1, 2. (a) Ukalu muka amwene Navote navana venyi? (b) Vyuma muka vivali natushimutwila muchihande chino?

ACHISHINGANYEKENU lunga vanamuvangijikila mulonga waunene nakusaka kumujiha. Malunga vavali vatuvihu navahana unjiho wamakuli uze naulingisa vausoko namasepa jenyi valikomokele chikuma. Vatu vaze vazanga chiyulo navevwa kupihya chikuma hakumona ou lunga navana venyi navavajiha chakuzeneka mulonga. Ou mujimbu kana kawapwa wakutaka kahako. Ou ukiko ukalu amwene ngamba yaYehova wakushishika Navote, uze ayoyelele muchiyulo chaAhave Mwangana wavaIsalele.—Vamya. 1, 21:11-13; Vamya. 2, 9:26.

² Muchihande chino, natushimutwila haukalu amwene Navote, namukulwane wamuchikungulwilo chavaka-Kulishitu chamulikulukaji lyamyaka lyakulivanga uze kamwene vyuma mujila yakwolokako. Omu natushimutwila vyakutalilaho kanevi vyamuMbimbiliya, natulinangula nge kulinyisa chapwa chachilemu chikuma hakusaka tumone vyuma nganomu avimona Yehova. Natulinangula nawa omu kupwa namuchima wakukonekela  vakwetu nge vanatwivwisa kupihya chinahase kutukafwa tumone vyuma nganomu avimona Yehova.

3, 4. Uno Navote apwile lunga wakufwana ngachilihi, kaha mwomwo ika akanyinyine kulanjisa wande wenyi wamivinyo kuli Mwangana Ahave?

³ Navote apwile mutu wakushishika kuli Yehova halwola luze vaIsalele vavavulu valondezezelenga vilinga vyavipi vyaMwangana Ahave napuwenyi Yezevele uze apwile Lisano wakuhuka. Vatu vaze valemeselenga Mbale kavavumbikilenga Yehova chipwe kumona jindongi jenyi kupwa jakwolokako. Kaha nawa Navote amwenenga usoko wenyi naYehova kupwa waulemu chikuma kuhambakana kuyoya chenyi.

⁴ Tangenu Vamyangana 1, 21:1-3. Omu Ahave asakile kulanda wande wamivinyo waNavote chipwe kumuhana wande weka, Navote akanyine. Mwomwo ika? Alumbunwine ngwenyi: “Kacheshi chakutamo kumeso aYehova ami kukuhana uswana wavakakuluka jamiko.” Navote akanyine kulinga chuma kana mwomwo akavangijile jishimbi jaYehova jize ahanyine kuli vaIsalele jize jakanyishile kulanjisa uswana uze mutu vamuselelele kuli vaka-kuluka jenyi. (Levi 25:23; Kula. 36:7) Chikupu vene, Navote amwenenga vyuma nganomu avimona Yehova.

5. Vyuma muka alingile Yezevele hakusaka kujiha Navote?

⁵ Chaluvinda omu Navote akanyine kulanjisa wande wenyi chalingishile Ahave naPuwenyi vapihilile chikuma nakusaka kumuzangamisa. Hakusaka Yezevele atambule wande waNavote auhane kuli lunga lyenyi, avangijikilile Navote chihande chize chalingishile vamujihe navana venyi. Vyuma muka alingile Yehova hachihande kanechi?

6, 7. Vyuma muka vyasolwele nge Yehova azanga chiyulo, kaha chuma kana chavendejekele ngachilihi vausoko namasepa jaNavote?

⁶ Yehova atumine Elija kuli Ahave mangana akamuhuhumune. Elija asopesele Ahave hakumulweza ngwenyi apwile mwiji kaha nawa muka-kujiha vatu. Vyuma muka alingile Yehova hachihande kanechi? Ahave napuwenyi, navana vavo vatelele kuhita muukalu ngana uze ahichilemo Navote navana venyi.—Vamya. 1, 21:17-25.

⁷ Numba tuhu Navote natanga yenyi namasepa jenyi valishonene havyuma alingile Ahave, oloze kutachikiza ngwavo Yehova amwene vyuma vyosena vize apihishile Ahave chavavendejekele chikuma. Oloze omu Yehova alumwine vyuma vimwe mujila yize kavashinganyekeleko, chavevwishile kupihya.

