1, 2. (a) Vyuma muka ahanjikile Yehova ngwenyi navikasoloka mulwola lwetu luno? (b) Vihula muka vize natukumbulula muchihande chino? (Talenu muvwimbimbi wakulivanga.)

KUTALISA kulwola luno tuli nakuyoyelamo, Yehova ambile ngwenyi, “malunga likumi vakumalimi akumafuchi osena navakakwata kuchikuto chakaYuleya nakwamba ngwavo: ‘Natuya nayove mwomwo tunevu ngwavo Kalunga ali nayove.’” (Zekaliya 8:23) Ou ‘kaYuleya’ emanyinako vatu vaze Kalunga awavisa nashipilitu yenyi yajila. Vatu kana vavavuluka nawa ngwavo, “Isalele yaKalunga.” (Wavaka-Ngalesha 6:16) “Malunga likumi” vemanyinako vatu vaze vakwechi lutalililo lwakukayoya hano hamavu haya myaka yosena. Vatachikiza ngwavo, Yehova nakisula eli lizavu lyavawavisa, kaha nawa vamona nge kumulemesela hamwe navakiko chapwa hikutokwa chachinene.

² Ngana muze ahanjikile kapolofweto Zekaliya, Yesu ambile ngwenyi vatu jaKalunga navakalinunga hamwe. Yesu alumbunwine nge vaze vakwechi lutalililo lwakuyoyela mwilu vapwa “utanga wamikoko waundende,” kaha vaze vatalilila kukayoyela hamavu vapwa “mikoko veka.” Yesu ambile ngwenyi, naukapwanga “utanga umwe” uze  naukamukavangizanga ikiye kupwa “kafunga [kavo] umwe.” (Luka 12:32; Yowano 10:16) Hakuwana nge apwa mazavu avali, vatu vamwe vanahase kuhulisa ngwavo: (1) Uno mikoko veka vatela kutachikiza majina avosena vaze vawavisa makumbi ano tahi? (2) Uno vawavisa vatela kulimona ngachilihi vavene? (3) Nge mutu umwe muchikungulwilo chami mwaputuka kulya mbolo nakunwa vinyo haKwanuka Kufwa chaMwata, uno ngwatela kumumona ngachilihi? (4) Kutala ngwatela kulizakamina nge nangumona kuvula chavaze veji kulyanga mbolo nakunwa vinyo haKwanuka Kufwa chaMwata chili nakutohwelako lika tahi? Chino chihande nachikumbulula vihula kanevi.

3. Mwomwo ika katweshi kuhasa kutachikiza chikupu majina avaze navakapwa hali vaze 144,000?

³ Uno mikoko veka vatela kutachikiza majina avosena vaze vawavisa vachili hano hamavu makumbi ano tahi? Nduma. Mwomwo ika? Mwomwo mutu naumwe wauchi nahase kutachikiza chikupu nge vawavisa vosena navakatambula fweto yavo. ^[1] (Talenu kwinyikila chakusongo yachihande.) Numba tuhu Kalunga ikiye navasanyika vakaye mwilu, oloze navakatambula fweto yavo kuvanga kaha nge navapwa lika vakushishika. Satana atachikiza chuma kanechi, kaha eji kuzachisanga “vapolofweto vamakuli” mangana ‘ahungumwise’ vatu kana. (Mateu 24:24) Vaka-Kulishitu vawavisa kaveshi kuhasa kwinjikiza chikupu ngwavo navakatambula fweto yavoko, palanga nomu Yehova mwakavalweza ngwenyi chikupu vene vanashishika nakusongo. Yehova eji kulamikanga vawavisa vamwe tutachikijilo twamakumishilo shimbu kanda vafwenga, kaha vakwavo mwakavalamika tutachikijilo kana kwakamwihi ‘naluyando lwalunene.’—Kusoloka 2:10; 7:3, 14.

4. Kachi nge chapwa chachikalu kutachikiza majina avosena vaze vawavisa vali hano hamavu makumbi ano, kutala tunahase ngachilihi ‘kuya’ navo?

