1, 2. (a) Uno ‘wana wakanyombo waKalunga uze wahambakana chikuma kuwaha’ ukwechi vyuma vyeka muka? (b) Vihula muka natushimutwila muchihande chino?

YEHOVA atuhanyine wana waulemu chikuma uze wasolola zangi yenyi hakutuma Mwanenyi azanga chikuma Yesu, kwiza hano hamavu nakutufwila. (Yowano 3:16; WaYowano 1, 4:9, 10) Kaposetolo Paulu avulukile wana kana ngwenyi ‘wana wakanyombo uze wahambakana chikuma kuwaha.’ (Wavaka-Kolinde 2, 9:15) Mwomwo ika Paulu azachishilile mazu kana awa?

² Paulu atachikijile nge vyuma vyamwaza vyosena vize ashika Kalunga navikatesamo mwomwo yawana waYesu. (Tangenu Wavaka-Kolinde 2, 1:20.) Echi chalumbununa nge ‘wana wakanyombo waKalunga uze wahambakana chikuma kuwaha’ watwama navyuma vyavivulu keshi wana waYesu kahako. Watwama nawa nakuwaha chaYehova chosena nazangi yenyi yakwilila vize eji kutusolwelanga. Wana kana wapwa waukalu chikuma kuulumbununa mujila yize tunahase kwivwishisa kanawa. Uno ou wana wakulipwila unahase kutulingisa twivwenga ngachilihi? Kaha wana kanou watela  kutulingisa tulinge vyuma muka omu tuli nakuliwahisa vyaKwanuka Kufwa chaKulishitu haChitatu, March 23, 2016?

3, 4. (a) Uno mweji kwivwanga ngachilihi nge mutu mwamihana wana? (b) Uno wana wakulipwila unahase kwalumuna ngachilihi chiyoyelo chenu?

³ Tweji kwivwanga kuwaha nge mutu mwatuhana wana. Oloze mawana amwe veji kutuhananga apwa amalemu chikuma mwomwo anahase kwalumuna chiyoyelo chetu. Achishinganyekenu, munavulumuna mulonga waunene, ngocho vali nakusaka kumijiha. Oloze kukasumuka mutu uze kamwatachikizako himwalisuula vamujihe ikiye muchishishisa chakujiha yenu. Uno namwivwa ngachilihi hakulisuula chayou mutu?

⁴ Chuma kanechi chinapu hiwana waulemu mwomwo nachimilingisa mwalumuneko vyuma vimwe mukuyoya chenu. Chamuchano vene, namufwila kupwa chikuma nazumbu, nakuzanga vakwenu nakuvakonekela numba tuhu vanamilinginga mwamupi. Mukuyoya chenu chosena namufwilanga kusolola nge mukwechi muchima wakusakwilila chikuma hachuma chize vamilingililile.

5. Mujila muka wana wandando yakusokola uze atuhana Kalunga wapwila waulemu chikuma kuhambakana mawana eka osena?

⁵ Wana wakulipwila wandando yakusokola uze ahanyine Kalunga, wapwa waulemu chikuma kuhambakana wana ou tunashimutwila. (WaPetulu 1, 3:18) Achitalenu hachuma echi: Tuvosena twaswana shili kufuma kuli Alama, kaha shili kana yeji kunehanga kufwa. (Wavaka-Loma 5:12) Zangi yalingishile Yehova atume Yesu ezenga hano hamavu mangana “ahase kufwila vatu vosena.” (WavaHepeleu 2:9) Oloze wana ahanyine Yesu naukalinga vyuma vyavivulu, naukafumisako kufwa haya myaka yosena. (Isaya 25:7, 8; Wavaka-Kolinde 1, 15:22, 26) Vatu vosena vaze veji kufwelelanga Yesu, numba navakapwa vyamyangana hamwe naKulishitu mwilu, chipwe navakapwa hamukana wavatu vaze navakayula kuWangana waKalunga hano hamavu, vosena navakatwamanga mukuunda nakuwahilila haya myaka yosena. (Wavaka-Loma 6:23; Kusoloka 5:9, 10) Uno wana uze atuhana Yehova watwama navyuma muka vikwavo?

6. (a) Vyuma muka vyamwaza kutalisa kuwana atuhana Yehova vize muli nakutalilila kulutwe? (b) Vulukenu vyuma vitatu vize wana waKalunga nautukunyula tulinge?

