1. Uno chuma chamwaza muka atela kusakula mutu?

KAKAVULU vyuma vize veji kusakulanga kulinga visemi vyeji kukwatanga nahakuyoya chavana vavo. Nge visemi navasakula vyuma vyakuhenga, kaha vana vavo navakapwa muukalu. Oloze nge navasakula vyuma vyamwaza, kaha vanahase kulingisa vana vavo vakapwe vakuwahilila nakufukila mukuyoya. Chipwe ngocho, navana nawa vatela kusakula vyuma vyamwaza. Kaha chuma chamwaza atela kusakula mutu shina kuzachila Yehova, Setu wamwilu wazangi.—Samu 73:28.

2. Vyuma muka vyamwaza asakwile Yesu navisemi jenyi?

² Visemi jaYesu vafwililile kukafwa vana vavo vazachile Yehova, kaha vyuma vasakwilenga vyasolwele nge vazangile chikuma kuzachila Yehova mukuyoya chavo. (Luka 2:40, 41, 52) Yesu nayikiye asakwilenga vyuma vyamwaza vize vyamukafwile atesemo mulimo amuhanyine Yehova. (Mateu 4:1-10) Ngocho omu akolele apwile mutu walikoji, wakushishika, kaha nawa wakumika. Kaha visemi vosena vaze vazanga Yehova vasaka vana vavo valondezeze Yesu.

3. Vihula muka natushimutwila muchihande chino?

³ Muchihande chino, natushimutwila vihula vino: Vyuma muka asakwile Yehova kutalisa kuli Yesu? Visemi vaka-Kulishitu navalinangula ika kuvyuma vasakwile visemi jaYesu vahamavu? Kaha vakweze vaka-Kulishitu navalinangula ika kuvyuma asakwile Yesu?

4. Chuma muka asakwile Yehova kutalisa kuli Mwanenyi?

⁴ Yehova asakwililile Yesu visemi vamwenemwene. (Mateu 1:18-23; Luka 1:26-38) Mazu ahanjikile Maliya aze vasoneka muMbimbiliya  asolola nge azangile chikuma Yehova naMazu enyi. (Luka 1:46-55) Yosefwe nawa ononokele jindongi amuhanyine Yehova, kahechi chasolwele nge amwivwilenga woma nakusaka kumwivwisa kuwaha.—Mateu 1:24.

5-6. Yehova etavishile Mwanenyi ahite muukalu muka?

⁵ Yehova kasakwilile Yesu visemi valuhetoko. Wana uze Yosefwe naMaliya vahanyine hakusemuka chaYesu wasolwele nge vapwile vakuhutwa. (Luka 2:24) Ngocho kavapwile nachiyoyelo chauhandoko. Yosefwe azachilenga mulimo wakusonga maliva muNazaleta mangana awaneko tujimbongo twakulikafwa natanga yenyi, chikumanyi omu vana vavulile nakuheta kafwe ku 7.—Mateu 13:55, 56.

⁶ Yehova kapwile nakukinga Mwanenyi Yesu kumaukalu osenako. (Mateu 2:13-15) Chakutalilaho, vausoko wenyi vamwe kavamufweleleleko. Achishinganyekenu hakupihya chize evwile Yesu omu vausoko wenyi vamwe hakavanga vahonene kumwitavila ngwavo ikiye Meshiya. (Mako 3:21; Yowa. 7:5) Yesu amwene nawa ukalu ukwavo wakufwisa ise wakumulela Yosefwe. Hakuwana nge Yesu ikiye apwile mwana watwatwa, ngocho ikiye jino apwile nakuzata mulimo waise wakusonga maliva. (Mako 6:3) Omu apwile nakukola, atachikijile kanawa mulimo wakuzakama tanga. Kaha nawa apwile nakukilikita chikuma mangana awane najimbongo jakulikafwa najo. Echi chasolola nge naikiye azeyelenga hanyima yakuzata likumbi lyamuundu.

7. (a) Vihula muka vatela kulihulisa vapwevo nalunga kutalisa kukulela vana? (b) Visemi vanahase kuzachisa ngachilihi chisoneka chaVishimo 2:1-6 hakunangula vana vavo?

