1. Vihula muka tuhase kulihulisa?

UNO shimbu jimwe mweji kulizakaminanga nge munashinganyeka havyuma navikasoloka kulutwe vyakufwana nge kunongesa kwitava chamakuli, nakutunyemukila kuli Ngonge wakuMangonge, najita yaAlamangetone tahi? Kutala mweji kulihulisanga ngwenu ‘Uno nangukapwa lika wakushishika omu navikasoloka vyuma kanevi vyakwivwisa woma tahi?’ Kachi nge mwashinganyekaho lyehi ngocho, kaha mazu aYesu ali muchisoneka chamutwe wachihande chino nawamikafwa. Yesu alwezele tumbaji twenyi ngwenyi: “Michima yenu kanda nayilizakaminako. Fwelelenu muli Kalunga, fwelelenu nawa muli ami.” (Yowa. 14:1) Chikupu vene lufwelelo lwakukola nalutukafwa tumike chamokomoko navyuma navikasolola kulutwe.

2. Tunahase kuzamisa ngachilihi lufwelelo lwetu, kaha vyuma muka natushimutwila muchihande chino?

² Kushinganyeka havyuma tweji kulinganga nge tuli mucheseko oholyapwa nachitukafwa tutachikize vyuma twatela kulinga mangana tukomike muvyeseko vinakwiza kulutwe. Kulinga ngocho nachitukafwa tutachikize vyuma twatela kulinga mangana tuzamise lufwelelo lwetu. Nge natumika mukala vyeseko natuhitamo, kaha lufwelelo lwetu naluzama nakutulingisa tukomike muvyeseko navikatuwana kulutwe. Muchihande chino natushimutwila havyuma viwana vyasolokele kuli tumbaji twaYesu vize vyasolwele nge vasakiwile lufwelelo lwalunene. Natushimutwila nawa haukalu tunahase kuhitamo nayetu makumbi ano nomu kumika muukalu kana chinahase kutukafwa tukomike muvyeseko vinakwiza kulutwe.

3. Mazu ahanjikile Yesu hali Mateu 6:30, 33, atukafwa twivwishise ika?

³ Chapwa chakutamo kuli mutwe watanga kutondela tanga yenyi vyakulya, navyakuvwala, nahakusavala. Oloze chapwa chachikalu kuwana vyuma kana mumakumbi ano amakalu. Shimbu jimwe vandumbwetu vanavafumisanga hamilimo, kaha vanesejekanga mangana vawane yeka oloze vanahono. Kaha veka vaneche kuzata milimo yize yalimbalaka najindongi jamuMbimbiliya. Nge tuli muukalu kanou, twatela kupwa nalufwelelo lwakukola ngwetu Kalunga mwatuhana vyuma tunakusakiwa natanga yetu. Yesu alwezele tumbaji twenyi vyuma kana muChihande ChahaPili. (Tangenu Mateu 6:30, 33.) Nge natufwelela ngwetu Yehova mwatuzakama nge tuli muukalu, kaha nachitukafwa tutonde chatete Wangana waKalunga. Kahomu natumona ali nakutuzakama, natupandama chikuma kuli ikiye kaha lufwelelo lwetu naluzama.

4-5. Vyuma muka vyakafwile tanga yimwe omu valizakaminyine mwakuwanyina vyakulikafwa navyo mukuyoya?

⁴ Tuchitalenu omwo Yehova akafwile tanga yimwe muVenezuela yize yapwile muukalu wakuwana vyakulikafwa navyo mukuyoya. Tanga yandumbwetu Castro yatwaminenga hafwamu, kaha kuyoya chavo chapendaminyinenga hakulima. Oloze kutwala muze vasamalyamba vavalukukile nakuvatambula fwamu yavo nakuvahangaho. Ndumbwetu Miguel Castro ambile ngwenyi: “Twatwama jino hakafwamu kakandende kambala kaze vatuhana, kaha nawa hakiko tweji kulimanga. Hakumbi hakumbi ngweji kulombanga Yehova atuhane vyuma tunakusakiwa.” Numba tuhu ava vandumbwetu vali muukalu oloze hakufwelela ngwavo Yehova mwavahana vyuma vasakiwa hakumbi hakumbi, cheji kuvakafwanga vatwaleho lika kupwanga kukukunguluka shimbu yosena nakwazana mumulimo wamuwande. Veji kuhakanga Wangana waKalunga kulutwe mukuyoya chavo, kaha Yehova eji kuvazakamanga kumujimba.

