1-2. (a) Yehova nahanjikanga ngachilihi navatu? (b) Vyuma muka natushimutwila muchihande chino?

YEHOVA asaka kuhanjika kuli etu. Kushikulu Yehova azachishilenga vapolofweto, navangelo, naMwanenyi Kulishitu Yesu mangana alweze vatu jenyi vyuma asakile. (Amo. 3:7; Ngale. 3:19; Kuso. 1:1) Makumbi ano, eji kuhanjikanga kuli etu kuhichila muMazu enyi Mbimbiliya. Atuhana Mbimbiliya mangana tutachikize vishinganyeka vyenyi najijila jenyi.

² Omu Yesu apwile hano hamavu, Yehova ahanjikile nenyi kufuma mwilu mapapa katatu. Tushimutwilenu havyuma ahanjikile Yehova kuli Mwanenyi, navyuma natulinangula kuMazu enyi nomu tunahase kunganyala kumazu ahanjikile.

3. Kweseka namukanda waMako 1:9-11, mazu muka ahanjikile Yehova omu Yesu vamumbapachishile, kaha mazu kana asolola vishina muka vyavilemu?

³ Hali Mako 1:9-11 hakiko hatwama mazu atete aze ahanjikile Yehova kuli Yesu kufuma mwilu. (Tangenu.) Ambile ngwenyi: “Ove uMwanami, yove ngwazanga, ngunakwivwila kuwaha.” Chikupu vene, mazu kana evwishile Yesu kuwaha chikuma hakwivwa Ise mwahanjika ngwenyi amuzanga. Mazu aze ahanjikile Yehova ashindakanyine vishina vyavilemu vitatu hali Yesu. Chatete, Yehova ambile ngwenyi Yesu apwa Mwanenyi. Chamuchivali, ambile ngwenyi amuzanga. Kaha chamuchitatu, ambile ngwenyi amwivwila kuwaha. Tukekesenu jino kanawa hali evi vishina.

4. Omu Yesu vamumbapachishile, usoko muka wauhya apwile nawo naKalunga?

⁴ “Ove uMwanami.” Yehova hakuhanjika mazu kana asolwele ngwenyi Mwanenyi Yesu, apwile nausoko wauhya naIkiye. Omu  Yesu apwile mwilu apwile mwana Kalunga wakushipilitu. Oloze omu vamumbapachishile vamuwavishile nashipilitu yajila. Halwola kanelu, Kalunga asolwele hatoma ngwenyi hakuwana nge Yesu apwile Mwanenyi wakuwavisa, ngocho apwile nalutalililo lwakukinduluka cheka mwilu nakukapwa Mwangana kaha nawa Kapilishitu Wakulitulaho. (Luka 1:31-33; Hepe. 1:8, 9; 2:17) Shikaho chapwile chakutamo Yehova kuhanjika kuli Yesu omu vapwile nakumumbapachisa ngwenyi: “Ove uMwanami.”—Luka 3:22.

5. Tunahase kulondezeza ngachilihi Yehova hakusangejeka nakukolezeza vakwetu?

⁵ “Yove ngwazanga.” Yehova ahanjikile hatoma ngwenyi, azangile mwanenyi nakumwivwila kuwaha, kahechi chatunangula nge twatela kukolezezanga vakwetu. (Yowa. 5:20) Tweji kwivwanga kuwaha kachi nge mutu umwe mwatukolezeza nakutusangejeka hakumona vilinga vyetu vyamwaza. Chochimwe nawa, twatela kukolezeza vandumbwetu najitanga jetu nakuvazanganga. Kachi nge natusangejekanga vakwetu, kaha natuvakafwa vapwenga nalufwelelo lwakukola nakuvalingisa vatwaleho lika kuzachila Yehova nakashishi. Visemi vatela kukolezezanga chikuma vana vavo. Kachi nge visemi navasangejekanga vana vavo namuchima wavo wosena nakusolola ngwavo vavazanga, kaha nachikafwa vana vavo vazovoloke.

6. Mwomwo ika twatela kufwelela Yesu?

⁶ “Ngunakwivwila kuwaha.” Awa mazu asolwele chikupu nge Yehova afwelelele ngwenyi Yesu mwatwalaho lika kulinga mwaya muchima wenyi. Yehova afwelela chikuma mwanenyi, shikaho nayetu twatela kufwelela chikupu ngwetu Yesu mwakatesamo jishiko jaKalunga josena. (Koli. 2, 1:20) Kachi nge natushinganyeka hachakutalilaho chaYesu, kaha nachitukafwa tufwile kulinangula kuli ikiye nakukavangiza mujitambo jenyi. Yehova afwelela ngwenyi,  vangamba jenyi vosena navatwalaho kulinangula kuli Mwanenyi.—Petu. 1, 2:21.

