1-2. Mwomwo ika kamwatela kwivwa kupihyako nge kanda mulizange kumimbapachisa? (Talenu muvwimbimbi wahalipapilo lyahelu.)

 NGE muli nakufwila kumimbapachisa, kaha muli nakufwila chuma chamwaza chikuma. Kutala munalizange kumimbapachisa tahi? Nge mukiko, kaha nawa mukiko vanamono navakulwane, kaha kanda kulangisa kulinga chuma kana hakukunguluka chachinene nachikavangizahoko. Nge namulinga ngocho, kaha namulivwisa kuwaha kuzachila Yehova mukuyoya chenu.

² Kutala vanamilwezeko vyuma vimwe mwatela kulinga mangana mutwaleho kuzovoloka shimbu kanda vamimbapachise tahi? Nyi nayenu vavene munamono vyuma kana tahi? Nge mukiko, kaha kanda kwivwa kupihyako. Munahase kutwalaho kuzovoloka mangana vamimbapachise, numba mupwa muvanyike chipwe muvakulwane.

3. Uno chilolo wakaEchopa ahulishile Fwilipu chuma muka, kaha echi chaneha chihula muka? (Vilinga 8:36, 38)

³ Tangenu Vilinga 8:36, 38. Chilolo umwe wakaEchopa ahulishile Fwilipu muka-kwambulula mujimbu wamwaza ngwenyi: “Chuma muka nachinguhonesa ami kungumbapachisa?” Ou lunga wakaEchopa apwile namuchima wakufwila kumumbapachisa, oloze kutala apwile wakulizanga kulinga chuma kanechi chachilemu tahi?

4. Uno uze lunga wakaEchopa asolwele ngachilihi nge afwililile kutwalaho lika kulinangula?

⁴ Ou lunga wakaEchopa “ayile kuYelusalema nakulemesa Kalunga.” (Vili. 8:27) Chasoloka nge apwile mutu uze alumukile nakupwa kaYuleya, ngocho pamo etavilile kwitava chavaYuleya. Chakuzeneka kukakasana, ou lunga alinangwile hali Yehova mumikanda yajila yamuVisoneka VyachiHepeleu. Chipwe ngocho, afwililile kulinangula vyavivulu. Uno Fwilipu awanyine ou lunga ali nakulinga vyuma muka omu amuwanyine mujila? Amuwanyine ali nakutanga mukanda wakuvunga wakapolofweto Isaya. (Vili. 8:28) Echi chapwile hikulya chakutafunya chakushipilitu. Ou chilolo kafwililile kaha kulinangula vyuma vyavindende vyamuvisonekako, oloze afwililile kutwalaho lika kulinangula vyavivulu.

5. Vyuma muka alingile lunga wakaEchopa vize vyasolola nge akavangijilenga vyuma alinangwilenga?

 ⁵ Ou lunga apwile nachihela chachinene muchiyulo chaMwangana wapwevo Kandese wavaEchopa, kaha nawa apwile “muka-kulama luheto lwosena lwamwangana.” (Vili. 8:27) Shikaho chasoloka nge ou lunga apwilenga namilimo yayivulu chikuma. Chipwe ngocho, awanyinengako lwola lwakulemesa Yehova. Kakuminyinyine kaha hakulinangula muchanoko, oloze akavangijilenga navyuma alinangwilenga. Atambukile tunda yayisuku kufuma kuEchopa nakuya kutembele muYelusalema mangana akalemese Yehova. Numba tuhu ungeji kana wasakiwile kuzachisa lwola lwaluvulu naluheto lwaluvulu, oloze ou lunga asakile kulemesa Yehova chamokomoko navyuma vyasakiwile.

6-7. Uno zangi yauze kaEchopa yakuzanga Yehova yatwalileho lika ngachilihi kutohwa?

