CHIHANDE CHAKULINANGULA 41
Mwakunangwila Mutu naKumuhetesa kuLumbapachiso—Chihanda 1
“Enu mwasolola ngwenu yenu mukanda waKulishitu wakusoneka kuli etu vaka-kuzata.”—KOLI. 2, 3:3.
MWASO 78 “Kunangula Mazu aKalunga”
VYUMA NATUSHIMUTWILA *
Chikungulwilo chosena chinawahilila hakumona mutu vazanga uze apwanga nakulinangula Mbimbiliya vanamumbapachisa. (Talenu palangalafu 1)
1. Uno chisoneka chaWavaka-Kolinde 2, 3:1-3 nachitukafwa ngachilihi tumone kulema chakunangula mutu Mbimbiliya nakumuhetesa kulumbapachiso? (Talenu muvwimbimbi wahalipapilo lyahelu.)
UNO mweji kwivwanga ngachilihi kachi nge mutu wamuchikungulwilo chenu uze apwile nakulinangula Mbimbiliya vanamumbapachisa? Chikupu vene, mweji kuwahililanga chikuma. (Mateu 28:19) Kaha mweji kuwahililanga nawa chikumanyi nge enu yenu mwapwile nakumunangula. (Teso. 1, 2:19, 20) Chilongesa kana eji kuzovolokanga mwomwo yakukilikita chachikungulwilo chosena keshi nge kukilikita chamuka-kumunangula kahako. Shikaho natumuvuluka ngwetu ‘himukanda wakujimbula’ chikungulwilo chosena keshi nge wakujimbula uze apwile nakumunangula kahako.—Tangenu Wavaka-Kolinde 2, 3:1-3.
2. (a) Chihula muka chachilemu chize twatela kushinganyekaho, kaha mwomwo ika? (b) Chilongesa chaMbimbiliya chapwa chika? (Talenu kwinyikila chamwishi.)
2 Tunawahilila chikuma hakutachikiza ngwetu mumyaka yiwana yinahichi kunyima tunapunga nakutetekela vilongesa vyaMbimbililya * kafwe 10,000,000 kakweji hikakweji, mukaye kosena. Kaha mumyaka kaneyi vanambapachisanga vatu vakuhambakana 280,000 mwaka himwaka nakupwa Vinjiho jaYehova. Uno tunahase kukafwa ngachilihi vilongesa vavavulu ngana vatengamo kuvambapachisa? Hakuwana nge Yehova nahane vatu lwola lwakwalumuka nakupwa tumbaji twaKulishitu, ngocho twatela kukilikita chikuma mangana tukafwe vilongesa jetu vazovoloke washi nakuvambapachisa. Chikupu vene, lwola lunalituluko lunakehe.—Koli. 1, 7:29a; Petu. 1, 4:7.
3. Vyuma muka natushimutwila muchihande chino hachihande chakunangula vatu Mbimbiliya?
3 Hakuwana nge mulimo wakunangula vatu vapwenga tumbaji uli nakusakiwa kuuzata mukapachapacha, Lizavu lyaKutwaminyina lyahulishile jiofesi jamitango jivalweze vyuma twatela kulinga mangana tukafwe vatu tweji kunangulanga Mbimbiliya vazovoloke nakuvambapachisa. Muchihande chino nechi nachikavangizaho, natushimutwila havyuma tunahase kulinangula kuli vapayiniya, navamishonali, natulama vakujinguluka vakulindunuka. * (Vishi. 11:14; 15:22) Vanalumbununa vyuma vize atela kulinga muka-kunangula navize atela kulinga uze vali nakunangula Mbimbiliya numba azovoloke. Muchihande chino natushimutwila havyuma vitanu vize atela kulinga mutu uze vali nakunangula numba azovoloke nakumumbapachisa.
