1. Vyuma muka vajimbalishile vaAlama naEve, kaha vyaneha ukalu muka?

UNO iya atela kuhakako jishimbi jakutukafwa tutachikize vyuma vyamwaza nevi vyavipi? Omu Alama naEve valile kumutondo wakutachikijila kuwaha nakupihya uze avakanyishile Kalunga, vasolwele hatoma ngwavo kavafwelelele Yehova nakumona jishimbi avahanyine kupwa jajilemuko. Valisakwililile vavene vyuma vyamwaza nevi vyavipi. (Kupu. 3:22) Alama naEve vajimbalishile vyuma vyavivulu. Chakutalilaho, vajimbalishile usoko wavo naYehova. Kaha nawa kavapwile cheka nalutalililo lwakuyoya haya myaka yosenako. Valingishile vana vavo vapwenga vaka-shili nakuvalingisa nawa vaputuke kufwa. (Loma 5:12) Chikupu vene, vyuma vasakwile kulinga vaAlama naEve vyaneha ukalu waunene chikuma.

2-3. (a) Chuma muka alingile chilolo wakaEchopa omu vamwambulilile kuli Fwilipu? (b) Tunahase kunganyala ngachilihi nge navatumbapachisa, kaha vihula muka natushimutwila?

² Alama naEve kavamwene kulema chavyuma avalingililile Yehovako, oloze omu chilolo wakaEchopa vamwambulilile kuli Fwilipu, kakwachile kumashindeko. Ou chilolo amwene vyuma amulingililile Yehova naMwanenyi Yesu kupwa vyavilemu, ngocho kalangishile kumumbapachisako. (Vili. 8:34-38) Kachi nge natulihana kuli Kalunga nakutumbapachisa ngana muze alingile uze chilolo, kaha natusolola hatoma ngwetu twamona vyuma atulingila Yehova naYesu kupwa vyavilemu. Kaha nawa natusolola ngwetu twafwelela chikuma Yehova nakwitavila ngwetu ikiye kaha atela kuhakako jishimbi jakutukafwa tutachikize vyuma vyamwaza nevi vyavipi.

³ Achishinganyekenu havyuma tunahase kunganyala hakuzachila Yehova. Yehova mwakatuhana vyosena vize ajimbalishile Alama naEve kuhakilako vene nalutalililo lwakuyoya haya myaka  yosena. Hakuwana nge twafwelela muli Yesu Kulishitu, Yehova eji kutukonekelanga milonga yetu nakutulingisa tupwenga nachivezu chitoma. (Mateu 20:28; Vili. 10:43) Kaha nawa twatwama hamukana wavangamba jaYehova asakula vaze mwakalingila vyuma vyamwaza kulutwe. (Yowa. 10:14-16; Loma 8:20, 21) Vatu vamwe vaze vanalinangula muchano navakiko vatachikiza ngwavo kuzachila Yehova chapwa hikutokwa chachinene chikuma. Oloze kaveshi kuhamuka nakulihana vavambapachise ngana muze alingile uze chilolo wakaEchopako. Uno vyuma muka vyeji kuvalingisanga vahone kulihana vavambapachise? Kaha vanahase kuhonesa ngachilihi ukalu kana?

4-5. Ukalu muka apwile nawo mukweze walunga Avery nakanyike wapwevo Hannah?

⁴ Kuhona kulifwelela. Visemi jaAvery vapwa Vinjiho jaYehova. Ise apwa kalama wapuho yamwaza, kaha nawa chisemi uze eji kuzakamanga kanawa tanga yenyi. Oloze Avery alangishilenga kulihana vamumbapachise. Mwomwo ika? Ambile ngwenyi: “Ngwashinganyekelenga ngwami kangweshi kukapwa napuho yamwaza ngana yize yatatako.” Avery ashinganyekelenga nawa ngwenyi, keshi kahasa kuzata milimo navakamuhana muchikungulwiloko. Ambile nawa ngwenyi: “Ngwalizakaminyinenga ngwami nachikangukaluhwila kulombanga mulizavu, nakuhanjika vihande chipwe kutwaminyina kuliwana chakuya mumulimo wakwambulula.”

⁵ Hannah kanyike wapwevo wamyaka 18, naikiye kalifwelelelenga iveneko. Visemi jenyi vapwilenga Vinjiho jaYehova. Chipwe ngocho ahuhwasanyinenga numba nge mwakahasa kukakavangiza jindongi jaYehova nyi chiku. Mwomwo ika? Hannah alimwenenga ivene kupwa mutu wamokomoko. Shimbu jimwe evwilenga kupihya chikuma ngocho alilemekelenga ivene, kahechi chahakililileko kuukalu wenyi. Ambile ngwenyi: “Kangwalwezele mutu numba umwe chipwe vene visemi jami vyuma ngwapwile nakulingako. Ngwashinganyekelenga ngwami Yehova keshi kukangwitavila ngukapwe ngungamba yenyiko, mwomwo yavyuma vyavipi ngwapwilenga nakulinga.”