8. Vyuma muka alingile Ahave omu vamusopesele kuli Yehova, kaha vyuma muka vyafuminemo?

⁸ Omu Ahave atachikijile ngwenyi Yehova mwamuzangamisa havyuma alingile, “apulile uvwalo wenyi nakuvwala vikeleyi, kaha alitwaminyine kulya. Asavalilenga navikeleyi, kaha atambukilenga oku nahombo.” Chikupu vene, Ahave alinyishile. Kaha vyuma muka vyasolokele? Yehova atumine cheka Elija kuli Ahave nakumulweza mujimbu ukwavo. Halwola kanelu Elija ayile nakulweza Ahave ngwenyi, hakuwana nge nalinyisa kuli Kalunga, ngocho Yehova keshi kuzangamisa tanga yaAhave halwola luze apwile wamutonyiko. (Vamya. 1, 21:27-29) Hakuwana nge Yehova “eji kukekesanga michima yavatu,” ngocho evwililile Ahave keke.—Vishi. 17:3.

9. Uno kulinyisa chakingile ngachilihi tanga yaNavote namasepa jenyi?

⁹ Uno vatu vaze vatachikijile ukalu waAhave  vevwile ngachilihi? Chuma kanechi pamo chevwishile kupihya masepa, navaka-tanga yaNavote. Nge mukiko, kaha kulinyisa chavakingile nakuvakafwa vatwaleho lika kulemesa Yehova nakufwelela ngwavo Kalunga eji kuyulanga mwakwoloka. (Tangenu Lushimbi lwamuchivali 32:3, 4.) Navote, navana venyi, navausoko wenyi navakanganyala chikuma kuchiyulo chaYehova omu mwakasangula vaka-kwoloka. (Yopa 14:14, 15; Yowa. 5:28, 29) Kaha nawa vatu vakulinyisa vatachikiza ngwavo, “Kalunga wamuchano mwakatala havilinga vyosena, kuhakilako vene navyuma vyakusweka vyosena, mangana akamone numba nge vyamwaza nyi vyavipi.” (Kwambu. 12:14) Chikupu vene, omu Yehova eji kusopesanga eji kutalanga havyuma vize katwatachikizako. Ngocho kupwa vakulinyisa cheji kukinganga vatu kushipilitu.

10, 11. (a) Vyuma muka vinahase kutwivwisa kupihya kumuchima? (b) Uno kulinyisa chinahase kutukinga ngachilihi?

¹⁰ Vyuma muka namulinga kachi nge vakulwane muchikungulwilo navalinga vyuma munahono kwivwishisa chipwe vize kamwetavilileko? Chakutalilaho, namulinga ngachilihi nge yenu chipwe mutu uze mwazanga navamutambula mulimo umwe muchikungulwilo? Namulinga ngachilihi nge muka-mahyenu, chipwe mwanenu chipwe sepa lyenu uze mwazanga chikuma vanamufumisa muchikungulwilo, oloze enu kamwetavilile chuma  kanako? Namulinga ngachilihi nge munamono ngwenu mutu uze alinganga shili kavatelanga kumukonekelako? Vyuma kana vinahase kutulingisa tuhone kufwelela Yehova nakuhona kuvumbika vyuma valongesa muliuka lyenyi. Uno kupwa vakulinyisa nachimikafwa ngachilihi nge vyuma kana vinasoloka? Achitalenu hajijila jino jivali.

¹¹ Chakavanga, kulinyisa nachitukafwa twitavile ngwetu katweshi naunjiho wosenako. Numba tupwa naunjiho wakutamo hachihande kana, oloze twatela kwijiva ngwetu Yehova ikiye kaha atachikiza kanawa muchima wamutu. (Samwe. 1, 16:7) Kutachikiza chishina kana nachitukafwa tupwenga vakulinyisa nakwijiva hakumina ngolo jetu, nakumona nawa vyuma mujila yakwoloka. Chamuchivali, kulinyisa nachitukafwa tupwenga vakulyononona nakuvandamina Yehova akolole vyuma kana halwola asakula. Ngana muze ahanjikile lunga wamangana ngwenyi: ‘Vaze vevwa Kalunga wamuchano woma vyuma navivawahilanga, oloze muka-kuhuka vyuma kavyeshi kumuwahilako . . . , kaha nawa keshi kuvulisa makumbi akuyoya chenyiko.’ (Kwambu. 8:12, 13) Chikupu vene, kulinyisa cheji kunehanga nganyo yayinene.—Tangenu WaPetulu 1, 5:5.