⁶ Mavu navakawalumuna kupwa palachise, kaha vaveji navakavoka, navafu nawa navakavasangula. Evi navikiko vinapu wana uze atuhana Kalunga. (Isaya 33:24; 35:5, 6; Yowano 5:28, 29) Twazanga Yehova naMwanenyi hakutuhana ou ‘wana wakanyombo uze wahambakana chikuma kuwaha.’ Uno wana kanou nautukunyula tulinge ika? Nautukunyula tulinge vyuma vino vitatu: (1) kulondezeza kanawa Kulishitu Yesu, (2) kuzanga vandumbwetu, (3) kukonekelanga vakwetu namichima yetu yosena.

7, 8. Uno zangi yaKulishitu yatukafwa ngachilihi, kaha nayitukunyula tulinge vyuma muka?

⁷ Chatete, twatela kufwila kuvumbika Yesu mukuyoya chetu chosena. Kaposetolo Paulu ambile ngwenyi: “Zangi yize atwama nayo Kulishitu, yeji kutukunyulanga.” (Tangenu Wavaka-Kolinde 2, 5:14, 15.) Paulu atachikijile ngwenyi, nge natwitavila zangi yaYesu, kaha nayitukafwa tuzange Yesu nakumuvumbika. Chikupu vene, nge natutachikiza kanawa vyuma vize atulingila Yehova, kaha zangi yenyi nayitukunyula tuyoye mujila yize nayisolola nge twavumbika Yesu. Uno natuhasa ngachilihi kulinga ngocho?

⁸ Kuzanga Yehova nachitulingisa tulondezeze Yesu nakukavangiza kanawa mujitambo jenyi. (WaPetulu 1, 2:21; WaYowano 1, 2:6) Nge natwononoka Kalunga naKulishitu, kaha natusolola nge twavazanga chikuma. Yesu ambile  ngwenyi: “Weshowo etavila jishimbi jami nakujilamanga, ou ikiye anguzanga ami. Kaha nawa weshowo anguzanga ami, navamuzanga kuli Tata, kaha ami nawa nangumuzanga nakulisolola hatoma kuli ikiye.”—Yowano 14:21; WaYowano 1, 5:3.

9. Vyuma muka vanahase kutushinyinyika vatu vamukaye?

⁹ Mungonde yino yaKwanuka Kufwa chaMwata, nachipwa chamwaza kushinganyeka hakuyoya chetu. Lihulisenu ngwenu: ‘Vyuma muka vize nguli nakulinga hakulondezeza Yesu? Kaha vyuma muka vyeka ngwatela kuzachilaho?’ Chapwa chachilemu chikuma kulihulisa etu vavene vihula kanevi mwomwo vatu mukaye vali nakusaka tulinge vyuma vize veji kulinganga vakiko. (Wavaka-Loma 12:2) Twatela kuzangama, mokomoko vatu vamukaye vanahase kutushinyinyika tulondezeze valongeshi, navatu vaze vaya puho, navaze vafumakana muvyuma vyakuhemahema. (Wavaka-Kolose 2:8; WaYowano 1, 2:15-17) Tunahase kuhonesa ngachilihi ukalu kanou?

10. Vihula muka twatela kulihulisa mungonde yino yaKwanuka Kufwa chaMwata, kaha kukumbulula chetu vihula kana nachitukunyula tulinge vyuma muka? (Talenu muvwimbimbi wakulivanga.)

¹⁰ Nachipwa chamwaza chikuma mungonde yaKwanuka Kufwa chaMwata kukekesa uvwalo wetu, najivindiyo tweji kutalanga, namyaso twasaka, navyuma vili hajikopyuta jetu, nahajishinga, nahatumakina vavuluka ngwavo tablet. Lihulisenu ngwenu: ‘Kachi nge Yesu ali aha, kaha mwamona uvwalo ngunavwale, kutala nangwivwa sonyi tahi?’ (Tangenu WaChimoteu 1, 2:9, 10.) ‘Kutala uvwalo wami weji kusololanga nge ngweji kukavangizanga Kulishitu nyi? Uno Yesu mwawahilila kutala jivindiyo ngweji kutalanga tahi? Kutala nahase kwivwilila kumyaso yami nyi? Kachi nge Yesu mwalomba shinga chipwe tablet yami mangana azachiseko, kutala nangwivwa sonyi havyuma mwawanamo tahi? Uno chinahase kupwa chachikalu kulumbunwina Yesu ovyo ngwazangila kuhemahema chimwe chahajivindiyo tahi?’ Kuzanga Yehova chatela kutulingisa tumbile vyuma vize kavyatela vaka-Kulishituko, chamokomoko numba tuhu vyuma kana twavizanga chikuma. (Vilinga 19:19, 20) Omu twalihanyine kuli Yehova, twamushikile ngwetu natuvumbikanga Kulishitu mukuyoya chetu chosena. Shikaho, katwatela kulama vyuma vize navituhonesa kulondezeza Yesuko.—Mateu 5:29, 30; Wavaka-Fwilipi 4:8.

