1. Uno vilinga vyavatu vali muno mukaye vinahase kutulingisa ngachilihi tuhone kupwa vakulinyisa?

MAKUMBI ANO chinapu chachikalu kukavangiza vyuma tweji kulinangulanga muMazu aKalunga. Mwomwo ika? Mwomwo tuli nakuyoyela ‘mumakumbi akukuminyina,’ kaha mukaye muli “vaka-kulizanga vavene, vaka-kuzanga jimbongo, vaka-kulitukwojola, vaka-kulitohwesa,” ‘navaka-kuhona muchima wakulikanyisa vavene.’ (Chimo. 2, 3:1-3) Ngocho vatu kaveshi namuchima wakulinyisa uze nauvakafwa valinge vyuma vyamwazako. Numba tuhu etu vangamba jaKalunga twamona vilinga kana kupwa vyavipi, oloze shimbu jimwe tunahase kushinganyeka ngwetu vaze vatwama navilinga kanevi vali nakufukila nakupwa vakuwahilila mukuyoya chavo. (Samu 37:1; 73:3) Pamo tunahase kulihulisa ngwetu, “Kutala chapwa chakutamo kuhaka kulutwe vyuma vasaka vakwetu tahi? Uno ‘kulilingisa kupwa nguwamundende,’ nachilingisa vatu vahone kunguvumbika tahi?” (Luka 9:48) Nge natupwa namuchima walifwi wamuno mukaye, kaha chinahase kutuhonesa kutwama mukuunda navandumbwetu muchikungulwilo nakupihisa lijina lyetu  hakupwa tuvaka-Kulishitu. Oloze nge natulinangulanga mijimbu yavatu vakushishika vamuMbimbiliya nakuvalondezeza, kaha Yehova mwatukisula.

2. Uno kulinangula vyakutalilaho vyavangamba jaKalunga vakushishika nachitukafwa ngachilihi?

² Kachi nge tuli nakufwila kulondezeza vangamba jaKalunga vakushishika, kaha twatela kutachikiza vyuma vyavakafwile vatunge usepa wamwaza naKalunga. Vyuma vikwavo twatela kutachikiza shina vize valingile numba Kalunga avevwile uselewa, navize vyavakafwile vahase kulinga mwaya muchima wenyi. Nge natulinga ngocho kaha natusolola ngwetu tuli nakulya kulya chakushipilitu.

3, 4. (a) Jijila muka tweji kutambwilangamo kulya chakushipilitu? (b) Mwomwo ika natwambila ngwetu kulya chakushipilitu kachalumbununa kutachikiza mijimbu kahako?

³ Yehova eji kutuhuhumunanga nakutunangula kuhichila muMbimbiliya, namumikanda yetu, nakeyala yetu ya jw.org, najivindiyo jaha JW Broadcasting nahakukunguluka chachikungulwilo nachechi chachihanda. Oloze mazu ahanjikile Yesu hali Yowano 4:34, asolola nge kulya chakushipilitu kachalumbununa kutachikiza mijimbu kahako, oloze chasakiwa kulingako navyuma vyeka. Jino vyuma muka vyasakiwa? Yesu ambile ngwenyi: “Kulya chami shina kulinga mwaya muchima wayauze angutumine nakukumisa mulimo wenyi.”

⁴ Yesu amwenenga kulinga mwaya muchima waKalunga kupwa hikulya chenyi. Mujila muka vachifwanyishila nakulya? Ngana muze mujimba wasakiwa kulya chamwaza numba upwenga wakulikangula, nakulinga mwaya muchima waKalunga cheji kuzamisanga lufwelelo lwetu. Chakutalilaho, kutala mwevwaho lyehi kuzeya nakusaka kulitwamina kuya muwande tahi? Kachi nge mweji kulikakanga nakuya, kaha mweji kwivwanga ngachilihi hakukinduluka? Twafwelela ngwetu mweji kukwatanga ngolo.

5. Uno kupwa namangana chikwechi nganyo muka?

⁵ Nge natukavangizanga vyuma eji kutunangulanga Yehova, kaha natusolola ngwetu chikupu vene tukwechi mangana. (Samu 107:43) Kaha kupwa namangana nachitunganyalisa chikuma. Mbimbiliya ngwayo, “vyuma vyosena nauzanga kavyeshi kuteseka nawo hamweko. . . . [Mwomwo mangana] anapu nge mutondo wakuyoya kuli vaze navawalinjilila, kaha vaze navawakwachilila navavamba ngwavo vawahilila.” (Vishi. 3:13-18) Yesu ambile ngwenyi: “Kachi nge munatachikiza vyuma kanevi, kaha namuwahilila nge namuvilinganga.” (Yowa. 13:17) Tumbaji vapwilenga vakuwahilila mwomwo valingilenga vyuma avalwezelenga Yesu kulinga navize avanangwilenga. Kaha nawa vakavangijilenga chakutalilaho chenyi mukuyoya chavo chosena.

