1-2. Vyuma muka vyavula kusoloka nge vatu vali nakuvambapachisa, kaha vyuma muka natushimutwila muchihande chino?

 KUTALA mwamonaho lyehi lizavu lyavatu vaze vali nakuya kulumbapachiso tahi? Nge mukiko, kaha mweji kwivwanga kukunyuka chavo omu veji kukumbululanga vihula vivali vize veji kuvahulisanga halikumbi lyakuvambapachisa. Mweji kumonanga nawa omu vatanga namasepa javo veji kuwahililanga. Omu mutu uze vanambapachisa eji kufumanga mumeya, mweji kwivwanga jikushi veji kusakwililanga vaze vanakutala lumbapachiso nakumona nawa omwo veji kuwahililanga. Kaha chalumingo hichalumingo, vatu vavavulu veji kuvambapachisanga nakupwa Vinjiho jaYehova Kalunga.

² Nyi ngachilihi enu? Kachi nge muli nakufwila kumimbapachisa, kaha ijivenu ngwenu namupwa vakulipwila mukaye kano kakuhuka, mwomwo muli “nakutondatonda Yehova.” (Samu 14:1, 2) Shikaho, chihande chino vanachisonekela enu, numba mupwa muvanyike chipwe muvakulwane. Chipwe ngocho, nayetu vene vambapachishile lyehi twafwila kutwalaho lika kuzachila Yehova haya myaka. Shikaho tushimutwilenuko vyuma vitatu havyuma vyatela kutulingisa tuzachile Yehova.

3. Mwomwo ika vangamba jaYehova vazangila muchano nakwoloka? (Samu 119:128, 163)

³ Yehova alwezele vatu jenyi ‘vazangenga muchano.’ (Zeka. 8:19) Yesu nawa akolezezele vaka-kumukavangiza vazangenga vyuma vyakwoloka. (Mateu 5:6) Echi chalumbununa nge mutu atela kufwila chikuma kulinganga vyuma vyakwoloka, vyamwaza, kaha nawa vitoma kumeso aKalunga. Kutala mwazanga kwoloka namuchano tahi? Tunafwelela ngwetu mwavizanga. Enu mwahunga makuli navyuma vyosena vize vyapwa vyavipi kaha nawa vyakuhenga. (Tangenu Samu 119:128, 163.) Makuli asolola omwo apwa Satana uze apwa muka-kuyula kano kaye. (Yowa. 8:44; 12:31) Chuma chimwe afwila Satana shina kusaula lijina lyaYehova Kalunga lyajila. Satana  natanjisanga makuli hali Kalunga ketu kufuma vene halwola alikangile muEtene. Nasololanga Yehova kupwa himutu uze alizanga ivene, kaha nawa ngwenyi apwa Muka-Kuyula wamupi uze aswekelele vatu vyuma vyamwaza. (Kupu. 3:1, 4, 5) Makuli aze Satana navangijikilanga Yehova analingisa vatu vamone Yehova kupwa himutu wamupi chikuma. Kachi nge vatu navakana ‘kuzanga muchano,’ kaha Satana nahase kuvalingisa valinge vyuma vyavipi vyosena.—Loma 1:25-31.

4. Uno Yehova alisolola ngachilihi kupwa “Kalunga wamuchano”? (Talenu nawa muvwimbimbi.)

⁴ Yehova apwa “Kalunga wamuchano,” shikaho eji kunangulanga muchano vatu vosena vaze vamuzanga. (Samu 31:5) Ngocho eji kuvasokolanga kumakuli aSatana. Yehova eji kunangulanga nawa vatu jenyi vapwenga vakashishi kaha nawa vakwoloka. Kahechi cheji kuvakafwanga vamone ngwavo vavavumbika nakupwa vakuunda. (Vishi. 13:5, 6) Kutala omu mukiko Yehova nalinginga nakuli enu omu munalinangulanga Mbimbiliya tahi? Munalinangula nge jijila jaYehova jeji kunganyalisanga vatu vosena kuhakilako vene nayenu. (Samu 77:13) Ngocho muli nakufwila kulinga vyuma vize Kalunga amona ngwenyi vyakwoloka. (Mateu 6:33) Mwafwila nawa kuhakwila muchano nakusolola nawa ngwenu vyuma ahanjikile Satana hali Yehova Kalunga vyamakuli. Uno munahase kulinga ngachilihi ngocho?

