CHIHANDE CHAKULINANGULA 14
‘Vosena Navakatachikiza Ngwavo muTumbaji Twami’
“Vatu vosena navakatachikiza ngwavo enu mwapwa mutumbaji twami.”—YOWA. 13:35.
MWASO 106 Pwenunga naZangi
VYUMA NATUSHIMUTWILA a
Uno zangi veji kulisolwelanga vatu jaYehova yinakafwenga ngachilihi vatu vaze kavapwa Vinjihoko? (Talenu palangalafu 1)
1. Chuma muka cheji kwivwisanga kuwaha vatu vakuwahilila vaze veji kwizanga kukukunguluka chetu? (Talenu nawa muvwimbimbi.)
ACHISHINGANYEKENU valunga napwevo vaneza halwola lwatete kukukunguluka haZuvo yaWangana yaVinjiho jaYehova. Vanawahilila chikuma hakuvasolwela chisambo nazangi vali nakulisolwela vatu vanawane muchikungulwilo. Kahomu navapwa nakukinduluka pwevo mwahanjika ngwenyi ‘Vinjiho jaYehova valihandununa navatu veka tunawanenga, kaha ngunalivwisa kuwaha kupwa navo.’
2. Mwomwo ika vatu vamwe vanahukanyinanga?
2 Zangi veji kulisolwelanga vatu jaYehova yapwa yakulipwila. Chipwe ngocho, Vinjiho jaYehova kavapwa vakukupukako. (Yowa. 1, 1:8) Shikaho nge natutachikiza kanawa vatu vamuchikungulwilo, kaha natutachikiza nawa tutenga twavo. (Loma 3:23) Chaluvinda, vatu vamwe vanechelelanga tutenga twavakwavo tuvahukanyise.
3. Uno vaka-kukavangiza Yesu vamuchano veji kuvatachikijilanga haka? (Yowano 13:34, 35)
3 Tutalenu cheka hachisoneka chamutwe wachino chihande. (Tangenu Yowano 13:34, 35.) Chuma muka veji kutachikijilangaho vaka-kukavangiza Kulishitu vamuchano. Chuma kana shina zangi, keshi kukupukako. Anukenu ngwenu Yesu kahanjikile ngwenyi: ‘Enu namukatachikiza ngwenu mwapwa mutumbaji twamiko.’ Oloze ahanjikile ngwenyi: “Vatu vosena navakatachikiza ngwavo enu mwapwa mutumbaji twami.” Echi chalumbununa nge Yesu apwile nakuhanjika ngwenyi navatu vaze kavapwa Vinjihoko vanahase kutachikiza vaka-kumukavangiza vamuchano mwomwo yazangi yamwenemwene yize veji kulisolwelanga, keshi vaka-kumukavangiza kaha vakiko vanahase kumutachikizako.
4. Vyuma muka vanahase kufwila kutachikiza vatu hali vaka-Kulishitu vamuchano?
4 Vatu vamwe vaze kavapwa Vinjiho jaYehovako vanahase kuhulisa ngwavo: ‘Uno zangi yeji kulingisanga ngachilihi vaka-kukavangiza Yesu vamuchano vavatachikize? Uno Yesu asolwelele ngachilihi vaposetolo jenyi zangi? Kutala vatu vanahase kulondezeza Yesu makumbi ano tahi?’ Vinjiho navalinganga kanawa nge navashinganyekanga hajila vakumbulwilamo vihula kana. Kulinga ngocho nachitukafwa tusololenga chikuma zangi, chikumanyi nge vandumbwetu vanatwivwisa kupihya.—Efwe. 5:2.
MWOMWO IKA ZANGI YAPWILA KATACHIKIJILO KAKULIPWILA KAVAKA-KUKAVANGIZA YESU VAMUCHANO?