6. Mwomwo ika twatela kutwalaho lika kupwa namangana?

⁶ Makumbi ano, chapwa chachilemu chikuma kukavangizanga vyuma vize twamona kupwa vyamuchano. Chakutalilaho, muka-kuwahisa makina nahase kupwa nachinyingi navinoma vyakuzachisa vyavivulu, oloze nge keshi kuvizachisako, kaha kavyeshi kumunganyalisako. Numba tuhu nazatenga mulimo kana hamyaka yayivulu, oloze katela kulitwaminako mokomoko mwavulyama mwakuzachishila uhashi wenyi nakuhona kunganyalilaho. Nayetu tunahase kufukila mukuyoya hakuvangila kukavangiza vyuma natutanga muMbimbiliya. Oloze twatela kulinyisa mangana tukavangizenga vyuma mwatulweza Yehova hakumbi hakumbi.

7. Uno kulinangula mijimbu yamuMbimbiliya nachitukafwa ngachilihi tupwenga namangana?

⁷ Tushimutwilenu havyuma viwana vize vinahase kutuhonesa kupwa namuchima wakulinyisa, nakumona nawa omu vatu vakushishika  vakunyima vahonesele ukalu kana. Kupwa vakuzama kushipilitu kachapendamina hakutanganga kaha mijimbuko. Shikaho wanenu omu munahase kuzachishilamo vishina kana hauka wenu nakulinga ngocho chakuzeneka kulangisa.

8, 9. Chisoneka chaVilinga 14:8-15 chasolola ngachilihi nge Paulu apwile wakulinyisa? (Talenu muvwimbimbi wakulivanga.)

⁸ Kalunga ajina ngwenyi “vatu vosena vavalwile, ngwenyi, vapwenga nachinyingi chakwoloka chakutachikiza muchano.” (Chimo. 1, 2:4) Uno mweji kumonanga ngachilihi vatu vaze kanda valinangule muchano? Numba tuhu kaposetolo Paulu ayilenga mujisunangonga nakwambulila vaYuleya, oloze kambulililenga vakiko kahako. Ambulililenga navatu vaze valemeselenga tulunga vamakuli, kaha kuze ayilenga amwenenga vyeseko vyakusaka kumulingisa alivwimbe.

⁹ Chakutalilaho, omu Paulu naMbalanape vayile ungeji wavo watete muLusutala, vatu vamunganda kana vaputukile kulifukula kuli vakiko nakuvavuluka majina atulunga twavo ngwavo Zeuse naHelemese. Uno chuma kana chalingishile Paulu naMbalanape valivwimbe tahi? Uno echi chavalingishile vamone jino ngwavo vanasokoka kuukalu vamwene mujinganda jivali jize vatambukilile hakavanga tahi? Kutala vashinganyekele ngwavo kuya fuma nachivakafwa vatandakanyise mujimbu wamwaza tahi? Nduma. Mbimbiliya ngwayo, hahaze vene vapulile uvwalo wavo nakulupukila mukachi kalize liyongomena nakutambakana ngwavo, “Ika muli nakulingila vyumevi? Nayetu nawa tuvatu, twapwa nganomu mwapwa yenu.”—Vili. 14:8-15.

10. Mujila muka Paulu naMbalanape vesekele hamwe navatu vamuLusutala?

¹⁰ Paulu naMbalanape hakuhanjika ngwavo kavapwile vakukupukako, kachalumbunwine nge navakiko vapwilenga nakulemesa tulunga vamakuliko. Ava malunga vavali vapwile vamishonali vaze vatongwele mujila yakulipwila. (Vili. 13:2) Vavatongwele nashipilitu yajila, kaha nawa vapwile nalutalililo lwakuyoyela mwilu. Chipwe ngocho, Paulu naMbalanape vatachikijile ngwavo navatu vamuLusutala vanahase kupwa nalutalililo kana chikalu kaha nge navetavila mujimbu wamwaza.

