1-2. (a) Mwomwo ika vaze vanengila muulo kalinwomu vatela kufwelela Yehova? (Samu 37:3, 4) (b) Vyuma muka natushimutwila muchihande chino?

KUTALA kalinwomu mwingile muulo tahi, nyi hakiko munengila muulo? Nge mukiko, kaha twafwelela ngwetu muli nakufwila kukalivwisa kuwaha kuyoya namutu uze mwazanga chikuma. Chipwe ngocho, muulo mwatwama ukalu, kaha nawa vaze vanalimbate vatela kusakula kulinga vyuma vyavilemu. Jila namukumishilamo ukalu kana, navyuma namusakula kulinga mukuyoya navimilingisa mupwenga vakuwahilila lika chipwe chiku. Kachi nge namupendaminanga hali Yehova, kaha namusakula kanawa vyakulinga, nakuzamisa ulo wenu, nakupwa nawa vakuwahilila. Oloze kachi nge kamweshi kupendamina hali Yehova amikafweko, kaha munahase ukalu muulo wenu, ngocho kamweshi kupwa vakuwahililako.—Tangenu Samu 37:3, 4.

² Numba tuhu chihande chino chinakwate hali vaze vanengila muulo kalinwomu, oloze nachihanjika haukalu vanahase kumona vosena vaze vali mumalo. Nachishindakanya havyuma tunahase kulinangula kuli malunga namapwevo vakushishika vasoneka muMbimbiliya. Tunahase kulinangula vishina vyavilemu kuvatu kana vize navitukafwa mukuyoya chetu chahakumbi hakumbi kuhakilako vene namuulo. Natumona nawa vyuma natulinangula kuvyakutalilaho vyavaze valimbata vamakumbi ano.

3-4. Ukalu muka vanahase kumona vaze vanengila muulo kalinwomu?

³ Vatu vamwe vanahase kulweza vaze vanengila muulo kalinwomu valivwise kuwaha kuyoya ngana mwavatu vamukaye.  Chakutalilaho, visemi navausoko vanahase kushinjila vaze vanengila muulo kalinwomu vaputuke kupwa navana hahaze vene vanalimbate. Kaha nawa masepa navatanga nahase kuvashinjila vapwenga nazuvo yayinene nakulanda vikumba vyavivulu.

⁴ Vaze vanalimbate nge kavazangamineko vanahase kusakula kulinga vyuma vize navivalingisa vengile mumikuli yayinene. Echi nachivalingisa vazate jiola jajivulu mangana vafwete mikuli kana. Oloze kuzata chikuma milimo yakumujimba nachivalingisa vahone kupwa nalwola lwakulinga chilongesa chaMbimbiliya chauka, nachatanga, nakuhona kuya muwande. Valunga napwevo vanahase kuhona kuya kukukunguluka mwomwo yakusaka kuzata milimo kuhambakana halwola vavatomena mangana vapwenga najimbongo jajivulu chipwe mangana vahone kuvafumisa hamilimo. Echi nachivalingisa vahone kulivwisa kuwaha kuzachila Yehova milimo yakulisezaseza.

5. Chuma muka munalinangula kuli Klaus napuwenyi Marisa?

⁵ Kuli vyakutalilaho vyavivulu vyasolola nge kufwila chikuma luheto kachaneha kuwahililako. Tutalenu chakutalilaho chaKlaus napuwenyi Marisa. * Omu valimbachile, vosena vavali vazachilenga chikuma milimo yakukaye mangana vapwenga najimbongo navikumba vyavivulu. Oloze chamokomoko nakukilikita, kavapwile vakuwahililako. Klaus ambile ngwenyi: “Twapwile navikumba vyavivulu, oloze katwalitomenenene kuzata milimo numba yimwe yakushipilituko. Kuhanjika muchano, katwalivwishile kuwaha kuyoyako, kaha nawa twazeyelenga chikuma.” Pamo nayenu munamono ngwenu kufwila vyuma vyamukuyoya kacheshi nakuminehela kuwahililako, nge mukiko kaha kanda kuhombako. Kachi nge namushinganyeka havyakutalilaho vyamwaza vyavatu veka kaha chinahase kumikafwa. Chatete, tukekesenu vyuma vanahase kulinangula malunga vaze vambata kuli Mwangana Yehoshafwate.