5. Lumbununenu mazu aYesu aze atwama hali Yowano 15:12, 13.
5 Yesu ahanjikile ngwenyi, vaka-kumukavangiza navakalisolwelanga zangi mujila yakulipwila. (Tangenu Yowano 15:12, 13.) Anukenu ngwenu, Yesu ahanjikile ngwenyi: “[Lizangenunga] navakwenu nganomu ngunamizangenga enu.” Uno echi chalumbununa ika? Ngana muze Yesu atwalileho kulumbununa, echi chalumbununa muka-Kulishitu kuzanga chikuma vakwavo kuhambakana ivene nakuheta nahaseteko yakuvafwila, kachi nge chili nakusakiwa kulinga ngocho. b
6. Uno Mazu aKalunga asolola ngachilihi nge zangi yapwa yayilemu?
6 Mazu aKalunga atunangula ngwawo zangi yapwa yayilemu chikuma. Hajivesi jize vazanga chikuma vatu vavavulu hatwama najivesi jakwamba ngwavo: “Kalunga ikiye zangi.” (Yowa. 1, 4:8) “Zangenunga vakwenu nganomu mwalizanga enu vavene.” (Mateu 22:39) “Zangi yeji kufwikanga jishili jajivulu.” (Petu. 1, 4:8) “Zangi kayakumako.” (Koli. 1, 13:8) Jivesi kana najivesi jeka jatela kutukafwa tumone ngwetu chapwa chachilemu kusolola zangi.
7. Mwomwo ika Satana keshi kuhasa kulingisa vatu valinunge hamwe nakulisolwela zangi yamwenemweneko?
7 Vatu vavavulu veji kuhulisanga ngwavo: ‘Ngunahase kutachikiza ngachilihi kwitava chamuchano? Mauka akwitava osena eji kuhanjikanga ngwawo anangula muchano, oloze liuka hiliuka lyeji kunangulanga vyuma vyakulihandununa hali Kalunga.’ Satana nahungumwisa vatu hakutunga mauka akwitava chamakuli amavulu. Oloze keshi kukahasa kutunga liuka lyavaka-Kulishitu vamukaye kosena vaze navalisolwelanga zangiko. Yehova kaha ikiye nahase kulinga ngocho. Echi chinapu chakutamo mwomwo zangi yamwenemwene yafuma kuli Yehova, kachi nge mwahana vaka-kumulemesa shipilitu yenyi nakuvakisula. (Yowa. 1, 4:7) Echi chikiko chalingishile Yesu ahanjike ngwenyi vaka-kumukavangiza vamuchano navakavatachikijila hazangi yamwenemwene.
8-9. Uno zangi veji kulisolwelanga Vinjiho jaYehova yinakafwenga ngachilihi vatu vavavulu?
8 Ngana muze Yesu ahanjikilile chimweza, vatu vavavulu vanatachikijila vaka-kumukavangiza vamuchano hazangi yamwenemwene veji kulisolwelanga. Chakutalilaho, ndumbwetu Ian eji kwanukanga lwola lwatete apwile kukukunguluka changalila chize chapwilile muchivaza chakuhemena kwakamwihi nalimbo lyavo. Mwahichile tukweji vavandende kufuma haze ou ndumbwetu apwile kuchivaza kana nakutala vaka-kuhema. Ambile ngwenyi: “Oloze kukunguluka kana chapwile chakulipwila. Vinjiho jaYehova vapwile nakavumbi kuhakilako vene navana vavo, kaha nawa vavwalile kanawa.” Ambile cheka ngwenyi: “Chachinenenyi vatu kana vasuulukile navyuma vapwile navyo kaha nawa vapwile vakuunda, evi hivyuma vize ngwapwile nakusaka. Kangweshi nakwanuka chihande numba chimwe havihande vahanjikile halikumbi kanako, oloze vilinga vyavo vyamwaza vasolwele vyangukwachile kumuchima.” c Vilinga amwene ou lunga tweji kuvisololanga mwomwo yazangi yamwenemwene twatwama nayo. Tweji kusolwelanga vandumbwetu likoji nakuvavumbika mwomwo twavazanga.
