1. Mwomwo ika vaka-kulemesa Yehova vapwila vakuwahilila? (Talenu muvwimbimbi wakulivanga.)

VINJIHO JAYEHOVA vapwa vatu vakuwahilila. Chakutalilaho, nge vali kukukunguluka chaNgalila chipwe chaChihanda chipwe nge vali kukuliwana cheka, veji kupwanga vakuwahilila, vakusehaseha nakushimutwila nawa muzangi. Jino mwomwo ika vapwila vakuwahilila? Chuma cheji kuvalingisanga vawahilile shina kutachikiza Yehova, nakumuzachila nakumulondezeza hakupwa ikiye ‘Kalunga wakuwahilila.’ (Chimo. 1, 1:11; Samu 16:11) Hakuwana nge kuli Kalunga kukiko kwafuma kuwahilila, shikaho asaka nayetu tupwenga tuvakuwahilila, kaha eji kutukafwanga mangana tuwahilile.—Lushi. 12:7; Kwambu. 3:12, 13.

2, 3. (a) Uno kuwahilila chapwa ngachilihi? (b) Mwomwo ika chapwila chachikalu kupwa vakuwahilila makumbi ano?

² Nyi ngachilihi yenu? Kutala mwapwa muvakuwahilila tahi? Kutala muli nakusaka kutwalaho lika kupwa muvakuwahilila tahi? “Kuwahilila” chalumbununa “kusuuluka chamuchima navishinganyeka vyamutu hakutwama kanawa, kaha cheji kumulingisanga atwaleho lika kulivwisa kuwaha kuyoya.” Mbimbiliya yasolola  ngwayo mutu uze vanakisula kuli Yehova ikiye eji kupwanga nakuwahilila chamwenemwene. Chipwe ngocho, makumbi ano chapwa chachikalu kuwana kuwahilila chamwenemwene. Mwomwo ika?

³ Vatu vavavulu vali nakuhomba mwomwo yaukalu wakufwana nge kufwisa, chipwe nge kausoko vanamufumisa muchikungulwilo chipwe kulilukulula chipwe kukuma chamilimo. Veka vali nakuyanda mwomwo yajijita chipwe kuhona chivwasano. Ukalu weka nawa shina kuvasekeleka kuli vakwavo vaka-milimo chipwe vaka-shikola, chipwe kuvakasa mukamenga chipwe kuviza. Chipwe ngocho, Yesu Kulishitu uze “apwa uka wenyi Muka-kuyula, wakuwahilila” asaka kuvendejeka vatu. (Chimo. 1, 6:15; Mateu 11:28-30) MuChihande ChahaPili chize ahanjikile Yesu, avulukile vilinga vize vinahase kutukafwa tutwaleho lika kupwa vakuwahilila chamokomoko navyeseko tunakumona muno mukaye kaSatana.

4, 5. Chuma muka nachitukafwa tupwenga vakuwahilila?

⁴ Yesu avangilile kuvuluka chuma chize chapwa chachilemu chikuma. Ambile ngwenyi: “Vawahilila vaze vejiva ngwavo vasaka vyuma vyakushipilitu, mwomwo Wangana wamelu unapu wavo.” (Mateu 5:3) Uno natusolola ngachilihi ngwetu twasaka vyuma vyakushipilitu? Tweji kulinganga ngocho hakulya kulya chakushipilitu, nakumona kulemesa Kalunga kupwa chachilemu kuhambakana vyuma vyeka vyosena. Nge natulinganga ngocho, kaha natupwa chikupu tuvakuwahilila. Echi nachizamisa lufwelelo lwetu muvyuma atushika Kalunga. Kaha nawa ‘lutalililo luze lweji kunehanga kuwahilila’ nalutukolezeza tupendaminenga haMazu aKalunga.—Chitu. 2:13.

⁵ Kutunga usoko wakukola naYehova nawa nachitukafwa tuwane kuwahilila chamwenemwene. Kaposetolo Paulu vamuhwiminyinyine asoneke ngwenyi: “Wahililenunga muli Mwata shimbu yosena. Nangwamba cheka ngwami, wahililenunga.” (Fwili. 4:4) Hakusaka tulivwise kuwaha usoko wetu naKalunga, twatela kupwa namangana. Mbimbiliya ngwayo: “Awahilila mutu uze mwawana mangana, nauze mwaheta uhashi wakukekesa vyuma. [Mwomwo mangana] anapu nge mutondo wakuyoya kuli vaze navawalinjilila, kaha vaze navawakwachilila navavamba ngwavo vawahilila.”—Vishi. 3:13, 18.

