1, 2. (a) Chihandwa muka chatwama hali Yehova navaze vakwechi ngolo jakuyula? (b) Vyuma muka natushimutwila muchihande chino?

KAKAVULU, vatu vaze vakwechi ngolo jakuyula, veji kushinyinyikanga vakwavo nakulilingisa kupwa vakaka javo. (Mateu 20:25; Kwambu. 8:9) Oloze Yehova kapwa ngochoko. Numba tuhu apwa Wangolo Josena, oloze eji kuzakamanga vangamba jenyi vakuhona kukupuka. Apwa walikoji, kaha nawa atuzakama nakusaka nawa ngwenyi tuyoyenga kanawa. Atachikiza kanawa omu tweji kwivwanga nakutukafwa nawa nge tuli muukalu. Hakuwana nge Yehova “atachikiza ngwenyi twapwa tulukungu kaha,” ngocho katulweza tulinge vyuma vize katweshi kuhasako.—Samu 103:13, 14.

² MuMbimbiliya mwatwama vyakutalilaho vyavivulu vize vyasolola omu Yehova eji kuzakamanga vangamba jenyi. Tuchishimutwilenu havyakutalilaho vino vitatu. Chatete, natushimutwila hajila akafwililemo Samwele mangana alweze Kapilishitu Wakulitulaho Eli mujimbu wakumusopesa. Chamuchivali, natushimutwila hamuchima wakutalilila chikoki asolwele Yehova omu Mose asakile kukana kutwaminyina vaIsalele. Kaha chamuchitatu, natushimutwila  hajila Kalunga ayowelelemo vaIsalele kufuma muEjipitu. Omu natushimutwila havyakutalilaho kana, tuwanenu vishina natulinangula hali Yehova navize natufwila kuzachisa mukuyoya chetu.

3. Chuma muka chakukomwesa evwile Samwele, kaha chaneha chihula muka? (Talenu muvwimbimbi wakulivanga.)

³ Samwele aputukile “kuzachila Yehova” hatavanaku omu apwile kanyike. (Samwe. 1, 3:1) Likumbi limwe omu Samwele apwile mutulo, evwile chuma chakukomwesa. * (Tangenu Samwele 1, 3:2-10.) Evwile mutu mwasanyika lijina lyenyi. Samwele ashinganyekele ngwenyi Kapilishitu Wakulitulaho Eli ikiye apwile nakumusanyika. Ngocho alahile nakuya kuli ikiye, nakwamba ngwenyi: “Nguneza, ngunevu unangusanyika.” Oloze Eli akanyine ngwenyi keshi ikiye amusanyikileko. Omu vyuma kana vyasolokele cheka mapapa kavali, Eli atachikijile jino ngwenyi Kalunga ikiye apwile nakusanyika Samwele. Shikaho alwezele Samwele mwakukumbulwila nge navamusanyika cheka, kaha Samwele evwililile. Mwomwo ika Yehova ahonenene kulweza Samwele ngwenyi ikiye apwile nakumusanyika? Mbimbiliya kayatulwezako, oloze mujila vyalingiwililemo vyuma vyasolola nge atachikijile kanawa omu apwile nakwivwa Samwele. Mujila muka?

4, 5. (a) Samwele akwile ngachilihi kumulimo uze amuhanyine Kalunga, kaha vyuma muka vyasolokele omu kwachele? (b) Mujimbu waSamwele watunangula vyuma muka hali Yehova?

⁴ Tangenu Samwele 1, 3:11-18. Jishimbi jize Yehova ahanyine vangamba jenyi jahanjikile ngwajo vana vatelelele kuvumbika vakulwane chikumanyi vaze vapwile nawata. (Kulo. 22:28; Levi 19:32) Kutala omu kwachele Samwele ahamukile nakuya kuli Eli nakumulweza vyakusopesa chaKalunga tahi? Nduma. Mbimbiliya yatulweza ngwayo Samwele “evwile woma kulweza Eli vyuma vamumwenesele.” Oloze Kalunga alingishile Eli atachikize ngwenyi ikiye apwile nakusanyika Samwele. Ngocho Eli alwezele Samwele mangana ahanjike. Amulwezele ngwenyi, “[Kanda] naunguswekela chuma numba chimwe[ko].” Ngocho Samwele “amulwezele vyuma vyosena.”