6. Chuma muka chalingishile Vanessa ahone kulihana vamumbapachise?

⁶ Masepa. Vanessa wamyaka 22 ambile ngwenyi: “Ngwapwilenga nasepa wamwenemwene uze ngwatachikijile hamyaka yayivulu.” Chipwe ngocho, sepa lyenyi kakundwijile vishinganyeka vyenyi vyakusaka kumumbapachisako. Echi chevwishilenga Vanessa kupihya, ngocho ambile ngwenyi: “Changukaluhwilile chikuma kupwa namasepa, kaha nawa ngwalizakaminyine ngwami kachi nge nangulitwamina kulikata nenyi, kaha kangweshi kukawana weka wakufwana nge ikiyeko.”

7. Vyuma muka alizakaminyine Makayla, kaha mwomwo ika?

⁷ Kwivwa woma wakuvulumuna mulonga. Makayla apwile namyaka 5 omu yayenyi walunga  vamufumishile muchikungulwilo. Jino omu apwile nakukola, amwenenga omu visemi jenyi vevwilenga kupihya hamulonga alingile yayenyi. Ngocho ambile ngwenyi: “Ngwevwilenga woma wakulihana vangumbapachise, hakushinganyeka ngwami pamo nayami nangukavulumuna mulonga nakungufumisa muchikungulwilo nakulingisa visemi jami vakevwe kupihya chikuma.”

8. Uno Miles evwile woma waka?

⁸ Kufumbukila. Ise yaMiles nanaye wakumulela vapwile Vinjiho jaYehova, oloze naye wakumusema kapwile Chinjihoko. Miles ambile ngwenyi: “Ngwatwaminenga namama hamyaka 18, oloze ngwevwilenga woma kumulweza ngwami ngwapwile nakusaka kungumbapachisa. Ngwahonene kumulweza mwomwo ngwamwene omu apihililile hakumona tata mwapwa Chinjiho, ngocho ngwevwilenga woma ngwami mwalinga mwomumwe nakuli yami.”

9. Chuma muka namulinga kachi nge namutachikiza ngwenu Yehova apwa wazangi kaha nawa atwama namuchima wakutalilila chikoki?

⁹ Alama naEve kavazachililile Yehovako mwomwo kavamuzangileko. Chipwe ngocho, Yehova avetavishile vatwaleho lika kuyoya nakupwa navana nakulitungila jishimbi jakukavangiza hakulela vana vavo. Oloze chuma vasakwile kulinga vaAlama naEve chavanehelele ukalu waunene. Mwanavo wamukulwane ajihile songo yenyi, kaha mukuhita chalwola ulyanyi namuchima wakulizanga mutu ivene vyavulile chikuma. (Kupu. 4:8; 6:11-13) Chipwe ngocho, Yehova awahishile jila yakulwililamo vana vaAlama naEve vosena vaze vapwile namuchima wakusaka kumuzachila. (Yowa. 6:38-40, 57, 58) Omu namutachikiza zangi namuchima wakutalilila chikoki atwama navyo Yehova, kaha nachimilingisa nayenu mumuzange chikuma. Ngocho kamweshi kulondezeza vyuma valingile vaAlama naEveko, oloze namufwila kulihana kuli Yehova.

10. Uno kushinganyeka hamazu atwama hali Jisamu 19:7 nachimikafwa ngachilihi muzachile Yehova?

¹⁰ Twalenuho lika kulinangula vyaYehova. Kachi nge namutwalaho lika kulinangula vyaYehova, kaha nachimikafwa mufwile kumuzachila kanawa mukuyoya chenu. Avery uze twavulukanga hakavanga ambile ngwenyi: “Kutanga mazu atwama hali Jisamu 19:7 (Tangenu.) nakuwashinganyeka chikiko changukafwile chikuma.” Avery amwene nameso enyi kapu omu Yehova ateselemo mazu ahachisoneka  kana, ngocho chamukafwile azange chikuma Kalunga. Kuzanga Yehova nachitukafwa tufwile kumuzachila nakulinga nawa vyuma vize asaka. Hannah uze twavulukanga hakavanga naikiye ambile ngwenyi: “Omu ngwatangilenga Mbimbiliya nakupwa nachilongesa chauka, ngwejile nakutachikiza jino ngwami Yehova evwilenga kupihya omu ngwalilemekelenga ami ivene.” (Petu. 1, 5:7) Hannah apwile jino ‘muka-kulinga mwaya mazu aKalunga.’ (Yako. 1:22) Vyuma muka vyafuminemo? Hannah ambile ngwenyi: “Ngwanganyalile chikuma hakumona kuwaha chatwama hakwononoka Yehova, ngocho changukafwile ngumuzange chikuma. Oholyapwa ngwakunyuka chikupu ngwami Yehova mwangukafwanga mukala ukalu.” Ngocho Hannah alitwaminyinyine jino kulilemekanga, kaha alihanyine mangana vamumbapachise.