⁶ Uze lunga wakaEchopa alinangwile muchano waulemu wauhya kuli Fwilipu, kuhakilako vene namuchano wakwamba ngwavo Yesu ikiye Meshiya. (Vili. 8:34, 35) Ou chilolo evwile kuwaha chikuma hakutachikiza vyuma amulingililile Yesu. Uno vyuma muka alingile hakutachikiza muchano kana? Nge asakile kachi atwalileho lika kupwa mutu uze alumukile nakupwa kaYuleya uze vavumbikilenga. Oloze zangi yenyi yakuzanga Yehova naMwanenyi yatohwele. Echi chamukunywile asakule kulinga chuma chize chalumwine kuyoya chenyi. Chuma kana shina kumumbapachisa nakupwa muka-kukavangiza Yesu Kulishitu. Fwilipu amwene ngwenyi ou lunga nalizange, ngocho amumbapachishile.

⁷ Kachi nge namukavangiza chakutalilaho chauze kaEchopa, kaha namupwa vakulizanga kumimbapachisa. Nayenu munahase kuhanjika nakukunyuka ngwenu, “Chuma muka nachinguhonesa ami kungumbapachisa?” Tushimutwilenu havyuma mwatela kulinga mangana mukavangize vyuma alingile uze lunga wakaEchopa. Ou lunga atwalileho lika kulinangula, nakukavangiza vyuma alinangwilenga, kaha nawa zangi yenyi yakuzanga Kalunga yatwalileho lika kutohwa.

8. Uno chisoneka chaYowano 17:3 chamilweza mulinge ika?

⁸ Tangenu Yowano 17:3. Uno awa mazu aYesu akiko amikafwile musakule kulinangula Mbimbiliya tahi? Omu mukiko chapwile kuli yetu vavavulu. Kutala mazu kana atukafwa nawa tutwaleho lika kulinangula tahi? Eyo. Katweshi kukalitwamina ‘kutachikiza Kalunga umwe kaha wamuchanoko.’ (Kwambu. 3:11) Shikaho, natutwalangaho lika kulinangula haya myaka. Kulinangula chikuma hali Yehova nachitupandamisa nawa chikuma kuli ikiye.—Samu 73:28.

9. Vyuma muka twatela kulinga hanyima yakulinangula muchano wamaputukilo wamuMbimbiliya?

⁹ Nge tunaputuka kulinangula hali Yehova, tweji kulinangulanga vyuma vyavindende kaha vyamuMbimbiliya. Mumukanda uze kaposetolo Paulu asonekelele vaHepeleu, avulukile vyuma  kana ngwenyi “vyuma vyamaputukilo.” Kapwile nakulumbununa ngwenyi “kunangula chamaputukilo” chapwile chamokomokoko, oloze apwile nakuchifwanyisa kumavele aze eji kukafwanga kemba. (Hepe. 5:12; 6:1) Oloze akolezezele nawa vaka-Kulishitu vatambukenga kweseka nakunangula kanechi chamaputukilo nakulinangula nawa muchano wakujiminyina wamuMazu aKalunga. Kutala muli nachipepa chakufwila kulinangula vyuma vyakujiminyina vyamuMbimbiliya tahi? Kutala muli nakufwila kutwalaho lika kuzovoloka nakutwalaho kulinangula hali Yehova nahavyuma ajina tahi?

10. Mwomwo ika vatu vamwe cheji kuvakaluhwilanga kulinangula?

¹⁰ Etu vamwe cheji kutukaluhwilanga kulinangula. Nyi ngachilihi yenu? Kutala omu mwapwilenga kushikola mwatachikijile kutanga nakulinangula kanawa tahi? Kutala mwalivwishilenga kuwaha kulinangula nakumona ngwenu nachiminganyalisa tahi? Nyi mwakukulwile ngwenu kamwatwama nauhashi wakutanga mikandako? Nge mukiko, kaha tachikizenu ngwenu kamweshi ukawenuko. Oloze Yehova mwamikafwa. Apwa wakukupuka, kaha nawa apwa Muka-kunangula wamwenemwene.