⁷ Nge mwatwama muulo kaha nawa muli nakusaka kupwa navana, lihulisenu ngwenu: ‘Kutala twapwa tuvakulinyisa, kaha nawa twazanga Yehova naMazu enyi tahi? Kutala Yehova namono ngwenyi tunatemo kutuhana mulimo wakulela mwana uze mwakasemuka tahi?’ (Samu 127:3, 4) Nge mwapwa muvisemi, kaha lihulisenu ngwenu: ‘Kutala ngweji kunangulanga vana vami vatachikize ngwavo chapwa chachilemu kupwa vaka-kukilikita tahi?’ (Kwambu. 3:12, 13) ‘Kutala ngweji kuzatanga nangolo ngukinge vana vami kuvyuma vyavipi vyamuno mukaye kaSatana tahi?’ (Vishi. 22:3) Chipwe ngocho, kamweshi kuhasa kukinga vana venu kuukalu wosenako.  Oloze munahase kuvakafwa vatachikize mwakulingila naukalu uze navalitalasana nawo mukuyoya hakuvanangula vapendaminenga haMbimbiliya. (Tangenu Vishimo 2:1-6.) Chakutalilaho, kachi nge kausoko kenu neche kuzachila Yehova, kaha mwatela kukafwa vana venu kuzachisa Mbimbiliya mangana vatachikize ovyo chapwila chachilemu kutwalaho lika kupwa vakushishika kuli Yehova. (Samu 31:23) Numba nge kausoko kenu nafu, zachisenu Mbimbiliya hakukafwa vana venu vomike muukalu kana nakupwa vakuunda.—Koli. 2, 1:3, 4; Chimo. 2, 3:16.

8. Kweseka naLushimbi lwamuchivali 6:6, 7, vyuma muka valingile vaYosefwe naMaliya?

⁸ Yosefwe naMaliya valelele Yesu mujila yize yamulingishile vamwivwile uselewa kuli Kalunga, mwomwo vakavangijilenga jindongi jize ahana visemi. (Tangenu Lushimbi lwamuchivali 6:6, 7.) Vazangile chikuma Yehova, kahechi chavalingishile vafwile kukafwa navana vavo vapwenga nazangi kana.

9. Yosefwe naMaliya vasakwile kulinga vyuma muka vyavilemu?

⁹ Yosefwe naMaliya valingililenga hamwe vyuma vyakushipilitu natanga yavo. Twafwelela ngwetu vayilenga kusunangonga muNazaleta chalumingo hichalumingo, nakuPaseka muYelusalema. (Luka 2:41; 4:16) Pamo halwola vayilenga kuYelusalema hakiko vanangwilenga Yesu navasongo jenyi vyuma vyasolokelenga kuli vatu jaYehova. Kaha nawa pamo vamwenenga vihela vize vavuluka muVisoneka. Pamo kachapwilenga chachashi kutwalaho kulinga vyuma vyakushipilitu lwola lwosena omu vavulile vanako. Oloze hakuwana nge vahakilenga vyuma vyakushipilitu kulutwe, Yehova avakiswile, kaha tanga yavo yatwalileho lika kufukila.

10. Visemi vaka-Kulishitu vanahase kulinangula vyuma muka kuli Yosefwe naMaliya?

¹⁰ Uno visemi vaze vevwa Kalunga woma vanahase kulinangula vyuma muka kuli Yosefwe naMaliya? Chuma chachilemu shina kupwa navilinga nahanjikiso yize nayikafwa vana vavo vazange chikuma Yehova. Enu visemi, tachikizenu ngwenu wana waulemu mwatela kuhana vana venu shina kuvanangula vazange Yehova. Kaha chuma chimwe mwatela kulinga shina kuvanangula vatwaleho kulinganga vyuma vyakushipilitu, vyakufwana  nge kulinangula Mbimbiliya, nakulomba, nakukungulukanga, nakuyanga muwande. (Chimo. 1, 6:6) Kaha nawa mwatela kutondelanga vana venu vyuma vyakulikafwa navyo mukuyoya. (Chimo. 1, 5:8) Oloze mwatela kwanukanga ngwenu usepa wakukola uze vana venu navatunga naYehova ukiko naukavayovola nakwingila mukaye kakahya omu navakanongesa kano kaye kaSatana, keshi luhetoko. *—Ezeke. 7:19; Chimo. 1, 4:8.