5. Uno vyuma muka mwatela kulinga mangana musolole ngwenu muli nakuhakwila muchano nakwoloka?

⁵ Munahase kusakula kuyoya mujila yize nayisolola nge muli nakwamba ngwenu: “Ngwahunga makuli aSatana oloze ngweji kuhakwilanga muchano. Ngwafwila kunguyula kuli Yehova nakulinga nawa vyuma vyosena vize amona kupwa vyakwoloka.” Uno namusolola ngachilihi ngwenu muli nakuyoya mujila kana? Munahase kulinga ngocho hakulomba kuli Yehova nakulihana kuli ikiye, nakusolola jino hatoma kulihana chenu hakumimbapachisa. Kuzanga muchano navyuma vyakwoloka chikiko chatela kutukunyula vatumbapachise.

6. Kweseka naSamu 45:4, vyuma muka vyatela kumilingisa muzange Yesu Kulishitu?

⁶ Mwomwo ika mwazangila Yesu Kulishitu? Talenu vyuma vimwe vyatulingisa tumuzange, vize vasoneka hali Samu 45:4. (Tangenu.) Yesu azanga muchano, nakulinyisa nakwoloka. Kachi nge nayenu mwazanga muchano nakwoloka, kaha namusolola hatoma ngwenu mwazanga Yesu Kulishitu. Achishinganyekenu omwo Yesu omikile hakuhakwila muchano nakwoloka. (Yowa. 18:37) Uno Yesu eji kutunangulanga ngachilihi tupwenga vakulinyisa?

7. Chuma muka chinamivwisa kuwaha hakumona kulinyisa chaYesu?

 ⁷ Yesu eji kutunangulanga tupwenga vakulinyisa hakuzachisa chakutalilaho chenyi. Chakutalilaho, nge nalingi vyuma vimwe, eji kulingisanga vatu vavumbike Ise keshi vavumbike ikiyeko. (Mako 10:17, 18; Yowa. 5:19) Uno munevu ngachilihi hakumona kulinyisa chaYesu? Kutala chinamikunyula muzange ou Mwana Kalunga nakufwila kumulondezeza tahi? Tunafwelela ngwetu munakunyuka. Jino mwomwo ika Yesu apwila wakulinyisa? Mwomwo azanga Ise uze apwa wakulinyisa nakumulondezeza. (Samu 18:35; Hepe. 1:3) Kutala kamweshi nakufwila kupandama kuli Yesu uze eji kulondezezanga kanawa vilinga vyaYehovako tahi?

8. Mwomwo ika twazangila Yesu kupwa Mwangana wetu?

⁸ Twazanga Yesu kupwa Mwangana wetu mwomwo apwa Muka-kuyula wamwenemwene. Yehova ivene ikiye anangwile Mwanenyi nakumutongola kupwa muka-kuyula. (Isa. 50:4, 5) Achishinganyekenu nawa hazangi yamwenemwene yize nasolola Yesu. (Yowa. 13:1) Hakuwana nge Yesu apwa Mwangana wenu, shikaho mwatela kumuzanga. Yesu alumbunwine ngwenyi, vosena vaze vamuzanga, vaze eji kuvulukanga kupwa masepa jenyi veji kusololanga ngwavo vamuzanga hakukavangiza jishimbi jenyi. (Yowa. 14:15; 15:14, 15) Chapwa hikutokwa chachinene kutunga usepa naMwana Yehova.

