1, 2. (a) Vyuma muka ahanjikile Elifwaze naMbilitate kutalisa kumilimo tweji kuzachilanga Kalunga? (b) Yehova ahanjikile vyuma muka hachihande kana?

“UNO Kalunga akwechi mulimo namutu numba? Kutala mutu wamangana nahase kunganyalisa Kalunga numba? Ou Wangolo Josena eji kwivwilanga kuwaha vilinga vyove vyakwoloka numba? Kutala eji kunganyalanga vimwe hakulonga chove numba?” (Yopa 22:1-3) Kutala mwashinganyekaho lyehi muvakumbulwila vihula kanevi tahi? Numba tuhu Elifwaze wakuTemane ahulishile Yopa vihula kanevi, oloze Elifwaze atachikijile ngwenyi kukumbulula nachipwa nduma. Kaha sepa lyenyi Mbilitate wakuShuwa ambile ngwenyi mutu keshi kuhasa kupwa wakwoloka kumeso aKalungako.—Tangenu Yopa 25:4.

² Ava vaka-kulyonga kuvendejeka vambile ngwavo kuzachila Yehova nakashishi chapwa chamavokovoko kaha nawa Yehova katumona kupwa tuvavalemu ngana mwakauyauya, nalivunu chipwe musangunyako. (Yopa 4:19; 25:6) Shimbu jimwe tunahase kushinganyeka ngwetu Elifwaze naMbilitate vapwile vakulinyisa. (Yopa 22:29) Chakutalilaho, nge tuli helu lyapili chipwe mundeke, kaha hinatutala hamavu, tweji kumonanga vatu hamavu kupwa vavapululu chikuma kaha nawa vamokomoko. Uno omu mukiko Yehova  eji kumonanga milimo tweji kumuzachilanga omu eji kutalanga hano hamavu nge ali halitanda lyenyi tahi? Yehova asolwele vilinga vyenyi omu ahuhumwine Elifwaze, naMbilitate, naZofwale havyuma vyamakuli vize vahanjikile, oloze evwililile kuwaha Yopa nakumuvuluka ngwenyi “ngamba yami.” (Yopa 42:7, 8) Chikupu vene, “Kalunga akwechi mulimo namutu.”

3. Vyuma muka ahanjikile Elihu kutalisa kumilimo tweji kuzachilanga Kalunga, kaha alumbunwine vyuma muka?

³ Yehova kolwele Elihu omu ahulishile ngwenyi: “Kachi nge umuka-kwoloka, kaha naumukafwa ikaze [Kalunga], vyuma mukaze mwawanyinaho hali ove?” (Yopa 35:7) Uno Elihu apwile nakulumbununa ngwenyi kukilikita chetu hakuzachila Kalunga chapwa chamokomoko tahi? Nduma. Apwile nakwamba ngwenyi Yehova kapendamina hakulemesa chetuko mwomwo Yehova akwechi vyosena. Ngocho katweshi kuhasa kumuhana ngolo chipwe kumuhetesa luhetoko. Kala kutokwa, chipwe uhashi, chipwe ngolo jize twatwama najo vyafuma kuli Kalunga, ngocho eji kumonanga omu tweji kuvizachishilangamo.

4. Yehova afwanyisa muchima wakuhana vakwetu kuvyuma muka?

⁴ Yehova amona zangi yakwilila yize tweji kusolwelanga ndumbwetu kwijiva nge tuli nakuyisolwela ikiye. Mukanda waVishimo 19:17 wamba ngwawo: “Ou mwevwila muka-kuhutwa uselewa ali nakulevanyisa Yehova, kaha Kalunga mwakamufweta hakulinga ngocho.” Uno echi chisoneka chinakulumbununa nge Yehova eji kumonanga kala chuma chamwaza chize veji kulingilanga vaka-kuhutwa tahi? Kutala tunahase kukukulula ngwetu Tengi wavyuma vyosena eji kusakwililanga vatu vaze veji kulingilanga vyuma vimwe vakwavo mwomwo yakeke, kaha amona vyuma kana kupwa himukuli uze atela kufweta tahi? Eyo, omu mukiko etavilile naMwana Kalunga.—Tangenu Luka 14:13, 14.

