VYUMA muka mweji kulinganga kachi nge muli nakusaka kutachikiza lwola? Twafwelela mweji kutalanga haloloji yenu. Jino namukumbulula ngachilihi nge sepa lyenu mwasaka mumulwezeko lwola? Kwatwama jijila jakulisezaseza jakuvulukilamo lwola. Jijila muka?

Chakutalilaho, nge hanahichi ola yimwe naminyutu 30 kufuma ha 12 koloko yamusana, kaha munahase kumulweza ngwenu yinahete 1:30 chipwe ngwenu 13:30 kweseka nakuchihela mwatwama chipwe hanjikiso vavula kuzachisa. Kujingalila jimwe vanahase nawa kwamba ngwavo luli nakukokela ku 14.

Hakuwana nge nayenu mweji kutanganga Mbimbiliya, pamo munahase kulihulisa ngwenu, uno vatu vavuluka muMbimbiliya vatachikijilenga ngachilihi lwola? Valutachikijilenga mujijila jakulisezaseza. Chakutalilaho, muVisoneka vimwe vyachiHepeleu vazachisa mazu akufwana nge “chimenemene,” “musana,” “musana weye,” “nachingoloshi.” (Kupu. 8:11; 19:27; 43:16; Lushi. 28:29; Vamya. 1, 18:26) Oloze shimbu jimwe vazachisa lwola luvene.

Kushikulu, vaka-kulama naufuku vavulile chikuma. Vaka-kulama vasakiwilenga chikumanyi nalwola lwaufuku. Makulukaji amyaka kunyima shimbu kanda Yesu asemuke, vaIsalele vahandunwine ufuku muvihanda vitatu vize vavuluka kuzachisa lizu ‘chilo’. (Lungu. 2:19) Mukanda waVaka-kuyula 7:19 wavuluka “[vya]maputukilo achilo chamukachi kaufuku.” Mumakumbi aYesu nawa, vaYuleya valondezezele vaHelase navaLoma hakuhandununa ufuku muvilo viwana.

Mikanda yaMujimbu Wamwaza yazachisa lizu chilo mapapa kakavulu. Chakutalilaho, yamba ngwayo “hachilo chamuchiwana,” Yesu atambukile hameya nakuya kuwato uze vapwilemo tumbaji twenyi. (Mateu 14:25) Kaha nawa Yesu muchifwanyisa chenyi ambile ngwenyi: “Kachi nge mwenyazuvo mwejiva hachilo ocho mweza mwiji, kachi mwatona nakuzeneka kwechelela zuvo yenyi vayipupe.”—Mateu 24:43.

Yesu avulukile vilo vyosena viwana omu alwezele tumbaji twenyi ngwenyi: “Tonenunga, mwomwo kamwatachikijile lwola mweza mwenyazuvoko, kwiji hamashikajamo, nyi mukachi kaufuku, nyi havandemba, nyi nachimenemene.” (Mako 13:35) Chilo chatete chapwile “hamashikajamo,” kaha chaputukilenga kufuma hakulauka chalikumbi nakuheta ku 21:00. Chamuchivali chapwile “mukachi kaufuku,” kaha chaputukilenga kufuma ha 21:00 nakuheta mukachi kaufuku. Kaha chamuchitatu, vachivulukile ngwavo “havandemba.” Chilo kana chaputukilenga kufuma mukachi kaufuku nakuheta ku 03:00 nachimene. Hachilo kana pamo hakiko haze ndemba atambikile haufuku uze vakwachile Yesu. (Mako 14:72) Chilo chamuchiwana chapwile “nachimenemene,” kaha chaputukilenga kufuma ha 03:00 nakuheta hakututuka chalikumbi.

Shikaho, numba tuhu vatu kushikulu kavapwilenga najiloloji nganeji tuli najo makumbi anoko, oloze vatachikijile mwakuhandunwina lwola.