Mbimbiliya yamba ngwayo: “Mawana amwaza osena namawana akukupuka osena eji kufumanga mwilu, eji kwizanga kufuma kuli Ise yavyuma vyakumunyika.” (WaYakova 1:17) Echi chisoneka chasolola muchima wazumbu atwama nawo Setu wamwilu, Yehova Kalunga. Oloze hamawana osena atuhana Kalunga, kwatwama wana uze wapwa waulemu chikuma. Wana muka? Mazu aYesu aze vatachikiza vatu vosena, aze vasoneka hali Yowano 3:16, amba ngwawo: “Kalunga azangile chikuma kaye ngocho ahanyine Mwanenyi umwe kaha wakulipwila, mangana ngwenyi weshowo mwamufwelela vakahone kumunongesa, oloze akapwe nakuyoya chahaya myaka yosena.”

Wana uze atuhanyine Kalunga hakututumina Mwanenyi umwe kaha wakulipwila wapwa chikupu hiwana waulemu chikuma mwomwo wana kana ukiko watulingisa vatusokole kuundungo washili, naushinakaji, nakufwa. (Samu 51:5; Yowano 8:34) Numba tuhundangana ngachilihi, katweshi kuhasa kulisokola etu vavene kuundungo kanouko. Oloze Kalunga hakutuzanga chikuma alingile chuma chimwe mangana atusokole. Yehova Kalunga hakuhana Mwanenyi umwe kaha wakulipwila, Yesu Kulishitu kupwa ndando yakusokola, akafwa vatu vakwononoka vapwenga nalutalililo lwakukayoya haya myaka yosena. Uno ndando yakusokola yapwa chuma muka? Mwomwo ika twasakiwila ndando kana? Tunahase kunganyala ngachilihi kundando kana?

Ndando yakusokola yapwa jimbongo jize navafweta mangana valande cheka chuma vanajimbalisa chipwe vasokole mutu munjele. Mbimbiliya yatulweza ngwayo visemi jetu vatete, vaAlama naEve vapwile vakukupuka kavapwile nashiliko, kaha nawa vapwile nalutalililo lwakuyoyela mupalachise hano hamavu haya myaka yosena hohamwe navana vavo navasema. (Kuputuka 1:26-28) Chaluvinda, vajimbalishile kutokwa chosena echi hakulikanga kuli Kalunga, ngocho vapwile vaka-shili. Vyuma muka vyasolokele jino? Mbimbiliya ngwayo: “Nge muze shili yengilile mukaye kuhichila muli mutu umwe nakufwa nawa kuhichila mushili, ngocho kufwa chatanda kuli vatu vosena mwomwo vosena valingile shili.” (Wavaka-Loma 5:12) Alama ahichikishilemo vana venyi hakuvatambwisako shili nakufwa, muchishishisa chakuvalingisa vapwenga vakukupuka.

Ndando yakusokola yatela kulitombola nachuma chize chinajimbala. Omu Alama alikangile kuli Kalunga alingile shili, kahechi chamulingishile ajimbalise kuyoya chakukupuka mwosena. Kweseka naMbimbiliya, kulikanga kana chengishile vana vaAlama muundungo washili nakufwa. Ngocho kwasakiwile kuyoya chamutu wakukupuka Yesu mangana atusokole muundungo kana. (Wavaka-Loma 5:19; Wavaka-Efwesu 1:7) Kalunga hakuhana eyi ndando yakusokola chalingisa vatu vapwenga jino nalutalililo lwakukalivwisa kuwaha vyuma ajimbalishile Alama naEve, kulumbununa kuyoyela mupalachise hano hamavu.—Kusoloka 21:3-5.

Hakuwana nge ndando yakusokola yikiko nayikatulingisa tukayoye haya myaka yosena kulutwe, ngocho wapwa hiwana waulemu chikuma hamawana osena atuhana Kalunga. Hakusaka tusolole numba nge twasakwilila ‘hawanou wakukupuka’, tushimutwilenu vishina vize twashimutwilanga muchihande chinafumuho vize vinahase kulingisa vaze navautambula vawahilile.

