1. Vyuma muka vatela kutwalaho kulinga vaka-Kulishitu vakumbapachisa?

UNO vamimbapachisa tahi? Nge mukiko, kaha halwola vamimbapachishile mwasolwele hatoma ngwenu mwafwelela Yehova nakusaka kuzachila hamwe naliuka lyenyi. * Chipwe ngocho, lufwelelo lwenu lwatela kuzaminako lika. Kaha nawa mwatela kutwalaho lika kufwelela ngwenu Yehova ali nakutwaminyina liuka lyenyi makumbi ano.

2-3. Yehova ali nakutwaminyina ngachilihi liuka lyenyi makumbi ano? Hanenu vyakutalilaho vyakusolola omwo apwa.

² Makumbi ano, Yehova ali nakutwaminyina liuka lyenyi mujila yize yili nakutukafwa tutachikize omwo apwa navyuma ajina najishimbi jenyi. Tushimutwilenu havyuma vitatu atwama navyo Yehova vize tuli nakumona muliuka lyenyi.

³ Chatete, “Kalunga katala vatu kumesoko.” (Vili. 10:34) Mwomwo yazangi, Yehova ahanyine Mwanenyi kupwa ‘ndando yakusokola vatu vosena.’ (Chimo. 1, 2:6; Yowa. 3:16) Yehova ali nakuzachisa vatu jenyi mangana vambulule mujimbu wamwaza kuvatu vosena vaze navasaka kwivwilila nakuvakafwa vanganyale kundando yakusokola. Chamuchivali, Yehova apwa Kalunga wakuunda, kaha nawa muka-kulinga vyuma mukulonga. (Koli. 1, 14:33, 40) Shikaho, twatela kufwelela ngwetu navaka-kumulemesa navamuzachilanga mukuunda nakulonga. Chamuchitatu, Yehova apwa ‘Muka-kutunangula Wamunene.’ (Isa. 30:20, 21) Echi chikiko chalingisa liuka lyenyi lihake mangana kukunangula vatu Mazu enyi aze ahwima, muchikungulwilo namuwande. Uno vaka-Kulishitu vakulivanga valondezezele ngachilihi Yehova hakusolola evi vyuma vitatu atwama navyo? Kaha vaka-Kulishitu vamakumbi ano  vali nakumulondezeza ngachilihi? Kaha shipilitu yajila yinahase kumikafwa ngachilihi omu muli nakuzachila hamwe naliuka lyaYehova?

4. Kweseka na Vilinga 1:8, Yesu ahanyine vaka-kumukavangiza mulimo muka, kaha chuma muka chatelelele kuvakafwa?

⁴ Mulikulukaji lyamyaka lyakulivanga. Mujimbu uze ambulwile Yesu wahanyine vatu vosena lutalililo. (Luka 4:43) Kaha alwezele vaka-kumukavangiza vatwaleho kuzata mulimo uze aputukile wakwambulula mujimbu wamwaza swi “nakuvihela vyakwakusuku vyahamavu.” (Tangenu Vilinga 1:8.) Chikupu vene, kavazachile ou mulimo mungolo javoko. Vasakiwile kuvakafwa kushipilitu yajila yize yapwa ‘muka-kukafwa,’ ngana muze avafwelelesele Yesu ngwenyi mwakavatuminayo.—Yowa. 14:26; Zeka. 4:6.

5-6. Shipilitu yajila yakafwile ngachilihi vaka-kukavangiza Yesu?

⁵ Vaka-kukavangiza Yesu vatambwile shipilitu yajila haPendekoseta mu 33 C.E. Shipilitu yajila yavakafwile vaputuke kwambulula, ngocho mukashimbu kakandende kaha vatu vavavulu vetavilile mujimbu wamwaza. (Vili. 2:41; 4:4) Kaha kavevwile woma omu vavayanjishilengako, oloze valombele Yehova avakafwe. Valombele ngwavo, “kafwa vandungo jove vahanjikenga lika mazu ove nakumika.” Hanyima yakulomba vazalile nashipilitu yajila, kaha “vapwile nakuhanjika mazu aKalunga nakumika.”—Vili. 4:18-20, 29, 31.

