1. Uno vangamba jaKalunga veji kusololanga ngachilihi nge vazanga vakwavo?

VANGAMBA jaKalunga vosena vatwama mutanga yakushipilitu, kaha nawa valizanga chikuma navakwavo. (Yowa. 1, 4:16, 21) Shimbu jimwe vanahase kusolola zangi kana hakulingila vandumbwavo vyuma vyakulipwila, oloze kakavulu veji kuyisololanga namuvyuma vyavindende vyakufwana nge kuhanjika navandumbwavo mujila yamwaza nakuvasolwela likoji. Shikaho nge natuzakamanga vakwetu nakuvasolwela likoji, kaha ‘natulondezeza Kalunga, hakupwa tuvana venyi azanga.’—Efwe. 5:1.

2. Yesu alondezezele ngachilihi muchima waYehova wazangi?

² Yesu alondezezelenga Ise lwola lwosena. Ambile ngwenyi: “Twayenu kuli ami enu muvosena muli nakufulyangila nakulemuwa naviteli, kaha ami nangumihizumuna . . . , mwomwo ami ngumuvwovu, nguwakulikehesa mumuchima.” (Mateu 11:28, 29) Nge natulondezezanga Kulishitu ‘hakuzakamanga vaka-kukalikiza,’ kaha Setu wamwilu mwatwivwila uselewa nakupwa nakuwahilila chamwenemwene. (Samu 41:1) Tushimutwilenu jino omu tunahase kuzakaminamo vaka-tanga yetu, navandumbwetu muchikungulwilo, navatu tweji kwambulilanga.

3. Uno lunga nahase kusolola ngachilihi nge azakama puwenyi? (Talenu muvwimbimbi wakulivanga.)

³ Malunga vatela kuzakamanga chikuma vaka-tanga yavo. (Efwe. 5:25; 6:4) Chakutalilaho, Mbimbiliya yavalweza vatwamenga namapwevo javo “mwaya chinyingi” chipwe ngwetu ‘vatachikizenga kanawa mapwevo javo.’ (Petu. 1, 3:7; kwinyikila chamwishi) Lizu kutachikiza kanawa nakuzakama vyatambukila hamwe. Chakutalilaho, lunga uze atachikiza kanawa puwenyi, keshi kumumona kupwa wamokomokoko oloze eji kumumonanga kupwa muka-kumukafwako. (Kupu. 2:18) Shikaho eji kumwivwililanga kanawa nge ali nakuhanjika, nakumuvumbika nawa. Pwevo umwe wamuCanada ambile ngwenyi: “Nge ngunahombo lunga lyami eji kungwivwishisanga. Eji kungwivwililanga kanawa nge ngunakuhanjika. Kaha nawa nge ali nakusaka kungwolola, eji kulinganga ngocho mujila yalikoji.”

4. Lunga nahase kusolola ngachilihi ngwenyi azakama puwenyi numba nge ali hakachi kamapwevo veka?

⁴ Lunga uze azakama puwenyi keshi kusapula namapwevo veka chipwe kusolola nge ali nakuvaminyina malejiko. Kaha nawa keshi kulisonekela mijimbu namapwevo veka hajishinga chipwe haInternetko. (Yopa 31:1) Eji kupwanga lika wakushishika kuli puwenyi keshi mwomwo yakumuzanga kahako, oloze mwomwo yakuzanga nawa Kalunga nakuhunga vyuma vyavipi.—Tangenu Samu 19:14; 97:10.

5. Uno pwevo nahase kusolola ngachilihi nge azakama lunga lyenyi?

⁵ Nge lunga mwalondezezanga Yesu Kulishitu uze apwa mutwe wenyi, kaha mwakafwa puwenyi apwenga “nakalemesa chikuma” kuli ikiye. (Efwe. 5:22-25, 33) Kalemesa kana kanahase kulingisa pwevo azakame lunga lyenyi. Chakutalilaho, nahase kulinga ngocho kachi nge lunga lyenyi ali nakusaka kuzata vyuma vyakushipilitu hajiola jajivulu, chipwe nge ali nakushinganyeka havyuma vimwe. Lunga umwe wamuBritain ambile ngwenyi: “Shimbu jimwe puwami eji kutachikizanga kachi nge kuli ukalu umwe chikumanyi nge ngunahombo. Halwola lwangana eji kukavangizanga chishina chahali Vishimo 20:5 numba tuhu chasakiwa kungutalilila chikoki nakunguhulisa halwola lwakutamo havihande vize nanguhasa kushimutwila naikiye.”

6. Uno tunahase kukolezeza ngachilihi vanyike vapwenga namuchima wakuzakama vakwavo, kaha vanahase kunganyala ngachilihi?

