MUKAYE kosena vakulwane muchikungulwilo vamona mulimo wakufunga vatu jaKalunga kupwa waulemu chikuma. Chikupu vene, chapwa hikutokwa chachinene kupwa navakulwane muchikungulwilo. Oloze mumyaka yakalinwomu, valumunangako vyuma muliuka. Vakulwane vaze vanakolo chikuma vavalwezele vahane milimo yayinene kuli vakulwane vaze vachili vakweze mangana vayizate. Mujila muka?

Kwalumuka kana chapwile ngwacho, nge tulama vakutambwojoka navaka-kunangula vyamuliuka vanahetesa myaka yakusemuka 70, kaha kavatela kutwalaho kuzata milimo kanako. Kaha nawa mukulwane uze nahetesa myaka yakusemuka 80, katela cheka kupwa muka-kuwanyisa Komiti yaMutango chipwe muka-kuwanyisa lizavu lyavakulwane muchikungulwiloko, oloze atela kuhana milimo kana kuli tulama vavakweze. Uno tulama vatushinakaji vanakulanga ngachilihi kukwalumuka kana? Chikupu vene, vanasolola kushishika chavo kuli Yehova naliuka lyenyi.

Ken uze apwile muka-kuwanyisa Komiti yaMutango hamyaka kafwe 49 ambile ngwenyi, “Omu chejile kwalumuka kana, ngwawahililile chikuma. Halikumbi vene lize ngwevwile mujimbu kana, ngwavangilile kulomba kuli Yehova nachimene ngwami kwapwile nakusakiwa ndumbwetu wamukweze mangana azate mulimo  kana.” Mazu ahanjikile Ken, alifwana namazu vahanjikile navakwavo tulama vatushinakaji mukaye kosena. Chipwe ngocho, hakuwana nge vazangilenga chikuma kuzakama vandumbwavo, pamo vevwile kupihya hakuvatambula milimo.

Chakutalilaho, Esperandio uze apwile muka-kuwanyisa lizavu lyavakulwane muchikungulwilo ambile ngwenyi, “Hakavanga omu ngwevwile kwalumuka kana ngwahombele, oloze hakuhunananaho ngwamwene ngwami chapwile chakutamo mwomwo ngwasakiwile kupwa nalwola lwaluvulu lwakulizakama hakuwana nge kangwalikangwilenga kumujimbako.” Esperandio achili lika nakuzachila Yehova nakashishi, kaha nawa achili nakukolezeza vandumbwenyi muchikungulwilo.

Uno tulama vakutambwojoka vaze vapwile nakuzata milimo yeka muliuka vevwile ngachilihi hakwivwa kwalumuka kana? Allan uze apwile kalama wakutambwojoka hamyaka 38 ambile ngwenyi: “Omu ngwevwile mujimbu kana ngwevwile namuvifuhwa keke.” Chipwe ngocho, amwene nawa kuwaha chatwama hakunangula vandumbwetu vamalunga vavakweze mangana vatwaleho kuzata milimo kana nakashishi. Oholyapwa Allan achili lika nakuzachila Yehova nakashishi.

Russell uze nazate myaka 40 mwakalama wakutambwojoka kaha nawa muka-kunangula vyamuliuka, ambile ngwenyi, hakavanga ikiye napuwenyi vahombele. Vambile ngwavo: “Twazangile chikuma mulimo wetu, kaha nawa twamwene ngwetu twapwile nangolo jakuzata milimo kana.” Russell napuwenyi vali jino nakuzachisa vyuma valinangwile hakukafwa vaka-kwambulula muchikungulwilo chavo. Echi chili nakulingisa vandumbwavo vawahilile.

Numba tuhu kanda muchivwengaho lyehi nganomu vevwile ava vandumbwetu tunavuluka, oloze mukanda waSamwele wamuchivali, unahase kumikafwa mutachikize omu vapwile nakwivwa.