⁶ Tumbaji twaYesu vamwene nawa ukalu weka. Chakutalilaho, kavapwile namikanda yakuvunga yaVisoneka yayivuluko. Kavapwile namikanda yahanjikilenga haMbimbiliya nganomu tuli nayo oholyapwako. Kaha nawa vambulililenga vatu vavavulu vaze vahanjikilenga malimi eka. Oloze chamokomoko naukalu wosenou, vaze tumbaji vatwima valingile chuma chize chasolokele nge chachikalu. Hamyaka yayindende kaha, vambulwile mujimbu wamwaza “kuvyuma vyakutenga vyosena vize vyatwama mwishi yamelu.”—Kolo. 1:6, 23.

7. Vangamba jaYehova kunyima vatachikijile ngachilihi vyuma asakile Yehova valinge, kaha vakwileko ngachilihi?

⁷ Mumakumbi ano. Yehova achili lika nakutwaminyina vatu jenyi nakuvahana ngolo jakuvakafwa valinge mwaya muchima wenyi. Chachinenenyi, ali nakuvatwaminyina kuzachisa Mazu enyi aze ahwima nashipilitu. Mumazu kana mwatwama mijimbu yahanjika hamulimo azachile Yesu nalushimbi lwakulweza vaka-kumukavangiza vatwaleho kuzata mulimo kana. (Mateu 28:19, 20) Mukaposhi waJuly 1881 vasonekelemo ngwavo: “Yehova katuwavishile mangana vatu vatuhanenga kavumbi chipwe mangana tupwenga naluhetoko. Oloze atuwavishile mangana tuzachise vikumba vyetu hakwambulula mujimbu wamwaza.” Kaha kamukanda vavuluka ngwavo To Whom the Work Is Entrusted, kaze valowele mu 1919 kamba ngwako: “Numba tuhu mulimo kana waunene chikuma, oloze wapwa himulimo waMwata, kaha mwatukafwa tuutesemo.” Chikupu vene, ngana mwavaka-Kulishitu vakulivanga, ava vandumbwetu navakiko vomikile nakuzata nangolo hakufwelela ngwavo shipilitu yajila nayivakafwa vahase kwambulila vatu vosena. Nayetu nawa makumbi ano twafwelela ngwetu shipilitu yajila nayitukafwanga.

8-9. Jijila muka linazachisanga liuka lyaYehova mangana vatandakanyise mujimbu wamwaza?

⁸ Liuka lyaYehova linazachisanga vinoma vyamwaza vinapungako hakutandakanyisa mujimbu wamwaza. Chakutalilaho, linazachisanga mikanda yakupulita, nachimweso chakwamba ngwavo “Photo-Drama of Creation,” najifwonongalafu, najiminyau jize japwile navihungo vyavivumo, navisaji. Oholyapwa, liuka lili nakuzachisa chikuma makina naInternet. Kaha lili nakuzata chikuma mulimo wakwalumuna kulya chakushipilitu mumalimi amavulu chikuma kuhambakana kunyima. Mwomwo ika? Mangana vatu vosena vevwenga mujimbu wamwaza mumalimi avo. Chikupu vene, Yehova katala vatu kumesoko. Ahanjikilile chimweza ngwenyi vatu  jenyi navakambulula mujimbu wamwaza kuli “vaka-mafuchi osena, navaka-miyachi yosena, navaka-malimi osena, navatu veka naveka vosena.” (Kuso. 14:6, 7) Asaka vatu vosena vevwenga mujimbu wamwaza waWangana.