11. (a) Chisoneka chaWaChimoteu 1, 6:17-19 chinahase kukafwa ngachilihi visemi kusakula kanawa jijila jakulelelamo vana vavo? (b) Vyuma muka vize yinahase kulitomena tanga yenu, kaha nganyo muka yinahase kufumamo? (Talenu lipwata lyakwamba ngwavo “ Milimo Yimwe Munahase Kulitomena.”)

¹¹ Ocho kuwaha kana hakumona visemi vaka-Kulishitu vavavulu vali nakusakula kanawa vyuma vize vyeji kunganyalisanga vaka-tanga javo! Veji kulemeselanga hamwe Kalunga. Chakutalilaho, veji kuyilanga hamwe kukukunguluka chachikungulwilo nechi changalila nakuzachila hamwe mulimo wakwambulula. Jitanga jimwe jeji kuzachilanga mujingalila muze kavazachila chikumako. Veka veji kutambukilanga Mbetele chipwe kukafwa mulimo wakutungatunga. Jitanga jize jeji kusakulanga kuzata milimo kana jeji kuzachisanga jimbongo javo, ngocho chinahase kuvakaluhwila kulinga vyuma kana. Oloze kulisuula chavo cheji kulingisanga Yehova avakisule. (Tangenu WaChimoteu 1, 6:17-19.) Vana vaze veji kukolelanga mujitanga jakufwana ngana, veji kukavangizanga vyakutalilaho vyamwaza vyavisemi javo, kaha kavaliveyako. *—Vishi. 10:22.

12. Chuma muka atelelele kulinga Yesu omu akolele?

¹² Ise yaYesu wamwilu, eji kusakulanga vyuma vyamwaza lwola lwosena kaha navisemi jenyi vahamavu navakiko vasakwilenga vyuma vyamwaza. Omu Yesu akolele atelelele kulisakwila ivene vyakulinga. (Ngale. 6:5) Naikiye apwile nalisesa lyakulisakwila vyakulinga ngana mwavatu vosena. Nge asakile kachi asakwile kulinga mwayile muchima wenyi. Oloze omu keshi mukiko alingileko, mwomwo asakile kuzamisa usepa wenyi naYehova. (Yowa. 8:29) Chakutalilaho chenyi chinahase kukafwa ngachilihi vanyike makumbi ano?

13. Vyuma muka asakwile kulinga Yesu omu apwile kanyike?

¹³ Omu Yesu apwile hano hamavu, ononokelenga visemi jenyi. Numba tuhu atachikijile vyuma vyavivulu kuhambakana vakiko, oloze kakanyinenga kulinga vyuma vamulwezelengako. Yesu “atwalileho lika [kuliluula] kuli vakiko.” (Luka 2:51) Kaha azachilenga  nangolo hakupwa ikiye mwana watwatwa. Alinangwile mulimo azachilenga ise wakumulela, mangana azakame tanga.

14. Uno twatachikiza ngachilihi ngwetu Yesu apwile muka-kulinangula wamwenemwene waMazu aKalunga?

¹⁴ Visemi jaYesu pamo vamulwezele omwo vamwimichile mujila yakukomwesa nakusemuka chenyi, navyuma vahanjikile valuwa jaKalunga hali ikiye. (Luka 2:8-19, 25-38) Yesu kapendaminyinenga kaha havyuma vize vamulwezeleko, oloze vikwavo alinangwilengavyo ivene muVisoneka. Uno twatachikiza ngachilihi ngwetu Yesu apwile muka-kulinangula wamwenemwene waMazu aKalunga? Twatachikiza ngocho mwomwo omu apwile kanyike, vaka-kunangula muYelusalema “valikomokelele chikuma hakunangakana chenyi nomu akumbulwilenga vihula.” (Luka 2:46, 47) Omu apwile namyaka 12, Yesu alinangwile vyuma vyavivulu vize vyamulingishile atachikize ngwenyi Yehova ikiye apwile Ise.—Luka 2:42, 43, 49.

