1. Uno visemi vafwila kulinga ika kuli vana vavo?

 ENU visemi, twatachikiza ngwetu mwasaka kukafwa vana venu vatachikize Yehova nakumuzanga. Oloze Kalunga katwamumonako. Namukafwa ngachilihi vana venu vamutachikize kanawa nakupandama kuli ikiye?—Yako. 4:8.

2. Uno visemi vanahase kunangula ngachilihi vana vavo vatachikize vilinga vyaYehova?

² Jila yayilemu yakukafwilamo vana vapandame kuli Yehova shina kulinangulanga navo Mbimbiliya. (Chimo. 2, 3:14-17) Chipwe ngocho, Mbimbiliya yasolola nawa jila yikwavo yize vanyike vanahase kulinangwilamo hali Yehova. Mumukanda waVishimo chisemi eji kwanukisanga mwanenyi ahone kuvulyamanga vilinga vyaYehova vize vasolola muvyuma vyakutenga. (Vishi. 3:19-21) Natushimutwila hajijila jimwe jize visemi vanahase kuzachishilamo vyuma vyakutenga hakukafwa vana vavo vatachikize vilinga vyaYehova.

3. Uno visemi vanahase ngachilihi kukafwa vana vavo?

³ Mbimbiliya yahanjika ngwayo “vilinga [vyaKalunga] evi vahona kumona, . . . vyasoloka hatoma kufuma vene kukutenga chakaye nakuya kulutwe, mwomwo vavimwena kuvyuma atenga.” (Loma 1:20) Enu visemi pamo mweji kulivwisanga kuwaha kupwa hamwe navanyike haweluka. Zachisenunga lwola kana mangana mukafwe vana venu vamone omwo ‘vyuma atenga’ Kalunga vyalikwatasanyina hamwe navilinga vyenyi. Tutalenu jino vyuma navalinangula  visemi kujila azachishile Yesu hakunangula tumbaji twenyi.

4. Uno Yesu azachishile ngachilihi vyuma vyakutenga hakunangula tumbaji twenyi? (Luka 12:24, 27-30)

⁴ Talenu omwo Yesu azachishile vyuma vyakutenga mangana anangule vatu. Halwola lumwe, alwezele tumbaji twenyi vakekese makololo najitemo. (Tangenu Luka 12:24, 27-30.) Nge Yesu azangile, kachi ahanjikile hakala kanyama chipwe kala mutondo. Oloze azachishile kajila nalutemo mwomwo vikiko vatachikijile chikuma tumbaji twenyi. Pamo tumbaji vamwene makololo vali nakuhita, jitemo nawa jinasamwina mumande. Achishinganyekenu Yesu ali nakwinyika vyuma kana oku ali nakuhanjika. Uno vyuma muka alingile hanyima yakuvuluka vyakutalilaho kana? Anangwile tumbaji twenyi chishina chachinene chazumbu nalikoji atwama navyo Sevo wamwilu. Echi chalumbunwine nge Yehova mwahananga vambanga jenyi vakushishika vyakulya nakuvavwika, ngana muze eji kulinganga kuli makololo najitemo.

5. Vyuma muka vyakutenga vize vanahase kuzachisa visemi mangana vanangule mwanavo hali Yehova?

⁵ Enu visemi, namulondezeza ngachilihi Yesu omu namunangulanga vana venu? Lwezenu mwanenu kanyama, chipwe mutondo, chipwe chuma cheka chakutenga chize mwazanga. Omu namulinga ngocho, lumbununenu vyuma mwalinangula hali Yehova kuchuma kanechi. Munahase nawa kuhulisa mwanenu amilweze kanyama chipwe mutondo uze azanga chikuma. Mwanenu nahase kuhakako mangana nge namuzachisa chuma chakutenga chize azanga hakumunangula vilinga vyaYehova.

