1. Chihande muka chachilemu ashimutwilile Yesu natumbaji twenyi haufuku wamakumishilo?

OMU Yesu apwile natumbaji twenyi haufuku wamakumishilo, avulukile lizu zangi mapapa kafwe 30. Ahanjikile hatoma ngwenyi tumbaji twenyi vatelelele ‘kulizanga navakwavo.’ (Yowa. 15:12, 17) Avalwezele ngwenyi nge navalizanga navakwavo, kaha vatu navatachikiza ngwavo vapwa vaka-kumukavangiza vamuchano. (Yowa. 13:34, 35) Zangi kana kayapwa yakuhanjika kaha hakanwako. Yesu apwile nakuvuluka zangi yize veji kusololanga vatu vakulisuula. Ambile ngwenyi: “Naumwe wauchi ali nazangi yakuhambakana eyi, mutu kwecha mwono wenyi hali masepa jenyi. Kachi nge namulinga vyuma nguli nakumilweza ami, kaha munapu mumasepa jami.”—Yowa. 15:13, 14.

2. (a) Kuwaha muka chatwama hakulikata navangamba jaKalunga? (b) Vihula muka navakumbulula muchihande chino?

² Makumbi ano, vangamba jaYehova vali nakuvatachikijila hazangi yavo yakulisuula nahakulinunga chavo. (Yowa. 1, 3:10, 11) Shikaho tweji kuwahililanga kupwa navandumbwetu vaze veji kusololanga zangi ngana yize yaKulishitu chamokomoko namafuchi vafuma, navisemwa namalimi. Jino tunahase kulihulisa ngwetu:  “Mwomwo ika chapwila chachilemu kusololanga zangi makumbi ano? Uno Yehova naYesu veji kututunganga ngachilihi muzangi? Kaha vyuma muka twatela kulinga mutu himutu mangana ‘tulitunge’ navakwetu muzangi?”—Koli. 1, 8:1.

3. Uno ukalu vali nakumona vatu uli nakuvalingisa valinge ika?

³ Hakuwana nge muno mukaye munazale “naukalu naushona” mwomwo yakuyoyela ‘mulwola lwalukalu,’ ngocho vatu vavavulu veji kuhombanga. (Samu 90:10; Chimo. 2, 3:1-5) Vavavulu veji kushinganyekanga ngwavo chinawahe kufwa kuhambakana kuyoya. Vaka-kulava vamba ngwavo vatu vakuhambakana 800,000 veji kulijihanga mwaka himwaka. Chaluvinda, navaka-Kulishitu vamwe veji kulijihanga mwomwo yakumona ngwavo ukalu unavatohwela.

4. Vatu muka vamuMbimbiliya vaze vashinganyekele ngwavo chinawahe kufwa?

⁴ Navangamba jaKalunga vamwe vakushishika vakushikulu, vashinganyekele ngwavo chinawahe kufwa mwomwo yaukalu vapwile nakumona. Chakutalilaho, Yopa ambile ngwenyi: “Ngunahungu kuyoya chami. Kangweshi nakusaka kuyoya likako.” (Yopa 7:16; 14:13) Yona nawa evwile kupihya omu vyalumukile vyuma kweseka namulimo vamuhanyine. Ambile ngwenyi: “Ove Yehova ngujihe, mwomwo nachiwaha ngufwenga kuhambakana kuyoya.” (Yona 4:3) Kaha nawa, kapolofweto Elija evwile woma nakwamba ngwenyi: “Kunahu. Ove Yehova ngujihe.” (Vamya. 1, 19:4) Chipwe ngocho, Yehova atwalileho kuvamona kupwa vavalemu nakusaka ngwenyi vatwaleho lika kuyoya. Muchishishisa chakuvahana mulonga, avakafwile nakuvakolezeza vatwaleho lika kumuzachila nakashishi.

5. Mwomwo ika twatela kuzanga chikuma vandumbwetu makumbi ano?

⁵ Numba tuhu vandumbwetu kavatwama namuchima wakusaka kulijihako, oloze vavavulu vali nakumona ukalu uze weji kuvahombesanga, ngocho vali nakusakiwa kuvatunga muzangi. Chakutalilaho, vamwe veji kuvayanjisanga nakuvasekeleka. Veka nawa veji kuvamonanga ulumbi nakuvayongola kuli vakwavo vaka-milimo, chipwe kuzeya mwomwo yakuvula chamilimo. Kaha nawa veka veji kuvayanjisanga kuli vaka-mahyavo vaze kavapwa Vinjihoko. Ukalu tunavuluka naweka weji kuhombesanga vandumbwetu vavavulu. Jino iya nahase kukolezeza ava vandumbwetu mangana vatwaleho lika kuzachila Yehova?