6. Uno Mwangana Yehoshafwate asolwele ngachilihi nge akavangijile mazu atwama hali Vishimo 3:5, 6 omu vamulukukile kulizavu lyalinene lyamaswalale?

⁶ Enu malunga mwambata, kutala shimbu jimwe mweji kulizakaminanga hamilimo yenu mwatwama nayo tahi? Nge mukiko, kaha chakutalilaho chaMwangana Yehoshafwate chinahase kumikafwa. Hakupwa mwangana apwile namulimo wakukinga lifuchi lyenyi lyosena. Uno vyuma muka alingile numba atesemo mulimo kana? Akilikichile nangolo mangana akinge vatu jenyi hakutunga jinganda jakukingiwa muYuta, kaha nawa akungulwile vaka-kwasa jita vangolo vakuzomboka 1,160,000. (Miji. 2, 17:12-19) Mukuhita chalwola, Yehoshafwate apwile muukalu waunene. Lizavu lyalinene lyavaAmone, navaMowave, navatu vakungalila yajipili yaSeile vamulukukile hamwe navatu jenyi natanga yenyi. (Miji. 2, 20:1, 2) Uno Yehoshafwate alingile ngachilihi? Alombele Yehova amukafwe  nakumuhana ngolo. Chuma alingile chalifwana namazu vasoneka hali Vishimo 3:5, 6. (Tangenu.) Kulomba chaYehoshafwate chakulinyisa vasoneka hali Mijimbu 2, 20:5-12 chasolola nge afwelelele chikuma Ise wamwilu wazangi. Uno Yehova akumbulwile ngachilihi kulomba chaYehoshafwate?

7. Uno Yehova akumbulwile ngachilihi kulomba chaYehoshafwate?

⁷ Yehova ahanjikile kuli Yehoshafwate kuhichila muli kaLevi Yahajele, ngwenyi: “Imanenu muvihela vyenu, imanenu ndundulu mangana mumone omu Yehova mwamilwila.” (Miji. 2, 20:13-17) Jila kana yapwile yakulipwila, mwomwo keshi mukiko veji kulwanga jitako. Oloze Yehova ikiye amulwezele alinge ngocho keshi vatuko. Shikaho, Yehoshafwate afwelelele Kalunga nakulinga vyuma amulwezele. Omu ikiye navatu jenyi vayile nakulihumangana navaka-kole javo, ahakile kulutwe malunga vaka-kwimba mangana valise Yehova, nakuhaka maswalale munyima yamalunga kana. Yehova ateselemo mazu ashikile Yehoshafwate ngocho afungulwile vaka-kole jenyi.—Miji. 2, 20:18-23.

8. Chuma muka vanahase kulinangula malunga vaze vambata kuli Yehoshafwate?

⁸ Enu malunga mwambata munahase kulinangula kuli Yehoshafwate. Mwatwama namulimo wakuzakama tanga yenu, shikaho mweji kuzatanga nangolo mangana muvakinge. Nge munakumona ukalu munahase kushinganyeka ngwenu munahase kupendamina hangolo jenu mangana mukumise ukalu kana. Oloze kamwatela kupendaminanga hangolo jenuko, lombenunga kuli Yehova kwaukawenu mangana amikafwe. Kaha mwatela nawa kulombelanga hamwe napuwenu. Linangulenunga Mbimbiliya namikanda vali nakutuhana muliuka lyaKalunga mangana mwijive jindongi jaYehova nakujikavangiza. Veka vanahase kufwefulula vyuma vize namusakula mwomwo yakupendamina hajindongi jaYehova, nakumyamba ngwavo muvakusalila. Vanahase kuhanjika ngwavo kupwa najimbongo nachikinga tanga yenu. Oloze anukenu chakutalilaho chaYehoshafwate. Afwelelele Yehova hakulinga vyuma vize amulwezele. Ngocho Yehova kamusezeleko, shikaho nayenu keshi kumisezako. (Samu 37:28; Hepe. 13:5) Vyuma muka vanahase kulinga vaze vali muulo mangana vahase kulivwisa kuwaha mukuyoya chavo?