Tuchishimutwilenu havyuma vyasolokele kuli Mwangana Ndavichi omu vamufumbukilile kuli mwanenyi Avasalome. Ndavichi afumine kuYelusalema nakuchinyina kuMahanaime kumututuko waKalwiji Yotau. Omu vapwile kuze, Ndavichi navatu jenyi kavapwile navyakulikafwa navyo mukuyoyako. Kutala muli nakwanuka vyuma vyasolokele tahi?

Malunga vatatu vamungalila kana vavanehelele tuhela, navyakulya, navyuma vyeka vyakuzachisa. Umwe hali vaze malunga vatatu apwile ikiye Mbalajilai. (Samwe. 2, 17:27-29) Omu vyuma ajinyine Avasalome vyahonene kuzachiwa, Ndavichi akindulukile kuYelusalema, kaha Mbalajilai amushinjikijile swi nakuYotau. Ndavichi alwezele Mbalajilai ngwenyi vayenga hamwe kuYelusalema. Numba tuhu Mbalajilai apwile “lunga waluheto chikuma,” oloze Ndavichi amufwelelesele ngwenyi, mwaya nakumuhana vyakulya. (Samwe. 2, 19:31-33) Ndavichi pamo asakwililile Mbalajilai nakulinangula havyuma vize amulingilile. Shikaho kachi evwile kuwaha kutwama nakuzata nenyi hamwe.

Hakuwana nge Mbalajilai apwile wakushishika kaha nawa wakulinyisa, echi chamulingishile ahanjike hatoma ngwenyi apwile namyaka  yakusemuka 80. Ambile nawa ngwenyi: “Kutala ngunahase kutachikiza vyuma vyamwaza navyevi vyavipi numba?” Uno atwalile mulihi hakuhanjika mazu kana? Mbalajilai pamo apwile namangana mwomwo yakuyoya myaka yayivulu. Kaha nawa apwile lika nauhashi wakulweza vatu mangana ngana muze “vakulwane” valingile kuli Mwangana Lehovowame. (Vamya. 1, 12:6, 7; Samu 92:12-14; Vishi. 16:31) Shikaho Mbalajilai hakuhanjika vyakutachikiza vyuma vyamwaza navyevi vyavipi, pamo apwile nakulumbununa ukalu amwenenga mwomwo yaushinakaji. Etavilile hatoma ngwenyi ushinakaji wamulingishile ahone kwivwa kuyema chavyakulya nakuhona kwivwa kanawa. (Kwambu. 12:4, 5) Mbalajilai akolezezele Ndavichi mangana ayenga kuYelusalema naKimihame uze pamo apwile mwana Mbalajilai.—Samwe. 2, 19:35-40.

Kwalumuka chamuliuka chize tunavuluka kumaputukilo achihande chino chinalifwane navyuma alingile Mbalajilai. Chipwe ngocho, echi kwalumuka kana kachapwile kutala kaha hachiyoyelo nauhashi wamutu umwe ngana muze chapwile kuli Mbalajilaiko, oloze chasakiwile kukekesa kanawa vamone vyuma vize navinganyalisa tulama vakushishika mukaye kosena.

Ava vakulwane vakushishika vamwene chikupu ngwavo hakusaka liuka lyaYehova litwaleho lika kuzovoloka, vatelele kuhana vandumbwavo vavakweze milimo yayinene yize vazachilenga vakiko. Kakavulu ava vakulwane vakiko vanangwilenga vakweze, ngana muze Mbalajilai pamo anangwile mwanenyi namuze kaposetolo Paulu nawa anangwile Chimoteu. (Koli. 1, 4:17; Fwili. 2:20-22) Ngocho ava vandumbwetu vavakweze vanapu jino ‘malunga vaze vapwa wana,’ vaze vali nakukafwa ‘kutunga mujimba waKulishitu.’—Efwe. 4:8-12; esekesenuko Kulava 11:16, 17, 29.

Vandumbwetu vavavulu muvikungulwilo vaze vanalisuula kusela vakweze milimo yimwe, vali jino nakutokwa chakuzata milimo yakulisezaseza.