6. Vyuma muka natulinangula kuchakutalilaho chanaye yaChristopher?

⁶ Uno visemi vatela kupwa nalwola lwaluvulu lwakuhehwojola kanyama chipwe mutondo numba vashimutwile havyuma valinangula kuchuma kana hali Yehova tahi? Nduma. Yesu katotojwele vyavivulu hajila veji kulilangamo makololo chipwe jila jeji kukolelangamo jitemoko. Numba tuhu mwanenu asaka kumulumbunwina vyakujiminyina havyuma vyakutenga, oloze lwola lumwe kushimutwila mukavatu chipwe kumuhulisa kachihula kakashi nachimukafwa evwishise chishina muli nakumunangula. Ivwenu vyuma eji kwanukanga ndumbwetu Christopher vize vyasolokelenga omu apwile kanyike. Ambile ngwenyi: “Mama ahanjikilenga vyuma mujila yayashi mangana tuzange vyuma vyakutenga. Chakutalilaho, nge tuli kwakamwihi najipili, ambilenga ngwenyi: ‘Talenu jipili kana omwo jatohwa nomwo jawaha! Yehova apwa wakukomwesa nyi mweka?’ Kaha nge tuli kukalungalwiji, ambilenga ngwenyi: ‘Talenu aze makimba angolo! Kalunga apwa wangolo nyi mweka?’” Christopher ambile ngwenyi: “Awa mazu amashi ahanjikilenga mama atulingishilenga tushinganyeke chikuma.”

7. Namuhasa kunangula ngachilihi vana venu vashinganyekenga havyuma vyakutenga?

⁷ Omu vana venu navaputuka kukola, munahase kuvanangula vashinganyekenga havyuma vyakutenga mangana vamone vyuma navalinangulako hali Yehova. Munahase kuvulukako chuma chimwe atenga nakuhulisa vana venu ngwenu, “Uno chuma kana chinaminangula ika hali Yehova?” Munahase kulikomokela hakwivwa vyuma navahanjika vana venu.—Mateu 21:16.

8. Kutokwa muka vapwilenga nacho visemi vavaIsalele omu vatambukilenga “mujila”?

⁸ Visemi vavaIsalele vavakolezezele vanangulenga vana vavo jishimbi jaYehova omu navatambukanga “mujila.” (Lushi. 11:19) Jijila jamuIsalele jahichilenga mujingalila jakumembo. Ngocho vatu vamwenenga tunyama vakulisezaseza natujila najitemo hakuhita mujijila kana. Omu jitanga javaIsalele  jatambukilenga mujijila kana, visemi vapwilenga nakutokwa chakushimutwila navana vavo havyuma atenga Yehova. Enu visemi, pamo nayenu mweji kupwanga nakutokwa chakunangula vana venu havyuma atenga Kalunga. Achitalenu omwo visemi vamwe vanalinganga ngocho.

9. Vyuma muka munahase kulinangula kuli Punitha naKatya?

⁹ Punitha, chisemi wapwevo wamunganda yayinene yamuIndia ambile ngwenyi: “Omu tweji kuyanga nakutala vausoko wetu kungalila yakumembo, lwola kana tweji kulumonanga kupwa hilwola lwakunangula vana vetu havyuma vyakukomwesa atenga Yehova. Ngweji kumonanga ngwami vana vami veji kwivwishisanga kanawa vyuma vyakutenga kachi nge kaveshi muvatu vavavuluko chipwe munganda yajiminyau jajivuluko.” Enu visemi, vana venu vanahase kukanukanga lika lwola luze mwapwilenga navo kuvihela vyamwaza. Ndumbwetu wapwevo Katya, wakuMoldova ambile ngwenyi: “Vyuma vyavivulu ngweji kwanukanga vyakuunyike wami shina vize twalivwishilenga kuwaha navisemi jami omu twapwilenga kungalila yakumembo. Ngwavasakwilila hakungunangula kufuma kuunyike wami mangana ngukekesenga vyuma atenga Yehova nakulinangulako havilinga vyenyi.”

10. Vyuma muka vanahase kulinga visemi kachi nge chili nakuvakaluhwila kuya kujingalila jakumembo? (Talenu lipwata lyakwamba ngwavo “ Vyuma Navikafwa Visemi.”)

¹⁰ Nyi ngachilihi nge kamweshi kuhasa kutambuka nakuya kungalila yakumemboko? Amol, uze atwama kuIndia ambile ngwenyi: “Okwo ngwatwama visemi veji kuzatanga jiola jajivulu kumilimo, kaha nawa kuya kungalila yakumembo cheji kusakiwanga jimbongo jajivulu. Chipwe ngocho, vatu vanahase kuya mumilemba yakushikamina chipwe kunyina hamulungu wazuvo mangana vatale vyuma atenga Yehova nakushimutwila havilinga vyenyi.” Kachi nge namushishikanga kanawa, namumona ngwenu nahembo lyenu vene hali vyuma atenga Kalunga vize munahase kulweza vana venu. (Samu 104:24) Pamo namumona tujila chipwe tututu  namitondo navyuma vyeka vyakulisezaseza. Karina wakuGermany, ambile ngwenyi: “Mama azangilenga chikuma jitemo. Shikaho omu ngwapwile ngukanyike atwinyikililenga jitemo nge tuli nakuya nakwolola mahinji.” Enu visemi, munahase nawa kuzachisa jivindiyo jetu jajivulu namikanda yakufuma kuliuka lyetu mangana munangule vana venu. Chikupu vene, kala mweshomwo vili vyuma munahase kukafwa vana venu vakekesenga vyuma atenga Kalunga. Tushimutwilenu jino havilinga vimwe vyaYehova vize munahase kunangula vana venu.