9. Uno vyuma muka natulinangula kuli Isaya napuwenyi?

⁹ Kapolofweto Isaya napuwenyi vazachililenga Yehova chikuma mukuyoya chavo. Isaya apwile kapolofweto, kaha chasoloka nawa nge puwenyi naikiye azachilenga mulimo waupolofweto hakuwana nge vamuvuluka ngwavo “kapolofweto.” (Isa. 8:1-4) Ou lunga napuwenyi vamwene kulemesa Yehova kupwa chachilemu chikuma mukuyoya chavo. Chikupu vene vahana chakutalilaho chamwaza kuli vaze vali mumalo makumbi ano.

10. Uno kulinangwila hamwe upolofweto wamuMbimbiliya chinahase kukafwa ngachilihi vaze vali muulo vazachile chikuma Yehova?

¹⁰ Vaze vali mumalo makumbi ano vanahase kulondezeza kapolofweto Isaya napuwenyi hakuzachila Yehova chikuma mukuyoya chavo. Vanahase kuzamisa lufwelelo lwavo hakulinangwilanga hamwe upolofweto nakumona omu unatesangamo. * (Chitu. 1:2) Vanahase kushinganyeka vyuma vanahase kulinga mangana upolofweto umwe wamuMbimbiliya utesemo. Chakutalilaho, vanahase kulingisa upolofweto waYesu utesemo wakwamba ngwavo, mujimbu  wamwaza navakawambulula hamavu hosena shimbu kanda kukuma chizenga. (Mateu 24:14) Kachi nge navamona ngwavo upolofweto wamuMbimbiliya uli nakutesamo nachikafwa vazate chikuma milimo yaYehova.

11. Vyuma muka alingile Akwila napuwenyi Pilishila, kaha mwomwo ika?

¹¹ Enu munengila muulo kalinwomu munahase kulinangula kuli Akwila napuwenyi Pilishila vaYuleya vaze vatwaminenga munganda yaLoma. Vetavilile mujimbu wamwaza wakuvuluka Yesu, ngocho valumukile nakupwa vaka-Kulishitu. Twafwelela ngwetu vasuulukile mukuyoya chavo. Chipwe ngocho, vyuma vyalumukile mukuyoya chavo omu Mwangana Kolochiu alwezele vaYuleya vosena vafume muLoma. Akwila naPilishila vafumine kuchihela kuze vatachikijile kanawa nakuya kuchihela chaungeji, kaha vaputukile kutonda zuvo, nakuputuka cheka mulimo wavo wakutunga jimbalaka. Uno vyuma kana vyavalingishile vahone kuzachila chikuma Yehova tahi? Nduma. Omu Akwila naPilishila vapwile kuchihela chachihya muKolinde vaputukile kukafwa vandumbwavo vamuchikungulwilo chamulifuchi kana, nakuzachila hamwe nakaposetolo Paulu hakukolezeza vandumbwavo. Kufumaho vayile kujimbaka jeka jamulifuchi kana kuze kwapwile nakusakiwa chikuma vaka-kwambulula. (Vili. 18:18-21; Loma 16:3-5) Chikupu vene valivwishile kuwaha kuzachila Yehova mukuyoya chavo.