LINANGULENUNGA CHALUMINGO HICHALUMINGO
Muhulisenu nge mwetavila kusuhwisako lwola lwakushimutwila nenyi vyamuMbimbiliya (Talenu palangalafu 4-6)
4. Vyuma muka twatela kutachikiza kutalisa kuchilongesa chakunangula mukalwola kakandende?
4 Vandumbwetu vavavulu veji kutwaminyinanga vilongesa vyaMbimbiliya mukalwola kakandende. Numba tuhu kunangula mujila kana cheji kulingisanga mutu afwile kulinangula vyuma vyavivulu, oloze chinahase kumilingisa munangule vyuma vyavindende, kaha nawa pamo kamweshi kulinangulanga chalumingo hichalumingoko. Hakusaka kulingisa mutu afwile kulinangula, vandumbwetu vamwe veji kutambulanga nambala yashinga yamutu mangana vakamutumine shinga chipwe mujimbu wamuMbimbiliya shimbu kanda vamutambukile. Vanahase kushimutwila nenyi vihande vyamuMbimbiliya mujila kaneyi hatukweji vavavulu. Oloze chilongesa kana keshi kuhasa kuzovoloka nakulihana vamumbapachise kachi nge keshi nakuzachisa lwola lwenyi nangolo jenyi jajivulu hakulinangula Mbimbiliyako.
5. Kweseka naLuka 14:27-33, chishina muka ashindakanyine Yesu chize nachitukafwa hakuzata mulimo wakunangula vatu vapwenga tumbaji?
5 Halwola lumwe, Yesu alumbunwine vyuma atela kulinga mutu uze mwasaka kupwa kambaji kenyi. Ahanjikile hamutu uze mwasaka kutunga kaposhi namwangana uze mwasaka kuya nakwasa jita. Yesu ahanjikile hali mutu uze mwasaka kutunga kaposhi ngwenyi atela “chatete kutwama hamavu nakulava jimbongo jakutungisa.” Kaha ahanjikile nawa ngwenyi mwangana atela “chatete kutwama hamavu nakutwama punga” mangana amone numba nge ali namaswalale vakutamo kuya kujita. (Tangenu Luka 14:27-33.) Chochimwe nawa, Yesu atachikijile ngwenyi mutu uze mwasaka kupwa kambaji kenyi atela kukekesa kanawa vyuma atela kulinga numba apwenga kambaji. Shikaho, twatela kukunyula vilongesa jetu mangana tulinangulenga navo chalumingo hichalumingo. Jino natuhasa ngachilihi kulinga ngocho?
6. Vyuma muka twatela kulinga mangana tukafwe vilongesa jetu vazovoloke?
6 Putukenu kusuhwisangako lwola lwakulinangula. Munahase kulinga ngocho hakushimutwila nenyi Visoneka vivali muchishishisa chakushimutwila kaha hachisoneka chimwe. Nge nejilila lyehi, kaha munahase kumuhulisa mwivwenga nge mwetavila kusuhwisako cheka lwola. Jila mwakumbulwilamo nayimikafwa mwijive numba nge ali nakusaka kulinangula nyi chiku. Kaha kutwala muze, munahase nakumuhulisa nge mwasaka kulinangulanga mapapa kavali muchalumingo mangana azovoloke washi. Oloze kuli chuma cheka mwatela kulinga kuhakila hakulinangula kuswakumwe.
WAHISHILENU CHIMWEZA VYUMA NAMUKANANGULA
Liwahishilenunga chimweza, nakunangula chilongesa chenu mwakuwahishila chimweza (Talenu palangalafu 7-9)
7. Vyuma muka atela kuwahishila chimweza muka-kunangula shimbu kanda ayenga nakunangula chilongesa chenyi?
7 Hakupwa muvaka-kunangula, mwatela kuliwahishilanga chimweza shimbu kanda muyenga nakunangula vilongesa jenu. Chatete mwatela kutanga vyuma namuya nakunangula kuhakilako vene navisoneka vilimo. Shinganyekenu havishina vyavinene vili muchihande kana. Shinganyekenu nawa hamutwe wachihande, natumitwe twatundende, navihula, navisoneka vize vasoneka ngwavo “tanga,” namivwimbimbi nakala vindiyo yize yinashindakanya chihande kana. Kaha nawa mwatela kushinganyekela chimweza hajila yayashi munahase kulumbunwinamo vishina vili muchihande kana mangana chilongesa chenu avivwishise nakuvizachisa.—Nehe. 8:8; Vishi. 15:28a.