11. Uno Yehova alisolola ngachilihi kupwa ‘Muka-kunangula Wamunene’?

¹¹ Yehova alivuluka ngwenyi apwa ‘Muka-kunangula Wamunene.’ (Isa. 30:20, 21) Apwa Muka-kunangula uze eji kwivwishisanga vatu, nakuvatalilila chikoki nakuvasolwela likoji. Eji kutalanga havyuma vyamwaza hali vatu vaze eji kunangulanga. (Samu 130:3) Kaha nawa kasaka tulinge vyuma vize katweshi kuhasako. Anukenu ngwenu, atengele wongo wamutu mujila yakukomwesa. (Samu 139:14) Shikaho, tukwechi muchima wakufwila kulinangula. Tengi yetu asaka tutwaleho lika kulinangula haya myaka, nakulivwisacho kuwaha. Shikaho, nachipwa chamangana ‘kufwilanga chikuma’ muchano wamuMbimbiliya oholyapwa. (Petu. 1, 2:2) Litomenenu kulinga vyuma vize namutesamo, nakukavangiza kunoneka chenu chakutanga Mbimbiliya nakulinangula. (Yoshu. 1:8) Yehova mwamikafwa mulivwise kuwaha kutanganga nakulinangula vyavivulu hali ikiye.

12. Mwomwo ika twatela kulinangula chiyoyelo chaYesu namilimo wenyi?

¹² Wanenungako lwola lwakushinganyekanga hachiyoyelo chaYesu namulimo wenyi. Chapwa chachilemu chikuma kukavangiza kanawa mujitambo jaYesu numba tuzachile kanawa Yehova, chikumanyi mulwola luno lwalukalu. (Petu. 1, 2:21) Yesu ahanjikile hatoma ukalu uze navakamona vaka-kumukavangiza. (Luka 14:27, 28) Chipwe ngocho, afwelelele ngwenyi vaka-kumukavangiza vamuchano navakafungulula ngana muze alingile ikiye. (Yowa. 16:33) Linangulenunga mijimbu yakuyoya chaYesu nakulitomena vyuma mwatela kulinga mangana mumulondezeze mukuyoya chenu chahakumbi hakumbi.

13. Chuma muka mwatela kutwalaho lika kulomba Yehova, kaha mwomwo ika?

¹³ Katwatela kukumina kaha hakupwa nachinyingiko. Oloze chinyingi chatela kutulingisa tulinangule vyavivulu hali Yehova, nakumuzanga chikuma nakumufwelela. (Koli. 1, 8:1-3) Omu namutwalaho lika kulinangula, twalenuho lika kulomba Yehova amikafwe mupwenga chikuma nalufwelelo. (Luka 17:5) Yehova eji kukumbululanga kulomba kana. Lufwelelo lwamwenemwene luze lwapendamina hachinyingi chakwoloka chakufuma kuli Kalunga ketu, nalumikafwa muzovoloke.—Yako. 2:26.

14. Kaposetolo Petulu ashindakanyine ngachilihi hakulema chatwama hakukavangiza vyuma tunalinangula? (Talenu nawa muvwimbimbi.)

¹⁴ Kaposetolo Petulu ashindakanyine omwo chalema kuli vaka-kukavangiza Kulishitu kutwalaho lika kukavangiza vyuma veji kulinangulanga. Avulukile mujimbu wamuMbimbiliya waNowa. Yehova alwezele Nowa ngwenyi mwanongesa vatu vakuhuka nalivaji. Kutachikiza kaha ngwavo kwapwile  nakwiza livaji, kachi kachayowele Nowa natanga yenyiko. Tachikizenu ngwenu Petulu apwile nakuhanjika havyuma vyasolokele shimbu kanda Livaji, “shimbu wato vapwile nakuutunga.” (Petu. 1, 3:20) Chikupu vene, Nowa natanga yenyi vasolwele nge vakavangijile vyuma avanangwile Kalunga hakusonga wato waunene. (Hepe. 11:7) Petulu esekesele vyuma alingile Nowa kulumbapachiso hakusoneka ngwenyi: “Lumbapachiso luze lwalitombola nachuma echi luli nakumilwila nayenu nawa oholili.” (Petu. 1, 3:21) Echi chili nakulumbununa nge, tunahase kwesekesa mulimo muli nakuzata oholyapwa mangana mulizange vyalumbapachiso, kumulimo wakusonga wato uze Nowa natanga yenyi vazachile hamyaka yayivulu. Uno mulimo muka mwatela kuzata mangana mupwenga vakulizanga kumimbapachisa?