⁵ Eli pamo kalikomokelele havyuma amulwezele Samweleko mwomwo mujimbu kana walifwanyine nauze “mutu waKalunga” alwezele kapilishitu wakulitulaho. (Samwe. 1, 2:27-36) Mujimbu kana unatukafwe tutachikize ngwetu Yehova eji kutuzakamanga, kaha nawa wamangana.

6. Vyuma muka natulinangula hali Kalunga mujila akafwililemo Samwele?

⁶ Enu vakweze, mujimbu waSamwele naumikafwa mutachikize ngwenu Yehova eji kumonanga ukalu mweji kulitalasananga nawo nomu mweji kwivwanga. Chakutalilaho, kachi nge mweji kwivwanga sonyi kulwezako vakwenu mujimbu waWangana chipwe kulisolola ngwenu mwapwa muVinjiho, kaha mwatela kufwelela ngwenu Yehova mwamikafwa. Shikaho mwatela kumulwezanga vyuma vyosena vili kumichima yenu. (Samu 62:8) Mwatela nawa kushinganyekanga hamijimbu yamuMbimbiliya yakufwana nge mujimbu waSamwele. Munahase nawa kulwezako vandumbwenu vavanyike chipwe vavakulwane vaze vanamononga ukalu nganou wenu. Chikupu vene, vanahase kumilweza omu Yehova avakafwile pamo namujila yize kavashinganyekele vaveneko.

7, 8. Uno Yehova asolwele ngachilihi nge azakamine chikuma Mose?

⁷ Omu Mose apwile namyaka yakusemuka 80, Yehova amuhanyine mulimo waunene chikuma. Mose atelelele kusokola vaIsalele kufuma  muundungo muEjipitu. (Kulo. 3:10) Hakuwana nge Mose azachilenga mulimo waufunga mulifuchi lyaMichane hamyaka 40, ngocho alikomokelele chikuma hakwivwa Yehova mwamuhana mulimo kana. Ambile ngwenyi: “Ami yami iyaze numba nguyenga kuli Fwalo nakulovola vaIsalele muEjipitu?” Oloze Kalunga amulwezele ngwenyi: “Ami nangupwanga nayove.” (Kulo. 3:11, 12) Amufwelelesele nawa ngwenyi: Vakulwane javaIsalele “navakevwilila mulizu lyove.” Chipwe ngocho, Mose amukumbulwile ngwenyi: “Nangukalinga ngachilihi nge navakakana . . . vyuma nangukavalweza?” (Kulo. 3:18; 4:1) Numba tuhu Mose apwile nakuhuhwasana vyuma amulwezele Yehova, oloze Yehova atwalileho lika kumutalilila chikoki. Yehova ahanyine Mose ngolo jakulinga vyuma vyakukomwesa. Mose ikiye mutu watete vahanyine ngolo jakulinga vyakukomwesa.—Kulo. 4:2-9, 21.

⁸ Mose ambile nawa ngwenyi katachikijile kuhanjika kanawako. Oloze Kalunga amulwezele ngwenyi: “Ami nangukapwanga nayove omu naukahanjika, kaha nangukakunangula vyuma naukahanjika.” Uno mazu kana akafwile Mose etavile tahi? Nduma. Mose alombele Kalunga mangana atumeko mutu weka. Yehova hakwivwa ngocho, apihililile chikuma. Chipwe ngocho, Kalunga atetelele Mose, ngocho asakwile Alone kupwa muka-kumuhanjikilako.—Kulo. 4:10-16.