9 Ndumbwetu John naikiye evwile mwomumwe omu apwile kukukunguluka chachikungulwilo halwola lwatete. Ambile ngwenyi: “Ngwevwile kuwaha hakumona chisambo chavo . . . Ngwavamwene kwijiva nge hivangelo. Kaha nawa zangi yavo yamuchano yangukunywile ngwitavile ngwami ngunawane kwitava chamuchano.” d Vyakuliwana navyo vyakufwana ngana navyeka vyeji kusololanga hatoma nge vatu jaYehova vapwa vaka-Kulishitu vamuchano.
10. Lwola muka tunahase chikumanyi kusolola zangi yamwenemwene? (Talenu nawa kwinyikila chamwishi.)
10 Ngana muze twavulukanga hakavanga, vandumbwetu kavakupukako. Shimbu jimwe vanahase kuhanjika chipwe kulinga vyuma vize navitwivwisa kupihya kumuchima. e (Yako. 3:2) Halwola lwakufwana ngana tunahase kusolola chikumanyi zangi yamwenemwene kweseka navyuma natulinga chipwe natuhanjika. Vyuma muka natulinangula kuli Yesu vize navitukafwa halwola kana?—Yowa. 13:15.
UNO YESU ASOLWELELE NGACHILIHI VAPOSETOLO JENYI ZANGI?
Yesu asolwelele vaposetolo jenyi zangi omu vasolwele muchima waupi (Talenu palangalafu 11-13)
11. Muchima muka waupi apwile nawo Yakova nandumbwenyi Yowano? (Talenu nawa muvwimbimbi.)
11 Yesu kasakile ngwenyi vaka-kumukavangiza vatela kupwa vakukupukako. Oloze avakafwile valumune vishinganyeka vyavo mangana Yehova avevwile kuwaha. Halwola lumwe, kaposetolo Yakova naYowano valwezele nevo avahanjikileko kuli Yesu akavahane vihela vyavinene muWangana. (Mateu 20:20, 21) Yakova naYowano vasolwele muchima wakulivwimba nakufwila ulemu.—Vishi. 16:18.
12. Uno Yakova naYowano vakiko kaha vasolwele muchima waupi tahi? Lumbununenu.
12 Yakova naYowano keshi vakiko kaha vasolwele muchima waupi halwola kanako. Ivwenu muchima vasolwele vakwavo vaposetolo. Mbimbiliya ngwayo: “Jino vaze vakwavo 10 hakwivwa ngocho, vapihililile navaze vasongo namutu.” (Mateu 20:24) Pamo Yakova naYowano navakwavo vaposetolo valyambile mazu amapi halwola kana. Pamo vakwavo vambile ngwavo: ‘Uno munalimono nge muvavalemu kuhambakana etu, nakumilingisa mulombe vihela vyavilemu muWangana tahi? Keshi yenu kaha munazate naYesu nangoloko. Nayetu tunatemo kuzata milimo yakulipwila.’ Ava vaposetolo vechelelele chuma kana chivahonese kulisolwela zangi hatando kana.
13. Uno Yesu alingile ngachilihi omu vaposetolo jenyi valimbenjele? (Mateu 20:25-28)
13 Uno Yesu alingile ngachilihi? Kapihililileko. Kambile ngwenyi mwaya nakutonda vaposetolo veka vamwaza michima, vakulinyisa vaze navasolwela vakwavo zangiko. Oloze ashimutwilile navo mujila yalikoji. (Tangenu Mateu 20:25-28.) Atwalileho lika kuvasolwela zangi, numba tuhu lwola kana kalwapwile lwatete chipwe lwamakumishilo kulikokojwesa hakusaka kutachikiza iya hali vakiko apwile wamulemuko.—Mako 9:34; Luka 22:24.