⁹ Nyi ngachilihi vatu vaze katweshi kuhasa kwambulilako, pamo mwomwo vavakalu kuvawana hajizuvo javo? Hakusaka kwambulila vatu vavavulu vatwama kuvihela kana, liuka lyaYehova lyahakileko jijila jakulisezaseza jakwambulwila kuvihela vyasanga. Chakutalilaho, mu 2001, Lizavu lyaKutwaminyina lyetavishile vandumbwetu muFrance kuputuka kuzachisa tumatemba twakushindumuna najimesa, kaha kutwala muze vaputukile kuzachisa jila kana mumafuchi eka. Jila kana yapwile yamwaza. Ngocho mu 2011 jila kana vaputukile kuyizachisa namuUnited States munganda yaNew York, kuvihela kuze kwatwama vatu vavavulu. Mumwaka umwe kaha, vandumbwetu vapangililile mikanda 102,129 najimangazini 68,911. Kaha vatu vakuheta ku 4,701 valombele vavanangule Mbimbiliya. Ou hiunjiho wakusolola nge shipilitu yajila yapwile nakutwaminyina ou mulimo. Ngocho Lizavu lyaKutwaminyina litavise jino vandumbwetu mukaye kosena kwambulwilanga kuvihela vyasanga kuzachisa tumatemba twakushindumuna.

10. Vyuma muka twatela kulinga numba tuhotole uhashi wetu wakuzata muwande?

¹⁰ Vyuma muka mwatela kulinga? Zachisenunga vyuma eji kutunangulanga Yehova kukukunguluka chachikungulwilo. Zachilenunga hamwe nalizavu lyamulimo wamuwande lize vamihaka. Kulinga ngocho nachimikafwa mutachikize vyuma mwatela kulinga mangana mwambulilenga vatu nakuvanangula kanawa, kaha nawa vyakutalilako vyavandumbwenu vinahase kumikolezeza. Twalenuho lika kwambululanga mujimbu wamwaza chamokomoko naukalu. Tweji kutesangamo kulinga mwaya muchima waKalunga mwomwo yakutukafwa kushipilitu yajila, keshi mwomwo yangolo jetuko, ngana muze chinahanjika chisoneka chamutwe wachihande. (Zeka. 4:6) Twafwelela ngwetu Kalunga mwatwalaho lika kutukafwa omu natumuzachilanga.

11. Chuma muka lyalingile lizavu lyakutwaminyina lyamulikulukaji lyamyaka lyakulivanga mangana vatu jaKalunga vatwame mukuunda?

¹¹ Mulikulukaji lyamyaka lyakulivanga. Lizavu lyakutwaminyina lize lyapwile muYelusalema lyazachililenga hamwe nakukafwa vatu jaKalunga  vatwame mukuunda nakulinga vyuma mukulonga. (Vili. 2:42) Chakutalilaho, omu kwepukile chihande chakujihana mu 49 C.E., shipilitu yajila yatetekelele lizavu lyakutwaminyina mangana liwane mwakuvatwila kanawa chihande kana. Nge chihande kana kavachivatwile kanawako, kachi mulimo wakwambulula kawazovolokeleko. Numba tuhu vaposetolo navakulwane vapwile vaYuleya, oloze kavakavangijile chisemwa chavaYuleya navishinganyeka vyavaze vapwile nakukundwiza chihande kanako. Oloze vapendaminyine haMazu aKalunga nahashipilitu mangana vivatwaminyine. (Vili. 15:1, 2, 5-20, 28) Nganyo muka yafuminemo? Yehova avakiswile hajila vavatwililemo chihande kana, ngocho mulimo wakwambulula wazovolokele.—Vili. 15:30, 31; 16:4, 5.