6. Uno kuwahilila chakwilila chapendamina hakulinga ika?

⁶ Oloze hakusaka tutwaleho lika kupwa tuvakuwahilila, twatela kukavangizanga vyuma natutanga muMazu aKalunga. Yesu ashindakanyine hakulema chakulinga vyuma natutanga hakwamba ngwenyi: “Kachi nge munatachikiza vyuma kanevi, kaha namuwahilila nge namuvilinganga.” (Yowa. 13:17; tangenu WaYakova 1:25.) Echi chikiko chuma nachimikafwa mupwenga vakusuuluka kushipilitu nakuwana kuwahilila chakwilila. Jino natuhasa kupwa ngachilihi vakuwahilila kachi nge tuli nakumona ukalu? Tukekesenu vyuma ahanjikile Yesu muChihande ChahaPili.

7. Vaze vali nakulishona vanahase kupwa ngachilihi vakuwahilila?

⁷ “Vawahilila vaze veji kulishonanga, mwomwo navakavavendejeka.” (Mateu 5:4) Pamo munahase kulihulisa ngwenu, ‘Uno mutu ali nakulishona nahase kupwa ngachilihi wakuwahilila?’ Yesu kapwile nakuvuluka vatu vosena vaze veji kulishonangako, mwomwo navaka-kuhuka veji kulishonanga hakumona ukalu uli nakusoloka muno ‘mulwola lwalukalu.’ (Chimo. 2, 3:1) Oloze kulishona chavo kachavalingisa vapandame kuli Yehovako, ngocho  kavapwa vakuwahililako. Yesu pamo apwile nakuvuluka vatu vaze veji kulishonanga mwomwo yakumona vilinga vyavipi vyavatu. Vatu kana vatachikiza tutenga twavo nakutachikiza nawa ngwavo ukalu uli muno mukaye weza mwomwo yashili twaswana. Yehova atachikiza vatu kana, kaha eji kuvakisulanga nakuvavendejeka mangana vatwaleho lika kupwa vakuwahilila mukuyoya chavo.—Tangenu Ezekele 5:11; 9:4.

8. Lumbununenu omu muchima wauvwovu unahase kunehela mutu kuwahilila.

⁸ “Vawahilila vaze vavavwovu michima, mwomwo navakaswana mavu.” (Mateu 5:5) Uno kupwa vavavwovu nachikafwa ngachilihi mutu apwenga wakuwahilila? Vatu vamwe veji kwalumunanga vilinga vyavo hanyima yakulinangula muchano. Shimbu kanda vatu kana valumuke, pamo vapwilenga vavakalu michima, vaka-kukokojola chipwe vaka-matoto. Oloze hakuwana nge vanavwale lyehi “mutu wamuhya,” vali jino nakusolola vilinga vyakufwana nge, “keke, nalikoji, nakulinyisa, nakuvova, nakutalilila chikoki.” (Kolo. 3:9-12) Ngocho vapwa jino vakuwahilila mukuyoya chavo nakutwama mukuunda navakwavo. Kaha nawa Mazu aKalunga afwelelesa vatu kana ngwawo “navakaheta mavu.”—Samu 37:8-10, 29.

9. (a) Mujila muka vaze vavavwovu michima “navakaswana mavu”? (b) Mwomwo ika vaze “veji kwivwanga zala nalipwila lyavyuma vyakwoloka” vapwila vakuwahilila?

⁹ Mujila muka vaze vavavwovu michima “navakaswana mavu”? Tumbaji twaYesu vakuwavisa navakaswana mavu omu navakaputuka kuyula mwavamyangana navapilishitu. (Kuso. 20:6) Kaha mayevuyevu avatu vaze kaveshi kukaya mwiluko navakaswana mavu omu navakavetavisa kutwamaho haya myaka yosena nakupwa vakukupuka nakutwama mukuunda nakuwahilila. Vatu kana vakiko vaze vavuluka ngwavo vapwa vakuwahilila mwomwo “veji kwivwanga zala nalipwila lyavyuma vyakwoloka.” (Mateu 5:6) Vatu kana navakavekuchisa mukaye kakahya. (Petu. 2, 3:13) Omu Kalunga mwakafumisako kuhuka chosena, hakiko jino vatu navakapwa vakuwahilila, kaha kaveshi kukanuka cheka ukalu vali nakumona makumbi anoko.—Samu 37:17.

10. Uno kutetela chalumbununa ika?

¹⁰ “Vawahilila vaze veji kutetelanga vakwavo, mwomwo navakiko navakavatetela.” (Mateu 5:7) Lizu lyachiHepeleu valumuna ngwavo kutetela lyalumbununa “kwivwila mutu keke.” Kaha nawa lizu lyachiHelase lyalumbununa mwomumwe. Chipwe ngocho, katwatela kukumina hakwivwanga keke kahako. Mbimbiliya yasolola ngwayo keke yetu twatela kuyisolola muvilinga.

