Yehova Amona “Amene” Yenu Kupwa Yayilemu
YEHOVA amona jila tweji kumulemeselangamo kupwa yayilemu. Yehova eji ‘kutengelekanga matwitwi enyi nakwivwilila’ vangamba jenyi, kaha eji kumona vyuma vyosena veji kulinganga hakumulemesa kupwa vyavilemu numba vipwa vyavindende. (Mala. 3:16) Chakutalilaho, tuchishinganyekenu halizu lize tunahanjikanga hamyaka yayivulu. Lizu kana shina “amene.” Uno Yehova amona ngachilihi lizu kana? Alimona kupwa lyalilemu. Hakusaka tutachikize ovyo Yehova alimwena kupwa lyalilemu, tuvangilenu kushimutwila omu lyalumbununa nomu valizachisa muMbimbiliya.
“VATU VOSENA VAKAMBE NGWAVO, ‘AMENE!’”
Lizu “amene” lyalumbununa “chipwenga vene ngocho” chipwe “mukiko vene.” Lizu kana lyafuma kulizu lyachiHepeleu lize lyalumbununa “kupwa vakushishika.” Shimbu jimwe lizu kana valizachishilenga hakusopa. Kachi nge mutu nalishingi lyehi, ahanjikilenga ngwenyi “amene” mangana asolole ngwenyi mazu nahanjika amuchano, nakwitavila kala ukalu naufumaho kweseka namazu nahanjika. (Kula. 5:22) Kaha kulishinga chalingishilenga mutu afwile kulinga vyuma nahanjika.—Nehe. 5:13.
Chakutalilaho chakulipwila chakusolola omu lizu kana valizachishilenga vachisoneka mumukanda waLushimbi lwamuchivali kapetu 27. Omu vaIsalele vengilile muLifuchi lyaLushiko valikungulwilile kuPili Evale naPili Ngelize mangana vevwenga omu vatangilenga Jishimbi jize Kalunga ahanyine Mose. Omu valikungulwililenga kuze kujipili, kavatelelele kwivwilila kahako oloze vatelelele kwitavila ngwavo navakavangiza Jishimbi kana. Vetavililenga chuma kana hakwamba ngwavo, “Amene!” omu vatangilenga mazu akusolola ukalu unahase kwiza mwomwo yakulikanga. (Lushi. 27:15-26) Achishinganyekenu hachivumo chamazu avo omu malunga, namapwevo, navanyike vetavililenga hamwe ngwavo “Amene!” (Yoshu. 8:30-35) Chikupu vene kavavulyamine mazu aze vahanjikile halikumbi kanako. Kaha vaze vaIsalele valingile kweseka namuze vahanjikile mwomwo Mbimbiliya yamba ngwayo: “VaIsalele vazachililenga Yehova hamakumbi aYoshuwa osena, nahamakumbi avakulwane vaze vatwalilileho kuyoya omu alingile Yoshuwa hanafu lyehi, vaze nawa vatachikijile vyuma vyosena vize Yehova alingilile vaIsalele.”—Yoshu. 24:31.
Yesu naikiye ahanjikilenga ngwenyi “amene” mangana asolole ngwenyi mazu nahanjika apwile amuchano, oloze alingilenga ngocho mujila yakulipwila. Muchishishisa chakuzachisa lizu kana mangana etavile mazu amwe, ikiye azachishilenga lizu “amene” (lize valumuna muLuvale ngwavo “chamuchano vene”) hakuputuka kuhanjika chishina chimwe chachilemu. Shimbu jimwe lizu kana alihilukililenga hakuhanjika. Ambilenga ngwenyi “amene amene.” (Mateu 5:18; Yowa. 1:51) Echi chakolezezelenga vaka-kumwivwilila vamone chikupu ngwavo mazu ahanjikilenga apwile amuchano. Yesu ahanjikilenga nakukunyuka mwomwo ikiye vatongola kutesamo jishiko jaKalunga josena.—Koli. 2, 1:20; Kuso. 3:14.
“VATU VOSENA VAMBILE NGWAVO, ‘AMENE!’ KAHA VAMWALISHILE YEHOVA”
VaIsalele navakiko vahanjikilenga ngwavo “amene” omu valombelenga nakwalisa Yehova. (Nehe. 8:6; Samu 41:13) Vahanjikilenga ngwavo “amene” hakukumisa kulomba mangana vasolole ngwavo vanetavila mazu vanalombo. Kulinga chuma kana chalingishilenga vatu vosena vaze vakungulukilenga vazanemo nakulivwisa kuwaha kulemesa Yehova mujila kaneyi. Omu mukiko chapwile nahalwola Mwangana Ndavichi anehele Chikasha chaYehova muYelusalema. Omu vapwile nakulinga chilika kana, Ndavichi alombele kulomba chize chapwile kwijiva nge mwaso, kulomba kana vachisoneka hamukanda waMijimbu 1, 16:8-36. Vatu vosena vaze vakungulukile vakunyukile namazu ahanjikile mukulomba, kaha “vatu vosena vambile ngwavo, ‘Amene!’ kaha vamwalishile Yehova.” Chikupu vene, vawahililile chikuma kulemesela hamwe Yehova.