7. Kweseka namazu ahali Mateu 17:1-5, lwola muka Yehova ahanjikile kufuma mwilu, kaha mazu muka ahanjikile?

⁷ Tangenu Mateu 17:1-5. Lwola lwamuchivali luze Yehova ahanjikile naMwanenyi shina omu Yesu, “alyalumwine mweka.” Yesu alwezele Petulu, naYakova, naYowano mangana vayenga nenyi kupili. Omu vapwile kuze, vamwene chakumwenesa chakulipwila. Kumeso aYesu kwamunyikile, kaha uvwalo wenyi nawa wamunyikile zwalala. Kaha vatu vavali vaMose naElija, vapwile nakuhanjika nenyi kutalisa kukufwa nakusanguka chenyi. Numba tuhu meso avava vaposetolo vatatu “alemene natulo,” oloze vamwene echi chakumwenesa chakulipwila omu vatonene kanawa. (Luka 9:29-32) Kufumaho livwi litoma lyavafwikile, kaha vevwile lizu lyaKalunga nalifuminyina muze mulivwi. Omu Yesu vapwile nakumumbapachisa Yehova ahanjikile mazu akusolola nge amuzangile nakumwitavila hakuhanjika ngwenyi: “Ou ikiye Mwanami, ou ngwazanga, ou ngwevwila kuwaha.” Oloze halwola kanelu apwile Yesu kupili Yehova ahakilileko mazu akwamba ngwenyi: “Mwivwililenunga.”

8. Uno chakumwenesa chakulyalumuna mweka chakafwile ngachilihi Yesu natumbaji twenyi?

⁸ Chakumwenesa kana chasolwele upahu nangolo mwakapwa navyo Yesu omu mwakapwa Mwangana muWangana waKalunga. Chikupu vene, twafwelela ngwetu Kulishitu vamukolezezele hakuwana nge apwile hakamwihi nakuhita muluyando nakumujiha mujila yayipi. Kaha chakumwenesa kana nawa chajikijishile lufwelelo lwatumbaji twenyi mwomwo chavakafwile valizange kuhita muvyeseko nakukahasa nawa kuzata mulimo waunene uze mwakavasela mwata wavo. Omu mwahichile myaka 30, kaposetolo Petulu avulukile chakumwenesa kana, kahechi chasolwele nge apwilenga lika nakuchanuka.—Petu. 2, 1:16-18.

9. Vyuma muka vize Yesu alwezele tumbaji twenyi valingenga?

⁹ “Mwivwililenunga.” Yehova hakuhanjika mazu kana, asolwele hatoma ngwenyi asaka etu twivwililenga kuli Mwanenyi nakumwononoka. Vyuma muka ahanjikile Yesu omu apwile hano hamavu? Ahanjikile vyuma vyavivulu chikuma vize twatela kukavangiza. Chakutalilaho, Yesu anangwile vaka-kumukavangiza mwakwambulwila mujimbu wamwaza kaha nawa kakavulu avalwezelenga vapwenga vakutona. (Mateu 24:42; 28:19, 20) Avakolezezele vatwaleho lika kuzata nangolo nakuhona kulitwamina. (Luka 13:24) Yesu akolezezele vaka-kumukavangiza valizangenga mwavomwavo, nakupwa vakulinunga nakukavangiza jishimbi jenyi. (Yowa. 15:10, 12, 13) Mazu aze ahanjikile Yesu kuli tumbaji twenyi apwa amalemu chikuma namakumbi ano.

10-11. Uno tunahase kusolola ngachilihi ngwetu tuli nakwivwilila kulizu lyaYesu?

¹⁰ Yesu ambile ngwenyi: “Weshowo eji kukavangizanga muchano eji kwivwililanga kulizu lyami.” (Yowa. 18:37) Kachi nge ‘natwitavilanga lika tutenga twavakwetu, nakulikonekelanga navakwetu namuchima wakusuuluka,’ kaha natusolola ngwetu tuli nakwivwilila kulizu lyaYesu. (Kolo. 3:13; Luka 17:3, 4) Tweji kusololanga nawa ngwetu tuli nakwivwilila kulizu lyaYesu hakutwalaho lika kwambulula mujimbu “mulwola lwamwaza namulwola lwalukalu.”—Chimo. 2, 4:2.