9. Uno zangi yaYehova namuchima wenyi wakutalilila chikoki vyakafwile ngachilihi Mose hakuzata mulimo wenyi?

⁹ Mujimbu waMose watunangula vyuma muka hali Yehova? Hakuwana nge Kalunga apwa Wangolo Josena, kachi pamo evwishile woma Mose mangana etavile washi. Oloze kalingile ngochoko. Atalililile chikoki ngamba yenyi Mose, nakumusolwela likoji nakumufwelelesa ngwenyi mwapwa naikiye. Uno echi chakafwile Mose tahi? Eyo, Mose apwile jino twamina wamwenemwene uze azakaminenga vakwavo ngana muze Yehova amuzakamine ikiye.—Kula. 12:3.

10. Nganyo muka nayifumamo nge natulondezeza Yehova hakuzakamanga vakwetu?

¹⁰ Vyuma muka natulinangulako? Nge  mwapwa muvisemi, chipwe mutwe watanga chipwe muvakulwane muchikungulwilo, kaha tachikizenu ngwenu mwatwama nawata. Shikaho mwatela kulondezeza Yehova hakwivwishisanga kanawa vakwenu nakuvazakamanga, nakuvasolwelanga likoji, nakuvatalililanga chikoki. (Kolo. 3:19-21; Petu. 1, 5:1-3) Nge namulondezezanga Yehova, naYesu Kulishitu uze apwa Mose Wamunene, kaha namupwanga muvavashi kuhanjikisa kuli vakwenu nakuvahizumuna. (Mateu 11:28, 29) Namuvalingisa nawa vafwile kumilondezeza.—Hepe. 13:7.

11, 12. Yehova akafwile ngachilihi vaIsalele valivwe kupwa vakukingiwa omu vapwile nakufuma muEjipitu?

¹¹ Omu vaIsalele vafumine muEjipitu mu 1513 B.C.E., pamo vavulile kuhambakana hajimiliyoni jitatu. Hachendo kana hapwile vanyike, navakulwane, navaze vapwilenga nakuviza navitonji. Shikaho kutwaminyina lizavu lyalinene ngana kufuma muEjipitu kwasakiwile Twamina wamwaza muchima. Kahomu mukiko alingile Yehova hakuzachisa Mose. Echi chalingishile vaIsalele valivwe kupwa vakukingiwa omu vasezele limbo lyavo lize vatwaminenga hamyaka yayivulu.—Samu 78:52, 53.

¹² Uno Yehova akafwile ngachilihi vatu jenyi mangana valivwe kupwa vakukingiwa? Alingile ngocho, hakuvalingisa vatambuke “mumazavu akulongesa kanawa ngana mwamaswalale.” (Kulo. 13:18) Chuma kana chalingishile vaIsalele vafwelele chikupu ngwavo Kalunga apwile nakuvakafwa. Kaha nawa Yehova alisolwele ngwenyi ali navakiko hakuzachisa “livwi namusana, . . . nakumunyika chakakahya,” naufuku. (Samu 78:14) Chapwile kwijiva nge Yehova apwile nakuvalweza ngwenyi: “Kanda namwivwa womako. Nangumitwaminyina nakumikinga.” Chikupu vene, halwola kana vapwile nakusakiwa kuvakolezeza.

13, 14. (a) Vyuma muka vyakulipwila vize Yehova alingililile vaIsalele kuKalungalwiji Uchila? (b) Yehova asolwele ngachilihi nge apwile nangolo kuhambakana vaEjipitu?

¹³ Tangenu Kulovoka 14:19-22. Achishinganyekenu nayenu muli hamukana wavaIsalele. Kunyima vanakumihangasana kuli maswalale jaFwalo, kaha kulutwe kuli Kalungalwiji Uchila. Nakushimbula chiku Kalunga mwanungulula panda yalivwi kufuma kulutwe lwenu nakuyineha kunyima yenu mangana vaEjipitu vapwenga mumilima, oloze enu nalizavu lyenu namupwa mumusana weye. Kufumaho namumona Mose mwolola livoko lyenyi hakalungalwiji, kaha peho yangolo yakumututuko nayihandununa kalungalwiji mangana muzauke nakuya hasali. Kukumisako, enu natanga yenu, navimuna jenu navatu vosena hinamuputuka kutambuka hamavu akuma nakuzauka. Namulikomokela hakumona hamavu hanomu chau, kaha nawa vatu vosena navaze vali nakutambuka chindende chindende vali nakutambuka kaha kanawa nakuya hasali chakuzeneka kusenunuka.