6. Yehova eji kututunganga ngachilihi?

⁶ Yehova eji kutunganga vaka-kumulemesa hakuvafwelelesa ngwenyi mwatwalangaho kuvazanga. VaIsalele vakushishika vawahililile chikuma hakwivwa Yehova mwavafwelelesa ngwenyi: “Ngwakumwene kupwa uwamulemu, kaha ngwakuvumbikile nakukuzanga. . . . Kanda nawivwa womako, mwomwo ami nguli nayove.” (Isa. 43:4, 5) Hakuwana nge nayenu mwapwa muvangamba jaYehova, ngocho mwatela kufwelela ngwenu Yehova amizanga chikuma. * Mazu enyi afwelelesa vaze veji kukundwizanga kulemesa chamuchano ngwawo: “Mwakakulwila mwomwo apwa chindume. Mwakalisambila hali ove nakuwahilila chikuma.”—Zefwa. 3:16, 17.

7. Uno zangi yaYehova yalifwana ngachilihi nayize yachisemi wapwevo? (Talenu muvwimbimbi wakulivanga.)

⁷ Yehova afwelelesa vangamba jenyi ngwenyi mwavazakamanga nakuvavendejeka chamokomoko navyeseko vize navamonanga. Amba ngwenyi: “[Namukamwa, kaha  navakamiveleka mujikondo], navakamilelanga hamambuli. Nangukamivendejeka nge omu pwevo eji kuvendejekanga mwanenyi.” (Isa. 66:12, 13) Kemba eji kwivwanga kuwaha chikuma omu naye eji kumuvelekanga mukondo nakumusata hamambuli enyi. Omu mukiko eji kulinganga naYehova mujila yachifwanyisa kuli vaka-kumulemesa vamuchano. Tachikizenu ngwenu Yehova amimona kupwa muvavalemu chikuma.—Yele. 31:3.

8, 9. Uno zangi yaYesu yinahase kutukolezeza ngachilihi?

⁸ Vaka-Kulishitu vamuchano veji kupandamanga kuli Kalunga mwomwo yazangi yenyi. Mbimbiliya yamba ngwayo, “Kalunga azangile chikuma kaye ngocho ahanyine Mwanenyi umwe kaha wakulipwila, mangana ngwenyi weshowo mwamufwelela vakahone kumunongesa, oloze akapwe nakuyoya chahaya myaka yosena.” (Yowa. 3:16) Chikupu vene, Yesu asolwele zangi yenyi hakwecha kuyoya chenyi hali etu. Shikaho zangi kana yatela kutulingisa nayetu tuzangenga vakwetu. Mazu aKalunga atufwelelesa ngwawo, ‘luyando chipwe vihuli, kavyeshi kuhasa kutuhandununa kuzangi yaKulishituko.’—Loma 8:35, 38, 39.

⁹ Kachi nge tuli nakuhita muvyeseko vize vinakutuzeyesa kumujimba, namuvishinganyeka nakushipilitu, kaha zangi yaKulishitu yinahase kutukafwa tutwaleho lika kupwa vakumika. (Tangenu Wavaka-Kolinde 2, 5:14, 15.) Zangi yenyi yinahase nawa kutukafwa tuhone kuzeya numba nge tuli nakuhita muukalu wakufwana nge kutufumbukila, naukalu wakulijila uvene, chipwe kutuhukanyisa, chipwe kulizakamina chikuma.

10, 11. Veya vatwama namulimo wakuvendejeka vaze vanahombo? Lumbununenu.

¹⁰ Jila yimwe eji kututungilangamo Yehova shina kuhichila muchikungulwilo. Nayetu tunahase kulondezeza zangi yenyi hakukolezezanga nakutunga vandumbwetu kushipilitu chipwe nge vanahombo. (Yowa. 1, 4:19-21) Kaposetolo Paulu akolezezele vaka-Kulishitu ngwenyi: “Likolezezenunga navakwenu, nakulitunganga nawa navakwenu nganomu vene muli nakulinga.” (Teso. 1, 5:11) Chikupu vene, tuvosena muchikungulwilo tunahase kulondezeza zangi yaYehova naYesu hakuvendejekanga nakutunga vandumbwetu.—Tangenu Wavaka-Loma 15:1, 2.

