Vatu vavavulu mukaye vashinganyeka ngwavo chilika chaKulisimasi chapwa hichilika chakwanuka likumbi asemukile Yesu Kulishitu. Kutala mwalihulisaho lyehi ngwenu, uno vaka-Kulishitu vamulikulukaji lyamyaka lyakulivanga, vaze vayoyele hamwe naYesu navakiko valingilenga chilika chaKulisimasi tahi? Kutala mwatachikiza vyuma yahanjika Mbimbiliya hakwanuka makumbi akusemuka tahi? Kukumbulula vihula kanevi nachitukafwa tutachikize numba nge vaka-Kulishitu vatela kulinga chilika chaKulisimasi nyi chiku.

Chatete, Mbimbiliya kayahanjika vyachilika chakwanuka kusemuka chaYesu chipwe chamuka-kulemesa Kalunga umwe wakushishikako. Mbimbiliya yahanjika kaha havatu vavali vaze valingile vilika vyakwanuka kusemuka chavo. Ava vatu kavapwile vaka-kulemesa Yehova Kalunga uze vavuluka muMbimbiliyako, kaha nawa havilika kanevi valingile vyakwanuka makumbi akusemuka, hasolokelenga vyuma vyavipi chikuma. (Kuputuka 40:20; Mako 6:21) Mukanda waEncyclopædia Britannica wasolola nge vaka-Kulishitu vakulivanga valihendele “kuvilika vyakwanuka makumbi akusemuka vize valingilenga vaka-kulemesa tuponya.”

Mbimbiliya kayavuluka likumbi livene asemukile Yesuko. Mukanda waMcClintock and Strong’s Cyclopedia wamba ngwawo: “MuTesetamende Yayihya namumikanda yeka kavasonekamo likumbi asemukile Kulishituko.” Kachi nge Yesu asakile vaka-kumukavangiza valingenga chilika chakwanuka kusemuka chenyi, kachi avalwezele likumbi livene asemukile.

Chamuchivali, nahamwe hauchi muMbimbiliya vasolola ngwavo Yesu chipwe tumbaji twenyi valingilenga chilika chaKulisimasiko. Mukanda waNew Catholic Encyclopedia, wasolola nge chilika chaKulisimasi chatete vachivulukile mumukanda waChronograph uze vasonekelenga mwaka himwaka kuli chilolo Philocalus wamuLoma. Mukanda kana wapwileko muji 336 [C.E.].” Chikupu vene, echi chihande chaKulisimasi vachitakile omu valingile Mbimbiliya hivanayikumisa lyehi kuyisoneka, kaha nawa himunahichi lyehi makulukaji amyaka kufuma haze Yesu apwile hano hamavu. Echi chikiko chalingishile mukanda waMcClintock and Strong wambenga ngwawo “chilika chaKulisimasi kachafuma kuli Kalungako, kaha nawa kachatwama muTesetamende Yayihyako.” *

Yesu hakupwa Muka-kunangula Wamunene, ahanjikile hatoma vyuma vatelele kulinga vaka-kumukavangiza, kaha vyuma kana vavisoneka muMbimbiliya. Kavalwezele valingenga chilika chaKulisimasiko. Nganomu mulongeshi hashikola kasaka vaka-shikola valinge vyuma vize kavalwezele kulingako, naYesu kasaka vaka-kumukavangiza ‘vahambakanenga havyuma vasoneka’ muVisoneka Vyajilako.—Wavaka-Kolinde 1, 4:6.

Kwatwama chilika chimwe chachilemu chize vatachikijile chikuma vaka-Kulishitu vakulivanga, chilika chakwanuka kufwa chaYesu. Yesu alwezele tumbaji twenyi lwola vatela kulinga chilika kana namwakuchilingila. Eji jindongi nalikumbi lyakwanuka kufwa chenyi vyosena vavisoneka muMbimbiliya.—Luka 22:19; Wavaka-Kolinde 1, 11:25.

Nganomu tunashimutwila, vaka-Kulishitu vakulivanga kavalingilenga chilika chaKulisimasi chize valingilenga kuli vaka-kulemesa chamakuliko. Kaha nawa Mbimbiliya kayavuluka ngwavo Yesu chipwe mutu weka alingilenga echi chilika chaKulisimasiko. Ou muchano tunashimutwila ukiko unakafwe vaka-Kulishitu vavavulu mukaye vamone ngwavo kavatela kulinga echi chilikako.