Chakutalilaho, Marco uze apwile kalama wakutambwojoka hamyaka 19 ambile ngwenyi: “Kuhana milimo yayinene kuvakweze mangana vayizate, chinangukafwe nguwaneko nalwola lwakukafwa malunga javandumbwetu muchikungulwilo vaze kavapwa vinjihoko.”

Geraldo uze apwile kalama wakutambwojoka hamyaka 28 ambile ngwenyi: “Oholyapwa jino tuli nakufwila kukafwa vandumbwetu vaze vazeya kushipilitu nakutwaminyina nawa vilongesa vyaMbimbiliya vyavivulu.” Ambile nawa ngwenyi ikiye napuwenyi vali jino nakutwaminyina vilongesa vyaMbimbiliya 15, kaha nawa vandumbwetu vavavulu vaze vazeyele kushipilitu vanaputuka cheka kukunguluka.

Allan uze twavulukanga kumaputukilo ambile ngwenyi: “Tuli jino nakuzata mulimo wakwambulula natwima. Tuli nawa nakulivwisa kuwaha kwambulwila kuvihela vyasanga, nakwambulila vakwetu twalihata navo, kaha vavali vanaputuka jino nakukunguluka.”

Nge nayenu muli hamukana wavandumbwetu vakushishika vaze vanahane milimo kuvakweze mwomwo yaushinakaji, kaha tachikizenu ngwenu kuli jila yikwavo yakulipwila munahase kukundwijilamo milimo yaYehova. Munahase kulinga ngocho hakulwezako vakweze vamalunga muchikungulwilo chenu omwo kwalumunako vyuma muliuka chinaminganyalisa. Russell uze twavulukanga lyehi ambile ngwenyi: “Yehova ali nakunangula vakweze vaze vakwechi uhashi mangana avazachise. Vandumbwetu vavavulu vali nakunganyala kuvyuma vali nakunangula ava vandumbwetu vavakweze nomu vali nakuzachilamo mulimo waufunga.”—Talenu lipwata lyakwamba ngwavo “ Kafwenunga Vakweze Mangana Vatengamo Kuzata.”

Kachi nge muli jino nakuzata mulimo weka mwomwo yakwalumuka kanechi, kaha twalenuho lika kumona vyuma mujila yamwaza. Tachikizenu ngwenu munakafwe lyehi vatu vavavulu  hamyaka yayivulu, kaha namutwalaho lika kulinga mwomumwe. Vandumbwenu nawa vamizanga chikuma ngocho navatwalaho lika kumizanga.

Chachinenenyi munalingisa Yehova amivwile uselewa. Keshi “[kukavulyama] milimo yenu, nazangi munasolola yakuzanga lijina lyenyi, hakuwana nge munazachilanga vaka-kujila, kaha muchili lika nakuvazachila.” (Hepe. 6:10) Mazu kana atufwelelesa ngwawo mwakatufweta hamilimo yosena tunamuzachilanga kufuma vene kunyima. Chikupu vene, Yehova keshi kukavulyama milimo mwamuzachilile kunyima neyi muchili lika nakumuzachila makumbi anoko.

Numba tuhu kwalumuka tunavuluka helu kachakwachile nahali yenuko, oloze munahase kulinangulaho vyuma vimwe. Mujila muka?

Kachi nge muli hamwe nandumbwetu wakukola wakushishika uze anakuzata milimo yeka mwomwo yakwalumuka chamuliuka, kaha munahase kulinangula vyavivulu kuli ikiye. Munahase kumulweza amikafwe. Mwatela nawa kumona omu ali nakutwalaho lika kuzata mulimo wenyi nakashishi chamokomoko nakwalumuka chavyuma.

Numba mupwa muvakulwane vaze vanahane milimo yeka muliuka chipwe chiku, tachikizenu ngwenu Yehova amona kushishika chavaze vanamuzachila hatando yayisuku navaze vachili lika nakumuzachila kupwa chachilemu.