11. (a) Kuzanga Yehova naYesu cheji kutukunyula tuzate ngachilihi mulimo wakwambulula? (b) Uno zangi nayitukunyula tukafwe ngachilihi vandumbwetu muchikungulwilo?

¹¹ Kuzanga Yesu nachitulingisa twambulule mujimbu wamwaza nakunangula vatu natwima. (Mateu 28:19, 20; Luka 4:43) Kutala munahase kunoneka kanawa vyuma mungonde yaKwanuka Kufwa chaMwata mangana muzateko upayiniya wakukafwa wajola 30 chipwe 50 mumulimo wakwambulula tahi? Tuliwe walunga wamyaka yakusemuka 84, ashinganyekele nge keshi kuhasa kuzata upayiniyako mwomwo yaushinakaji nakuhona kulikangula kumujimba. Oloze vapayiniya vamungalila yenyi valisuwile kumukafwa. Vamukafwilenga mwakutambukila, nakusakula ngalila yize ahashile kuzachila. Ngocho ou ndumbwetu ahashile kuzata jola 30. Kutala munahase kukafwa ndumbwenu umwe muchikungulwilo mangana ahase kuzata upayiniya wakukafwa mukakweji waMarch chipwe waApril nyi? Numba tuhu vandumbwetu vamwe kaveshi kuhasa kuzata upayiniyako, oloze tuvosena tunahase kulondezeza Paulu hakuzachisa lwola lwetu nangolo jetu mangana tuzachile chikuma Yehova. Nge natulinga ngocho, kaha natusolola nge zangi yaYesu yinatukunyula. Uno zangi yaKalunga nayitukunyula tulinge vyuma muka vikwavo?

12. Zangi yaKalunga yatukunyula tulinge vyuma muka?

¹² Chamuchivali, zangi yaKalunga yatela kutukunyula tuzangenga vandumbwetu. Kaposetolo  Yowano asonekele ngwenyi: “Enu ngwazanga, kachi nge omu mukiko atuzangile Kalunga, kaha nayetu nawa twatela kulizanga navakwetu.” (WaYowano 1, 4:7-11) Kachi nge tuli nakusaka Kalunga atwivwile uselewa, kaha twatela kuzanga vandumbwetu. (WaYowano 1, 3:16) Uno natusolola ngachilihi nge twavazanga?

13. Chakutalilaho muka atuhana Yesu chize chasolola omu twatela kuzanga vakwetu?

¹³ Yesu atuhana chakutalilaho chize chasolola omu tunahase kuzanga vandumbwetu. Omu apwile hano hamavu, akafwile vatu vavavulu chikumanyi vaka-kulinyisa. Okilenga vaveji navitonji, atonesele tupuputa, nakujikula matwitwi atujika matwitwi, nakuka tumama. (Mateu 11:4, 5) Yesu kapwile nge vatwamina vamukwitavako, ikiye anangwilenga vatu vaze vasakile kutachikiza Kalunga. (Yowano 7:49) Azangile vatu kana ava vakulinyisa, kaha azachile nangolo mangana avakafwe.—Mateu 20:28.

14. Vyuma muka munahase kulinga mangana musolwele vandumbwenu zangi?

¹⁴ Ngonde yaKwanuka Kufwa chaMwata yapwa hilwola lwamwaza kushinganyeka omu tunahase kukafwilamo vandumbwetu muchikungulwilo chikumanyi vaze vanashinakajiwa. Kutala munahase kuvatambukila kujizuvo javo tahi? Kutala munahase kuvawahishilako vyakulya, nakuvakafwako milimo yimwe kuzuvo yavo, chipwe kuvambata muyenga navo kukukunguluka chipwe kuzata navo mumulimo wakwambulula nyi? (Tangenu Luka 14:12-14.) Chikupu vene, zangi yaKalunga yatela kumikunyula mangana muzangenga vandumbwenu.

15. Vyuma muka twatela kutachikiza?

¹⁵ Chamuchitatu, zangi yaYehova yeji kutukunyulanga tukonekelenga vandumbwetu. Tuvosena twaswana shili yaAlama yize yatunehela kufwa, ngocho naumwe wauchi nahase kuhanjika ngwenyi, “Ami kangweshi nakusakiwa ndando yakungusokolako.” Navangamba jaKalunga vakushishika navakiko vasakiwa wana wandando yakusokola. Tuvosena vatukonekela mukuli waunene. Mwomwo ika chapwila chachilemu kutachikiza chuma kanechi? Natuwana kukumbulula muchifwanyisa ahanjikile Yesu.