11. Vyuma muka alingile Vanessa numba awane masepa vamwenemwene, kaha vyuma muka natulinangulako?

¹¹ Sakulenunga kanawa masepa. Vanessa uze twavulukanga hakavanga atachikijile jino ngwenyi sepa lyenyi ikiye amulingishilenga ahone kuzachila Yehova. Ngocho alitwaminyine kulikata nenyi. Kaha kufumaho azachile nangolo mangana atunge masepa vavahya muchikungulwilo. Ambile ngwenyi, chakutalilaho chaNowa natanga yenyi chamukafwile chikuma, mwomwo “Nowa natanga yenyi vavajingilikile kuvatu vaze vahonene kuzanga Yehova oloze vakiko vapwile lika vakulinunga.” Omu Vanessa vamumbapachishile, aputukile kuzata upayiniya. Ambile jino ngwenyi: “Kuzata upayiniya chinangukafwe ngutunge masepa vavahya vamwenemwene muchikungulwilo ngwatwama namuvikungulwilo vyeka.” Nayenu nawa munahase kuwana masepa vamwenemwene kachi nge namuzatanga chikuma mumulimo uze atuhana Yehova.—Mateu 24:14.

12. Uno woma muka vahonene kupwa nawo vaAlama naEve, kaha vyuma muka vyafuminemo?

¹² Tachikizenu mutu mwatela kwivwa woma. Kwivwa woma kachapihyako. Chakutalilaho, chapwa chakutamo kwivwa woma wakulinga vyuma vize navivwisa Yehova kupihya. (Samu 111:10) Kachi nge vaAlama naEve vapwile nawoma kana, kachi kavalikangile kuli Yehovako, oloze vakiko valikangile. Hanyima yakulikanga, meso avo atonene nakutachikiza jino ngwavo vapwile vaka-shili. Ngocho vatambwishileko navana vavo shili nakufwa. Hakuwana nge vatachikijile ngwavo vapwile uselesele, ngocho vevwile sonyi nakutonga jino mafwo nakuvwala.—Kupu. 3:7, 21.

13-14. (a) Kweseka namazu ahali WaPetulu 1, 3:21, mwomwo ika katwatela kwivwa woma wakufwako? (b) Vyuma muka vyatela kutulingisa tuzange Yehova?

 ¹³ Numba tuhu chapwa chakutamo kwivwa woma wakulinga vyuma vize navivwisa Yehova kupihya, oloze katwatela kwivwa woma wakufwako. Yehova atuwahishila jila mangana tukawane kuyoya chahaya myaka yosena. Kachi nge tunalingi shili, kaha hinatupihilila nakwalumuka mwomwo yakufwelela mundando yakusokola yaYesu, Yehova mwatukonekela. Jila yimwe yakulipwila tweji kusolwelangamo lufwelelo lwetu shina kulihana kuli Kalunga nakutumbapachisa.—Tangenu WaPetulu 1, 3:21.

¹⁴ Kuli vyuma vyavivulu vize vyatela kutulingisa tuzange Yehova. Eji kutuhananga vyuma vyamwaza vize vyasakiwa mukuyoya hakumbi hakumbi, kaha nawa eji kutunangulanga tutachikize omu apwa navyuma vize ashika kukatulingila. (Yowa. 8:31, 32) Ahakako chikungulwilo chavaka-Kulishitu mangana chitutwaminyine nakutukafwa. Eji kutukafwanga tumike muukalu tuli nakumona oholyapwa, nakutuhana lutalililo lwakukayoya haya myaka yosena kulutwe. (Samu 68:19; Kuso. 21:3, 4) Kachi nge natushinganyeka havyuma vize Yehova natulingila vyakusolola nge atuzanga, kaha natupandama kuli ikiye nakumuzanga. Ngocho nge natuzanga Yehova, kaha nachitukafwa tuhone kulinga vyuma vize navimwivwisa kupihya. Oloze twatela kwivwa woma wakulinga vyuma vize navimwivwisa kupihya mwomwo atuzanga.