⁴ Kachi nge chapwa chachikalu kutachikiza majina avosena vaze vawavisa vali hano hamavu makumbi ano, kutala mikoko veka vanahase ngachilihi ‘kuya’ navo? Mbimbiliya yamba ngwayo, “malunga likumi” “navakakwata kuchikuto chakaYuleya nakwamba ngwavo: ‘Natuya nayove mwomwo tunevu ngwavo Kalunga ali nayove.’” Numba tuhu Mbimbiliya muvesi kaneyi yavuluka kaYuleya umwe hakwamba ngwayo “yove,” oloze lizu kana lyatalisa kuvatu vavavulu. Echi chalumbununa nge ou kaYuleya kapwa mutu umweko, oloze emanyinako lizavu lyosena lyavawavisa. Mikoko veka vatachikiza chuma kana, kaha veji kuzachilanga Yehova hamwe nalizavu kaneli. Kachasakiwa kuli vakiko kutachikiza majina avawavisa nakukavangiza mutu himutu wamulizavu kanako. Mbimbiliya yatulweza ngwayo twatela kukavangizanga kaha Yesu, mwomwo ikiye Twamina yetu.—Mateu 23:10.

5. Mazu muka akuhuhumuna aze vawavisa vatela kushinganyekangaho kanawa, kaha mwomwo ika?

⁵ Vawavisa vatela kushinganyeka kanawa mazu akuhuhumuna atwama hali Wavaka-Kolinde 1, 11:27-29. (Tangenu.) Uno muka-Kulishitu vawavisa nahase ngachilihi kulya mbolo nakunwa vinyo “mujila yakuzeneka kutela” haKwanuka Kufwa chaMwata? Nge keshi  kulama usoko wamwaza naYehovako mwomwo yakuhona kupwa wakushishika kuli ikiye, kaha mutu kana keshi nakusolola kavumbi hakulya mbolo nakunwa vinyoko. (WavaHepeleu 6:4-6; 10:26-29) Mazu awa akuhuhumuna eji kwanukisanga vawavisa vapwenga lika vakushishika numba vakatambule “fweto yakusanyika chaKalunga chamwilu kuhichila muli Kulishitu Yesu.”—Wavaka-Fwilipi 3:13-16.

6. Uno vaka-Kulishitu vawavisa vatela kulimona ngachilihi vavene?

⁶ Paulu alwezele vaka-Kulishitu vawavisa ngwenyi: “Ami funge muli Mwata, ngunamilembelela mutambukenga nganomu mwatela kusanyika kana chize vamisanyikile.” Uno vanahase kulinga ngachilihi ngocho? Paulu alumbunwine ngwenyi: “Nakulinyisa chosena, nakuvova, nakutalilila chikoki, nakuliula tutenga twavakwenu muzangi, nakufwilanga kulama kulinunga chenu hamwe mushipilitu chize cheji kuminunganga hamwe mukuunda.” (Wavaka-Efwesu 4:1-3) Eyo, shipilitu yajila yaYehova yeji kukafwanga vangamba jenyi vapwenga vakulinyisa. (Wavaka-Kolose 3:12) Ngocho vawavisa kavashinganyeka nge vapwa vavalemu kuhambakana vakwavoko. Vatachikiza ngwavo Yehova keshi kuvahana chikuma shipilitu yenyi yajila kuhambakana mikoko vekako. Kaha nawa vashinganyeka nge keshi vakiko kaha vanahase kwivwishisa chikuma muchano wamuMbimbiliya kuhambakana kala mutuko. Cheka nawa, kaveshi kulweza mutu ngwavo vanamuwavisa lyehi, ngocho atela kuputuka kulya mbolo nakunwa vinyo haKwanuka Kufwa chaMwatako. Mwomwo vatachikiza ngwavo Yehova kaha ikiye eji kusanyikanga vaze veji kuyanga mwilu.

7, 8. Vyuma muka vize kavasaka vaka-Kulishitu vawavisako, kaha mwomwo ika?