12. Mujimbu muka natushimutwila, kaha mwomwo ika?

¹² Vaka-Kulishitu vamulikulukaji lyamyaka lyakulivanga vamuAndeyoka yakuSulya, vamwene ukalu uze wavalingishile vachiwane chachikalu kupwa namuchima wakulinyisa nakukonekela. Tuchishimutwilenu hamujimbu kana nakulikekesa tumone numba nge tukwechi muchima wakukonekela nakutukafwa nawa tumone vyuma nganomu avimona Yehova.

13, 14. Milimo muka yayilemu apwile nayo kaposetolo Petulu, kaha asolwele ngachilihi nge apwile wakumika?

¹³ Kaposetolo Petulu apwile mukulwane uze vatachikijile chikuma muchikungulwilo chavaka-Kulishitu. Apwile sepa lyaYesu kaha nawa vamuhanyine milimo yayilemu yayivulu. (Mateu 16:19) Chakutalilaho, mu 36 C.E., Petulu apwile namulimo wakwambulula mujimba wamwaza kuli Kolonelyu natanga yenyi. Chuma kanechi chapwile chakulipwila mwomwo Kolonelyu apwile Muka-lifuchi lyeka. Omu Kolonelyu natanga yenyi vatambwile shipilitu yajila, Petulu ambile ngwenyi: “Kutala mutu mwahasa kukanyisa ava vanatambula shipilitu yajila ngana mwayetu vazeneke kuvambapachisa mumeya nyi?”—Vili. 10:47.

¹⁴ Mumwaka wa 49 C.E., vaposetolo navakulwane valiwanyine muYelusalema mangana vawane nge chapwile chakutamo kujihana Vaka-mafuchi eka vaze valumukile nakupwa vaka-Kulishitu nyi chiku. Hakuliwana kana, Petulu ahanjikile nakumika hakwanukisa vandumbwenyi ngwenyi, mumyaka yinahichimo Vaka-mafuchi eka vaze kavapwile vakujihanako vatambwile shipilitu yajila. Unjiho kanou ahanyine Petulu, wakafwile lizavu lyakutwaminyina lyamulikulukaji lyamyaka lyakulivanga liwane mwakukulwila chihande kana. (Vili. 15:6-11, 13, 14, 28, 29) VaYuleya naVaka-mafuchi eka vawahililile chikuma hakumona omu Petulu ahanyine unjiho kana nakumika. Chapwile chachashi kufwelela lunga kanou wakuhya kushipilitu.—Hepe. 13:7.

15. Vyuma muka alimbenjele Petulu omu apwile muAndeyoka yakuSulya? (Talenu muvwimbimbi wakulivanga.)

¹⁵ Omu mwahichile tando yayindende kufuma hakuliwana chize chapwileko mu 49 C.E., Petulu ayile kunganda yamuAndeyoka yakuSulya. Omu ayile kuze atwaminenga kanawa navandumbwenyi vosena vaze vapwile Vaka-mafuchi eka. Chikupu vene, vanganyalile hakutwama nenyi. Oloze valikomokelele chikuma nakwivwa kupihya omu Petulu alitwaminyinyine kulya navo. Kaha chuma alingile chalingishile navaYuleya vamwe vakufwana nge Mbalanape  valondezeze vyuma vyavipi vize alingile ikiye. Chuma muka chalingishile ou kalama wakuhya kushipilitu alimbenje kulinga chuma chize pamo chambile kuhandununa chikungulwilo? Vyuma muka natulinangula kuchihande kanechi, vize navitukafwa kachi nge mukulwane muchikungulwilo nahanjika chipwe nalingi vyuma vize vinatwivwisa kupihya?