15. Uno Makayla ahonesele ngachilihi woma apwile nawo?

¹⁵ Makayla uze twavulukanga hakavanga ahonesele woma uze apwile nakwivwa omu atachikijile ngwenyi Yehova apwa muka-kukonekela. Ambile ngwenyi: “Ngwatachikiza ngwami tuvosena katwakupukako kaha nawa tweji kulimbenjanga. Ngwatachikiza nawa ngwami Yehova atuzanga kaha mwatukonekela kuhichila mundando yakusokola.” Kuzanga Yehova chamulingishile alihane kuli ikiye nakumumbapachisa.

16. Uno Miles vamukafwile ngachilihi mangana ahonese woma apwile nawo?

¹⁶ Miles uze ashinganyekelenga ngwenyi naye mwamukanyisa nge mwatachikiza ngwenyi ali nakusaka kumumbapachisa, ayile kuli kalama wakujinguluka mangana amukafwe. Miles ambile ngwenyi: “Ou kalama amulwezele ngwenyi naikiye nawa naye kapwile Chinjihoko.” Ambile nawa ngwenyi: “Ou kalama angukafwile ngutachikize vyakuhanjika mangana ngukakunyule mama ngwami nguli nakufwila kungumbapachisa keshi mwomwo yakungushinjila kuli tatako.” Naye apihililile hakwivwa chuma asakwile kulinga mwanenyi. Kahechi chamulingishile afume hembo mangana vaka-mumbapachise mwomwo afwililile kutesamo chuma asakwile kulinga. Ambile ngwenyi: “Kutachikiza vyuma vyamwaza vize Yehova Kalunga angulingililile changwivwishilenga kuwaha chikuma. Omu ngwashinganyekelenga chikuma handando yakusokola, ngwatachikijile jino ngwami Yehova anguzanga chikuma. Vyuma kana vikiko vyangulingishile ngulihane kuli Yehova nakungumbapachisa.”

17. Tuvosena tunahase kusakula kulinga ika?

¹⁷ Omu Eve alile kumutondo uze wapwile muEtene, asolwele hatoma ngwenyi akanyine Kalunga. Kahomu Alama naikiye akavangijile puwenyi asolwele hatoma ngwenyi kamwene vyuma vyamwaza vize amulingililile Yehova kupwa vyavilemuko. Tuvosena tunahase kusolola hatoma ngwetu twamona vyuma atulingila Yehova kupwa vyavilemu keshi ngana muze alingile Alama naEveko. Shikaho, nge natulihana vatumbapachise kaha natusolola hatoma ngwetu Yehova ikiye atamo kuhakako jishimbi jakutukafwa tutachikize vyuma vyamwaza nevi vyavipi, nakusolola nawa ngwetu twamuzanga chikuma kaha nawa twamufwelela.

18. Vyuma muka navimikafwa muzachile kanawa Yehova?

¹⁸ Kachi nge vanatumbapachisa, twatela kutwalaho lika kukavangiza jishimbi jaYehova hakumbi hakumbi, kahomu mukiko vali nakulinga navandumbwetu vavavulu mwahita kaye kosena. Nayenu munahase kulinga mwomumwe kachi nge namutwalaho lika kwivwishisa vyuma yahanjika Mbimbiliya, nakulikata navandumbwenu, nakulwezangako vakwenu vyuma munalinangula hali Yehova uze apwa Senu wazangi. (Hepe. 10:24, 25) Kachi nge muli nakusakula vyakulinga, kaha mwatela kukavangiza jindongi jatwama muMazu aKalunga naliuka lyenyi. (Isa. 30:21) Kulinga chuma kana nachimikafwa mufukile muvyuma namulinganga.—Vishi. 16:3, 20.

19. Chuma muka mwatela kutwalaho lika kushinganyeka, kaha mwomwo ika?

¹⁹ Kachi nge namutwalaho lika kushinganyeka havyuma munanganyala mwomwo yakukavangiza jishimbi jaYehova, kaha namumuzanga chikuma nakufwila nawa kukavangiza lika jishimbi jenyi. Kaha kakweshi kupwa kala chuma chize mwalinga Satana nachimilingisa mulitwamine kuzachila Yehovako. Omu namuhita myaka 1000 kufuma oholili namukevwa kuwaha chikuma hakumona nganyo nayikafuma hakulihana chenu kuli Yehova nakumimbapachisa. Chikupu vene namukamona ngwenu chuma mwasakwile kulinga mukuyoya chenu vyapwile vyavilemu chikuma.