¹¹ Yesu ambile ngwenyi: “Mikoko jami veji kwivwililanga kulizu lyami.” (Yowa. 10:27) Vaka-kukavangiza Kulishitu veji kwivwililanga kulizu lyaYesu nakulinga vyuma mwavalweza. Kaveshi “kulizakamina havyuma vyamukuyoya” nakuvalingisa jino vatangukeko. (Luka 21:34) Oloze vamona kukavangiza jishimbi jaYesu kupwa chachilemu namulwola lwaukalu. Vandumbwetu vavavulu vali nakuhita muvyeseko vyakulisezaseza vyakufwana nge, kuvafumbukila kujifulumende,  nauhutu naukalu weka wakulijila. Chamokomoko navyeseko vali nakumona, oloze vali nakutwalaho lika kupwa vakushishika kuli Yehova. Vakiko veji kutwalangaho lika kukavangiza mazu ahanjikile Yesu akwamba ngwenyi: “Weshowo etavila jishimbi jami nakujilamanga, ou ikiye anguzanga ami. Kaha nawa weshowo anguzanga ami, navamuzanga kuli Tata.”—Yowa. 14:21.

12. Jila muka yikwavo tunahase kusolwelamo ngwetu tuli nakwivwilila kulizu lyaYesu?

¹² Jila yikwavo tunahase kusolwelamo ngwetu tuli nakwivwilila kulizu lyaYesu shina, hakwononokanga kuli vaze Kalunga atongola mangana vatutwaminyinenga. (Hepe. 13:7, 17) Mumyaka yakalinwaha, liuka lyaKalunga linalumunangako vyuma vyavivulu. Chakutalilaho, linalumunako jila yakuzachishilamo vinoma vyavihya, najijila jakwambulwilamo, kaha nawa linalumunako vyuma vimwe hakukunguluka chamukachi kachalumingo. Linalumunako nawa jila yakutungilamo jiZuvo jaWangana, namwakujitungulwila namwakujilamina. Twasakwilila chikuma hakutuhana jindongi jize jasolola nge liuka lyaKalunga lyatuzanga chikuma. Twafwelela ngwetu Yehova mwakisula kukilikita chetu hakukavangiza jindongi vali nakutuhana muliuka lyenyi.

13. Nganyo muka yatwama hakwivwilila kuli Yesu?

¹³ Tweji kunganyalanga hakwivwilila kuvyuma vyosena vize anangwilenga Yesu. Yesu afwelelesele tumbaji twenyi ngwenyi vyuma vize anangwilenga navivahizumuna. Kaha ambile ngwenyi: “Namupwa vakuhizumuka. Mwomwo toka yami yayashi kumbata, kaha chiteli chami chachilelu.” (Mateu 11:28-30) MuMbimbiliya mwatwama namikanda yiwana yaMujimbu Wamwaza yize yahanjika hakuyoya chaYesu namulimo wenyi wakwambulula. Eyi mikanda yeji kutuhizumunanga nakutujikijisa kushipilitu nakutukafwa tupwenga namangana. (Samu 19:7; 23:3) Yesu ambile ngwenyi: “Vawahilila shina vaze veji kwivwililanga mazu aKalunga nakuwalamanga.”—Luka 11:28.

14-15. (a) Kweseka namazu ahali Yowano 12:27, 28, lwola muka lwamuchitatu luze Yehova ahanjikile kufuma mwilu? (b) Uno mazu ahanjikile Yehova ajikijishile ngachilihi Yesu nakumukolezeza?

¹⁴ Tangenu Yowano 12:27, 28. Mumukanda waYowano vavulukamo mazu aze ahanjikile Yehova kuli mwanenyi kamuchitatu kufuma mwilu. Yesu apwile muYelusalema nakulinga chilika chaPaseka chamakumishilo. Halwola kana kwasalile kaha makumbi amandende nakufwa chenyi. Kaha ambile ngwenyi: “Nguli  nakulyonyinga.” Ngocho alombele ngwenyi: “Ove Tata, tohwesa lijina lyove.” Kufumaho evwile lizu lyaIse mwamukumbulula kufuma mwilu ngwenyi: “Lijina lyami ngwalitohwesa lyehi, kaha nangulitohwesa cheka nawa.”