¹⁴ Tangenu Kulovoka 14:23, 26-30. Shimbu muli nakuzauka, Fwalo nalizavu lyenyi navawila muze mujila nakuputuka kumihangasana. Kufumaho Mose mwolola livoko lyenyi hakalungalwiji, kaha meya aze emananga nge jimbango hinawaliwana. Kaha kalungalwiji wosena himwanganjanga nge peho yanyamanganda. Fwalo namaswalale jenyi hinavavafwika kumeya, nakuvanongesa vosena, nou wakuyovokaho jino wauchi chipwe mutu chipwe kanyama.—Kulo. 15:8-10.

15. Mujimbu wavaIsalele watunangula vyuma muka hali Yehova?

¹⁵ Mujimbu wavaIsalele watunangula nge Kalunga eji kulinganga vyuma mukulonga, kahechi chatukafwa tulivwe kupwa vakukingiwa. (Koli. 1, 14:33) Yehova apwa nawa kafunga wazangi uze eji kuzakamanga vatu jenyi. Eji kuvakinganga kuli vaka-kole javo. Chikupu vene, vishina  kana navitukolezeza chikumanyi omu tuli nakupandama kukukuma chakatwamino kamyaka yino.—Vishi. 1:33.

16. Uno kushinganyeka hajila Yehova ayowelelemo vaIsalele nachitukafwa ngachilihi?

¹⁶ Makumbi ano nawa, Yehova eji kuzakamanga vangamba jenyi mwalizavu kumujimba nakushipilitu. Kaha mwatwalaho lika kulinga ngocho swi nahaluyando lwalunene. (Kuso. 7:9, 10) Shikaho vangamba jaYehova numba vapwa vanyike, chipwe vakulwane chipwe vaveji chipwe vitonji, kaveshi kukevwa woma chipwe kufwa muzuzu haluyando lwaluneneko. * Oloze navakanuka mazu aYesu Kulishitu akwamba ngwenyi: “Kemanenu nakwandula mitwe yenu, mwomwo kuyovoka chenu chili nakupandama kwakamwihi.” (Luka 21:28) Navatwalaho lika kumika nomu mwakavafumbukila Ngonge, kulumbununa mafuchi aze nawakalifutula mangana vakafumbukile vatu jaKalunga. Ngonge mwakapwa nangolo chikuma kuhambakana Fwalo. (Ezeke. 38:2, 14-16) Jino mwomwo ika vatu jaKalunga navakapwila lika vakumika? Mwomwo vatachikiza ngwavo Kalunga kalumukako, ngocho mwakalisolola kupwa Muka-kuyovola.—Isa. 26:3, 20.

17. (a) Vyuma muka natunganyala kumijimbu yamuMbimbiliya yize yasolola omwo Yehova eji kuzakamanga vatu jenyi? (b) Vyuma muka natushimutwila muchihande nachikavangizaho?

¹⁷ Vyakutalilaho tunashimutwila vinasolola nge Yehova apwa walikoji, kaha nawa eji kuzakamanga vatu jenyi nakuvayovola. Shikaho omu namushinganyeka havyakutalilaho kana, fwilenu kulinangulako vilinga vimwe vyaYehova vize kamwejivile hakavangako. Kulinga ngocho nachimikafwa mufwile kupwa navilinga kana, nakuzanga chikuma Kalunga, nakuzamisa lufwelelo lwenu muli ikiye. Muchihande nachikavangizaho natushimutwila omu tunahase kulondezeza Yehova hakuzakamanga vakwetu mutanga, namuchikungulwilo, namumulimo wamuwande.