16. Petulu vamwolwele ngachilihi, kahechi chaneha vihula muka?

¹⁶ Tangenu Wavaka-Ngalesha 2:11-14. Petulu evwile woma vatu. (Vishi. 29:25) Numba tuhu hakavanga atachikijile vyuma ajinyine Yehova hachihande kana, oloze evwile woma vaYuleya vakujihana vaze vafumine kuchikungulwilo chamuYelusalema. Kaposetolo Paulu uze apwile kukuliwana chize chapwile muYelusalema mu 49 C.E., asopolwele makuli aPetulu muAndeyoka. (Vili. 15:12; Ngale. 2:13) Uno Vaka-mafuchi eka vaze vapwile vaka-Kulishitu vevwile ngachilihi havyuma alingile Petulu? Kutala chuma kana chavahukanyishile tahi? Uno Petulu vamutambwile milimo apwile nakuzata mwomwo yakulimbenja kanechi tahi?

17. Petulu anganyalile ngachilihi hakumukonekela kuli Yehova?

¹⁷ Chasoloka nge Petulu etavilile vyuma vamukafwile kuli Paulu. Visoneka kavyasolola nge vamutambwile milimoko. Kutwala muze, vamuhwiminyinyine asoneke mikanda yivali yize yatwama muMbimbiliya. Kaha nawa mumukanda wamuchivali uze asonekele, Petulu ahanjikile hali Paulu ngwenyi “ndumbwetu twazanga.” (Petu. 2, 3:15) Numba tuhu vyuma alimbenjele Petulu vyevwishile kupihya Vaka-mafuchi eka vaze vapwile vaka-Kulishitu, oloze Yesu uze apwa mutwe wachikungulwilo atwalileho lika kumuzachisa. (Efwe. 1:22) Chasoloka nge vyuma kana vyalingishile vatu vosena muchikungulwilo valondezeze muchima wakukonekela uze atwama nawo Yehova namwaneyi Yesu. Twatela kufwelela ngwetu pamo naumwe wauchi ahukanyine havyuma alingile Petulu.

18. Mujila muka tunahase kusolola nge twamona vyuma nganomu avimona Yehova?

¹⁸ Ngana muze chapwile mulikulukaji lyamyaka lyakulivanga, makumbi ano nawa muvikungulwilo vyavaka-Kulishitu mwatwama vakulwane vaze kavakupukako “mwomwo tuvosena tweji kulimbenjanga.” (Yako. 3:2, kwinyikila chamwishi) Tunahase kutachikiza chishina kanechi, oloze chapwa chachikalu kwanuka chishina kana nge ndumbwetu natuhukanyisa. Kachi nge ukalu kana unasoloka, kutala natumona vyuma nge muze avimona Yehova tahi? Chakutalilaho, namulinga ngachilihi nge mukulwane muchikungulwilo mwahanjika vyuma vize navisolola nge amona vatu ulumbi? Kutala namuhukana nge mukulwane mwahanjika mazu aze nawamivwisa kupihya tahi? Muchishishisa chakukulula kaha ngwetu ndumbwetu jino katelemo kupwa mukulwaneko, mwatela kuvandamina Yesu uze apwa mutwe wachikungulwilo akolole vyuma kana halwola lwakutamo. Uno namufwila kutala kaha havyuma vyamwaza vize nalinginga ou ndumbwetu hamyaka yayivulu tahi? Kutala namuwahilila kachi nge ndumbwetu uze namivwisa kupihya mwatwalaho lika kuzata mwakalama chipwe nge vanamuhakilako namilimo yeka nyi? Kupwa namuchima wakukonekela nachisolola nge mwamona vyuma nganomu avimona Yehova.—Tangenu Mateu 6:14, 15.

19. Vyuma muka twatela kufwila kulinga?

¹⁹ Vatu vaze vazanga chiyulo chakwoloka vatalilila kukamona omu Yehova mwakafumisako vyuma vyavipi vyosena vize aneha Satana. (Isa. 65:17) Ngocho tufwilenu lika kumona vyuma nganomu avimona Yehova hakupwa vakulinyisa nakutachikiza oho hakumina ngolo jetu nakukonekela vaze navatulinganga mwamupi.