1. Kweseka namukanda WaPetulu 1, 3:8, mwomwo ika tweji kwivwilanga kuwaha kupwa navatu vaze veji kutuzakamanga?

TWEJI kwivwanga kuwaha kupwa navatu vaze veji kutuzakamanga. Vatu kana veji kushinganyekanga haukalu wetu nakwivwa kwijiva nge vakiko vali nakuhita muukalu kana. Veji kushinganyekanga havyuma tuli nakusakiwa nakutukafwa, pamo shimbu kanda nayetu vavene tuvalweze vyuma tuli nakusaka. Tweji kuvasakwililanga chikuma vatu vaze veji ‘kutuzakamanga.’ *—Tangenu Petulu 1, 3:8.

2. Mwomwo ika kwivwila vakwetu keke chasakiwila kukilikita?

² Hakupwa tuvaka-Kulishitu twatela kwivwilanga vakwetu keke nakuvazakama. Chipwe ngocho, twatela kukilikita numba tupwenga namuchima kana. Mwomwo ika? Mwomwo katwakupukako. (Loma 3:23) Shikaho twatela kukilikita mangana tumbile tato yize twasemuka nayo yakusaka kaha kulinganyalisa etu vavene. Etu veka chapwa chachikalu kwivwila vakwetu keke mwomwo yajila vatulelelelemo navyuma tunahichimo mukuyoya. Kaha nawa vatu vaze twatunga navo vanahase kutulingisa tuhone kupwa namuchima wakuzakama vakwetu. Vatu vavavulu mumakumbi ano akukuminyina ‘valizanga vavene,’ ngocho kavazakama vakwavoko. (Chimo. 2, 3:1, 2) Vyuma muka twatela kulinga tuhonese ukalu wosena ou mangana tuzakamenga vakwetu?

3. (a) Chuma muka nachitukafwa tupwenga namuchima wakuzakama vakwetu? (b) Vyuma muka natushimutwila muchihande chino?

³ Kachi nge natulondezeza Yehova Kalunga naMwanenyi Yesu Kulishitu, kaha natupwa namuchima wakuzakama vakwetu.  Yehova atwama nazangi, kaha atuhana chakutalilaho chamwaza chize twatela kulondezeza. (Yowa. 1, 4:8) Yesu alondezezelenga vilinga vyaIse. (Yowa. 14:9) Omu Yesu apwile hano hamavu, asolwele hatoma omu vatu vanahase kupwa namuchima wakutetela. Muchihande chino, natushimutwila omu Yehova naYesu vanasololanga muchima wakuzakama. Kufumaho natushimutwila omu tunahase kuvalondezeza.

4. Uno chisoneka chaIsaya 63:7-9 chasolola ngachilihi nge Yehova eji kuzakamanga vangamba jenyi?

⁴ Mbimbiliya yanangula ngwayo, Yehova eji kuzakamanga vangamba jenyi. Chakutalilaho, achishinganyekenu omu Yehova evwile omu vaIsalele vapwile nakuhita muukalu. Mbimbiliya yamba ngwayo, Yehova “evwilenga kupihya omu vayanjilenga.” (Tangenu Isaya 63:7-9.) Kufumaho, Yehova ahanjikile kuhichila muli kapolofweto Zekaliya ngwenyi, kachi nge vatu jenyi vali nakuvayanjisa, eji kwivwanga nge vali nakuyanjisa ikiye. Kaha Yehova alwezele vangamba jenyi ngwenyi: “Weshowo mwamikwata, nakwate hakatutu kahaliso lyami.” (Zeka. 2:8) Chikupu vene vyakutalilaho kanevi vinasolola nge Yehova eji kuzakamanga chikuma vangamba jenyi.