15. Yesu asolwele ngachilihi ngwenyi asakwile kulinga mwaya muchima waYehova?

¹⁵ Omu Yesu atachikijile mulimo vamuhanyine, etavilile kulinga mwaya wamuchima waYehova. (Yowa. 6:38) Ejivile ngwenyi vatu vavavulu navamuhunga, kaha ashinganyekelenga hachuma kana. Chipwe ngocho, asakwileho kwononoka Yehova. Kahomu vamumbapachishile mu 29 C.E., afwililile jino kuzata chikuma mulimo amuhanyine Yehova. (Hepe. 10:5-7) Nahalwola vamusukikile hachitondo chakuyanjishila, atwalileho lika kulinga mwaya muchima waIse.—Yowa. 19:30.

16. Chuma muka vanahase kulinangula vana kuli Yesu?

¹⁶ Ononokenunga visemi jenu. Visemi jenu kavakupukako, ngana muze vapwile vaYosefwe naMaliya. Chipwe ngocho, Yehova ahana visemi jenu mulimo wakumikinga nakuminangula nakumitwaminyina. Nge namuvononokanga nakuvavumbika, kaha ‘vyuma navimiwahilanga’ mukuyoya.—Efwe. 6:1-4.

17. Kweseka naYoshuwa 24:15, vana vatela kusakula kulinga ika?

¹⁷ Sakulenu owo namuzachilanga. Mwatela kutachikiza kanawa Yehova, navyuma ajina, nakulinga mwaya muchima wenyi mukuyoya chenu. (Loma 12:2) Nge namulinga ngocho, kaha namusakula kulinga chuma chachilemu chikuma mukuyoya chenu. Chuma kana shina kuzachila Yehova. (Tangenu Yoshuwa 24:15;  Kwambu. 12:1) Kachi nge namutwalaho lika kutanganga Mbimbiliya nakulinangulayo, namuzanga chikuma Yehova kaha nawa lufwelelo lwenu naluzaminako lika.

18. Chuma muka vatela kusakula vana, kaha kuwaha muka nachikafumamo?

¹⁸ Sakulenu kulinga mwaya muchima waYehova mukuyoya chenu. Vatu vamukaye kaSatana vashinganyeka ngwavo, kachi nge namuzachisa uhashi wenu nakulinga vyuma vize naviminganyalisa, kaha munahase kupwa vakuwahilila. Kuhanjika muchano, vatu vosena vaze vafwila luheto veji kumonanga “makava amavulu.” (Chimo. 1, 6:9, 10) Oloze nge namusakula kwivwilila kuli Yehova nakulinga mwaya muchima wenyi, namufukila mukuyoya chenu “nakulinganga mwakwoloka.”—Yoshu. 1:8.

19. Chuma muka vatela kwanuka visemi?

¹⁹ Enu visemi, kafwenu vana venu vasakule kuzachila Yehova. Pendaminenu hali Yehova mangana musakulenga kulinga vyuma vyamwaza. (Vishi. 3:5, 6) Anukenu ngwenu vyuma mweji kulinganga vikiko navikafwa chikuma vana venu, keshi vize mweji kuhanjikangako. Shikaho, lingenunga vyuma vize navilingisa vana venu vavevwile uselewa kuli Yehova.

20. Vyuma muka vyamwaza navalivwisa kuwaha vana kachi nge navasakula kuzachila Yehova?

²⁰ Enu vana, visemi jenu vanahase kumikafwa musakule vyuma vyamwaza mukuyoya. Oloze vyuma namulisakwila enu vavene vikiko navilingisa Yehova amivwile uselewa. Shikaho, londezezenu chakutalilaho chaYesu nakusakula kuzachila chisemi chenu wamwilu wazangi. Nge namulinga ngocho, kaha namupwa vakuwahilila mukuyoya. (Chimo. 1, 4:16) Kaha kulutwe nawa namukapwa nakuyoya chamwenemwene.