Awa mazu vawahanjikile kuli kanyike wapwevo wamyaka 13 omu vamuhanyine kawa kupwa wana. Muka-kusekasana umwe wapwevo ambile ngwenyi kopyuta amuhanyine ise omu apwile kushikola yapwile wana waulemu chikuma. Kaha nawa samwenga umwe ambile ngwenyi kati amutungilile puwenyi yapwile hiwana wakulipwila hamawana osena atambulaho lyehi.

Mwaka himwaka vatu vavavulu veji kutondatondanga vyuma vyavilemu vize vanahase kuhana masepa javo navausoko wavo kupwa wana. Kaha vavavulu nge vanahane wana vasaka kwivwa mazu nge awa vahanjikile ava vatu tunavuluka lyehi. Nyi ngachilihi yenu? Uno mwasaka kuhana chipwe kutambula wana uze weji kwivwisanga kuwaha tahi?

Kutambula chipwe kuhana wana wakulipwila chapwa chamwaza mwomwo cheji kwivwisanga kuwaha mutu uze nahane wana nauze vene nautambula. Mbimbiliya yamba ngwayo: “Kuhana cheji kunehanga kuwahilila chikuma kuhambakana kutambula.” (Vilinga 20:35) Chikupu vene, kuhana cheji kunehanga kuwahilila chikuma kachi nge uze mwautambula mwaumona kupwa waulemu.

Uno vyuma muka mwatela kulinga numba mawana namuhananga amivwise kuwaha enu vavene navaze namuhana? Nge kamweshi nawana wakulipwila uze munahase kuhanako, kaha vyuma muka mwatela kulinga mangana vamisakwilile chikuma hakala wana namuhana?