11. Uno visemi vanahase kukafwa ngachilihi vana vavo vamonenga zangi yaYehova?

¹¹ Hakusaka mukafwe vana venu vamone zangi yaYehova, munahase kuvalweza jila yize tunyama vavavulu veji kuzakaminangamo vana vavo. (Mateu 23:37) Munahase nawa kuvuluka vyuma vyamwaza vyakutenga vize tweji kulivwisanga kuwaha. Karina uze tunavuluka lyehi ambile ngwenyi: “Omu twayilenga nakwolola mahinji, mama angulwezelenga twimaneko chindende mangana ngutale omwo lutemo hilutemo lwapwa lwakulipwila, nomwo kuwaha chalwo chasolola zangi yaYehova. Munahichi myaka yayivulu, oloze ngweji kutalanga lika jitemo, hamiyachi yajo najila vajitengelamo naulombo wajo. Jeji kungukafwanga ngumone ngwami Yehova atuzanga chikuma.”

12. Uno visemi vanahase kukafwa ngachilihi vana vavo vatachikize mangana aKalunga? (Samu 139:14) (Talenu nawa muvwimbimbi.)

¹² Kafwenunga vana venu vamonenga mangana aKalunga. Yehova atwama namangana amanene chikuma. (Loma 11:33) Chakutalilaho, munahase kuvuluka omwo meya eji kukakumukanga nakutunga mavwi, nomwo mavwi kana eji kupekumukanga muutangatanga. (Yopa 38:36, 37) Munahase nawa kuvuluka jila yakukomwesa vatungilamo mujimba wamutu. (Tangenu Samu 139:14.) Ivwenu omwo chisemi walunga Vladimir alingile ngocho. Ambile ngwenyi: “Likumbi limwe mwanetu alimbukile nakinga nakulikolesa mulimbuli. Omu mwahichile makumbi amandende, yize mbandu yayoyele. Ami nanaye twamulumbunwinyine ngwetu Yehova atenga maselusi nauhashi wakulitungulula. Twamulumbunwinyine ngwetu oloze vyuma vatunga vatu kavyatwama nauhashi kanako. Chakutalilaho, minyau kayalitungulula yiveneko kachi nge yinalyenyeka muponde. Vyuma ahichilemo  mwanetu vyamukafwile atachikize mangana aYehova.”

13. Uno visemi vanahase kukafwa ngachilihi vana vavo vatachikize mangana Yehova? (Isaya 40:26)

¹³ Yehova atulweza twandulenga meso etu nakutala mwilu, nakushinganyeka omwo ngolo jenyi jakukomwesa jalingisa vatanganyika vosena vapwenga muvihela vyavo. (Tangenu Isaya 40:26.) Munahase kukafwa vana venu vatalenga mwilu nakushinganyeka havyuma navamona. Ivwenu vyuma ahanjikile Tingting wakuTaiwan vize alivwishile kuwaha kuunyike wenyi. Ambile ngwenyi: “Lwola lumwe omu mama angutwalile kuvihela vyakumembo, twatalilenga vatanganyika naufuku, mwomwo twapwile kwakusuku nambaka muze mwatwama manongo chikuma. Chuma kana chalingiwile omu ngwapwile nakulizakamina chikuma hamasepa nakushinganyeka ngwami pamo kangweshi kuhasa kuzachila Yehova nakashishiko. Oloze mama angukolezezele ngushinganyeke hangolo jize azachishile Yehova hakutenga vatanganyika vosena, nakwanuka nawa ngwami nahase kuzachisa ngolo kana hakungukafwa ngulipike navyeseko. Kukekesa vyuma vyakutenga halwola kana changukafwile ngutachikize kanawa Yehova, kaha ngwafwililile jino kumuzachila.”