¹⁵ Yesu atachikijile ngwenyi navamuyanjisa chikuma nakumujiha mujila yayipi, ngocho alyonyingile mwomwo atelelele kupwa lika wakushishika kuli Yehova. (Mateu 26:38) Chuma chachilemu chikuma chize asakile Yesu, shina kutohwesa lijina lyaIse. Yesu vamuvangijikililenga ngwavo asawilenga Kalunga, ngocho alizakaminyine ngwenyi kufwa chenyi chinahase kuneha katombo halijina lyaKalunga. Shikaho mazu aze ahanjikile Yehova ajikijishile chikuma Yesu. Atachikijile chikupu ngwenyi lijina lyaYehova navalitohwesa. Mazu ahanjikile Ise amukolezezele nakumujikijisa apwenga wakumika haukalu wapwile nakwiza kulutwe. Numba tuhu Yesu ikiye kaha evwile mazu ahanjikile Ise halwola kana, oloze Yehova alingishile mazu kana vawasoneke mangana tulinanguleko nayetu.—Yowa. 12:29, 30.

16. Mwomwo ika shimbu jimwe tunahase kulizakamina hakatombo kaze kanahase kwiza halijina lyaYehova?

¹⁶ Ngana muze chapwile kuli Yesu, nayetu tunahase kulizakamina hakatombo kaze kanahase kwiza halijina lyaYehova. Pamo nayetu vanahase kutuyanjisa ngana muze chapwile nakuli Yesu. Kaha nawa tunahase kwivwa kupihya kachi nge vaka-kole navatandakanyisa mijimbu yamakuli hali etu. Tunahase kushinganyeka omu mijimbu kana yinahase kuneha katombo halijina lyaYehova naliuka lyenyi. Halwola lwangana,  mazu aYehova anahase kutuvendejeka. Shikaho katwatela kulizakamina chikumako. Twatela kufwelela ngwetu “kuunda chaKalunga chize chahambakana kunangakana chosena nachikinga michima [yetu] navishinganyeka [vyetu] kuhichila muli Kulishitu Yesu.” (Fwili. 4:6, 7) Chikupu vene, Yehova mwatwalaho lika kutohwesa lijina lyenyi. Yehova mwakawahisa vyuma vyosena vize nenyeka Satana hamwe nakaye kenyi kuhichila muWangana wenyi.—Samu 94:22, 23; Isa. 65:17.

17. Kweseka namazu ahali Isaya 30:21, Yehova ali nakuhanjika ngachilihi kuli yetu makumbi ano?

¹⁷ Namakumbi ano, Yehova achili lika nakuhanjika kuli etu. (Tangenu Isaya 30:21.) Numba tuhu katweshi kwivwa Kalunga mwahanjika nayetu kufuma mwiluko, oloze eji kutuhananga jindongi kuhichila muMazu enyi Mbimbiliya. Kaha nawa shipilitu yaYehova yeji kukafwanga “kaselwa wakushishika” atwaleho lika kuhana vyakulya vangamba jenyi. (Luka 12:42) Makumbi ano, tuli nakutambula vyakulya vyakushipilitu vyavivulu vize navizamisa lufwelelo lwetu kuhichila mumikanda yize veji kupulitanga, nayize yili hainternet, najivindiyo namikanda yize yili mumazu akukopa.

18. Uno mazu aYehova anahase kuzamisa ngachilihi lufwelelo lwetu nakutukafwa tupwenga vakumika?

¹⁸ Tutwalenuho lika kushinganyekanga hamazu aze Yehova ahanjikile omu Mwanenyi apwile hano hamavu. Tunafwelela chikupu ngwetu mazu aKalunga aze vasoneka muMbimbiliya nawatukafwa tufwelele ngwetu Yehova akwechi ngolo jakulinga kala vyuma. Mwakawahisa vyuma vyosena vize nenyeka Satana hamwe nakaye kenyi kakuhuka. Shikaho tutwalenuho lika kwivwilila kanawa kulizu lyaYehova. Nge natulinga ngocho, kaha natutwalaho lika kupwa vakumika mukala ukalu natumona oholyapwa naweka uze uli nakwiza kulutwe. Mbimbiliya yamba ngwayo: “Enu mwatela kukakachila, mangana nge munalingi lyehi mwaya muchima waKalunga, muhase kukatambula vyuma vanamishiki.”—Hepe. 10:36.