11. Natuhasa kulondezeza ngachilihi muchima waPaulu wakulinyisa hakwambulila vatu?

¹¹ Natuhasa kulondezeza ngachilihi muchima waPaulu wakulinyisa? Chatete katwatela kulivwimba mwomwo yamulimo wakwambulula chipwe mwomwo yavyuma ali nakutukafwa Yehova tutesemoko. Tuvosena twatela kulihulisa ngwetu, ‘Uno ngwamona ngachilihi vatu vaze ngweji kwambulilanga? Kutala ngwatela kupwa namuchima wakulivwimba uze vatwama nawo vatu muchitungilo chami tahi?’ Vinjiho jaYehova mukaye kosena veji kuzatanga nangolo mangana vawane vatu vaze navahasa kwivwilila kumujimbu wamwaza. Vamwe veji kulinangulanga malimi navisemwa vyavatu vaze vamona ulumbi kuli vakwavo. Chipwe ngocho, Vinjiho jaYehova kavalimona kupwa vavalemu kuhambakana vakwavoko. Oloze veji kufwilanga kuvevwishisa kanawa mangana vahase kuvambulila mujimbu waWangana nakuvaheta kumuchima.

12. Epafwase asolwele ngachilihi nge azakamine vandumbwenyi?

¹² Jila yikwavo tunahase kusolwelamo ngwetu tuli nakukavangiza jindongi jamuMbimbiliya shina kulombelangako “vaze vali nalufwelelo luze lwapwa lwalulemu nge elu lwayetu.” (Petu. 2, 1:1) Omu mukiko alingilenga naEpafwase uze vavuluka kaha mapapa katatu mumikanda yajila yize asonekele Paulu. Omu Paulu vamukashile muLoma, asonekelele vaka-Kulishitu vamuKolose ngwenyi Epafwase ‘azachilenga nangolo shimbu yosena  nakuvalombelako mukulomba chenyi.’ (Kolo. 4:12) Chikupu vene, Epafwase atachikijile kanawa vandumbwenyi kaha nawa avazakamine chikuma. Numba tuhu Epafwase vamukashilile hamwe naPaulu mukamenga, oloze kechelelele ukalu kana umulingise avulyame vandumbwenyiko. (Fwile. 23) Oloze avazakamine. Chakuzeneka kukakasana, Epafwase kapwile namuchima walifwiko. Kulombelangako vandumbwetu chapwa chachilemu chikumanyi nge natuvavulukanga hamajina.—Koli. 2, 1:11; Yako. 5:16.

13. Namuhasa kulondezeza ngachilihi Epafwase kachi nge muli nakulomba?

¹³ Shinganyekenunga havatu vaze munahase kulombelako hakuvavuluka hamajina. Ngana mwaEpafwase, vandumbwetu vavavulu veji kulombelangako vakwavo muvikungulwilo chipwe jitanga jize jili namilimo yayivulu chipwe vaze vali nakumona vyeseko. Vavavulu veji kulombelangako vandumbwetu vaze vatwama ha jw.org hachihanda vavuluka ngwavo “Jehovah’s Witnesses Imprisoned for Their Faith.” (Talenu haze vavuluka ngwavo NEWSROOM > LEGAL DEVELOPMENTS.) Twatela kulombelangako nawa vandumbwetu vaze vafwisa, navaze vali muukalu wakulijila, najijita, navaze vali muukalu wauhutu. Tachikizenu ngwenu kuli vandumbwetu vavavulu vaze vali nakusakiwa kuvalombelako. Nge natulombelangako vakwetu, kaha natusolola ngwetu katwahaka kulutwe vyuma twafwila etu vaveneko oloze shina vize vasaka vakwetu nawa. (Fwili. 2:4) Chikupu vene, Yehova eji kukumbululanga kulomba kana.

14. Mujila muka Yehova atuhana chakutalilaho chakupwa wakwanguhwa kwivwilila?

¹⁴ Jila yikwavo natusolwelamo kulinyisa chetu shina kwivwilila vyuma navahanjika vakwetu. Mukanda WaYakova 1:19 ngwawo twatela ‘kwanguhwanga kwivwilila.’ Yehova atuhana chakutalilaho chamwaza twatela kulondezeza. (Kupu. 18:32; Yoshu. 10:14) Tunahase kulinangula kumujimbu watwama hali Kulovoka 32:11-14. (Tangenu.) Numba tuhu Yehova kasakiwile kumulweza vyakulinga kuli Moseko, oloze evwililile kuvyuma apwile nakuhanjika Mose. Vatu kavasaka kwivwilila vyuma mwahanjika mutu uze vatachikiza ngwavo eji kulimbenjangako. Oloze Yehova eji kwivwililanga kukulomba chavatu vaze navamusanyika mulufwelelo.