14. Uno visemi vanahase kuzachisa ngachilihi vyakutenga mangana vakafwe vana vavo vamone ngwavo Yehova apwa Kalunga wakuwahilila?

¹⁴ Vyuma atenga Yehova vyasolola nge apwa Kalunga wakuwahilila. Vaka-sayasi vamba ngwavo tunyama vavavulu veji kuhemanga, kuhakilako vene natujila navaishi. (Yopa 40:20) Kutala mwamonaho lyehi vana venu vali nakuseha hakumona kanyama ali nakuhema tahi? Pamo vamwene mwana kangatwe ali nakuhangasana ngunja, chipwe kumona vana vavatuwa vali nakulipika. Lwola lukwavo vana venu navakaseha hakumona kanyama ali nakuhema, kavanukisenu ngwenu Kalunga uze tweji kuzachilanga apwa wakuwahilila.—Chimo. 1, 1:11.

15. Chuma muka nachikafwa visemi vakunyule vana vavo vahanjike vili kumichima yavo? (Vishimo 20:5) (Talenu nawa muvwimbimbi.)

¹⁵ Lwola lumwe visemi chinahase kuvakaluhwila kukunyula vana vavo vahanjike haukalu vali nakumona. Nge omu mukiko chili nakuli  yenu, kaha nachisakiwa kukilikita numba vana venu vamilweze vili kumichima yavo. (Tangenu Vishimo 20:5.) Visemi vamwe cheji kuvashiwilanga kulinga ngocho halwola vali nakulivwisa kuwaha kutala vyuma vyakutenga navana vavo. Mwomwo ika? Chuma chimwe shina, halwola kana kakwavula kupwa vyuma vyakutangula vana chipwe visemiko. Masahiko chisemi walunga wamuTaiwan avulukile nawa chuma chikwavo ngwenyi: “Omu tweji kupwanga hamwe navana vetu, chakutalilaho, hakuya nakukanduka jipili chipwe kutambuka kujingenge jatulwiji, veji kupwanga vakukasunuka. Echi cheji kutukafwanga tuvakunyule vahanjike vili mumichima yavo.” Katya uze tunavuluka lyehi ambile ngwenyi: “Nge ngunakotoka kushikola, mama angutwalilenga kumilemba yakushikamina. Halwola kana ngwakasunukilenga kumulweza vyuma vyasolokanga hashikola chipwe vize ngunalizakamina.”

16. Uno jitanga jinahase kuzachisa ngachilihi vyuma atenga Yehova mangana vanoke nakulivwisa kuwaha?

¹⁶ Vyuma atenga Yehova vinahase nawa kukafwa jitanga jipwenga nalwola lwakunoka nakulivwisa kuwaha, kahechi nachilingisa tanga yipwenga yakulinunga. Mbimbiliya ngwayo kwatwama “lwola lwakuseha” “[na]lwola lwakutumbwojoka.” (Kwambu. 3:1, 4, kwinyikila) Yehova atenga vihela vyamwaza hano hamavu mangana tulivwisenga kuwaha vyuma twazanga. Jitanga jajivulu jazanga kuya kuvihela vyakulamina tunyama, namumusenge nakujipili chipwe kuvisekeseke. Vana vamwe vazanga kulaha nakuhema mumilemba nakutala tunyama chipwe kuya nakuhemena kukalwiji, chipwe muchijiva chipwe mukalungalwiji. Chikupu vene kuli vyuma vyavivulu atenga Yehova vize tunahase kulivwisa kuwaha.

17. Mwomwo ika visemi vatela kukafwa vana vavo valivwisenga kuwaha vyuma atenga Kalunga?

¹⁷ Mukaye kakahya kaKalunga visemi navana vavo navakalivwisanga kuwaha chikuma vyuma atenga Yehova. Halwola kana katweshi kukevwanga woma tunyama chipwe vakiko kutwivwa woma, nganomu chili makumbi anoko. (Isa. 11:6-9) Natukapwa nalwola lwaluvulu chikuma lwakukalivwisa kuwaha vyuma atenga Yehova. (Samu 22:26) Oloze enu visemi, kanda kuvandamina lwola kana numba mukakafwe vana venu vakalivwise kuwaha vyuma vyakutengako. Omu namuzachisa vyuma vyakutenga hakunangula vana venu hali Yehova, navevwa ngana muze evwile Ndavichi uze ahanjikile ngwenyi: “Ove Yehova, kakweshi . . . milimo yalifwana namilimo yoveko.”—Samu 86:8.