8. Mazu asonekele kaposetolo Paulu hali Wavaka-Kolose 1:9, 10 atukafwa tulinge ika kutalisa kuvilongesa jetu?
8 Hakuhituluka, mwatela nawa kulombelako chilongesa chenu kuli Yehova nakumulweza ukalu wenyi. Mulombenu Yehova amikafwe mukanangule vyuma vyamuMbimbiliya nakuheta chilongesa chenu kumuchima. (Tangenu Wavaka-Kolose 1:9, 10.) Shinganyekenu havyuma vize vinahase kukakaluhwila chilongesa chenu kuvivwishisa nakuvitavila. Mwatela kufwila kumukafwa azovoloke nakumumbapachisa.
9. Muka-kunangula atela kukafwa ngachilihi chilongesa chenyi mwakuwahishila chimweza vyuma navakalinangula? Lumbununenu.
9 Tunafwelela ngwetu mutu uze natunangula Mbimbiliya kuswakumwe mwasakwilila Yehova naYesu havyuma vali nakumulingila, kaha mwafwila jino kulinangula vyavivulu. (Mateu 5:3, 6) Chilongesa chaMbimbiliya atela kuhaka muchima kuvyuma ali nakulinangula numba anganyale chikuma. Ngocho mwatela kumulumbunwina ovyo chapwila chachilemu kuwahishila chimweza chihande chize namushimutwila, nakumukafwa atachikize mwakuzachishila vyuma ali nakulinangula. Vyuma muka mwatela kulinga mangana mumukafwe? Wahishilenu hamwe chihande namukashimutwila nakumulweza vyuma atela kulinga. * Mulumbunwinenu mwakuwanyina kukumbulula, nakumulweza nawa mwakufunjikila mazu chipwe mikuku yize nayimukafwa kwanuka mwakukumbulwila. Kufumaho, muhulisenu chihula nakumulweza akumbulule mumazu enyi. Kukumbulula mumazu enyi nachimikafwa mutachikize nge nevwishisa chihande kana nyi chiku. Chuma muka chikwavo chize mwatela kukolezeza chilongesa chenu alingenga?
MUNANGULENU MWAKUSHIMUTWILILA NAYEHOVA HAKUMBI HAKUMBI
Nangulenu chilongesa chenu mwakushimutwilila naYehova (Talenu palangalafu 10-11)
10. Mwomwo ika chapwila chachilemu kutanganga Mbimbiliya hakumbi hakumbi, kaha vyuma muka atela kulinga chilongesa numba anganyale hakutanga Mbimbiliya?
10 Kuli vyuma atela kulinga chilongesa uka wenyi hakumbi hakumbi, keshi kulinangulanga kaha Mbimbiliya chalumingo hichalumingo namuka-kumunangulako. Atela kushimutwilanga naYehova. Mujila muka? Hakwivwililanga kuli Yehova nakuhanjika nenyi. Nahase kwivwilila kuli Yehova hakutanganga Mbimbiliya hakumbi hakumbi. (Yoshu. 1:8; Samu 1:1-3) Munangulenu mwakuzachishila lipapilo lyakwamba ngwavo, “Kunoneka chaKutanga Mbimbiliya” lize lyatwama ha jw.org/lue. * Shikaho, hakusaka mumukafwe anganyale hakutanganga Mbimbiliya, mwatela kumukolezeza ashinganyekenga hamujimbu ali nakutanga mangana awane vyuma mwalinangula hali Yehova namwakuzachishila vyuma ali nakulinangula mukuyoya chenyi.—Vili. 17:11; Yako. 1:25.
11. Chilongesa nahase kulinangula ngachilihi mwakulombela kanawa, kaha mwomwo ika atela kulombela kuli Yehova kuswakumwe?
11 Kolezezenu chilongesa chenu alombenga kuli Yehova hakumbi hakumbi. Lombenunga namuchima wenu wosena hakuputuka nahakukumisa kulinangula, kaha nawa mwatela kumuvulukanga mukulomba. Kahomu mwevwilila kukulomba chenu, naikiye mwalinangula kulombanga kuli Yehova Kalunga namuchima wenyi wosena kuhichila mulijina lyaYesu Kulishitu. (Mateu 6:9; Yowa. 15:16) Chikupu vene, kutanganga Mbimbiliya hakumbi hakumbi (chize chapwa kwivwilila kuli Yehova) nakulombanga kuli Yehova (chize chapwa kuhanjika nenyi) navikafwa chilongesa chenu apandame chikuma kuli Yehova. (Yako. 4:8) Kachi nge mwalinga vyuma kanevi, nachimukafwa alinge vyuma vyeka vize navimulingisa alihane kuli Yehova nakumumbapachisa.