14. Uno vaposetolo jaYesu vakolelele mulwola lwakufwana ngachilihi?
14 Chakuzeneka kukakasana, Yesu ashinganyekele hachuma chalingishile vaposetolo vafwile ulemu. (Yowa. 2:24, 25) Vakolelele mungalila namulwola luze vatwamina vamukwitava vafwilililenga chikuma ulemu navihela. (Mateu 23:6; esekesenuko chihande chakwamba ngwavo Musunangonga—Muze Yesu naTumbaji Twenyi Vambulwililenga Mujimbu, muKaposhi Kakutalila waApril 1, 2010, li. 16-18.) Vatwamina vamukwitava vavaYuleya valimwenenga nawa kupwa vakwoloka kuhambakana vakwavo. f (Luka 18:9-12) Yesu atachikijile ngwenyi muchima kana ukiko walingishile vaposetolo vafwilenga ulemu. (Vishi. 19:11) Atachikijile vene ngwenyi vanahase kulimbenja, kaha avatalililenga chikoki omu valimbenjelenga. Atachikijile ngwenyi vapwile namichima yamwaza, ngocho avakafwilenga vapwenga nazangi nakumbila muchima wakulivwimba nakufwila ulemu.
NATULONDEZEZA NGACHILIHI YESU?
15. Vyuma muka natulinangula kumujimbu waYakova naYowano?
15 Tunahase kulinangula vyavivulu kumujimbu waYakova naYowano. Valuwishile vene hakulomba Yesu akavahane vihela vyavilemu muWangana. Oloze navaposetolo vakwavo nawa valimbenjele hakwechelela chuma kana chivalingise vahone kutwama mukuunda. Chipwe ngocho, Yesu asolwelenga zangi nalikoji kuli vaposetolo vosena 12. Chuma muka natulinangulako? Ijivenu ngwenu vyuma navilingisa tuhone kutwama mukuunda keshi vyuma navalinga vakwetu kahako, oloze navyuma natulinga nge vakwetu vanalimbenje. Uno vyuma muka vinahase kutukafwa? Kachi nge tunalimbalaka nandumbwetu, kaha twatela kulihulisa ngwetu: ‘Mwomwo ika vyuma nalingi vinangwivwishila kupihya? Uno echi chinasolola nge nguli namuchima waupi uze ngwatela kuzachilaho tahi? Uno ou ndumbwami nangulingi mwamupi aliko naukalu umwe ali nakulipika nawo tahi? Numba tuhu nachisoloka nge ngunoloka hakupihilila, oloze kutala ngunahase kusolola zangi yamwenemwene hakuliula katenga kana tahi?’ Shikaho, nge natusolwelanga vakwetu zangi, kaha natusolola hatoma ngwetu twapwa tuvaka-kukavangiza Yesu vamuchano.
16. Vyuma muka vikwavo tunahase kulinangula kuli Yesu?
16 Chakutalilaho chaYesu nawa chatunangula twivwishisenga kanawa vandumbwetu. (Vishi. 20:5) Twatachikiza ngwetu Yesu atachikiza vili mumichima yavatu, oloze etu katwatwama nauhashi kanako. Chipwe ngocho, tunahase kutalilila vandumbwetu chikoki kachi nge vanatwivwisa kupihya. (Efwe. 4:1, 2; Petu. 1, 3:8) Chinahase kupwa chachashi kulinga ngocho kachi nge natuvatachikiza kanawa. Achishinganyekenu hachakutalilaho chino.