Vaka-Kulishitu vamulikulukaji lyamyaka lyakulivanga navakiko vazachishilenga lizu “amene” hakwalisa Yehova. Vaka-kusoneka Mbimbiliya navakiko vazachishilenga lizu kana mumikanda yize vasonekelenga. (Loma 1:25; 16:27; Petu. 1, 4:11) Kaha mumukanda waKusoloka vasonekamo vaka-kuyoya vakushipilitu vali nakwalisa Yehova hakwamba ngwavo: “Amene! Mwalisenunga Ya!” (Kuso. 19:1, 4) Kahomu vaka-Kulishitu valikungulwilenga nakulinangula vahanjikilenga ngwavo “amene” hakukumisa kulomba. (Koli. 1, 14:16) Chipwe ngocho, lizu kana kavalihanjikilenga chamuhanjikilako.
OVYO CHAPWILA CHACHILEMUKWAMBA NGWETU “AMENE”
Tunalinangula omu vangamba jaKalunga vazachishilenga lizu “amene,” shikaho tunamono jino ovyo chapwila chachilemu kuhanjika lizu “amene” kusongo yakukumisa kulomba. Hakukumisa kulomba tweji kuhanjikanga ngwetu “amene” mangana tusolole ngwetu tunetavila vyuma tunalombo. Kaha nawa nge vatu mulizavu vali nakulomba, kaha nge hinatuhanjika ngwetu “amene” numba vene nalizu lyamwishi natusolola ngwetu tunetavila vyuma vanahanjika. Tushimutwilenu havishina vikwavo vize vyasolola ovyo chapwila chachilemu kwamba ngwetu “amene.”
Tweji kwivwililanga kukulomba mwomwo yapwa hijila yakulemeselamo Kalunga. Chapwa chachilemu kwivwililanga kachi nge ndumbwetu ali nakulomba mwomwo kulomba chapwa hijila yimwe yakulemeselamo Kalunga. Katweshi kulemesa kaha Yehova hakuhanjika ngwetu ‘ameneko’ oloze twatela nawa kwivwilila kumazu aze navahanjika mukulomba numba tusolole ngwetu “amene” yetu yamuchano.
Cheji kutununganga hamwe. Kachi nge mutu ali nakulomba kukukunguluka, kaha vatu vosena vanakunguluka veji kupwanga vakulinunga nakwivwilila kukulomba kana. (Vili. 1:14; 12:5) Kahomu tweji kwitavilanga hamwe navandumbwetu ngwetu “amene” tweji kupwanga vakulinunga chikuma. Kuhanjikila hamwe ngwetu “amene” chipwe mumuchima chipwe kutambakana cheji kulingisanga Yehova alinge vyuma tunamulombo.
“Amene” yetu yapwa hijila yimwe yakwalishilamo Yehova
Tweji kulemesanga Yehova. Yehova eji kumonanga vyuma vyosena tweji kulinganga hakumulemesa. (Luka 21:2, 3) Eji kutalanga mumichima yetu, nakutachikiza nawa vishinganyeka vyetu. Numba nge natwivwilila kuvihande vyakukukunguluka halikina, twatela kutachikiza ngwetu Yehova eji kumonanga “amene” yetu kupwa yayilemu chikuma. Shikaho kachi nge natuhanjika ngwetu “amene,” kaha nachisolola nge tunalinungu hamwe navandumbwetu vaze vali kukukunguluka.
Tunahase kumona ngwetu kuhanjika ngwetu “amene” kachapwa chachilemuko, oloze chapwa chachilemu chikuma. Mukanda umwe wahanjika haMbimbiliya wamba ngwawo, omu vangamba jaKalunga veji “kuhanjikanga lizu ‘amene’ veji kusololanga lufwelelo lwavo, nakukunyuka chavo, nakusolola nawa hatoma ngwavo vakunyuka navyuma vatalilila.” Shikaho “amene” yetu yize tweji kuhanjikanga shimbu yosena yatela kwivwisanga Yehova kuwaha.—Samu 19:14.