⁶ Nge visemi navalizakamanga lwola lwosena, kaha navahana chakutalilaho chamwaza kuli vana vavo. Chipwe ngocho, visemi vakwechi mulimo waunene wakunangula vana vavo mangana vazakamenga vakwavo. Chakutalilaho, visemi vatela kunangula vana vavo vahonenga kulihangasananga nge vali kuZuvo yaWangana. Kaha nawa nge vali kuchilika chimwe, visemi vatela kulwezanga vana vavo vavandaminenga vakulwane valivange kutambula vyakulya numba jino navakiko vatambule. Chipwe ngocho, tuvosena muchikungulwilo tunahase kukafwa visemi. Chakutalilaho, nge mwana ndumbwetu natulingila vyuma vyamwaza pamo natusokolwelako chikolo, kaha twatela kumusangejeka. Kulinga ngocho nachikafwa chikuma uze mwana atachikize chikupu ngwenyi kumana “kuhana cheji kunehanga kuwahilila chikuma kuhambakana kutambula.”—Vili. 20:35.

7. Uno Yesu azakamine ngachilihi kajika matwitwi, kaha vyuma muka natulinangula kuchakutalilaho chaYesu?

⁷ Lwola lumwe omu Yesu apwile mungalila yaNdekapole, vatu “vamunehelele kajika matwitwi uze apwile nakalaka.” (Mako 7:31-35) Muchishishisa chakumukila hakachi kavatu, Yesu “[ayile] nenyi kupenge,” kaha amukile. Mwomwo ika alingilile ngocho? Uze lunga pamo kachi evwile sonyi kumukila hakachi kavatu. Shikaho Yesu pamo atachikijile omu apwile nakwivwa uze lunga ngocho ayile nakumukila kupenge. Numba tuhu makumbi ano katweshi kuhasa kuka vatu mujila yakukomwesako, oloze twatela kushinganyekanga haukalu vali nakuhitamo vandumbwetu nakuvakafwa. Kaposetolo Paulu asonekele ngwenyi:  “Tulihakenunga michima navakwetu mangana tulikolezeze tusolole zangi navilinga vyamwenemwene.” (Hepe. 10:24) Yesu atachikijile kanawa omu apwile nakwivwa uze kajika matwitwi ngocho amuzakamine chikuma. Chikupu vene, Yesu atuhana chakutalilaho chamwaza.

8, 9. Mujijila muka tunahase kusolola ngwetu twazakama tushinakaji navitonji? (Hanenu vyakutalilaho.)

⁸ Zakamenunga tushinakaji navitonji. Chikungulwilo chavaka-Kulishitu chazama hazangi keshi hakufwila kutesamo milimo yimwe mukashimbu kakandendeko. (Yowa. 13:34, 35) Zangi kana yikiko yeji kutulingisanga tufwile kukafwa vandumbwetu vatushinakaji navitonji vahase kupwanga kukukunguluka nakuyanga muwande. Tweji kuvakafwanga chamokomoko nakukeha chamilimo navazata. (Mateu 13:23) Michael uze eji kutambukilanga muchitwamo chakushindumuna, eji kusakwililanga chikuma vaka-tanga yenyi navandumbwenyi vamulizavu lyamulimo wamuwande atwama hakumuzakama chikuma. Ambile ngwenyi: “Hakuwana nge veji kunguzakamanga chikuma, echi chinangukafwe ngupwenganga kukukunguluka chosena nakwazana chikuma mumulimo wakwambulula. Ngweji kulivwisanga chikuma kuwaha kwambulwila kuvihela vyasanga.”

⁹ HajiMbetele jajivulu hatwama vandumbwetu vatushinakaji navitonji. Shikaho vakulwane vahajiMbetele veji kuzakamanga chikuma ava vandumbwetu hakulongesa vyuma mangana vahase kwambululanga kuhichila mukusonekela vatu mikanda nakuzachisa jishinga. Bill wamyaka yakusemuka 86 uze eji kusonekelanga mikanda vatu vatwama kuvihela kuze kakwatwama Vinjihoko ambile ngwenyi: “Chapwa hikutokwa chikuma kwazana mukwambulula chakusonekelanga vatu mikanda.” Nancy uze ali namyaka yakusemuka yakukokela ku 90 ambile ngwenyi: “Mulimo wakusonekela vatu mikanda kangwaumona kupwa himulimo wamokomokoko. Oloze ngwaumona kupwa himulimo wakwambulula nahawo mwomwo vatu vali nakusakiwa kutachikiza muchano.” Ethel uze asemukile mu 1921 ambile ngwenyi: “Kangwapwa nguwakulikangula kumujimbako. Shimbu jimwe cheji kungukaluhwilanga nakulivwika ami ivene.” Numba tuhu Ethel eji kumonanga ukalu kana oloze eji kulivwisanga kuwaha kwambulwila hashinga, kaha natungu maungeji akukindulukila amavulu. Barbara uze ali namyaka yakusemuka 85 ambile ngwenyi: “Kuhona kulikangula kumujimba cheji kungulingisanga nguhone kwazana mumulimo wamuwande lwola lwosena. Oloze kwambulwila hashinga cheji kungukafwanga nguhase kuhanjika navatu vavavulu chikuma. Ngweji kusakwililanga chikuma Yehova.” Mutukweji vavandende kaha mumwaka, ava vandumbwetu vatushinakaji vazachile jola 1,228 mumulimo wamuwande, nakusonekela vatu mikanda 6,265. Vatuminyine nawa vatu shinga mapapa 2,000, nakuhana mikanda 6,315. Chikupu vene, Yehova evwile kuwaha hamilimo vakilikichile ava vandumbwetu vatushinakaji.—Vishi. 27:11.