5. Hanenu chakutalilaho chize chasolola omu Yehova nakafwenga vangamba jenyi vaze vanayanjisanga.

⁵ Yehova keshi kwivwila kaha keke vangamba jenyi vaze vali nakuyandako, oloze eji kuvakafwanga. Chakutalilaho, omu vaIsalele vapwile nakuyanda muundungo muEjipitu, Yehova atachikijile vihuli vamwenenga, kaha afwilililile kuvasokola. Yehova alwezele Mose ngwenyi: “Ngunamono chikupu omu vali nakuyanda vatu jami . . . , kaha nawa ngunevu miteto yavo vali nakuteta . . . Ngunatachikiza kanawa vihuli vali nakuhitamo. Nangushikumuka ngukavapululule kumavoko avaEjipitu.” (Kulo. 3:7, 8) Hakuwana nge Yehova evwililile keke vangamba jenyi, ngocho avasokwele muundungo. Kaha mukuhita chamyaka omu vaIsalele vejile muLifuchi lyaLushiko vavalukukilenga kuli vaka-kole. Uno vyuma muka alingile Yehova? Yehova “avatetelelele havihuli vyavo vavamwenesele kuli vaze vavashinyinyikile, navaze vavayanjishilenga.” Muchima wenyi wakeke wamulingishile avakafwe. Atumine  vaka-kuyula vakinge vaIsalele kuli vaka-kole javo.—Kuyu. 2:16, 18.

6. Hanenu chakutalilaho chize chasolola omu Yehova azakamine mutu uze apwile navishinganyeka vyakuhenga.

⁶ Yehova eji kuzakamanga vatu jenyi numba tuhu shimbu jimwe veji kupwanga navishinganyeka vyakuhenga. Achishinganyekenu hali Yona. Kalunga atumine ou kapolofweto kuya nakuvilika mujimbu wakunongesa vatu vamuNyineve. Kahomu vatu vamunyineve vapihililile nakwalumuka, Kalunga kavanongeseleko. Oloze Yona apihililile hachuma kana. Kaha “evwile matoto chikuma” mwomwo mujimbu wakunongesa avilikile kawateselemoko. Yehova atalililile Yona chikoki nakumukafwa alumune vishinganyeka vyenyi. (Yona 3:10–4:11) Mukuhita chalwola, Yona atachikijile vyuma amunangwile Yehova, ngocho Yehova amuzachishile asoneke mujimbu kana mangana utunganyalise.—Loma 15:4. *

7. Kushinganyeka omu Yehova nazakamanga vatu jenyi nachitulingisa tufwelele ika?

⁷ Kushinganyeka omu Yehova nazakamanga vatu jenyi nachitulingisa tufwelele ngwetu eji kuvevwilanga keke. Atachikiza ukalu nakuyanda tuli nakuhitamo tuvosena. Yehova ‘atachikiza muchima wamutu himutu.’ (Miji. 2, 6:30) Atachikiza kanawa vishinganyeka vyetu, nomu tweji kwivwanga noho twazeyela. Kaha “keshi [kutwechelela vatweseke] kuhambakana oho hanakumina ngolo [jetuko].” (Koli. 1, 10:13) Chikupu vene, awa himazu akutuvendejeka.

8-10. Vyuma muka vyalingishile Yesu azakame vatu?

⁸ Omu Yesu apwile hano hamavu azakaminenga chikuma vatu. Kuli vyuma vitatu vize vyamukafwile apwenga namuchima kana. Chatete, ngana muze twahanjikanga lyehi, Yesu alondezezelenga vilinga vyaIse. Yesu azangile vatu ngana mwaIse. Numba tuhu awahililile hakukafwa Ise kutenga vyuma, oloze “evwililenga kuwaha vana vavatu.” (Vishi. 8:31) Zangi yikiko yamulingishile apwenga namuchima wakuzakama vakwavo.

⁹ Chamuchivali, Yesu atachikijile vyuma vashinganyekelenga vatu nomu vapwile nakwivwa. (Mateu 9:4; Yowa. 13:10, 11) Ngocho omu amwene vatu vali nakuyanda, avavendejekelenga.—Isa. 61:1, 2; Luka 4:17-21.

¹⁰ Chamuchitatu, Yesu naikiye amwenenga ukalu uze vamwenenga vatu. Chakutalilaho, Yesu akolelelele mutanga yakuhutwa. Omu azachilenga naise wakumulela Yosefwe, Yesu alinangwile mwakuzachila milimo. (Mateu 13:55; Mako 6:3) Chasoloka nge Yosefwe afwile shimbu kanda Yesu aputuke mulimo wenyi wakwambulula. Shikaho, Yesu atela evwile kukola kumuchima chize veji kwivwanga vatu kachi nge vanafwisa kausoko kavo. Kaha nawa Yesu atachikijile ukalu veji kumonanga vatu vaze vatwama mutanga yakwitava chakulihandununa. (Yowa. 7:5) Vyuma kanevi navyeka vyalingishile Yesu evwishise ukalu vamwenenga vatu vamuchivulu.

