Mwomwo ika lunga uze kavavuluka lijinako ahanjikilile ngwenyi nahase ‘kwenyeka’ uswana wenyi nge mwambata Lute? (Lute 4:1, 6)

Kushikulu nge lunga wakumbata mwafwa chakuzeneka vana, kaha chakatwilenga vihula vino: Vyuma muka navisoloka kumusuka wenyi wamavu? Uno lijina lyenyi nalifwa kunahu tahi? Jishimbi vahanyine Mose jakumbulwile vihula kana.

Chuma muka chasolokelenga kumusuka wamavu walunga uze nafu chipwe lunga wakuhutwa uze nalanjisa mavu enyi? Ndumbwauze lunga chipwe kausoko kenyi weka wahalinyinga atelelelenga kulanda chipwe kusokola musuka kana. Echi chalingishilenga musuka kana utwaleho kupwa wamutanga.—Levi 25:23-28; Kula. 27:8-11.

Nyi lijina lyambozo lyayovokelenga ngachilihi? Ndumbwenyi chipwe kausoko kenyi atelelelenga kuswana uze tuliwe, kahomu mukiko chapwile nakuli Lute. Tuliwe vamumbachilenga kuli kausoko kalunga lyenyi mangana vaseme mwana uze mwalama lijina naluheto lwambozo ise. Jila kaneyi yazangi yakafwilenga natuliwe.—Lushi. 25:5-7; Mateu 22:23-28.

Tuchitalenu chakutalilaho chaNowemi. Asombokele kuli Elimeleke. Omu lunga lyenyi navana vavo vavali vafwile, Nowemi kapwile namutu wakumuzakamako. (Lute 1:1-5) Kahomu akindulukile kuYuta, Nowemi alwezele nayewenu Lute ayenga nakulweza Mbowaze alande musuka wamavu wambozo Elimeleke. Mbowaze apwile kausoko kaElimeleke wahalinyinga. (Lute 2:1, 19, 20; 3:1-4) Oloze Mbowaze anukile ngwenyi, kwapwile kausoko kaElimeleke weka wahalinyinga. Lunga kana kavamuvuluka halijina muMbimbiliyako. Shikaho ou lunga apwile nalisesa lyakupwa watete kupwa muka-kusokola.—Lute 3:9, 12, 13.

Hakavanga ou lunga etavilile. (Lute 4:1-4) Numba tuhu chasakiwile kulisuula, oloze amwene ngwenyi nge mwambata Nowemi uze achinyikile, kaha keshi kusema mwana uze mwakaswana mavu aElimelekeko. Shikaho mavu kana kachi apwile ayou lunga, ngocho kachi anganyalilileho.

Oloze ou lunga alumwine vishinganyeka vyenyi omu vamulwezele ngwavo atelelele kumbata Lute. Ambile ngwenyi: “Kangweshi kuhasa kuulandako, kuchina nangwenyeka uswana wami.” (Lute 4:5, 6) Mwomwo ika alumwinyine vishinganyeka vyenyi?

Nge ou lunga chipwe mutu weka ambachile Lute nakusema mwana walunga, kachi mwana kana aswanyine mavu aElimeleke. Uno echi kachi ‘chenyekele’ ngachilihi “uswana” wayou lunga kavavuluka halijinako? Mbimbiliya kayahanjikahoko, oloze pamo akanyine mwomwo yavyuma vino.

• Chatete, kachi jimbongo azachishile hakulanda uze musuka wamavu waElimeleke kachi jatokele, mwomwo kachi kawapwile wayauze lungako, oloze wayauze mwana mwasemuka kuli Lute.

• Chamuchivali, kachi apwile namulimo wakulisa Nowemi naLute nakuvazakama.

• Chamuchitatu, nge asemene vana naLute, kachi vaze vana valipangililile luheto lwenyi navana veka apwile navo.

• Chamuchiwana, nge kapwile navana vekako, kachi vana asemene naLute vakiko vaswanyine musuka wenyi nauze waElimeleke. Kachi musuka wenyi wamavu vauswanyine kuli mwana uze kapwile nalijina lyenyiko, oloze lyaElimeleke. Ou lunga kasakile kutokesa uswana wenyi mwomwo yakukafwa Nowemiko. Etavishile Mbowaze azate tuhu mulimo wakusokola Nowemi. Mbowaze etavilile kulinga ngocho “mangana uswana wambozo upwenga lika mulijina lyenyi.”—Lute 4:10.

Uze lunga kavavuluka halijinako afwililile kaha kukinga lijina lyenyi nauswana wenyi. Apwile namuchima walizangamina nakufwila kulinganyalisa. Oloze lijina lize asakile kukinga lyajimbanganyine. Kaha nawa kapwile nakutokwa chize apwile nacho Mbowazeko, chakumulavila hamukana wavatu vamuchisaka asemukilile Meshiya, Yesu Kulishitu. Ocho kupaya kana kuli ou lunga hakukana kukafwa mutu uze apwile muukalu enu vayaya!—Mateu 1:5; Luka 3:23, 32.