15. Natusolola ngachilihi ngwetu tunapihilila nakwalumuka namuchima wetu wosena?

¹⁵ Chuma chimwe chatete twatela kulinga shina kupihilila nakwalumuka namuchima wetu wosena. (Vili. 2:37, 38) Nge natupihilila nakwalumuka namuchima wetu wosena, kaha natwalumuna chikupu chiyoyelo chetu. Kutala munaseze vilinga vyavipi vize vyeji kwivwisanga Yehova kupihya vyakufwana nge ujila, nakunwa makanya, nahanjikiso yayipi tahi? (Koli. 1, 6:9, 10; Koli. 2, 7:1; Efwe. 4:29) Nge kanda mumbile jitato kana, kaha twalenuho lika kuzata nangolo mangana mujimbile. Lwezenu mutu ali nakuminangula Mbimbiliya chipwe vakulwane muchikungulwilo mangana vamikafwe. Nge muchili muvanyike kaha nawa muli nakutwama navisemi jenu, kaha valwezenu vamikafwe mumbile jitato jize jinahase kumihonesa kumimbapachisa.

16. Vyuma muka twatela kulinga numba tusolole ngwetu tuli nakutwalaho lika kuzata milimo yakushipilitu?

¹⁶ Chapwa nawa chachilemu kutwalaho lika kuzata milimo yakushipilitu. Milimo yimwe shina kupwanga kukukunguluka chavaka-Kulishitu nakuhanjikangaho. (Hepe. 10:24, 25) Kaha nawa nge munatemo kuya nakwambulula mujimbu wamwaza, kaha mulingenga ngocho shimbu yosena. Nge namuzata chikuma mulimo wakwambulula, kaha namulivwisawo kuwaha. (Chimo. 2, 4:5) Nge muvanyike kaha nawa muli nakutwama navisemi jenu, kaha lihulisenu ngwenu: ‘Kutala ngweji kuyanga kukukunguluka namumulimo wamuwande kuvanga kaha nge vanangwanukisa kuli visemi jami tahi? Nyi ngweji kulyanukilanga ami ivene?’ Nge namulyanukilanga enu vavene kulinga vyuma kana, kaha namusolola lufwelelo lwenu nazangi yenu yakuzanga Yehova Kalunga nakumusakwilila. Evi vyapwa ‘hivilinga vyakuzachila  Kalunga’ vize vyapwa wana uze tweji kuhananga Yehova. (Petu. 2, 3:11; Hepe. 13:15) Mawana osena aze tweji kuhananga namuchima wakusuuluka eji kwivwisanga Kalunga ketu kuwaha. (Esekesenuko Wavaka-Kolinde 2, 9:7.) Tweji kulinganga vyuma kana mwomwo tweji kwivwanga kuwaha nge natuzachila Yehova noho hakumina ngolo jetu.

17-18. Chuma muka chachilemu nachimikafwa muzovoloke nakumimbapachisa, kaha mwomwo ika? (Vishimo 3:3-6)

¹⁷ Namumonanga ukalu omu muli nakuzovoloka vamimbapachise. Vatu vamwe vanahase kumitoleka mwomwo yakwalumuna kwitava chenu, kaha vanahase kumifumbukila chipwe kumiyanjisa. (Chimo. 2, 3:12) Pamo muli nakukilikita mangana mumbile jitato jajipi, oloze shimbu jimwe munahase kujihilukila cheka. Chipwe pamo munahase kwivwa kupihya mwomwo yakuhona kutesamo vyuma munalitomena kulinga. Uno vyuma muka navimikafwa mupwenga vakumika? Chuma chachilemu nachimikafwa shina kuzanga Yehova.