11. Yesu asolwelenga ngachilihi muchima wenyi wakuzakama vatu? Lumbununenu. (Talenu muvwimbimbi wahalipapilo lyahelu.)

¹¹ Muchima waYesu wakuzakama vakwavo wasolokele chikuma hatoma omu alingilenga vyakukomwesa. Yesu alingilenga vyakukomwesa mwomwo ‘evwilililenga keke’ vaze vapwile nakuyanda. (Mateu 20:29-34; Mako 1:40-42) Chakutalilaho, achishinganyekenu omu evwile Yesu hakuya nauze kajika matwitwi kupenge nakumuka, chipwe omu asangwile uze mwana tuliwe umwe kaha lyamunwe. (Mako 7:32-35; Luka 7:12-15) Yesu naikiye evwile kukola  kumuchima haukalu vapwile nakumona ava vatu, ngocho afwilililile kuvakafwa.

12. Uno mukanda waYowano 11:32-35 wasolola ngachilihi nge Yesu evwililile keke Malita naMaliya?

¹² Yesu evwililile keke Malita naMaliya. Omu avamwene vali nakulishona hakufwisa ndumbwavo Lazalu, “Yesu asotwele masoji.” (Tangenu Yowano 11:32-35.) Hakuwana nge Yesu atachikijile ngwenyi mwasangula Lazalu ngocho kalilile mwomwo yakushinganyeka ngwenyi keshi kukamumona chekako. Oloze alilile mwomwo yakumona omu masepa jaLazalu navausoko wenyi valishonene nakukola vevwile hakufwisa Lazalu.

13. Uno kwijiva ngwetu Yesu atwama namuchima wakeke nachituvendejeka ngachilihi?

¹³ Cheji kutuvendejekanga chikuma hakwijiva ngwetu Yesu atwama namuchima wakeke. Chipwe ngocho, etu katwapwa vakukupuka ngana mwaikiyeko, oloze twamuzanga chikuma hakumona omu azakaminenga vakwavo. (Petu. 1, 1:8) Twawahilila chikuma hakutachikiza ngwetu oholyapwa ngana Yesu ali nakuyula mwaMwangana waWangana waKalunga. Kalinwomu afumiseko kuyanda chosena. Hakuwana nge naikiye ayoyelaho lyehi hano hamavu, shikaho atamo kukafwa vatu nakuvasokola kuvihuli vyosena vize aneha Satana. Chikupu vene, twatokwa chikuma hakupwa naMuka-Kuyula uze eji “kutwivwila[nga] keke mukuhehela chetu.”—Hepe. 2:17, 18; 4:15, 16.

14. Uno mazu ahali Wavaka-Efwesu 5:1, 2 ,atulweza tulinge ika?

¹⁴ Kachi nge natushinganyekanga omu Yehova naYesu vanazakaminangamo vatu, kaha nayetu natufwila kuvalondezeza chikuma. (Tangenu Wavaka-Efwesu 5:1, 2.) Etu katweshi kwijiva vyuma veji kushinganyekanga vatu ngana mwaYehova naYesuko. Oloze tunahase kweseka kushinganyeka vyuma vali nakusakiwa nomu vali nakwivwa. (Koli. 2, 11:29) Vatu vamuno mukaye valizanga vavene, oloze etu katwatela “kuhakanga kulutwe vyuma [twasaka etu] kahako, oloze navyuma vasaka [vakwetu] nawa.”—Fwili. 2:4.

15. Veya vatela kuzakama chikuma vakwavo?

¹⁵ Vakulwane muchikungulwilo vakiko vatela kuzakama chikuma vakwavo mwomwo navakavasopesa hajila veji kuzakaminangamo mikoko. (Hepe. 13:17) Shikaho tulama vatela kwivwilanga vakwavo keke numbanyi vahase kuvakafwa. Uno tulama vanahase kuzakama ngachilihi vakwavo?