MUKAFWENU ATUNGE USEPA NAYEHOVA
12. Muka-kunangula nahase kukafwa ngachilihi chilongesa chenyi azange chikuma Yehova?
12 Vyuma mwalinangula mutu muMbimbiliya vyatela kumuheta kumuchima. Mwomwo ika? Echi chikiko nachimulingisa afwile kuzachisa vyuma kana. Yesu anangwilenga vatu vyuma vyavivulu, kaha vazangilenga vyuma avanangwilenga. Oloze vamukavangijilenga mwomwo avahetelenga kumichima. (Luka 24:15, 27, 32) Mutu mweji kunangulanga atela kumona Yehova kupwa himutu nahenyi, uze nahase kutunga nenyi usoko, nakumumona nawa kupwa hiChisemi chenyi, hiKalunga kenyi kaha nawa Sepa lyenyi. (Samu 25:4, 5) Nge muli nakulinangula, mwatela kumukafwa atachikize vilinga vyaKalunga. (Kulo. 34:5, 6; Petu. 1, 5:6, 7) Kala chihande namushimutwila, mwatela kumukafwa amone omwo apwa Yehova. Mukafwenu amone kuwaha chavilinga vyaYehova vyakufwana nge zangi, nalikoji nakeke. Yesu ambile ngwenyi ‘lushimbi lwakuzanga Yehova Kalunga ketu’ lukiko ‘lwalulemu chikuma, kaha nawa lukiko lwatete.’ (Mateu 22:37, 38) Kafwenu chilongesa chenu azange chikuma Kalunga.
13. Natuhasa kukafwa ngachilihi mutu atachikize vilinga vyaYehova? Hanenu chakutalilaho.
13 Kachi nge muli nakulinangula, mulumbunwinenu vyuma vyamilingisa muzange Yehova. Echi nachimukafwa atachikize vyuma atela kulinga mangana atunge usoko naKalunga. (Samu 73:28) Chakutalilaho, shindakanyenu mukuku uli mumukanda muli nakulinangula chipwe muchisoneka uze weji kumivwisanga kuwaha, uze wasolola nge Yehova atwama nazangi, chipwe mangana, chipwe chiyulo, chipwe ngolo. Mulwezenu mukuku kana mangana atachikize ngwenyi chuma kana chikiko chamilingisa muzange Senu wamwilu. Uno chuma muka chikwavo atela kulinga muka-kulinangula Mbimbiliya mangana azovoloke nakumumbapachisa?
MUKOLEZEZENU AKUNGULUKENGA
Mukolezezenu aputuke kukungulukanga chakuzeneka kulangisa (Talenu palangalafu 14-15)
14. Chuma muka vavuluka hali WavaHepeleu 10:24, 25 chize nachikafwa mutu ali nakulinangula Mbimbiliya azovoloke?
14 Tuvosena twazanga vilongesa jetu vazovoloke, nakuvambapachisa. Jila yimwe tunahase kuvakafwilamo shina kuvakolezezanga vakungulukenga. Vaka-kunangula vakulindunuka veji kuhanjikanga ngwavo vilongesa vaze veji kuputukanga kukunguluka hahaze vene navaputuka kulinangula Mbimbiliya, veji kuzovolokanga washi. (Samu 111:1) Vandumbwetu vamwe veji kulwezanga vilongesa javo ngwavo vyuma veji kuvanangulanga vyavindende, vyavivulu navakalinangwilavyo kukukunguluka. Tangilenu chilongesa chenu chisoneka chaWavaHepeleu 10:24, 25 nakumulumbunwina omwo nahase kunganyala nge mwapwanga kukukunguluka. Mutalisenu vindiyo yakwamba ngwavo Vyuma Muka Vyeji Kusolokanga haZuvo yaWangana? * Mukafwenu amonenga kukunguluka chalumingo hichalumingo kupwa chachilemu mukuyoya chenyi.