⁵ Ndumbwetu Miguel napuwenyi Yurai vali nakumona omu Yehova ali nakuvazakama halwola kanelu vali nakuhita muukalu. Shimbu jimwe Yehova nazachisanga vandumbwetu mangana vavahane vyuma vyakulikafwa navyo chipwe kukafwa ndumbwetu Miguel awane milimo. Kaha lwola lukwavo, Yehova azachishile ofesi yamutango mangana yivahane vyuma vasakiwile. Yehova natwaleho lika kuvazakama. Echi chinalingisa tanga yavo yipwenga nalufwelelo lwakukola chikuma. Omu vambulwile omu Yehova avakafwile, mwanavo wapwevo wamukulwane Yoselin ambile ngwenyi: “Tweji kwivwanga kuwaha hakumona omu Yehova natukafwilamo. Yehova ngwamumona kupwa sepa lyami uze nangupendaminanga shimbu yosena.” Ambile nawa ngwenyi: “Vyeseko tunahichimo natanga yetu vinatukafwe tupwenga vakulizanga kukomika muvyeseko vyavinene vinakwiza kulutwe.”

6. Munahase kuzamisa ngachilihi lufwelelo lwenu kachi nge munakumona ukalu wajimbongo?

⁶ Kutala munakumona ukalu wajimbongo tahi? Nge mukiko kaha chili nakumikaluhwila kuwana mwakuyoyela. Chamokomoko naukalu kana,  munahase kuzamisa lufwelelo lwenu. Lombenu kuli Yehova nakutanga mazu aYesu atwama hali Mateu 6:25-34 nakushinganyekaho. Shinganyekenunga havyakutalilaho vyamakumbi ano vize vili nakusolola omu Yehova ali nakuzakama vangamba jenyi vaze vali nakuhaka milimo yaWangana kulutwe. (Koli. 1, 15:58) Kulinga ngocho nachimikafwa mufwelele chikupu ngwenu, Senu wamwilu mwamikafwa nganomu nakafwenga vandumbwenu. Atachikiza vyuma mwasakiwa namwakumihanyinavyo. Omu namumona ngwenu Yehova ali nakumikafwa mukuyoya chenu, lufwelelo lwenu naluzama nakumikafwa mukomike muvyeseko vyavinene kulutwe.—Hamba. 3:17, 18.

7. Kweseka naMateu 8:23-26, uno “nyamanganda wamunene” esekele ngachilihi lufwelelo lwatumbaji?

⁷ Omu Yesu natumbaji twenyi vapwile muwato hakalungalwiji kwejile nyamanganda, kaha Yesu avakafwile kuzachisa nyamanganda kana mangana vamone ngwavo vatelelele kuzamisa lufwelelo lwavo. (Tangenu Mateu 8:23-26.) Omu nyamanganda atohwele meya aputukile kwingila muwato, oloze Yesu apwile mutulo. Kahomu tumbaji twenyi vevwile woma nakumuhindula mangana avalwile, ikiye avahuhumwine ngwenyi: “Enu vaka-lufwelelo lwalundende, mwomwo ika munevwila woma?” Ava tumbaji vatelelele kufwelela ngwavo Yehova mwakinga Yesu hamwe navakiko. Chishina muka natulinangulako? Kupwa nalufwelelo lwakukola nachitukafwa tumike nge kuneza “nyamanganda wamunene” chipwe kala ukalu wakufwana nge nyamanganda.

8-9. Uno lufwelelo lwaNdumbwetu Anel valwesekele ngachilihi, kaha vyuma muka vyamukafwile?

⁸ Tutalenu hachakutalilaho chandumbwetu wapwevo wamujike Anel wamulifuchi lyaPuerto Rico. Lufwelelo lwenyi lwazamine chikuma omu omikile mucheseko chachinene. Cheseko kana chaputukile mu 2017 omu kwejile “nyamanganda wamunene” vavuluka ngwavo Maria uze enyekele zuvo yenyi. Kaha nawa nyamanganda kana alingishile namilimo yenyi yikume. Ndumbwetu Anel ambile ngwenyi: “Ukalu kana wangulingishile ngulizakamine chikuma. Oloze ngwapendaminyine hali Yehova kuhichila mukulomba nakuhona kwechelela kulizakamina chinguhonese kulinga vyuma ngwatelele kulinga.”