9. Uno lumbapachiso lwavaka-Kulishitu lwalifwanyina halihi nalwaKulishitu?

⁹ Lushimbi lumwe luze Yesu ahana vaka-kumukavangiza shina lwakuvambapachisa. (Mateu 28:19, 20) Naikiye vamumbapachishile. Oloze lumbapachiso lwenyi lwalihandununako chindende naluze lwavaka-kumukavangiza. (Talenu lipwata lyakwamba ngwavo “ Uno Lumbapachiso lwaYesu NalwaVaka-Kumukavangiza Lwalihandunwina Halihi?”) Chipwe ngocho, lwalifwanako mujijila jimwe. Yesu hakumumbapachisa, asolwele nge alihanyine kuli Ise mangana alingenga mwaya muchima wenyi. (Hepe. 10:7) Chochimwe nawa, vaka-kukavangiza Kulishitu veji kuvambapachisanga mangana vasolole hatoma ngwavo vanalihane kuli Yehova Kalunga. Ngocho veji kufwilanga jino kulinga mwaya muchima waKalunga mukuyoya chavo, keshi mwaya muchima wavoko. Hakulinga ngocho, veji kusololanga hatoma ngwavo vali nakulondezeza Mwata wavo.

10. Mwomwo ika kuzanga Yesu chatela kumikunyula vamimbapachise?

¹⁰ Mwetavila Yesu kupwa Mwana Yehova umwe kaha wakulipwila nakumwitavila nawa kupwa Mwangana uze vatongola kuli Kalunga mangana atuyule. Mwatachikiza nawa ngwenu Yesu apwa wakulinyisa, kaha nawa eji kulondezezanga Ise mujila yakukupuka. Munalinangula nawa ngwenu Yesu alishile vaze vapwile nazala, nakuvendejeka vaze vahombele, nakuka nawa vaveji. (Mateu 14:14-21) Munamono nawa omwo ali nakutetekela chikungulwilo chenyi makumbi ano. (Mateu 23:10) Kaha nawa mwatachikiza ngwenu mwakalinga vyuma vyavinene chikuma kulutwe hakuwana nge apwa Mwangana waWangana waKalunga. Uno munahase kusolola ngachilihi ngwenu mwamuzanga? Munahase kulinga ngocho hakumulondezeza. (Yowa. 14:21) Shikaho mwatela kulihana kuli Yehova nakumimbapachisa mangana musolole ngwenu mwamuzanga.

11. Chuma muka chachilemu chatela kukunyula vatu vavambapachise?

¹¹ Chuma muka chachilemu chatela kukunyula vatu vavambapachise? Yesu asolwele lushimbi lwalulemu chikuma hajishimbi jaKalunga ngwenyi: “Zangenunga Yehova Kalunga kenu namichima yenu yosena, namyono yenu yosena, navishinganyeka vyenu vyosena, nangolo jenu josena.” (Mako 12:30) Uno nayenu mwazanga Kalunga mujila kaneyi tahi?

12. Mwomwo ika mwazangila Yehova? (Talenu nawa muvwimbimbi.)

¹² Kuli vyuma vyavivulu vyatela kutukunyula tuzange Yehova. Chakutalilaho, munatachikiza jino ngwenu kuli ikiye “kukiko kwafuma kuyoya,” kaha nawa ikiye Muka-kuhana “mawana amwaza osena  namawana akukupuka osena.” (Samu 36:9; Yako. 1:17) Shikaho, vyuma vyosena vyamwaza vize muli nakulivwisa kuwaha vyafuma kuli Kalunga wazangi uze apwa muka-kuhana.