15. Vyuma muka twatela kulinga mangana tukolezeze chilongesa chetu aputuke kukunguluka lwola lwosena?
15 Vyuma muka namulinga nge chilongesa chenu kakungulukako chipwe kakunguluka lwola lwosenako? Mwatela kumulwezako vyuma vimwe vyamwaza vize mwalinangulanga kukukunguluka. Echi chikiko chinahase kumukunyula mangana afwile kuya nakukunguluka. Muhanenu Kaposhi Kakutalila chipwe Mukanda waKukunguluka chaChiyoyelo naMulimo uze muli nakulinangula kukukunguluka. Mulwezenu chihande namukashimutwila chalumingo nachikavangizaho, nakumuhulisa avuluke chihande muka nazange chikuma. Vyuma mwakevwa kukukunguluka navikamuheta chikuma kumuchima kuhambakana vize eji kwivwanga kumauka eka akwitava. (Koli. 1, 14:24, 25) Kaha nawa mwaliwana navatu vaze vatwama navilinga vize nahase kulondezeza nakumukafwa azovoloke nakumumbapachisa.
16. Vyuma muka vyasakiwa hakukafwa mutu mangana azovoloke nakumumbapachisa, kaha vyuma muka natushimutwila muchihande nachikavangizaho?
16 Vyuma muka twatela kulinga mangana tukafwe vilongesa jetu vazovoloke nakuheta kukuvambapachisa? Tunahase kuvakafwa nge natulinangulanga navo chalumingo hichalumingo, nakuliwahishilanga chimweza. Kaha nawa twatela kuvakolezeza vashimutwilenga naYehova hakumbi hakumbi nakuvakafwa vatunge usepa wakukola naIkiye. Tuvakolezezenunga nawa vapwenganga kukukunguluka chachikungulwilo. (Talenu lipwata lyakwamba ngwavo, “ Vyuma Atela Kulinga Mutu Numba Azovoloke Nakumumbapachisa.”) Oloze nganomu natumona muchihande nachikavangizaho, kuli vyuma vitanu vatela kulinga vaka-kunangula mangana vakafwe vilongesa javo vazovoloke nakuvambapachisa.
MWASO 76 Mweji Kwivwanga Ngachilihi?
^ par. 5 Kunangula mutu chalumbununa kumukafwa “ashinganyeke nakwivwa nakulinga vyuma mujila yeka.” Chisoneka chaMwaka wa 2020 chaMateu 28:19, chinatukafwe tutachikize ovyo chapwila chachilemu kunangula vatu Mbimbiliya nakuvanangula vyuma vatela kulinga numba vavambapachise nakupwa tumbaji twaYesu Kulishitu. Muchihande chino nechi nachikavangizaho, natushimutwila vyuma twatela kulinga mangana tuzate kanawa ou mulimo waulemu chikuma.
^ par. 2 MAZU VANALUMBUNUNA: Kachi nge mwanoneka lwola lwakushimutwilanga namutu kuswakumwe kuzachisanga Mbimbiliya, tachikizenu ngwenu muli nakutwaminyina chilongesa chaMbimbiliya. Munahase kusoneka ngwenu muli nachilongesa chaMbimbiliya nge munalinangula lyehi nenyi mapapa kavali kufuma haze mwamulwezele vyachilongesa, kaha nawa nge munamono ngwenu chilongesa kana nachitwalililaho lika.
^ par. 3 Muchihande chino vanasonekamo vyuma vimwe tunahase kweseka kukavangiza vize vasonekele muvihande vyakwamba ngwavo “Kutwaminyina Vilongesa vyaMbimbiliya Vyakuzovoloka” vize vyalovokelenga muMulimo Wetu waWangana kufuma muJuly 2004 nakuheta muMay 2005.
^ par. 9 Talenu vindiyo yamunyutu umwe yakwamba ngwavo, Kunangula Vilongesa Vyetu Mwakuhitulukila. Yenu ha JW Library, haze vanasoneka ngwavo MEDIA > OUR MEETINGS AND MINISTRY > IMPROVING OUR SKILLS.
^ par. 10 Yenu haze vanasoneka ngwavo CHISETE > MIKANDA NAJIMBULOSHUWA.
^ par. 14 Yenu ha JW Library®, haze vanasoneka ngwavo MEDIA > OUR MEETINGS AND MINISTRY > TOOLS FOR THE MINISTRY.