 ¹¹ Vandumbwetu vamwe vaze vatwama namusongo wakuhomba veji kusakiwanga kuvoka kuli vandotolo vakukuluka malambu. (Luka 5:31) Vakulwane muvikungulwilo navandumbwetu veka vatachikiza ngwavo kavapwa vandotolo vaze vatachikiza mwakukila musongo wakuwongoko. Oloze vatwama namulimo ‘wakuvendejeka vatu vaze vanahombo, nakukafwa vaze vanahehela, nakutalilila chikoki vatu vosena.’ (Teso. 1, 5:14) Vaka-Kulishitu vosena vatela kupwa namuchima wakeke, nakutalilila chikoki, nakuvendejekanga vaze vanahombo, mangana vahase kuvatunga. Kutala mweji kuvendejekanga nakukolezeza vaze vanahombo tahi? Kutachikiza kanawa mwakulingila vyuma kana nachimikafwa chikuma.

12. Ndumbwetu umwe vamusolwelele ngachilihi zangi kuli vandumbwenyi muchikungulwilo?

¹² Uno kusolwela zangi vaze vanahombo nachivakafwa ngachilihi? Ndumbwetu umwe wapwevo wakuEurope ambile ngwenyi: “Lwola lumwe ngweji kusakanga kulijiha. Oloze vandumbwami vakiko veji kungukafwanga mangana nguhonese vishinganyeka kana. Veji kungukolezezanga nakungusolwela zangi mujila yakulipwila. Numba tuhu vamwe muchikungulwilo kavatachikiza ukalu nguli nakumonako, oloze veji kunguzakamanga. Ndumbwetu umwe napuwenyi vakiko vapwa nge visemi jami vakushipilitu. Veji kunguzakamanga hakumbi hakumbi.” Chikupu vene katweshi kuhasa kukafwa vandumbwetu museteko yoyimweko. Chipwe ngocho, twatela kutachikiza ngwetu nge natusolwelanga zangi vandumbwetu vaze vanahombo, kaha nachivakolezeza chikuma. *

13. Chuma muka nachitukafwa tutungenga vandumbwetu?

¹³ Pwenunga muvaka-kwivwilila. (Yako. 1:19) Kwivwilila kuvyuma navahanjika vakwenu yapwa jila yimwe yakusolwelamo zangi. Shikaho, munahase kuvahulisa vihula mujila yakuzangama yalikoji mangana mutachikize omu vali nakwivwa. Kahechi nachimikafwa muwane mwakuvakafwila. Vatela kumona nawa ngwavo mwavazakama hakumona omu muli nakusoloka kumeso. Nge ndumbwenu ali nakusaka kumilweza ukalu wenyi, kaha mwatela kumutalilila chikoki nakuzeneka kumuvatwijiza. Nge namwivwilila kanawa vyuma mwamilweza ndumbwenu, kaha namwivwishisa ukalu wenyi nomu ali nakwivwa. Echi nachimukafwa naikiye alimone kupwa wamulemu nakwivwilila jino kukala vyuma namumukafwa. Kuvazakama mujila kaneyi nachivakolezeza mwamunene.

14. Mwomwo ika katwatela kukaluhwisanga muchima wetuko?

¹⁴ Kanda kukaluhwisanga muchimako. Nge natukaluhwisanga muchima, kaha natwivwisa chikuma kupihya vaze vanahombo nakuvalingisa vahone kwitavila kuvakafwa. Mbimbiliya ngwayo: “Kuhanjika chakulusuka cheji kutuvanga nge poko yamukwale, oloze lilimi lyamuka-mangana lyeji kuhindulanga.” (Vishi. 12:18) Numba tuhu katwasaka kwivwisa vakwetu kupihyako, oloze lwola lumwe tunahase kuhanjika mazu akuvafutwisa kumuchima chakuzeneka etu vavene kutachikiza. Shikaho, hakusaka tutunge vakwetu muzangi, twatela kuvevwilanga keke nakushinganyeka nge yetu tuli muukalu wavo.—Mateu 7:12.