5. Vihula muka natushimutwila?

⁵ Yehova alwezele kapolofweto Isaya akafwe vatu vatachikize nge Yehova apwile nakusaka vatu vakushishika vazate mulimo wenyi wakulipwila. (Isa. 6:8-10) Isaya etavilile kuzata mulimo kana. Chochimwe namakumbi ano, vatu vavavulu vali nakwitavila kuzata milimo yaYehova ngana muze alingile Isaya uze ambile ngwenyi: “Yami uno. Ngutume.” Veka vanahase kuhulisa ngwavo: ‘Uno Yehova amona milimo ngweji kumuzachilanga kupwa yayilemu tahi? Hakuwana nge Yehova nangwitavisa kuzata milimo yenyi, kutala mwahona kungukafwa ngutesemo Mazu enyi chamokomoko nakala milimo nangusaka kumuzachila tahi?’ Hakusaka tukumbulule vihula kanevi tuchishimutwilenu havyuma vyasolokele mumakumbi aNdevola naMbalake.

6. Chihandwa muka chapwile hali vaIsalele namaswalale jaYavine?

⁶ VaIsalele ‘vavayanjishilenga’ kuli Mwangana Yavine hamyaka 20. Vatu vevwilenga woma kutambuka. VaIsalele kavapwile navitwa vyangolo vyakwashisa jitako, oloze vaka-kole javo vapwile namatemba ajita 900 aze apwile najipoko jamikwale kutufumbo twawo.—Kuyu. 4:1-3, 13; 5:6-8.

7, 8. (a) Jindongi muka Yehova alwezele Mbalake? (b) VaIsalele vafungulwile ngachilihi maswalale jaYavine? (Talenu muvwimbimbi wakulivanga.)

⁷ Yehova alwezele Mbalake vyuma vimwe kuhichila muli kapolofweto wapwevo Ndevola ngwenyi: “Yako kuPili yaTavole hamwe namalunga 10,000 vakuli vaNafwatale navaZevulune. Nangukakunehela Shisela kapitau kamaswalale jaYavine, namatemba enyi ajita,  namaswalale jenyi kumwanakalwiji Kishone, kaha nangukamuhana mumavoko ove.”—Kuyu. 4:4-7.

⁸ Mujimbu kana wahetele kuvatu vavavulu, kaha valikungulwilile kuPili yaTavole. Mbalake kakwachile kumashinde hakukavangiza vyuma amulwezele Yehovako. (Tangenu Vaka-kuyula 4:14-16.) Omu vapwile nakwasa jita kuTanake, vula yamishilinjinji yaputukile kunoka, kaha yalingishile chihela chosena chipwenga namalova. Ngocho Mbalake ahangasanyine maswalale jaShisela jikilomita 24 kuheta kuHaloshete. Omu Shisela atwalileho lika kuchina asezele litemba lyenyi lize vapwile nakwivwa vatu woma nakuchinyina kuZananyime. Achinyinyine mumbalaka yaYayele pwevo lyaHevele kaKene, kaha amutambwile nachisambo. Hakuwana nge azeyele chikuma ngocho asavalile. Shisela apwile jino muponde yakumujiha kuli Yayele pwevo wakuhamuka. (Kuyu. 4:17-21) Ou muka-kole wavaIsalele vamufungulwile. *

9. Vyuma muka vavuluka hali waVaka-kuyula 5:20, 21 kutalisa kujita yavaIsalele naShisela?

⁹ Mukanda waVaka-Kuyula kapetulu 4 na 5 twatela kulinangulawo hamwe mwomwo tupetulu kana vahanjika vyuma vyakulisezaseza hamujimbu kana. Chakutalilaho, mukanda waVaka-kuyula 5:20, 21 wamba ngwawo: “Vatanganyika vazungile mwilu, vazungile naShisela oku vali muuhichilo wavo mwilu. Mwanakalwiji Kishone ahungumwine vaka-kole.” Uno vangelo vakiko vavakafwile tahi nyi, kwapwile vyuma vimwe vyapwile nakuholojoka kufuma mwilu? Mbimbiliya kayalumbununa vyavivulu hachihande kanako. Kachi nge vula kana kayafumine kuli Kalungako, kaha yafumine kulihi numba yilingise matemba 900 ajita akakachile muulova? Mumukanda waVaka-Kuyula 4:14, 15 vavulukamo mapapa katatu ngwavo Yehova ikiye avakafwile vafungulule. Hali vaze vaIsalele 10,000 naumwe wauchi ahashile kulivwimba nakwamba ngwenyi ikiye alingishile vayovokeko.

10, 11. Uno Meloze yapwa yika, kaha mwomwo ika vayangwililile?