12. Vyuma muka vyasolola nge liuka lyaYehova makumbi ano lyazata mukulonga namukuunda?

¹² Mumakumbi ano. Liuka lyaYehova linakafwe vatu jaYehova vapwenga vakulinunga nakuunda. Chakutalilaho, mukaposhi wachingeleshi waNovember 15, 1895, mwapwile chihande chize chahanjikile hakulinga vyuma mukulonga, chize chapendaminyine hachisoneka chaWavaka-Kolinde 1, 14:40. Vasonekelemo ngwavo: “Vaposetolo vasonekele mikanda yayivulu yakukafwa vandumbwavo valingenga vyuma mukulonga . . . Shikaho twatela kukavangizanga ‘vyuma vize vasonekele hakavanga mangana vitunangule.’” (Loma 15:4) Namakumbi ano, liuka lyaYehova lili nakukilikita mangana likafwe vikungulwilo vyavaka-Kulishitu vipwenga vyakulinunga nakuunda ngana muze vapwile vaka-Kulishitu vakulivanga. Chakutalilaho, nge namuya nakukunguluka kuchikungulwilo cheka chamulifuchi lyenu chipwe chamulifuchi lyeka, namutachikiza ngwenu jila navatwaminyinamo Chilongesa chaKaposhi Kakutalila kayeshi kulihandununa nayize yamuchikungulwilo chenuko, kaha nawa namushimutwila chihande chochimwe. Ngocho namupwa vakukasunuka. Shipilitu yajila yaKalunga yikiko yeji kulingisanga kulinunga kana chipwengako.—Zefwa. 3:9.

13. Kweseka naWaYakova 3:17, vihula muka twatela kulihulisa?

¹³ Vyuma muka mwatela kulinga? Yehova asaka vatu jenyi ‘valamenga kulinunga chavo hamwe mushipilitu chize cheji kuvanunganga hamwe mukuunda.’ (Efwe. 4:1-3) Shikaho, lihulisenu ngwenu: ‘Kutala ngwapwa ngumuka-kuneha kuunda nakulinunga muchikungulwilo tahi?  Kutala ngweji kwononokanga vaze vali nakututwaminyina tahi? Kachi nge ngwatwama nachihela muchikungulwilo, kutala vandumbwami vangufwelela tahi? Kutala ngwapwa ngumuka-kulama lwola kaha nawa ngumuka-kukafwa vandumbwami tahi?’ (Tangenu WaYakova 3:17.) Nge munamono ngwenu kuli vyuma vimwe mwatela kwalumunako, kaha lombenu Yehova amihane shipilitu yajila yimikafwe. Ngocho nayimikafwa mwalumuneko kuyoya chenu nakumikafwa mulingenga vyuma vyamwaza. Kaha vandumbwenu navamizanga nakumivumbika.

14. Kweseka naWavaka-Kolose 1:9, 10, Yehova anangwile ngachilihi vaka-Kulishitu vakulivanga?

¹⁴ Mulikulukaji lyamyaka lyakulivanga. Yehova azanga kunangula vatu jenyi. (Samu 32:8) Asaka vamutachikize nakumuzanga mangana vakayoye haya myaka yosena hakupwa vana venyi azanga. Vyuma kana vinahase kutesamo mwomwo yakunangula chize eji kuvanangulanga. (Yowa. 17:3) Yehova azachishile chikungulwilo chavaka-Kulishitu vakulivanga mangana anangule vatu jenyi. (Tangenu Wavaka-Kolose 1:9, 10.) Shipilitu yajila yize Yesu avafwelelesele ngwenyi mwakavatumina nayikiko nawa yavakafwile. (Yowa. 14:16) Yavakafwile vevwishise Mazu aKalunga nakuvanukisa vyuma alingilenga Yesu navize anangwilenga, vize jino vasonekele muMikanda yaMujimbu Wamwaza. Chinyingi kana chazamishile lufwelelo lwavaka-Kulishitu vakulivanga nakuvalingisa vazange chikuma Kalunga naMwanenyi nakulizanga navandumbwavo.