17. Uno kalama umwe wakujinguluka anganyalile ngachilihi hakutachikiza kanawa ndumbwenyi?
17 Kalama wakujinguluka uze azachililenga kuEast Africa anukile ndumbwetu umwe uze amwenenga ngwenyi kapwilenga namuchima walikojiko. Uno ou kalama alingile ngachilihi? Ambile ngwenyi: “Ngwalikashile mumuchima ngwami kuvanga vene ngumwijive kanawa kuhambakana kulihenda kuli ikiye.” Kulinga ngocho chakafwile ou kalama wakujinguluka atachikize vyuma vimwe vize vyalingishile uze ndumbwetu apwenga namuchima kana. Ou kalama wakujinguluka ahanjikile nawa ngwenyi: “Hakwijiva jino ukalu alipikile nawo ou ndumbwetu, ngwevwile chikuma kuwaha hakumona omwo alumukile. Ngocho, twapwile vasepa namutu.” Chikupu vene, nge natutachikiza kanawa vandumbwetu, kaha nachitwashiwila kuvasolwela zangi.
18. Vihula muka tunahase kulihulisa nge ndumbwetu natwivwisa kupihya kumuchima? (Vishimo 26:20)
18 Shimbu jimwe tunahase kufwila kuliwana nandumbwetu uze natwivwisa kupihya. Oloze chatete, nachiwaha kulihulisa ngwetu: ‘Uno ngunatachikiza mashina namasongo achihande tahi?’ (Vishi. 18:13) ‘Uno alingilangamo kaha tahi?’ (Kwambu. 7:20) ‘Kutala nayami ngwalimbenjaho lyehi mujila kana tahi?’ (Kwambu. 7:21, 22) ‘Nge nanguya nakuliwana nenyi, kutala nangutohwesa kaha chihande tahi?’ (Tangenu Vishimo 26:20.) Nge natutwama hamavu nakushinganyeka havihula kana, kaha tunahase kumona ngwetu kuzanga ndumbwetu nachitulingisa tuliule kaha katenga kenyi.
19. Chuma muka muli nakufwila kulinga?
19 Vinjiho jaYehova veji kusololanga ngwavo vapwa tumbaji twaYesu vamuchano hakulisolwelanga zangi. Kaha etu mutu himutu tunahase kusolola ngwetu twapwa tuvaka-kukavangiza Yesu vamuchano hakulisolwelanga zangi yamwenemwene, chamokomoko natutenga twetu. Echi chinahase kukafwa vatu vatachikize kwitava chamuchano nakulikata nayetu mangana tulemesele hamwe Yehova Kalunga wazangi. Shikaho tufwilenu kusololanga zangi yize yapwa katachikijilo kavaka-Kulishitu vamuchano.
MWASO 17 “Ngunasake Vene”
a Vatu vavavulu veji kufwilanga kulinangula muchano mwomwo yakumona zangi yamwenemwene tweji kulisolwelanga. Chipwe ngocho, hakuwana nge katwakupukako, chinahase kutukaluhwila kulisolwela zangi. Tushimutwilenu ovyo zangi yapwila yayilemu nomwo tunahase kulondezeza Yesu nge vandumbwetu vanatwivwisa kupihya.
b Talenu mukanda wakwamba ngwavo “Twaya Ungukavangizenga,” kapetu. 17, pala. 10-11.
c Yenu ha jw.org/lue mangana muwane chihande chakwamba ngwavo: “Ngwatachikiza Jino Mwalumbunukila Kuyoya.”
d Yenu ha jw.org/lue muwane chihande chakwamba ngwavo: “Chiyoyelo Chami Chasolokele Nge Chamwaza.”
e Chino chihande kacheshi nakuhanjika hamilonga yayinene yize vatela kutala vakulwane, yakufwana nge yize vasoneka hali Wavaka-Kolinde 1, 6:9, 10 koko.
f Vatu vamwe vamba ngwavo omu mwahichile myaka, kaLapi umwe ambile ngwenyi: “Muno mukaye mwatwama vatu kafwe 30 vakwoloka ngana mwaApalahama. Nge vatu kana vapwa 30, kaha ami namwanami hatuli. Nge vatanu, kaha ami namwanami hatuli. Nge vavali, kahanyi ami namwanami. Nge umwe, kaha yami vene.”