15. Chinoma muka chize nachitukafwa tutwaleho kutunganga vakwetu muzangi?

 ¹⁵ Vendejekenunga vakwenu kuzachisa Mazu aKalunga. (Tangenu Wavaka-Loma 15:4, 5.) Mbimbiliya yinahase kutukolezeza nakutuvendejeka mwamunene. Mukanda kana wafuma kuli ‘Kalunga uze eji kutukafwanga tukakachile nakutuvendejeka.’ Kuli nawa vinoma vyavivulu vize vinahase kutukafwa kuhehwojola havihande vimwe. Chakutalilaho, tunahase kuzachisa Chinoma Chakukafwa Vinjiho jaYehova Kuhehwojola naWatch Tower Publications Index. Vinoma kana vinahase kutukafwa tuwane Visoneka vize navitukolezeza tulipike nakala ukalu tuli nakumona.

16. Vilinga muka navitukafwa tuvendejeke kanawa vandumbwetu vaze vanahombo?

¹⁶ Pwenunga muvaka-kutetela nakuvova. Vilinga kana navitukafwa tuzange chikuma vakwetu nakuvakolezeza nakuvatunga muzangi. Yehova apwa “Setu muka-kutetela, kaha nawa Kalunga muka-kuvendejeka chosena.” (Tangenu Wavaka-Kolinde 2, 1:3-6; Luka 1:78; Loma 15:13) Paulu atuhana chakutalilaho hakwamba ngwenyi: “Twapwile tuvavavwovu muli enu, nganomu pwevo ali nakwamwisa eji kuzakamanga kanawa vana venyi. Ngocho etu hakumizanga chikuma, twafwililile kumihana mujimbu wamwaza waKalunga, namyono yetu nawa, mwomwo twamizangile chikuma.” (Teso. 1, 2:7, 8) Shikaho, nge natulondezezanga Kalunga hakwivwila vakwetu keke, kaha natusolola nge tuli nakusaka atuzachise hakukumbulula kulomba chavo.

17. Muchima muka twatela kupwa nawo hakusaka tukolezeze vakwetu?

¹⁷ Kanda kutokomenyanga hatutenga twavakwenuko. Mwatela kwanukanga ngwenu vandumbwenu kavakupukako. Shikaho kanda kushinganyeka ngwenu lwola lwosena navalinganga vyuma mujila yakukupukako. (Kwambu. 7:21, 22) Anukenu ngwenu Yehova kasaka vangamba jenyi valinge vyuma vize kaveshi kuhasako. Ngocho nge natumulondezezanga, kaha nachitukafwa tutwaleho kuliulanga tutenga twavakwetu. (Efwe. 4:2, 32) Lihendenunga kukuhanjika mazu aze nawasolola nge nevi vali nakulinga vene vyauchi. Oloze fwilenunga kuvasangejeka hakukilikita chavo. Echi nachivakolezeza chikuma. Kusangejeka vakwetu nachivatunga muzangi nakuvalingisa vazachile Kalunga nakuwahilila. Shikaho katwatela kulyesekesanga kuvakwetuko mwomwo nge natulinga ngocho, kaha katweshi kupwa vakuwahililako.—Ngale. 6:4.

18. Chuma muka cheji kutukolezezanga tutwaleho lika kulitunga navandumbwetu muzangi?

¹⁸ Yehova amona mikoko jenyi kupwa vavalemu kuli ikiye nakuli Yesu uze alisuwile kuhana ndando yakusokola. (Ngale. 2:20) Vandumbwetu vakushipilitu twavazanga chikuma, kaha nawa twasaka kuvazakama nakuvasolwela zangi. Chuma nachitukafwa tuvakolezeze, shina ‘kukavangizanga vyuma vyakuneha kuunda, navyuma vize vyakulitunga navakwetu.’ (Loma 14:19) Tuli nakutalilila omu natukapwa muPalachise muze kamweshi kukapwa chuma chakutuhombesako. Mulifuchi kana kamweshi kukapwa misongo, chipwe jijita, chipwe kufwa, chipwe luyanjisa, chipwe vikokojolako. Hanyima yaMyaka Likombakaji, vatu vosena navakapwa jino vakukupuka. Vaze navakahita hacheseko chamakumishilo, Yehova mwakavetavila kupwa vana venyi nakukengila “mukulihehwa chaupahu chavana vaKalunga.” (Loma 8:21) Shikaho, tutwalenuho lika kusolwelanga vandumbwetu zangi nakuvatunga nakulikolezeza mangana tuzachilenga Kalunga nakuwahilila.