⁷ Numba tuhu vawavisa vatachikiza ngwavo chapwa hikutokwa chachinene kuvasanyika nakuya mwilu, oloze kavasaka vatu vavamonenga mujila yakulipwilako. (Wavaka-Efwesu 1:18, 19; tangenu Wavaka-Fwilipi 2:2, 3.) Kaha nawa vatachikiza ngwavo omu Yehova avawavishile, kalwezele vatu veka chuma kanechiko. Ngocho mutu uze vawavisa keshi kulikomokela nge vakwavo navahona kwitavila hahaze vene ngwavo vanamuwavisa. Kaha nawa eji kutachikizanga ngwenyi Mbimbiliya yatuhuhumuna nge katwatela kwitavila washi mutu nge mwatulweza ngwenyi Kalunga namuhane milimo yakulipwilako. (Kusoloka 2:2) Hakuwana nge mutu uze vawavisa kasaka vatu vamumone mujila yakulipwilako, ngocho keshi kulweza vatu mwawana halwola lwatete ngwenyi vanamuwavisako. Naikiye vene, mutu uze vawavisa chikupu keshi kuhasa kulweza vakwavo chuma kanako. Kaha nawa katela kulitukwojola hamilimo yamwaza mwakazata mwiluko.—Wavaka-Kolinde 1, 1:28, 29; tangenu Wavaka-Kolinde 1, 4:6-8.

⁸ Vaka-Kulishitu vawavisa kavatela kushinganyeka ngwavo vatela kushikamanga kaha navakwavo vawavisako, nduma, mwomwo kulinga ngocho nachisolola nge vanatungu kalizavu kavo kakulipwila. Kaveshi kufwila kutondatonda vakwavo vawavisa mangana vashimutwilenga vihande vyakupandama kukuwavisa chipwe vatunge tumazavu twakulinangulanga Mbimbiliyako. (Wavaka-Ngalesha 1:15-17) Kachi nge navalinga chuma kana, kaha chikungulwilo kacheshi kulinungako. Mwomwo echi nachipwa kwimanyina nakole shipilitu yajila, yize yeji kulingisanga vatu jaKalunga vatwame mukuunda nakulinunga hamwe.—Tangenu Wavaka-Loma 16:17, 18.

9. Mwomwo ika twatela kuzangama najila tweji kumwenangamo vaze veji kulyanga mbolo nakunwa vinyo haKwanuka Kufwa chaMwata? (Talenu lipwata lyakuvuluka ngwavo, “ Zangi ‘Kayeshi Kulinga Mwakuhingamako.’”)

⁹ Uno mwatela kuvamona ngachilihi vandumbwetu vawavisa? Yesu alwezele tumbaji  twenyi ngwenyi: “Muvosena mwapwa muvandumbu.” Ambile nawa ngwenyi: “Weshowo mwalitohwesa ivene navakamwinyisa, kaha weshowo mwalinyisa ivene navakamutohwesa.” (Mateu 23:8-12) Ngocho nachipwa chakuhenga kumona mutu kupwa wamulemu chikuma, numba apwa ndumbwaKulishitu uze vawavisa nyi chiku. Numba tuhu Mbimbiliya yatulweza tulondezeze lufwelelo lwavakulwane muchikungulwilo, oloze yatuhuhumuna tuhone kumona kala mutu kupwa hitwamina yetu. (WavaHepeleu 13:7) Pundu vene, Mbimbiliya yamba ngwayo, vamwe “vatela kuvahana kavumbi kakanene.” Chapwa ngocho mwomwo “veji kutwaminyinanga mujila yamwenemwene,” kaha nawa “veji kuzatanga chikuma milimo yakuhanjika nakunangula,” keshi nge mwomwo vavawavisako. (WaChimoteu 1, 5:17) Nge natulemesa vaze vawavisa nakuvamona nge hitulunga, kaha tunahase kuvevwisa sonyi. Chikumanyi, natuvalingisa valivwimbe. (Wavaka-Loma 12:3) Naumwe wauchi atela kulinga kala chuma chize nachilingisa vandumbu jaKulishitu vawavisa vahukane.—Luka 17:2.