10. Tunahase kukafwa ngachilihi vandumbwetu mangana vanganyale nge vali kukukunguluka?

¹⁰ Zakamenunga vandumbwenu nge muli kukukunguluka. Kuzakamanga vandumbwetu nge tuli kukukunguluka, chinahase kuvakafwa chikuma vanganyale. Uno vanahase kunganyala ngachilihi? Tunahase kulinga ngocho hakuhetanga washi kukukunguluka kuchina natuvatangula. Chipwe ngocho, shimbu jimwe tunahase kukotokela kuheta pamo mwomwo yavyuma vimwe. Olozenyi nge yapwa tato yetu yakukotokelanga, kaha twatela kuzachilaho mangana tusolole ngwetu twazakama vandumbwetu. Twatela kutachikiza nawa ngwetu Yehova naYesu vakiko veji kutusanyikanga kukukunguluka. (Mateu 18:20) Shikaho vasakiwa kuvahana kalemesa kakanene.

11. Mwomwo ika vaze veji kupwanga navihande kukukunguluka vatela kukavangijila mazu ahali Wavaka-Kolinde 1, 14:40?

¹¹ Kuzakama vandumbwetu chalumbununa nawa kwononoka kumazu akwamba ngwavo: “Vyuma vyosena vilingenunga mwamwenemwene kaha nawa mukulonga.” (Koli. 1, 14:40) Vandumbwetu vaze veji kupwanga navihande hakukunguluka veji kwononokanga kumazu kana hakuhanjika vihande vyavo kweseka nalwola navavahana. Kulinga ngocho  cheji kusololanga nge veji kuzakamanga muka-kuhanjika chihande weka uze mwakavangizaho navandumbwavo muchikungulwilo. Vandumbwetu vamwe veji kufumanga kwakusuku. Kaha nawa veka veji kuzachisanga jiminyau jakufwetela hakwiza kukukunguluka. Vakwavo nawa vasomboka kuvatu vaze kavapwa Vinjihoko vasaka ngwavo vakindulukenga washi hembo.

12. Mwomwo ika vakulwane twatela ‘kuvavumbika chikuma muzangi’? (Talenu lipwata lyakuvuluka ngwavo: “ Zakamenunga Vaze Vali Nakutwaminyina.”)

¹² Twatela nawa kuzakamanga vakulwane vaze veji kukilikitanga muchikungulwilo nakutwaminyina mulimo wakwambulula natwima. (Tangenu Wavaka-Tesolonyika 1, 5:12, 13.) Chikupu vene, tweji kusakwililanga chikuma ava vakulwane hamilimo yosena veji kukilikitanga. Shikaho nge natuvononokanga nakufwila kuvakundwiza, kaha natusolola ngwetu twavazakama. Twatela kwanuka ngwetu vakiko ‘vali nakutulama, mwomwo navakalyambulula kuli Kalunga.’—Hepe. 13:7, 17.

13. Vyuma muka natulinangula kuli Yesu hajila amwenenengamo vatu?

¹³ Mukanda waIsaya wahanjikile chimweza hali Yesu ngwawo: “Keshi kukachika lihongo lyakufunyukako. Keshi kukajima wanda uze uli nakufwinda wishiko.” (Isa. 42:3) Hakuwana nge Yesu azangilenga vatu, ngocho avevwililenga keke. Evwishishilenga vatu vaze vapwilenga kwijiva nge lihongo lyakufunyuka chipwe wanda walinongo lize lyapwile nakusaka kujima. Shikaho echi chamulingishile avazakame, nakuvasolwela likoji, nakuvatalilila chikoki. Navanyike vavandende vayilenga kuli ikiye. (Mako 10:14) Chipwe ngocho, etu katwatwama nachinyingi nauhashi wakunangula ngana uze apwile nawo Yesuko. Oloze twatela kuzakamanga vatu vamungalila twatwama, kulumbununa jila natushimutwila navo, nalwola twatela kulinga ngocho, natando twatela kumbata hakushimutwila navo.