⁹ Ndumbwetu Anel avulukile nawa ngwenyi chuma chamukafwile shina kwononoka. Ambile ngwenyi: “Kukavangiza jindongi jakufuma kuliuka changukafwile nguunde muchima. Yehova angukafwile kuhichila muli vandumbwami. Vangukolezezele nakunguhana vyuma vyakulikafwa navyo vize ngwasakiwile.” Ambile nawa ngwenyi: “Yehova anguhanyine vyuma vyavivulu kuhambakana navize ngwapwile nakusakiwa, kahechi chazamishile chikuma lufwelelo lwami.”

10. Vyuma muka namulinga kachi nge munakumona ukalu wakufwana nge “nyamanganda wamunene”?

¹⁰ Kutala munakumona ukalu wakufwana nge “nyamanganda wamunene” tahi? Pamo muli nakuyanda mwomwo yaukalu chipwe mwomwo yanyamanganda wachifwanyisa wakufwana nge kuviza chikuma chize chili nakumilingisa muhombe nakuhona vyakulinga. Shimbu jimwe munahase  kulizakamina oloze mwatela kutwalaho lika kufwelela Yehova. Pandamenu kuli ikiye kuhichila mukulomba. Zamisenu lufwelelo lwenu hakushinganyeka omu namikafwenga. (Samu 77:11, 12) Fwelelenu ngwenu Yehova keshi kukamisezako haya myaka yosena.

11. Mwomwo ika twatela kwononoka kuli vaze vali nakutwaminyina?

¹¹ Vyuma vyeka muka vinahase kumikafwa mumike muukalu? Chuma chimwe nachitukafwa shina kwononoka ngana muze ahanjikile ndumbwetu Anel. Fwelelenunga vatu vaze ali nakuzachisa Yehova naYesu. Shimbu jimwe vatu vaze vali nakututwaminyina vanahase kutulweza kukavangiza jindongi jize natumona ngwetu jamokomoko. Chipwe ngocho Yehova eji kukisulanga vatu vaze veji kumwononokanga. Mazu enyi navyakutalilaho vyavangamba jenyi vakushishika vyasolola nge kwononoka cheji kuyovolanga myono yavatu. (Kulo. 14:1-4; Miji. 2, 20:17) Shikaho shinganyekenunga havyakutalilaho kana. Kulinga ngocho nachimikafwa mukavangize jindongi navamilweza kuliuka lyaYehova oholyapwa nakulutwe. (Hepe. 13:17) Kahechi nachimilingisa muhone kwivwa woma nyamanganda wamunene chikuma chipwe ngwetu luyando lwalunene luli nakwiza kulutwe.—Vishi. 3:25.

12. Uno mujimbu wahali Luka 18:1-8 wasolola ngachilihi nge kupwa nalufwelelo chatambukila hamwe nakumika kachi nge vatu vanahengesa chiyulo?

¹² Yesu atachikijile ngwenyi vaka-kuhengesa chiyulo navakeseka lufwelelo lwatumbaji twenyi. Ngocho avalwezele chifwanyisa vasoneka hali Luka mangana avakafwe vakomike muukalu kana. Yesu avalwezele mujimbu watuliwe uze ayilenga nakulembelela muka-kuyula wakuhona kwoloka mangana amuyulileko mwachiyulo. Ou tuliwe afwelelele ngwenyi nge mwatwalaho lika kumulembelela kaha mwamukafwa. Kutwala muze amukafwile. Chishina muka natulinangulako? Yehova kahengesa chiyuloko. Ngocho Yesu ambile ngwenyi: “Kutala Kalunga keshi kukalinga mwaya chiyulo chakwoloka kuvatu jenyi asakula vaze veji kumulililanga musana naufuku” tahi? (Tangenu Luka 18:1-8.) Yesu ahanjikile nawa ngwenyi: “Omu mwakeza Mwanamutu, kutala lufwelelo kanelu mwakaluwana hano hamavu tahi?” Kachi nge tuli nakuyanda mwomwo vatu vanakuhengesa chiyulo, twatela kusolola ngwetu tukwechi lufwelelo lwakukola ngana mwauze tuliwe hakupwa nalukakachila namuchima wakutalilila chikoki. Kupwa nalufwelelo kana nachitukafwa tufwelele ngwetu Yehova mwolola vyuma halwola atongola. Twatela nawa kutachikiza ngwetu kulomba chinahase kutukafwa. Shimbu jimwe Yehova nahase kukumbulula kulomba chetu mujila yize katwashinganyekeleko.