15. Natuhasa kulondezeza ngachilihi Yehova hakuvumbika vakwetu?

¹⁵ Twatela kulihulisa ngwetu: ‘Kachi nge Yehova evwililile vatu vakufwana nge Apalahama, naLakele, naMose, naYoshuwa, naManowa, naElija naHezekiya, kaha chuma muka nachinguhonesa kuvumbika vandumbwami nakwivwililanga vyuma navahanjika nakuvikavangiza? Uno kuliko mutu umwe muchikungulwilo chipwe mutanga yami uze ali nakusakiwa kumuzakama chikuma tahi? Kaha chuma muka ngwatela kulinga mangana ngumukafwe?’—Kupu. 30:6; Kuyu. 13:9; Vamya. 1, 17:22; Miji. 2, 30:20.

16. Mwangana Ndavichi alingile ngachilihi omu vamusowangijile kuli Shimei?

¹⁶ Kulinyisa cheji kutukafwanga nawa tupwenga namuchima wakulikanyisa kachi nge vanatusowangiza kuli vakwetu. (Efwe. 4:2) Hali Samwele 2, 16:5-13. (Tangenu.) hatwama chakutalilaho chamwaza chize tunahase kulondezeza. Ndavichi navangamba jenyi vavatukanyine nakuvasa malolwa kuli Shimei uze apwile kausoko kaMwangana Saulu. Ndavichi afungulwile cheseko numba tuhu apwile nangolo jakujiha Shimei. Chuma muka chamukafwile apwenga namuchima wakulikanyisa? Chuma nachitukafwa shina kukekesa mazu atwama hali Samu yamuchitatu.

17. Chuma muka chakafwile Ndavichi apwenga namuchima wakulikanyisa, kaha natuhasa kumulondezeza ngachilihi?

 ¹⁷ Mazu akujimbula Samu yamuchitatu asolola nge Ndavichi asonekele eyi Samu “omu apwile nakuchina mwanenyi Avasalome.” Mazu amuVesi 1 na 2 alifwana nawaze atwama hali Samwele wamuchivali kapetulu 16. Kaha mazu amuVesi 4 asolola lufwelelo apwile nalwo Ndavichi hakwamba ngwenyi: “Nangusanyika Yehova nalizu lyakukanguka, kaha mwangukumbulula kufuma kupili yenyi yajila.” Nayetu nawa tunahase kulomba kuli Yehova kachi nge vakwetu vanatusowangiza. Yehova mwatuhana shipilitu yenyi yajila mangana yitukafwe tumike. Kutala kuliko jijila jeka jize namusolwelamo muchima wakulikanyisa tahi? Kutala mwafwelela chikupu ngwenu Yehova mwamizakama halwola muli nakumona ukalu tahi?

18. Uno natunganyala ngachilihi nge natukavangiza vyuma eji kutulwezanga Kalunga?

¹⁸ Kulinga vyuma vize twatachikiza ngwetu vyakwoloka cheji kunehanga nganyo yayinene chikuma. Hali Vishimo 4:7 vasonekaho ngwavo: “Mangana apwa amalemu chikuma.” Numba tuhu mangana eji kufumanga hachinyingi ali nacho mutu, oloze eji kusolokelanga muvyuma mwasakula kulinga keshi nge havyuma vize atachikizako. Natuzenene vatwama namangana. Tuzenene vavatunga nauhashi uze weji kuvakafwanga valongese kulya chavo mungonde yanonga. (Vishi. 30:24, 25) Kulishitu uze apwa “mangana aKalunga” eji kwivwisanga Ise kuwaha kumuchima. (Koli. 1, 1:24; Yowa. 8:29) Kalunga atachikiza chihandwa chatwama hakusakula vyuma vyakwoloka nakuvizata. Kaha eji kukisulanga vaze veji kukilikitanga noho hakumina ngolo javo mangana vasolole muchima wakulinyisa nakulinga vyuma vyakwoloka. (Tangenu Mateu 7:21-23.) Shikaho tufwilenu kukilikita nangolo mangana tupwenga namuchima wakulinyisa. Kulinga vyuma vyakwoloka chasakiwa lwola nakupwa namuchima wakutalilila chikoki. Chipwe ngocho, tachikizenu ngwenu kupwa namuchima kana nachimilingisa mupwenga vakuwahilila oholyapwa nakulutwe.