13. Chuma muka chalingisa ndando yakusokola kupwa wana waulemu chikuma?

¹³ Ndando yakusokola hiwana wamwenemwene uze atuhana Yehova. Mwomwo ika tunahanjikila ngocho? Achitalenu hausoko watwama hali Yehova naMwanenyi. Yesu ambile ngwenyi: ‘Tata anguzanga,’ kaha nawa ngwenyi, “Ami ngwazanga Tata.” (Yowa. 10:17; 14:31) Usoko wavo wazamine chikuma hakupwa hamwe hamyaka yayivulu chikuma. (Vishi. 8:22, 23, 30) Jino achishinganyekenu kukola evwile Kalunga kumuchima hakwitavisa Mwanenyi vamuyanjise nakumujiha. Yehova azanga chikuma vatu kuhakilako vene nayenu, kahechi chikiko chamulingishile ahane Mwanenyi kupwa wana mangana enu navakwenu veka mupwenga nalutalililo lwakukayoya haya myaka. (Yowano 3:16; Ngale. 2:20) Echi chikiko chuma chachilemu chikuma chatela kutukunyula tuzange Kalunga.

14. Chuma muka chachilemu munahase kulitomena kulinga mukuyoya chenu?

¹⁴ Hakuwana nge munalinangula vyavivulu hali Yehova, munamuzange chikuma. Muli nakusaka kupandama chikuma kuli ikiye oholyapwa nahaya myaka. Kaha munahase kulinga vene ngocho. Yehova ali nakusaka mulingenga vyuma vize navimwivwisa kuwaha. (Vishi. 23:15, 16) Munahase kumwivwisa kuwaha muvilinga namuhanjikiso. Shikaho, jila namuyoyelamo nayisolola nge mwazanga Yehova nyi chiku. (Yowa. 1, 5:3) Echi  hichuma chachilemu chize munahase kulitomena kulinga mukuyoya chenu.

15. Vyuma muka mwatela kulinga mangana musolole ngwenu mwazanga Yehova?

¹⁵ Munahase kusolola ngachilihi ngwenu mwazanga Yehova? Chatete, mwatela kulihana kuli ou Kalunga umwe kaha wamuchano hakulomba kwaukawenu. (Samu 40:8) Kufumaho, sololenu jino hatoma kulihana chenu hakumimbapachisa. Ngana muze tunashimutwila lyehi muchihande chino, likumbi lyalumbapachiso lyapwa hilikumbi lyalilemu, kaha nawa lyakuwahilila chikuma. Hanyima yakumimbapachisa, mweji kuputukanga jino chiyoyelo chachihya mwomwo mweji kuhakanga Yehova kulutwe mukuyoya chenu. (Loma 14:8; Petu. 1, 4:1, 2) Chinahase kusoloka nge chachikalu kulitomena kulinga chuma kana, kahomu mukiko vene chapwa. Chipwe ngocho, kulinga chuma kana cheji kulingisanga mutu apwenga nachiyoyelo chamwaza. Mujila muka?

16. Kweseka namazu ahali Samu 41:12, uno Yehova mwakakisula ngachilihi vaze veji kumuzachilanga namichima yavo yosena?

¹⁶ Yehova ikiye apwa Muka-kuhana wamunene, mwomwo eji kumihananga vyuma vyavivulu kuhambakana vize munamuhane. (Mako 10:29, 30) Nahase kumikafwa mupwenga nachiyoyelo chamwaza, chakufukila, kaha nawa chakumisuulwisa namuno vene mukaye kakuhuka. Kaha chuma kana himaputukilo kaha. Ungeji wenu uze weji kuputukanga halikumbi lyakumimbapachisa, kawatela kukumako. Munahase kutwalaho lika kuzachila Senu wazangi haya myaka. Kaha nawa namutwalaho lika kulizanga naSenu, nakukayoya lika haya myaka ngana muze ayoya ikiye.—Tangenu Samu 41:12.