14. Mwomwo ika twatela kushinganyekanga hajila tweji kuhanjikilangamo navatu?

 ¹⁴ Mujila muka twatela kuhanjikilamo navatu? Makumbi ano, mayevuyevu avatu vali ‘nakuvayanjisa nakuvamwanga’ kuli vatwamina vamukusekasana, navamapolitiki, navamukwitava chamakuli. (Mateu 9:36) Vyuma kana vili nakulingisa vatu vahone kufwelela kala mutu nakuhona kupwa nalutalililo. Shikaho twatela kusakulanga kanawa mazu akuzachisa hakuhanjika navatu nakulinga ngocho nalizu lyalivwovu. Chikupu vene, vatu vavavulu vali nakwitavila muchano keshi mwomwo yachinyingi chamuMbimbiliya twatwama nacho chipwe mujila tweji kulumbunwinangamo vishina kahako oloze nawa mwomwo yamuchima wakuvazakama uze tweji kuvasolwelanga.

15. Mujila muka tunahase kusolola ngwetu twazakama vatu tweji kwambulilanga?

¹⁵ Kuli jijila jajivulu jize tunahase kusolwelamo ngwetu twazakama vatu tweji kwambulilanga. Chakutalilaho, tweji kuzachisanga vihula hakunangula vatu. Shikaho twatela kuhulisanga kanawa vihula mujila yalikoji kaha nawa yakalemesa. Payiniya umwe uze ambulwililenga mungalila muze mwapwile vatu vakuunda kaha nawa vasonyi, kahulishilenga vihula vize vyalingishilenga mutu evwenga sonyi kukumbulula chipwe akumbulule mwakuhengako. Chakutalilaho, kahulishilenga vihula vyakufwana nge ‘Uno mwatachikiza lijina lyaKalunga tahi?’ chipwe ‘Uno Wangana waKalunga wapwa chuma mukako?’ Oloze ambilenga ngwenyi “Ami ngwalinangula muMbimbiliya nge Kalunga atwama nalijina. Kutala nayenu namusaka kutachikiza lijina kana tahi?” Chipwe ngocho, tunahase kuzachisa vihula kweseka navisemwa vyavatu. Oloze lwola lwosena twatela kulinganga ngocho mujila yize nayisolola nge twazakama vatu tweji kwambulilanga.

16, 17. Uno kuzakama vatu tweji kwambulilanga chinahase kutukafwa ngachilihi (a) tutachikize lwola lwakutamo twatela kutambukila vatu? (b) tutachikize tando twatela kumbata hakushimutwila navatu?

¹⁶ Lwola muka twatela kwambulilanga vatu? Kakavulu omu tweji kwambulwilanga kuzuvo hizuvo vatu kaveshi kutachikiza ngwavo natuvatambukilako. Shikaho nachipwanga chamwaza kuvatambukilanga halwola luze vanalizange kushimutwila nayetu. (Mateu 7:12) Chakutalilaho, nge vatu vamungalila yenu kavasaka kuhinduka washi kusongo yavyalumingoko, kaha munahase kuputukanga kwambulwila mumikwakwa, chipwe kuvihela vyasanga chipwe kukindulukila kuvatu vaze munatachikiza ngwenu namuvawana vanahinduka lyehi.

¹⁷ Tando yingahi twatela kumbata hakushimutwila namutu? Vatu vavavulu veji kupwanga namilimo chikuma, shikaho nachipwanga chamwaza kushimutwila navo mukavatu halwola lwatete namuliwana. (Koli. 1, 9:20-23) Kachi nge vatu navamona ngwavo tunatachikiza ngwetu vali namilimo, kaha lwola lukwavo vanahase kukatwitavisa kushimutwila navo. Chikupu vene, twatela kusololanga mihako yashipilitu yaKalunga nge tuli muwande. Nge natusololanga mihako kana, kaha natupwa “tuvaka-kuzachila hamwe naKalunga,” ngocho Yehova nahase kutuzachisa tukafwe vatu valinangule muchano.—Koli. 1, 3:6, 7, 9.

18. Uno kuzakama vakwetu cheji kunehanga nganyo muka?

¹⁸ Shikaho tutwalenuho lika kuzakamanga vaka-tanga yetu, navandumbwetu muchikungulwilo, navatu tweji kwambulilanga. Nge natulinga ngocho, kaha Yehova mwatukisula oholyapwa nakulutwe nawa. Mukanda waSamu 41:1, 2 wamba ngwawo: “Awahilila mutu uze eji kuzakamanga muka-kukalikiza. Yehova mwamupululula halikumbi lyalupi. . . . Navamwambanga ngwavo apwa wakuwahilila hamavu.”