16. Kalama uze atwama namuchima wakeke eji kulinganga ika, kaha mwomwo ika chapwila chachilemu?

¹⁶ Kalama uze atwama namuchima wakeke, eji kuwanangako lwola lwakupwa hamwe navandumbwenyi. Eji kuvahulisanga vihula nakuvevwilila kanawa nge vali nakuhanjika. Kalama atela kwivwilila kanawa chikumanyi nge mukoko ali nakusaka kuhanjika vyuma vimwe oloze ali nakuhona mwakuvihanjikila. (Vishi. 20:5) Kachi nge kalama mwawanangako lwola lwakupwa hamwe navandumbwenyi, kaha nachimukafwa alizange navandumbwenyi nakutunga usepa wakukola.—Vili. 20:37.

17. Chuma muka vafwila kumona vandumbwetu vavavulu muli tulama? Hanenu chakutalilaho.

¹⁷ Vandumbwetu vavavulu veji kuhanjikanga ngwavo, vasaka tulama muchikungulwilo vapwenga namuchima wakuzakama vakwavo. Mwomwo ika? Adelaide ambile ngwenyi: “Cheji kupwanga chachashi kuhanjika navo mwomwo unejiva ngwove navakwivwishisa.” Ambile nawa ngwenyi: “Omu nauputuka kuhanjika navo hakiko naumona ngwove vakuzakama.” Ndumbwetu umwe walunga ambile ngwenyi: “Omu ngwapwile nakulweza kalama umwe ukalu wami ngwamwene namasoji hameso enyi yengele yengele. Chuma kana kangweshi kukachivulyamako.”—Loma 12:15.

18. Tunahase kusolola ngachilihi ngwetu twazakama vakwetu?

 ¹⁸ Keshi nge tulama kaha vakiko vatela kuzakamanga vakwavoko. Tuvosena tunahase kuzakama vakwetu. Mujila muka? Tunahase kulinga ngocho hakushinganyeka haukalu vali nakuhitamo vausoko wetu navandumbwetu. Zakamenunga vandumbwenu vavanyike muchikungulwilo, navaze vaviza, natushinakaji kuhakilako navaze vanafwisa vausoko wavo. Vahulisenu mwivwenga omu vali nakuyoyela. Mwatela chikupu kwivwilila kachi nge vali nakuhanjika. Vatela kumona ngwavo chikupu vene nayenu muli nakwivwa ngana muze vali nakwivwa vakiko haukalu vali nakulipika nawo. Kaha mwatela kuvakafwa kweseka nomu namuhashila. Kachi nge natulinga chuma kana, kaha natusolola ngwetu twavazanga chikuma.—Yowa. 1, 3:18.

19. Mwomwo ika twatela kupwa vavavwovu hakukafwa vakwetu?

¹⁹ Hakusaka tukafwe vakwetu, twatela kupwa vavavwovu. Mwomwo ika? Mwomwo vatu vapwa vakulisezaseza, vamwe nge vali muukalu kavasaka kuhanjika haukalu wavoko, oloze veka vasaka kuhanjika. Shikaho kachi nge tuli nakusaka kuvakafwa, kaha katwatela kuvahulisa vihula vize navivalingisa vachiwane kupwa chachikalu kukumbululako. (Teso. 1, 4:11) Numba nge vakwetu navatulweza ukalu wavo, oloze shimbu jimwe tunahase kumona ngwetu ukalu kana kaweshi waunene chikumako. Oloze twatela kutachikiza ngwetu ukalu uze vanatulweze waunene kuli vakiko. Shikaho twatela kwanguhwanga kwivwilila nakushipwokela kuhanjika.—Mateu 7:1; Yako. 1:19.

20. Natushimutwila ika muchihande chinakavangizaho?

²⁰ Katwatela kaha kuzakama vandumbwetu muchikungulwiloko, oloze twatela nawa kuzakama vatu vaze natuwana mumulimo wakwambulula. Uno tunahase kuzakama ngachilihi vatu vaze natwambulila? Muchihande chinakavangizaho natushimutwila hachuma kana.