¹⁸ Zangi yenu yakuzanga Yehova yapwa chuma chachilemu chikuma chize mwatwama nacho. (Tangenu Vishimo 3:3-6.) Kuzanga chikuma Kalunga nachimikafwa mufungulule kala ukalu namumona mukuyoya chenu. Kakavulu Mbimbiliya yavuluka zangi yakwilila yize Yehova eji kusolwelanga vangamba jenyi. Eyi zangi yasolola nge keshi kukaseza vangamba jenyi chipwe kulitwamina kuvazangako. (Samu 100:5) Enu vamitenga muchifwanyisa chaKalunga. (Kupu. 1:26) Uno munahase kusolola ngachilihi eyi zangi?

19. Namusolola ngachilihi muchima wakusakwilila chikuma Yehova havyuma vyosena namilingila? (Wavaka-Ngalesha 2:20)

¹⁹ Chatete, pwenunga namuchima wakusakwilila. (Teso. 1, 5:18) Hakumbi hakumbi lihulisenunga ngwenu, ‘Uno Yehova nangusolwela ngachilihi zangi?’ Kufumaho, sakwililenunga Yehova mukulomba chenu nakuvuluka vyuma vize namilingila. Tachikizenu ngwenu Yehova eji kumilingilanga vyuma mwomwo amizanga mutu himutu. Omu mukiko nakaposetolo Paulu atachikijile. (Tangenu Wavaka-Ngalesha 2:20.) Lihulisenu ngwenu, ‘Kutala nayami nguli nakufwila kusolwela Yehova zangi tahi?’ Kuzanga Yehova nachimikafwa mutwaleho lika kuhonesa vyeseko nakupwa vakumika chamokomoko naukalu. Nachimikafwa nawa mutwaleho lika kuzata milimo yakushipilitu nakuzanga Senu hakumbi hakumbi.

20. Chuma muka mwatela kulinga hakulihana kuli Yehova, kaha mwomwo ika kulihana kana chapwila chachilemu?

²⁰ Mukuhita chalwola, zangi yenu yakuzanga  Yehova nayimikunyula mulihane kuli ikiye mukulomba chakulipwila. Anukenu ngwenu, nge munalihane kuli Yehova, kaha namutalilila chuma chamwaza chikuma. Chuma kana shina kupwa muvatu jenyi haya myaka. Nge munalihane kuli Yehova, mweji kumushikanga ngwenu namumuzachilanga mulwola lwamwaza namulwola lwalukalu. Lushiko kana kavalushika kavaliko. Chikupu vene, kulihana kuli Yehova chapwa hichuma chachilemu chize tunasakula kulinga. Shinganyekenu hachuma chino: Anukenu ngwenu namusakulanga kulinga vyuma vyavivulu mukuyoya chenu, kaha vimwe vinahase kupwa vyamwaza. Oloze kusakula kulihana kuli Yehova hichuma chachilemu chikuma havyuma vyosena. (Samu 50:14) Satana mwafwilanga kumilingisa muhone kuzanga Senu hakushinganyeka ngwenyi pamo namulitwamina kulama kulonga chenu. Kanda namumwechelela amifungululeko. (Yopa 27:5) Kuzanga chikuma Yehova nachimikafwa mutesemo lushiko lwenu lwakumuzachila haya myaka nakupandama chikuma kuli ou Senu wamwilu.

21. Mwomwo ika tunahase kuhanjikila ngwetu lumbapachiso lwapwa himaputukilo keshi himakumishiloko?

²¹ Nge munalihane lyehi kuli Yehova, kaha yenu kuli vakulwane muchikungulwilo chenu muvalweze chuma chikwavo chachilemu chize muli nakusaka kulinga. Lwola lwosena anukenunga ngwenu, lumbapachiso lwapwa himaputukilo, keshi makumishiloko. Apwa himaputukilo akuzachila Yehova mukuyoya chenu chosena. Shikaho, zangenu chikuma Senu oholyapwa. Litomenenu vyakulinga mangana zangi yenu yitohwelengako lika hakumbi hakumbi. Kulinga vyuma kana nachimikafwa vamimbapachise. Kaha likumbi lyakumimbapachisa lyapwa hilikumbi lyamwaza. Oloze anukenu ngwenu echi chinapu kaha himaputukilo. Shikaho, zangi yenu yakuzanga Yehova naMwanenyi yatela kutwalaho lika kutohwa haya myaka.