13. Uno kulomba chakafwile ngachilihi tanga yimwe yize valingile mwamupi?

¹³ Tutalenu chakutalilaho chandumbwetu wapwevo Vero wamulifuchi lyaDemocratic Republic of the Congo. Ou ndumbwetu nalunga lyenyi uze kapwa chinjihoko namwanavo wapwevo wamyaka 15, vachinyine mungalila yavo mwomwo vayilukile kumaswalale. Omu vapwile nakuya vawanyine maswalale kaha vavemikile  nakuvalweza ngwavo navavajiha. Omu ndumbwetu Vero apwile nakulila, mwanenyi aputukile kulombela helu mangana aunjise naye kaha mukulomba chenyi avulukile lijina lyaYehova mapapa kakavulu. Omu akumishile kulomba, kapitau kamaswalale amuhulishile ngwenyi: “Ove mwana, iya akunangwile kulomba?” Akumbulwile ngwenyi, “Mama ikiye angunangwile kuzachisa chakutalilaho chatwama hali Mateu 6:9-13.” Uze kapitau kamaswalale ahanjikile ngwenyi, “Yakonga navisemi jove mukuunda, kaha Kalunga kove Yehova akukinge.”

14. Vyuma muka vinahase kweseka lufwelelo lwetu, kaha vyuma muka vinahase kutukafwa tumike?

¹⁴ Vyakutalilaho kana vyeji kutukafwa tumonenga kulomba kupwa chachilemu. Lufwelelo lwenu vanahase kulweseka kachi nge kulomba chenu kavachikumbulwile washi chipwe kuchikumbulula mujila yakukomwesako. Jino vyuma muka navimikafwa mumike? Ngana mwatuliwe uze vavuluka muchifwanyisa chaYesu, mwatela kutwalaho kulomba nakufwelela ngwenu Kalunga keshi kumisezako kaha nawa mwakumbulula kulomba chenu halwola lwakutamo. Twalenuho lika kulomba Yehova amihane shipilitu yenyi yajila. (Fwili. 4:13) Anukenu ngwenu kalinwomu Yehova amikisule mwamunene kaha kamweshi kukanuka vyuma vyavipi muli nakumonako. Kachi nge namumika muukalu uze muli nakumona makumbi ano hakumikafwa kuli Yehova, kaha namufwelela ngwenu namukomika namuukalu unakwiza kulutwe.—Petu. 1, 1:6, 7.

15. Kweseka namukanda waMateu 17:19, 20, ukalu muka vamwene tumbaji twaYesu?

¹⁵ Yesu anangwile tumbaji twenyi ngwenyi kupwa nalufwelelo nachivakafwa vatwaleho lika kuzachila Kalunga chamokomoko naukalu. (Tangenu Mateu 17:19, 20.) Lwola lumwe vahonene kulovola ndemone numba tuhu halwola lweka vahashilenga kulinga ngocho. Uno mwomwo ika vahonenene? Yesu avalwezele ngwenyi vasakiwile kupwa nalufwelelo lwalunene. Mwomwo lufwelelo lwalunene naluvakafwa vatwaleho kuzachila Kalunga chamokomoko nakuhita muukalu waunene wakufwana nge jipili. Nayetu nawa makumbi ano tunahase kulitalasana naukalu uze unahase kutulingisa chipwenga chachikalu kutwalaho kuzachila Kalunga.