12. Mwomwo ika vaze vali muulo vatela kulitomena vyakulinga vyakushipilitu?

¹² Navaze vali muulo makumbi ano vanahase kulondezeza Pilishila naAkwila hakuhaka Wangana kulutwe mukuyoya chavo. Shimbu kanda valunga napwevo valimbate hakiko vatela kushimutwila vyuma navalitomena kulinga. Kachi nge valunga napwevo navalitomena kulinga vyuma vyakushipilitu nakuvitesamo, kaha navamona omu Yehova mwavakafwa mukuyoya chavo. (Kwambu. 4:9, 12) Talenu chakutalilaho chaRussell naElizabeth. Russell ambile ngwenyi, “Shimbu kanda tulimbate, twashimutwilile havyuma vyakushipilitu vize twatelelele kulinga mukuyoya.” Elizabeth nawa ambile ngwenyi, “Twashimutwilile  havyuma kana mangana omu natukaliwana navyuma vyeka vyamukuyoya vikahone kutuhonesa kutesamo vyuma vyakushipilitu twalitomenenene.” Russell naElizabeth vapwile nakutokwa chakuya nakuzachila kulifuchi lyaMicronesia kuze kwapwile nakusakiwa chikuma vaka-kwambulula.

13. Kweseka naSamu 28:7, vyuma muka navifumamo kachi nge natufwelela Yehova?

¹³ Ngana muze chapwile kuli Russell naElizabeth, vandumbwetu vavavulu vaze vali mumalo vali nakulihenda kukuzata milimo yakulisezaseza mangana vapwenga nalwola lwaluvulu lwakuzata mulimo wakwambulula nakunangula. Kachi nge vaze vali muulo navalitomena vyuma vyakushipilitu nakuvitesamo, kaha navamona vyuma vyamwaza mukuyoya chavo. Navamona omu Yehova mwavazakama, ngocho navamufwelela chikuma, nakupwa nawa vakuwahilila.—Tangenu Samu 28:7.

14. Uno kaposetolo Petulu napuwenyi vasolwele ngachilihi ngwavo vafwelelele lushiko lwatwama hali Mateu 6:25, 31-34?

¹⁴ Vaze vali muulo vanahase nawa kulinangula kuli Petulu napuwenyi. Omu mwahichile tukweji 6 kufuma haze kaposetolo Petulu aliwanyine naYesu, asakwile kulinga vyuma vyavilemu chikuma mukuyoya. Petulu atelenga vaishi mangana awane vyuma vyakulikafwa navyo natanga yenyi. Shikaho omu Yesu amulwezele apwenga muka-kumukavangiza shimbu yosena, Petulu avangile kushinganyeka hatanga yenyi shimbu kanda asakule vyakulinga. (Luka 5:1-11) Petulu asakwile kuyanga naYesu mumulimo wakwambulula. Asakwile kanawa vyakulinga, kaha twafwelela ngwetu napuwenyi amukundwijile. Mbimbiliya yasolola ngwayo, hanyima yakusanguka chaYesu, ou pwevo atambukilenga hamwe nalunga lyenyi Petulu hashimbu jimwe. (Koli. 1, 9:5) Chakutalilaho chenyi chamwaza chikiko chalingishile Petulu apwenga wakukasunuka kusoneka mazu akuhuhumuna kuli vaka-Kulishitu vaze vali muulo. (Petu. 1, 3:1-7) Petulu napuwenyi vafwelelele mulushiko lwaYehova lwakuvuluka ngwavo, kachi nge navahaka Wangana kulutwe mukuyoya chavo, kaha Yehova mwavahana vyuma vasakiwa.—Tangenu Mateu 6:25, 31-34.

15. Vyuma muka namulinangula kuli Tiago napuwenyi Esther?

¹⁵ Kachi nge munatwame myaka yayivulu muulo, munahase kutwalaho ngachilihi kutohwesa mulimo wenu wakwambulula? Jila yimwe munahase kulinga ngocho shina kulinangula kuli vakwenu vaze vali muulo. Chakutalilaho, munahase kutanga vihande vyakwamba ngwavo “Valisuwile naMuchima Wosena.” Vihande kana vyakafwile Tiago napuwenyi Esther vamuBrazil vafwile kuya nakuzachila kuze kwapwile nakusakiwa kukafwa chikuma. Tiago ahanjikile ngwenyi: “Omu twatangilenga mijimbu nakumona omwo Yehova akafwilenga vangamba jenyi vamakumbi ano, nayetu twasakile kumona omwo Yehova mwatutwaminyina nakutuzakama.” Kufumaho vayile kuParaguay, kaha vanazachilanga mungalila yize yazachisa lilimi lyaPortuguese kufuma vene mu 2014. Esther ambile ngwenyi: “Chisoneka twazanga tuvosena shina chaWavaka-Efwesu 3:20. Tuli nakumona omwo mazu ahachisoneka kana ali nakutesamo omu tuli nakuzachila Yehova.” Mukanda uze Paulu asonekelele vaka-Efwesu ahanjikile ngwenyi Yehova mwavahana vyuma vyavivulu kuzomboka navize navamulomba. Chikupu vene mazu kana ali nakutesamo.