11. Vyuma muka natulinangula kuchifwanyisa chakaSamaliya?

¹¹ Tangenu Luka 10:30-37. Chifwanyisa chakaSamaliya chize ahanjikile Yesu chasolola omwo chalema kutetela. Uze Kasamaliya evwile keke ngocho afwililile kukafwa uze lunga vavetele. Hanyima yakuhanjika chize chifwanyisa, Yesu ambile ngwenyi: “Yako ukalingenga ngocho nayove nawa.” Shikaho tunahase kulihulisa ngwetu: ‘Kutala nayami nguli nakulinga mwomumwe tahi? Kutala ngweji kulondezezanga uze kaSamaliya tahi? Vyuma muka ngwatela kulinga mangana ngutwaleho lika kusolwela vaze vali nakuyanda likoji? Chakutalilaho, kutala ngweji kukafwanga vandumbwami vatushinakaji, navatuliwe, navaze vakwechi visemi javo kavapwa Vinjihoko tahi? Kutala ngweji ‘kuvendejekanga vatu vaze vanahombo’ tahi?—Teso. 1, 5:14; Yako. 1:27.

12. Uno kutetela vakwetu nachitukafwa ngachilihi tupwenga vakuwahilila?

¹² Uno kutetela cheji kunehanga ngachilihi kuwahilila? Nge natutetelanga vakwetu, kaha natupwa nakuwahilila chize cheji kwizanga mwomwo  yakuhana. Kaha nawa twejiva ngwetu kulinga ngocho cheji kwivwisanga Yehova kuwaha. (Vili. 20:35; tangenu WavaHepeleu 13:16.) Mwangana Ndavichi asonekele hali mutu uze eji kutetelanga vakwavo ngwenyi: “Yehova mwamukinga nakumulama. Navamwambanga ngwavo apwa wakuwahilila hamavu.” (Samu 41:1, 2) Shikaho nge natutetelanga vakwetu, kaha nachikatulingisa nayetu vakatutetele kuli Yehova nakutwama mukuwahilila haya myaka yosena.—Yako. 2:13.

13, 14. Uno kutoma mumuchima chatambukila ngachilihi hamwe nakupwa vakuwahilila?

¹³ “Vawahilila vaze vatoma mumichima, mwomwo navakamumona Kalunga.” (Mateu 5:8) Hakusaka tupwenga vatoma mumichima, twatela kupwa navilinga vyamwaza nakulihenda kukufwila kulinga vyuma vyavipi. Twatela kupwanga navishinganyeka vitoma kuchina natwenyeka usoko wetu naYehova.—Tangenu Wavaka-Kolinde 2, 4:2; Chimo. 1, 1:5.

¹⁴ Vaze vatoma mumichima vanahase kupwa vakuwahilila nakulivwisa kuwaha usoko wamwaza naYehova uze ambile ngwenyi: “Vawahilila vaze navakosa vikuto vyavo.” (Kuso. 22:14) Uno mujila muka veji ‘kukosanga vikuto vyavo’? Vaka-Kulishitu vawavisa veji ‘kukosanga vikuto vyavo’ omu Yehova eji kuvamonanga kupwa vatoma, kaha mwakavahana mwono wakuzeneka kufwa nakuyoya haya myaka yosena mwilu. Kaha nawa liyongomena lyalinene lyavatu vaze vatalilila kukayoyela hano hamavu, Kalunga eji kuvetavilanga kupwa masepa jenyi. Shikaho veji kukosanga “vikuto vyavo nakuvitomesa mumanyinga aMwanamukoko.”—Kuso. 7:9, 13, 14.

15, 16. Mujila muka vaze vatoma mumichima vanahase ‘kumumona Kalunga?’

¹⁵ Uno vaze vatoma mumichima vanahase ngachilihi ‘kumona Kalunga’ okunyi “kakweshi mutu mwamona [Kalunga] nakuyoyako”? (Kulo. 33:20) Lizu lyachiHelase valumuna ngwavo “kumona” lyalumbununa “kumona muvishinganyeka chipwe kuhumikiza chipwe kutachikiza.” Vaze veji kumonanga Kalunga nameso avishinganyeka vyavo veji kumutachikizanga nakufwila kulondezeza vilinga vyenyi. (Efwe. 1:18) Yesu asolwelenga vilinga vyaKalunga mujila yakukupuka, ngocho ambile ngwenyi: “Weshowo nangumono ami namono naTata nawa.”—Yowa. 14:7-9.

¹⁶ Jila yikwavo yize vaka-kulemesa Kalunga vamuchano vanahase ‘kumumona Kalunga’ shina kumona omu eji kuvakafwanga muukalu wavo. (Yopa 42:5) Kaha nawa veji kushishikanga meso amichima yavo havyuma vize Kalunga ashika vaze vatoma mumichima nakumuzachila nakashishi. Vaze vawavisa nawa veji kumonanga Yehova omu veji kusangukanga nakutambula fweto yavo mwilu.—Yowa. 1, 3:2.

