuma” nakwamba ngwenyi: “Wahililenu mwomwo majina enu vanawasoneka lyehi mwilu.”—Luka 10:20, 21.

Vatwamina vamukwitava vamumakumbi aYesu valingilenga vyuma mangana vatu vavalise nakuvamona kupwa vavalemu chikuma. (Kulava 15:38-40; Mateu 23:5-7) Oloze Yesu alwezele vaposetolo jenyi ngwenyi kavatela ‘kulilingisa kupwa vakaka’ javatuko. (Luka 22:25, 26) Yesu ahuhumwine ngwenyi: “Zangamenu navaka-kusoneka vaze vasaka kutambwojokaoku vanavwale vikuto, nakusaka kuvamenejeka kuvilanjilo.”—Mako 12:38.

Lwola lumwe Yesu atokelenga muvatu, kaha kavamutachikijileko mwomwo apwile ngana mwavatu vosena. (Yowano 7:10, 11) Nomu vene apwile hamwe navaposetolo jenyi 11 vakushishika, kasolokelenga kupwa wakulipwilako. Evi vikiko Yuta alwezelele vaze vakatukilile Yesu ngwenyi mwavahana “chinjikizo” chakumusweswenya numba vamutachikize ngwavo ikiye.—Mako 14:44, 45.

Chikupu vene, numba tuhu kakweshi unjiho wauvuluko, oloze chinasoloka hatoma nge Yesu kasolokelenga nganomu vamufunjejeka hamivwimbimbi yimweko. Chamokomoko najila vanakumufunjejekelamo, chuma chachilemu shina omu twatela kumumona.

Halikumbi vene lize Yesu ahanjikile awa mazu, hakiko afwile nakumufunda. (Yowano 14:19) Ahanyine kuyoya chenyi kupwa “ndando yakusokola vavavulu.” (Mateu 20:28) Halikumbi lyamuchitatu, Kalunga amusangwile nakupwa ‘mutu wakushipilitu’ “nakumulingisa asoloke” kuli tumbaji twenyi vamwe. (WaPetulu 1, 3:18; Vilinga 10:40) Uno Yesu asolokele ngachilihi omu alisolwele kuli tumbaji twenyi? Chasoloka nge asolokele mweka, keshi nge muze asolokelenga hakavangako, mwomwo namasepa jenyi kavamutachikijile hahaze veneko. Maliya Mangatala ashinganyekele ngwenyi Yesu apwile “muka-kulima mumilemba,” kaha tumbaji twenyi vavali vaze vapwile mujila yakuya kuEmau vamumwene nge ngeji.—Luka 24:13-18; Yowano 20:1, 14, 15.

Uno twatela kumona ngachilihi Yesu makumbi ano? Omu mwahichile myaka yakuzomboka 60 kufuma hakufwa chaYesu, kaposetolo Yowano amwene Yesu muchakumwenesa. Yowano kamumwene ali hakulusuko, oloze amumwene napu “Mwangana wavamyangana, Mwata wavamyata.” Chikupu vene, kalinwomu Yesu uze apwa Mwangana waWangana waKalunga, anongese vaka-kole jaKalunga, navandemone navatu vosena vaze vemanyina Kalunga nakole. Kufumaho mwakalingisa vatu vakwononoka vakayoye haya myaka yosena.—Kusoloka 19:16; 21:3, 4.