16. Uno vaze vanengila muulo kalinwomu vatela kuhulisa veya vavakafwe kachi nge vali nakusaka kukekesa vyuma valitomenene kulinga mukuyoya?

 ¹⁶ Vaze vanengila muulo kalinwomu vanahase kunganyala kuvyakutalilaho vyavakwavo vaze vanapendaminanga hali Yehova. Vamwe vanazatenga mulimo washimbu yosena hamyaka yayivulu. Shikaho vahulisenu vamikafwe kachi nge muli nakufwila kukekesa vyuma mwalitomenene kulinga. Eyi hijila yimwe namusolwelamo ngwenu mwafwelela Yehova. (Vishi. 22:17, 19) Tulama navakiko vanahase kukafwa vandumbwetu vaze vanengila kalinwomu muulo mangana valitomene vyakulinga vyakushipilitu nakuvitesamo.

17. Vyuma muka vyasolokele kuli Klaus naMarisa, kaha natulinangulako ika?

¹⁷ Shimbu jimwe tunahase kusakula kutohwesako mulimo wetu wakwambulula mujila yimwe, oloze vyuma kavyeshi kupwa ngana muze tunasakeko. Omu mukiko chapwile kuli Klaus naMarisa vaze twavulukanga hakavanga. Omu mwahichile myaka yitatu kufuma hakulimbata, valisuuwile kuya nakuzata mulimo wakutungatunga hamutango wamuFinland. Oloze vavalwezele ngwavo kaveshi kuzata mulimo kana hatukweji vakuzomboka 6 koko. Hakavanga vevwile kupihya chikuma. Nakushimbula chiku, vavasanyikile vayenga kushikola yakulinangula lilimi lyaArabic, kaha oholyapwa vali nakulivwisa kuwaha kuzachila mulifuchi lyeka muze vazachisa lilimo lyaArabic. Omu Marisa eji kwanukanga omu chapwile hakavanga eji kwambanga ngwenyi: “Ngwevwile woma kulinga vyuma vize kanda ngulingengaho lyehi shikaho ngwatelele kupendamina chikuma hali Yehova. Oloze ngunamono omu Yehova natukafwe mujijila jize katwashinganyekeleko. Kutukafwa mujila kana chinangulingisa ngufwelele chikuma Yehova.” Ngana muze chapwile kuli Klaus naMarisa nayenu tachikizenu ngwenu Yehova mwamikafwanga kachi nge namumufwelelanga chikuma.

18. Vyuma muka vatela kulinga vaze vali muulo mangana vatwaleho kufwelela Yehova?

¹⁸ Ulo wapwa wana wakufuma kuli Yehova. (Mateu 19:5, 6) Kaha asaka vaze vali muulo valivwise kuwaha wana kana. (Vishi. 5:18) Enu munengila muulo kalinwomu kekesenu vyuma munalitomena kulinga mukuyoya chenu. Kutala muli nakuzata noho hakumina ngolo jenu mangana musolole ngwenu mwasakwilila Yehova hamawana amihana tahi? Lombenunga kuli Yehova, nakuhehwojola muMazu enyi mangana muwane jindongi jize najimikafwa kweseka nomwo vili vyuma. Kufumaho kavangizenu vyuma namuwana. Tachikizenu ngwenu namuwahilila nakufukila muulo wenu kachi nge namuzachila chikuma Yehova mukuyoya chenu.