15. Jijila muka munalimwena nameso enu jize Yehova nateselamo lushiko lwenyi lwahali Isaya 2:2, 3?

¹⁵ Mumakumbi ano. Yehova ahanjikilile chimweza ngwenyi, “Hamakumbi akukuminyina” vatu vakumafuchi osena navakaumbukila kupili yenyi yachifwanyisa mangana akavanangule jijila jenyi. (Tangenu Isaya 2:2, 3.) Upolofweto kana tuli nakumona omu uli nakutesamo. Vatu vavavulu vanatachikiza jino ngwavo kulemesa chamuchano chamwaza chikuma kuhambakana kulemesa chosena. Kaha Yehova ali nakuhana  vatu jenyi kulya chachivulu chakushipilitu. (Isa. 25:6) Ali nakuzachisa ndungo wakushishika wakuzangama mangana atuhane kulya chachivulu, mujijila jakulisezaseza jakufwana nge vihande vyakupulita nevi vyahaInternet navihande vyaMbimbiliya, najivindiyo javyakufunjejeka najivindiyo jeka. (Mateu 24:45) Tuli nakwivwa ngana muze evwile Elihu sepa lyaYopa, uze ambile ngwenyi: “Muka-kunangula mukaze apwa nge [Kalunga]?”—Yopa 36:22.

16. Vyuma muka mwatela kulinga mangana munganyale kuvyuma ali nakutunangula Yehova?

¹⁶ Vyuma muka mwatela kulinga? Shipilitu yaKalunga nayimikafwa muzachisenga vyuma munakulinangula muMazu enyi. Lombenunga ngana muze alombele muka-kwimba jisamu ngwenyi: “Ove Yehova, ngunangule jila yove. Nangutambuka mumuchano wove. Ngukafwe ngupwenga namuchima umwe mangana ngwivwenga lijina lyove woma.” (Samu 86:11) Shikaho, twalenuho lika kulyanga kulya chakushipilitu chize Yehova ali nakutuhana kuzachisa Mazu enyi naliuka lyenyi. Kamwatela kufwila kaha kupwa nachinyingi chachivuluko, oloze muchano wamuMbimbiliya watela nawa kumiheta kumuchima, nakuuzachisa mukuyoya chenu. Shipilitu yaYehova yikiko nayimikafwa mulinge ngocho. Kaha nawa mwatela kukolezezanga vandumbwenu. (Hepe. 10:24, 25) Mwomwo ika? Mwomwo vapwa tanga yenu yakushipilitu. Lombenu Yehova amihane shipilitu yajila yimikafwe mukumbululenga mujila yize nayikolezeza vandumbwenu nge muli kukukunguluka, kaha nawa nge muli nachihande mwatela kuchihitulukanga kanawa mangana munganyalisenga vandumbwenu. Nge namulinganga vyuma kanevi kaha Yehova naMwanenyi navamona ngwavo mwazanga “mikoko” javo vaze vapwa vavalemu.—Yowa. 21:15-17.

17. Munahase kusolola ngachilihi ngwenu muli nakukundwiza liuka lyaYehova nakashishi?

¹⁷ Kunasale kashimbu kakandende kaha, hano hamavu nahakasala kaha liuka lize ali nakutwaminyina Kalunga nashipilitu yenyi. Shikaho, zachilenu hamwe naliuka lyaYehova. Londezezenu Yehova hakuhona kutala vatu kumeso mangana mwambulilenga vatu vosena namuwananga muwande. Kundwizenunga kuunda muchikungulwilo hakulinunga navandumbwenu. Kaha ivwililenunga kuli Muka-kunangula Wamunene hakulya kulya chakushipilitu chosena chize ali nakutuhana. Echi nachikamilingisa mukahone kwivwa woma omu navakanongesa kaye kaSatana. Oloze namukapwa vakumika nakukalinunga hamwe navatu vaze vali nakuzachila hamwe naliuka lyaYehova nakashishi.