17. Uno kutwama mukuunda navakwetu nachitukafwa ngachilihi tupwenga tuvakuwahilila?

¹⁷ Yesu ambile nawa ngwenyi: “Vawahilila vaze veji kunehanga kuunda.” (Mateu 5:9) Vatu vaze vasaka kuneha kuunda vapwa vakuwahilila. Kambaji Yakova asonekele ngwenyi: “Mihako yakwoloka veji kuyikuvanga mukuunda kuli vaze vali nakuneha kuunda.” (Yako. 3:18) Kachi nge tunalikokojwesa navakwetu muchikungulwilo chipwe mutanga, kaha twatela kulomba Kalunga atukafwe tutwame navo mukuunda. Nge natulinga ngocho, kaha Yehova mwatuhana shipilitu yenyi yitukafwe tusolole vilinga vize navitunehela kuwahilila chamwenemwene. Yesu amwenenga kuunda kupwa chachilemu, ngocho ambile ngwenyi: “Kachi nge uli nakuneha wana wove kulijiko lyakulumbila, kaha hakuheta kuze hinawanuka ngwove uli namulonga nandumbwove, seza wana wove kulutwe lwalijiko lyakulumbila, kaha yako. Chatete kalivwasane nandumbwove, numba ukinduluke jino nakuhana wana wove.”—Mateu 5:23, 24.

18, 19. Mwomwo ika vaka-Kulishitu vatela kupwa vakuwahilila numba tuhu vali nakuvayanjisa?

¹⁸ “Mwawahilila enu navasaula kuvatu nakumiyanjisa nakumivangijikila vyuma vyavipi vyeka navyeka vyosena mwomwo yayami.” Uno Yesu alumbunwine ika hakuhanjika mazu kana? Atwalileho kuhanjika ngwenyi: “Wahililenu, lisambenu, mwomwo fweto yenu yinapu yayinene mwilu, mwomwo mukiko vene vayanjishile navapolofweto vaze valivangile kupwako shimbu kanda enu muchisemuke.” (Mateu 5:11, 12) Mbimbiliya ngwayo omu vaposetolo vavavetele, “vafumine kumeso avaka-Sunendeline nakuwahilila.” Shikaho, vaposetolo kavawahililile mwomwo yakuvavetako, oloze “mwomwo chapwile chakutamo kuvasawila halijina lyaYesu.”—Vili. 5:41.

¹⁹ Makumbi ano, vatu jaYehova navakiko vapwa vakuwahilila mwomwo yakuvayanjishila halijina lyaYesu chipwe nge vali nakumona vyeseko vyeka. (Tangenu WaYakova 1:2-4.) Ngana muze chapwile kuli vaposetolo, nayetu katwasaka kutuyanjisako. Oloze nge natulama kulonga chetu hakuhita muvyeseko, kaha Yehova mwatukafwa tutwaleho kukakachila muchishishisa chakuyayavala. Chakutalilaho, muAugust 1944, vaka-fulumende vakwachile ndumbwetu Henryk Dornik nakumutwala kuchilombo chakulamina vafunge. Ava vaka-kole vambile ngwavo: “Ava vanyike vakunjinjavala, vali nakwivwa kuwaha kuvayanjisa.” Ndumbu Dornik ambile ngwenyi: “Numba tuhu kangwasakile kunguyanjisako, oloze ngwomikile nakutwalaho lika kupwa nguwakushishika kuli Yehova, kaha echi changulingishile nguwahilile. . . . Ngwalombelenga Yehova anguhane ngolo, kaha angukafwilenga.”

20. Mwomwo ika twatela kuzachila “Kalunga ou apwa wakuwahilila”?

²⁰ Kutachikiza ngwetu vali nakutwivwila uselewa kuli “Kalunga ou apwa wakuwahilila” nachitukafwa tupwenga tuvakuwahilila numba tuhu navatuyanjisa kuli vaka-mauka akwitava chamakuli chipwe kutujinda kuli vaka-tanga yetu, chipwe kuviza chipwe ushinakaji. (Chimo. 1, 1:11) Chuma chikwavo cheji kutunehelanga kuwahilila shina kushinganyeka havyuma atushika Kalunga “ou ahona kwonga.” (Chitu. 1:2) Omu Yehova mwakatesamo jishiko jenyi, natukawahilila chikuma, kaha katweshi kukanuka cheka ukalu tuli nakumonako. Omu natukapwa muPalachise, Yehova mwakatukisula mwamunene chikuma. Aha hakiko jino natukapwa nakuwahilila chamwenemwene chize kanda lyehi tupwenganga nacho. Chikupu vene, “[natukalivwisa] kuwaha kuunda chamwenemwene.”—Samu 37:11.