Wana uze nautusuulwisa. Tuvosena twasaka kuyoya lika. (Muka-kwambulula 3:11) Ngocho wana wandando yakusokola ukiko naukatulingisa tukayoye lika,  keshi halwetuko. Mbimbiliya yamba ngwayo: “Mwomwo fweto yashili kufwa, oloze wana uze Kalunga eji kuhananga ukiko vene kuyoya chahaya myaka yosena kuhichila muli Kulishitu Yesu Mwata wetu.”—Wavaka-Loma 6:23.

Twasakiwile wana kana. Vatu kaveshi kuhasa kulifwetela vavene ndando yakusokolako. Mbimbiliya yalumbununa ngwayo: “Ndando yakusokola mwono wamutu yapwa yayikalu chikuma, ngocho kaveshi kahasa kuyifwetako.” (Samu 49:8) Ngocho twapwile nakusakiwa chikuma kutukafwa kuli Kalunga mangana tusokoke muundungo washili nakufwa. Oloze atuhanyine chuma twapwile nakusakiwa, chikiko ‘kutusokola nandando yakusokola yaKulishitu Yesu.’—Wavaka-Loma 3:23, 24.

Vauhanyine halwola lwakutamo. Mbimbiliya yatulweza ngwayo: “Shimbu twapwilenga tuvaka-shili, Kulishitu atufwilile.” (Wavaka-Loma 5:8) Hakuwana nge ou wana wandando yakusokola vauhanyine “shimbu twapwile tuvaka-shili,” echi chatukafwa tufwelele ngwetu Kalunga atuzanga chamokomoko nashili eyi twaswana. Kaha twatalilila kulwola luze natukasokoka kushili, eyi tuli nakulipika nayo oholyapwa.

Wana kana wasolola nge Kalunga atuzanga. Mbimbiliya yalumbununa hatoma vyuma vyalingishile Kalunga asuule Mwanenyi kupwa ndando yakusokola. Yamba ngwayo: “Omu mukiko Kalunga asolwelele zangi yenyi kuli etu hakutuma Mwanenyi umwe kaha wakulipwila mukaye mangana tukahase kupwa nakuyoya kuhichila muli ikiye. Eyi zangi yalumbununa nge, Kalunga ikiye atuzangile etu nakututumina Mwanenyi kupwa wana wakufwika hajishili jetu, keshi nge etu yetu twazangile Kalungako.”—WaYowano 1, 4:9, 10.

Munahase kusolola ngachilihi ngwenu mwasakwilila ou wana waulemu atuhana Kalunga? Anukenu mazu aYesu ahali Yowano 3:16 ngwavo, vaze ‘navamufwelela’ vakiko kaha navakayovoka. Mbimbiliya yalumbununa ngwayo, “lufwelelo lwapwa kuvandamina namuchima wakukunyuka vyuma vize twatalilila.” (WavaHepeleu 11:1) Twatela kupwa nachinyingi chakwoloka numbanyi tupwenga nalufwelelo lwamuyachou. Ngocho tuli nakumikolezeza muwaneko lwola lwakulinangula vyaYehova Kalunga uze atuhana ou ‘wana wakukupuka,’ nakutachikiza nawa vyuma mwatela kulinga numbanyi nayenu mukalivwise kuwaha kuyoya chahaya myaka yosena chize nachikapwako mwomwo yawana wandando yakusokola ahanyine Yesu.

Munahase kulinangula vyosenevi hakukekesa vyuma yanangula Mbimbiliya vize vyatwama ha www.pr418.com. Vinjiho jaYehova vanahase kumikafwa chikuma. Tunafwelela ngwetu omu namulinangula vyavivulu nakunganyala kuwana kanou, nachimilingisa muhanjike mazu awa akwamba ngwavo: “Ngunamusakwilila Kalunga kuhichila muli Yesu Kulishitu Mwata wetu!”—Wavaka-Loma 7:25.