17. Chuma muka munahase kuhana Yehova chize kanda apwenga nacho?

¹⁷ Kachi nge namulihana kuli Yehova nakumimbapachisa, kaha ijivenu ngwenu munamuhane chuma chachilemu chikuma. Yehova amihana vyuma vyamwaza vyosena vyakumivwisa kuwaha. Shikaho, nayenu nawa munahase kumuhana ou Mwenya melu namavu chuma chize kanda apwenga nacho, chuma kana shina kumuzachila namuchima wenu wosena. (Yopa 1:8; 41:11; Vishi. 27:11) Eyi hijila yamwaza chikuma mwatela kuzachishilamo kuyoya chenu. Chakuzeneka kukakasana, kuzanga  Yehova chikiko chuma chachilemu chatela kumilingisa vamimbapachise.

18. Vihula muka munahase kulihulisa?

¹⁸ Namukumbulula ngachilihi chihula chakwamba ngwavo, Kutala muli nakusaka vamimbapachise tahi? Enu yenu kaha munahase kukumbulula chihula kana. Chuma chinahase kumikafwa shina kulihulisa ngwenu, ‘Mwomwo ika nguli nakulangishila kungumbapachisa?’ (Vili. 8:36) Anukenu vyuma vitatu vize tunashimutwila. Chuma chatete shina, kuzanga muchano nakwoloka. Lihulisenu ngwenu, ‘Kutala nguli nakutalilila kulikumbi lize vatu vosena navakahanjikanga muchano nakulinga vyuma vyakwoloka tahi?’ Chamuchivali, mwazanga Yesu Kulishitu. Lihulisenu ngwenu, ‘Kutala ngwasaka MwanaKalunga apwenga Mwangana wami nakufwila nawa kumulondezeza tahi?’ Chamuchitatu kaha nawa chachilemu chikuma shina, mwazanga Yehova. Lihulisenu ngwenu, ‘Kutala ngwasaka kwivwisa Yehova kuwaha hakumuzachila hakupwa Kalunga kami tahi?’ Nge namukumbulula vihula kana ngwenu eyo, kaha chuma muka chinamimika kumimbapachisa? Mwomwo ika muli nakulangishila?—Vili. 16:33.

19. Mwomwo ika kamwatela kulangisa kumimbapachisako? Hanenu chakutalilaho. (Yowano 4:34)

¹⁹ Kachi nge muli nakulangisa kumimbapachisa, kaha shinganyekenu hachakutalilaho azachishile Yesu. (Tangenu Yowano 4:34.) Anukenu ngwenu, Yesu afwanyishile kulinga mwaya muchima waIse kuvyakulya. Mwomwo ika? Mwomwo vyakulya vikiko vyasakiwa numba tuyoye. Shikaho Yesu atachikijile ngwenyi vyuma vyosena vize Yehova asaka tulinge vyapwa vyanganyo kuli etu. Ijivenu ngwenu, Yehova kasaka tulinge kala chuma chize chinahase kutunehela ukaluko. Kutala Yehova ali nakusaka enu vamimbapachise tahi? Eyo. (Vili. 2:38) Shikaho tachikizenu ngwenu, nge namukavangiza lushimbi lwakumilweza vamimbapachise, kaha nachiminganyalisa. Kachi nge kamwalangisa kulya vyakulya vyamwaza vize munamonoko, kaha mwomwo ika namulangishila kumimbapachisa?

20. Chuma muka natukashimutwila muchihande chinakavangizaho?

²⁰ Mwomwo ika vatu vamwe veji kulangishilanga kuvambapachisa? Vavavulu veji kwambanga ngwavo, “Kanda ngulizange.” Oloze ijivenu ngwenu, kusakula kulihana kuli Yehova nakumimbapachisa chapwa hichuma chachilemu chikuma chize mwatela kulinga. Shikaho chasakiwa lwola, nakushinganyekaho kanawa, nakukilikita, numba mutu alizange kumumbapachisa. Jino nge muli nakufwila kumimbapachisa, kaha vyuma muka mwatela kulinga mangana mulizange? Chihula kana natukachishimutwila muchihande chinakavangizaho.