16. Uno lufwelelo lwakafwile ngachilihi ndumbwetu Geydi omike omu lunga lyenyi vamujihile?

¹⁶ Talenu chakutalilaho chandumbwetu Geydi wakuGuatemala. Lunga lyenyi Edi vamujihile omu vapwile nakufuma kukukunguluka. Uno lufwelelo lwakafwile ngachilihi ou ndumbwetu omike muukalu kana chamokomoko naushona? Ambile ngwenyi: “Kulomba cheji kungukafwanga ngumbile chiteli chami hali Yehova nakungulingisa nguunde muchima. Yehova ali nakungukafwa kuhichila muli vausoko wami navandumbwami muchikungulwilo. Kaha nawa kuzata natwima milimo yaYehova cheji kungukafwanga ngukeheseko ushona nakuhona kulizakamina haukalu wahamene. Kuhita muukalu kana chinangulingisa ngumone ngwami kala cheseko  nachikeza kulutwe nangukomika hakungukafwa kuli Yehova naYesu naliuka.”

17. Vyuma muka namulinga kachi nge muli muukalu waunene wakufwana nge pili?

¹⁷ Kutala muli nakulishona mwomwo yakufwisa mutu mwazanga tahi? Fwelelenu chikuma mulutalililo lwakusanguka hakutanganga mijimbu yamuMbimbiliya yavatu vaze vasangwile. Kutala muli nakulishona mwomwo muka-tanga yenu umwe vamufumisa muchikungulwilo tahi? Linangulenu mangana mufwelele chikuma ngwenu eyi yikiko jila yimwe yamwaza yize Yehova eji kuzangamishilangamo. Chamokomoko naukalu munakuhitamo, fwilenu kuzamisa lufwelelo lwenu. Lwezenu Yehova omu munakwivwa kuhichila mukulomba. Kanda kufwila kupwa ukawenuko, pandamenunga kuli vandumbwenu. (Vishi. 18:1) Lingenu vyuma vize navimikafwa mutwaleho kumika numba tuhu namulila hakushinganyeka vyuma vinamisolokela. (Samu 126:5, 6) Twalenuho lika kukungulukanga nakuya muwande nakutanganga Mbimbiliya. Shinganyekenunga havyuma vyamwaza amishika Yehova kukamilingila. Kumona omu Yehova ali nakumikafwa nachizamisa chikuma lufwelelo lwenu.

18. Vyuma muka mwatela kulinga kachi nge munamono ngwenu lufwelelo lwenu lunazeye?

¹⁸ Kachi nge ukalu munakuhitamo chipwe uze mwahichilemo unazeyesa lufwelelo lwenu, kaha kanda kulizakaminako. Oloze fwilenu kuzachilaho mangana luzame. Lombenu ngana muze valombele vaposetolo ngwavo: “Tukafwe tupwenga nalufwelelo lwalunene.” (Luka 17:5) Kaha nawa shinganyekenunga havyakutalilaho tunashimutwila muchihande chino. Ngana mwandumbwetu Miguel napuwenyi Yurai, anukenunga lwola lwosena luze Yehova namikafwenga. Ngana muze chapwile kuli mwana ndumbwetu Vero nandumbwetu Anel, lombenunga naluzema kuli Yehova chikumanyi nge muli muukalu waunene. Kaha nawa ngana mwandumbwetu Geydi, tachikizenu ngwenu Yehova mwamikafwa kuhichila muli vausoko navandumbwenu. Kachi nge namupendamina hali Yehova amikafwe mumike muukalu muli nakumona oholyapwa kaha namufwelela ngwenu mwakamikafwa mukomike namuukalu namukamona kulutwe.

19. Vyuma muka atachikijile Yesu, kaha enu mwatela kutachikiza ika?

¹⁹ Numba tuhu Yesu akafwile tumbaji vapwenga nalufwelelo lwalunene oloze ejivile ngwenyi Yehova mwakavakafwa vakomike muvyeseko navikavawana kulutwe. (Yowa. 14:1; 16:33) Atachikijile nawa ngwenyi lufwelelo lwakukola nalukakafwa liyongomena lyalinene likayovoke haluyando lwalunene. (Kuso. 7:9, 14) Kutala namukapwa halizavu lyavaze navakayovoka tahi? Yehova nahase kumikafwa mukapwe halizavu kana kachi nge namuzata nangolo muzamise lufwelelo lwenu oholyapwa.—Hepe. 10:39.