10. Uno namusolola ngachilihi nge mwavumbika vaka-Kulishitu vawavisa?

¹⁰ Uno natusolola ngachilihi nge twavumbika vatu vaze Yehova awavisa? Katweshi kuvahulisa vatulweze omu vavawavishileko. Mwomwo chuma kana vatela kuchitachikiza kuli mutu ivene, oloze etu katweshi nalisesa lyakutachikiza chuma kanako. (Wavaka-Tesolonyika 1, 4:11; Wavaka-Tesolonyika 2, 3:11) Kaha nawa katwatela kushinganyeka nge malunga javo, chipwe mapwevo javo, chipwe visemi javo, chipwe vausoko wavo veka navakiko vapwa vakuwavisako. Mutu keshi kuswana lutalililo lwenyi kufuma kuli vaka-tanga yenyiko. (Wavaka-Tesolonyika 1, 2:12) Katwatela nawa kuhulisa vihula vize navivwisa vakwetu kumuchima kupihyako. Chakutalilaho, katwatela kuhulisa pwevo lyandumbwetu vawavisa omu eji kushinganyekanga hakukayoyela hano hamavu haya myaka yosena chakuzeneka muka-mahyenyiko. Tuvosena twatachikiza chikupu ngwetu mukaye kakahya, Yehova mwakekuchisa “vyuma vyakuyoya vyosena.”—Samu 145:16.

11. Uno kuhona kumona vatu vamwe kupwa vavalemu chikuma kuhambakana vakwavo, nachitukinga ngachilihi?

¹¹ Nge katweshi kumona vawavisa kupwa vavalemu chikuma kuhambakana vatu vekako, kaha natulikinga etu vavene. Mujila muka? Mbimbiliya yatulweza ngwayo, muchikungulwilo munahase kupwa ‘navandumbwetu vamakuli’ vaze vanahase kwamba ngwavo vavawavisa. (Wavaka-Ngalesha 2:4, 5; WaYowano 1, 2:19) Kaha nawa vawavisa vamwe vanahase kuhona kupwa vakushishika palanga nakusongo. (Mateu 25:10-12; WaPetulu 2, 2:20, 21) Chapwa chakuhenga kumona vatu vamwe kupwa vavalemu chikuma kuhambakana vakwavo, mwomwo echi nachitukafwa tuhone kukavangiza kala mutu, chipwe vene uze vawavisa, chipwe uze vatachikiza chikuma vatu, chipwe uze nazachila Yehova hamyaka yayivulu. Nge navahona kutwalaho lika kupwa vakushishika chipwe nge navaseza chikungulwilo, etu katweshi kulitwamina kufwelela Yehova chipwe kulitwamina kumuzachilako.—WaYuta 16.

12, 13. Mwomwo ika katwatela kulizakamina hakuvula chavatu vali nakulya mbolo nakunwa vinyo haKwanuka Kufwa chaMwatako?

¹² Hamyaka yayivulu, kuvula chavatu vaze vanalinga mbolo nakunwa vinyo haKwanuka Kufwa chaMwata chinapunga nakukehelangako lika. Oloze mumyaka yakalinwaha, vatu kana vanavulilangako lika mwaka himwaka. Uno twatela kulizakamina hachuma kana tahi? Nduma. Tuchitalenu ovyo katwatela kulizakaminako.

 ¹³ “Yehova atachikiza vaze vanapu venyi.” (WaChimoteu 2, 2:19) Vandumbwetu vaze veji kulavanga vatu vaze vanali mbolo nakunwa vinyo haKwanuka Kufwa chaMwata kavatachikiza chikupu mutu uze vanawavisa kuli Yehovako. Ngocho havatu kanava veji kulavanga, hatwama navaze veji kushinganyekanga ngwavo vanavawavisa, kumana chiku. Chakutalilaho, vatu vamwe vaze valilenga mbolo nakunwa vinyo vanalitwamina jino. Veka vanalinga mbolo nakunwa vinyo mwomwo yakuviza muwongo chipwe mwomwo yakuvayangila, kaha vashinganyeka ngwavo navakayula hamwe naKulishitu mwilu. Chikupu vene, katwatachikiza kuvula chavaze vawavisa vachili hano hamavuko.

14. Vyuma muka yahanjika Mbimbiliya kutalisa kukuvula chavaze vawavisa navakapwako hamavu omu nalukaputuka luyando lwalunene?