16, 17. (a) Vyuma muka natulinangula kuchifwanyisa ahanjikile Yesu chamwangana navandungo? (b) Vyuma muka muli nakufwila kulinga, omu namushinganyeka hachifwanyisa kanechi?

¹⁶ Yesu alwezele vatu chifwanyisa chamwangana uze akonekelele ndungo yenyi mukuli waunene wajindenali jakuheta ku 60,000,000. Oloze uze ndungo akanyine kukonekela mukwavo ndungo uze apwile namukuli wenyi waundende wajindenali jakuheta ku 100. Keke asolwele uze mwangana kuli uze ndungo, yatelelele kumukunyula atetele mukwavo. Mwangana apihilile chikuma omu evwile ngwavo uze ndungo yenyi akanyine kukonekela mukwavo uze apwile namukuli waundende. Kaha mwangana ambile ngwenyi: “Ove ndungo wakuhuka, ami ngwajimbangananga mukuli wove wosena omu wangulembelelanga. Kutala kawatelanga kutetela mukwenu ndungo ngana muze ngwakutetelangako nyi?” (Mateu 18:23-35, kwinyikila chamwishi) Ngana mwayou mwangana, Yehova atukonekela  tuvosena mukuli waunene. Uno zangi yaYehova nakutetela chenyi vyatela kutukunyula tulinge vyuma muka?

¹⁷ Omu tuli nakuliwahisa vyaKwanuka Kufwa chaMwata twatela kulihulisa ngwetu: ‘Kutala kuli ndumbwami uze nangwivwisa chikuma kukola kumuchima tahi? Uno chinangukaluwila kumukonekela tahi?’ Nge mukiko, kaha elu hilwola lwamwaza kulondezeza Yehova uze apwa “muka-kukonekela.” (Nehemiya 9:17; Samu 86:5) Nge natusakwilila Yehova hakututetela, kaha natutetelanga vandumbwetu nakuvakonekela namuchima wetu wosena. Nge katweshi kuzanga vandumbwetu nakuvakonekelako, kaha twatela kufwelela nge naYehova nawa keshi kutuzanga nakutukonekelako. (Mateu 6:14, 15) Kukonekela vandumbwetu kachalumbununa nge kavatwivwishile kumuchima kukolako, oloze nachitukafwa tukapwe vakuwahilila kulutwe.

18. Uno zangi yaKalunga yakafwile ngachilihi ndumbwetu umwe etavile tutenga twandumbwenyi?

¹⁸ Chikupu vene, chapwa chachikalu kwitavila tutenga twavandumbwetu. (Tangenu Wavaka-Efwesu 4:32; Wavaka-Kolose 3:13, 14.) Oloze ndumbwetu wapwevo Lily ahashile kulinga ngocho. ^[1] (Talenu kwinyikila chakusongo yachihande.) Akafwile tuliwe umwe walijina lyaCarol. Chakutalilaho, Lily atwalilenga Carol kweshokwo asakilenga kuya, nakumukafwa kulanda vyuma vyasakiwilenga nakumulingila vyuma vyeka vyavivulu. Chamokomoko navyuma vyosenevi alingilenga Lily, Carol lwola lwosena akaluwishilenga muchima wenyi. Oloze Lily atalilenga kaha havilinga vyaCarol vyamwaza nakumukafwa hamyaka yayivulu palanga nomu Carol avijile chikuma nakufwa. Numba tuhu Lily achiwanyinenga chachikalu kukafwa Carol, oloze ambile ngwenyi: “Nguli nakufwila chikuma kukamona Carol omu mwakasanguka, nakumutachikiza kanawa omu mwakakupuka mwosena.” Chamuchano vene, zangi yaKalunga nayitukunyula twitavile tutenga twavandumbwetu nakutalilila kulwola luze tutenga twavatu vosena natukakuma haya myaka yosena.

19. Uno ‘wana waKalunga wakanyombo uze wahambakana kuwaha’ watela kutukunyula tulinge ika?

¹⁹ Chikupu vene, Yehova atuhana wana “wenyi wakanyombo uze wahambakana chikuma kuwaha.” Tufwilenu kumona wana kana kupwa waulemu. Ngonde yaKwanuka Kufwa chaMwata hilwola lumwe lwamwaza chikuma kushinganyeka havyuma vyosena vize atulingila Yehova naYesu. Zangi yavo vasolola kuli etu yatela kutukunyula tulondezeze chikuma Yesu, nakusolwela vandumbwetu zangi nakuvakonekela namuchima wetu wosena.