¹⁴ Kuvihela vyavivulu hano hamavu nakukapwa vawavisa halwola mwakeza Yesu nakuvambata nakuya navo mwilu. Mbimbiliya yamba ngwayo, Yesu “mwakatuma vangelo jenyi naluneta lwakutezuka chikuma, kaha navakakungulwila hamwe vatu jenyi asakula kufuma kumitamba yiwana, kufuma kusongosongo yamelu mbwe nakusongosongo yikwavo.” (Mateu 24:31) Mbimbiliya nawa yasolola nge hamakumbi akukuminyina, hamavu nahakasala vawavisa vavandende kaha. (Kusoloka 12:17) Oloze kayasolola kuvula chavaze vawavisa vatela kukapwako halwola nalukaputuka luyando lwaluneneko.

15, 16. Vyuma muka twatela kutachikiza hali vaze 144,000 asakula Yehova?

¹⁵ Yehova ikiye atachikiza lwola eji kusakulanga vawavisa. (Wavaka-Loma 8:28-30) Yehova aputukile kusakula vawavisa kufuma hakusangula Yesu. Chasoloka nge mulikulukaji lyamyaka lyakulivanga, vaka-Kulishitu vamuchano vosena vapwile vakuwavisa. Hamyaka  yayivulu yahichilemo, vatu vavavulu vaze valivulukilenga kupwa vaka-Kulishitu kavakavangijilenga Kulishituko. Chipwe ngocho, hamyaka kana yize, Yehova awavishileko vavandende kaha vaze vapwile vaka-Kulishitu vamuchano. Vapwilenga nge tiliku yize Yesu ambile ngwenyi yikolele hamwe namwila. (Mateu 13:24-30) Mumakumbi ano akukuminyina, Yehova anakusakulanga vatu vakapwe hamukana wavaze 144,000. ^[2] (Talenu kwinyikila chakusongo yachihande.) Nge Kalunga ali nakusaka kusakula vatu vakwavo vapwenga vawavisa shimbu kanda kukuma chizenga, kaha twatela kufwelela ngwetu ali nakulinga chuma chakwoloka. (Isaya 45:9; Ndanyele 4:35; tangenu Wavaka-Loma 9:11, 16.) ^[3] (Talenu kwinyikila chakusongo yachihande.) Twatela kuzangama, mokomoko natulinga nge muze valingile vaka-kuzata vaze vayayavalile kuli mwata wavo mwomwo yakuvahana fweto yakuteseka hamwe navaze engishile milimo haola yakukuminyina.—Tangenu Mateu 20:8-15.

¹⁶ Keshi nge vosena vaze vatwama nalutalililo lwakukayoyela mwilu vapwa lizavu ‘lyandungo wakushishika wakuzangamako.’ (Mateu 24:45-47) Ngana muze chapwile mulikulukaji lyamyaka lyakulivanga, Yehova naYesu vanazachisanga lizavu lyalindende mangana lilise, chipwe kunangula vatu vavavulu. Mulikulukaji lyamyaka lyakulivanga, Kalunga azachishile vaka-Kulishitu vawavisa vavandende kaha mangana vasoneke Visoneka VyachiHelase vyaVaka-Kulishitu. Makumbi ano nawa, vaka-Kulishitu vawavisa vavandende kaha vakiko vakwechi mulimo wakuhana vatu jaKalunga ‘kulya halwola lwakutamo.’

17. Vyuma muka tunalinangula muchihande chino?

¹⁷ Vyuma muka tunalinangula muchihande chino? Yehova mwakahana vatu jenyi vavavulu kuyoya chahaya myaka yosena hano hamavu, kaha veka mwakavahana kuyoya mwilu muze navakayula hamwe naYesu. Yehova mwakahana fweto vangamba jenyi vosena, ‘nakaYuleya’ navaze “malunga likumi,” kaha nawa asaka vononoke jishimbi jojimwe nakupwa lika vakushishika. Vosena vatela kupwa vakulinyisa. Vosena vatela kuzachila hamwe Kalunga nakupwa vakulinunga. Kaha nawa vosena vatela kukilikita nangolo mangana muchikungulwilo mupwenga lika kuunda. Omu tuli nakupandama kwakamwihi nakukuma chakano kaye, twatela kutwalaho lika kuzachila Yehova nakukavangiza Kulishitu hakupwa utanga umwe.