¹⁰ Omu vaIsalele vafungulwile jita, Ndevola naMbalake vembile mwaso wakwalisa Yehova ngwavo: “Kangelo kaYehova ambile ngwenyi, ‘Angulenu Meloze, angulenu vatu vaze vatwamamo, mwomwo kavejile nakukafwa Yehovako, kavakafwile Yehova navatu jenyi vangoloko.’”—Kuyu. 5:23.

¹¹ Nganda yaMeloze vayangwile mwamunene. Uno vatu vamunganda kana vahonene kulisuula vakundwize vatu jaKalunga tahi? Kachi nge nganda kana yapwilile kwakamwihi najila yize ahichile Shisela omu apwile nakuchina, uno vahonene kumukwata tahi? Uno kavevwile vyuma avalwezele Yehovako tahi? Vatu 10,000 vevwile mutambi kana nakwiza valwenga jita. Achishinganyekenu vatu vamunganda yaMeloze vali nakumona Shisela ali nakupulasana munganda yavo omu ali nakuchina. Elu lwapwile hilwola lwamwaza vatelele kulisuula nakukundwiza Yehova mangana avakisule. Numba tuhu vapwile nalwola kanelu lwakulisuula, uno valingileko chuma chimwe tahi nyi valitwaminyinyine kaha? Chasoloka nge vatu vamunganda yaMeloze valihandununa chikuma naYayele uze apwile wakuhamuka ngana mwavatu natuvuluka mujivesi jinakavangizaho.—Kuyu. 5:24-27.

12. Chihandwa muka chapwile hali vatu vavuluka mumukanda waVaka-Kuyula 5:9, 10, kaha vyuma muka natulinangulako makumbi ano?

¹² Hali Vaka-Kuyula 5:9, 10, tweji kuwanangaho chihandwa chapwile hali vaze vayile naMbalake navaze vakanyine kuya nenyi. Ndevola naMbalake valishile “tupitau vajita vavaIsalele,  vaze valisuwile kuya navatu kujita.” Tupitau kana valihandunwine ‘navaka-kutambukila havimbulu vasweuluka,’ vaze valimwene ngwavo vanahase kufungulula, navaze nawa ‘vatwaminenga hamahina amwaza akwala hamavu,’ kulumbununa kuyoya muuhando. Valihandunwine nawa navaze ‘vatambukilenga mujijila’ mwomwo vaze vayile naMbalake valisuwile kwashila jita kujipili namuchinema chaKishone. Vosena vaze vakanyine kuya nakwasa jita vatelelele ‘kushinganyeka havilinga vyaYehova.’ Vatelele nawa kushinganyeka havyuma vyavalingishile vahone kukundwiza Yehova. Chochimwe nawa nakuli vaze vali nakukana kulisuula nakuzachila Yehova namuchima wavo wosena makumbi ano.

13. Muchima vapwile nawo vatu vakumuyachi waLuvene, naNdane, naAshele walihandunwine ngachilihi nawavaZevulune naNafwatale?

¹³ Vatu vaze vayile nakwasa jita vamwene nameso avo kapu omu Yehova atohwesele wata wenyi. Vapwile navyuma vyavilemu vize vatelelele kushimutwila omu “vambulwilenga vilinga vyaYehova vyakwoloka.” (Kuyu. 5:11) Kaha nawa hamukanda waVaka-Kuyula 5:15-17 vavulukaho vatu vakumuyachi waLuvene, naNdane, naAshele vaze vahakilenga mangana kuvimuna javo, namato, navyau nakuhona jino kukundwiza mulimo uze avahanyine Yehova. Vatu kana valihandunwine chikuma naZevulune naNafwatale vaze “vahakile myono yavo muponde” hakukafwa Ndevola naMbalake. (Kuyu. 5:18) Twalinangula vyuma vyavilemu kuli vatu kana mwomwo yakulisuula chavo.

14. Tweji kukundwizanga ngachilihi wata waYehova makumbi ano?

¹⁴ Makumbi ano, katwazana mukuzunga jita yakumujimbako, oloze twapwa vakutokwa chikuma kwambulula mujimbu natwima. Muliuka lyaYehova makumbi ano muli nakusakiwa vatu vavavulu chikuma kuhambakana muze chapwile kunyima. Vandumbwetu vavavulu vali nakulisuula kuzata mulimo washimbu yosena wakufwana nge upayiniya, nakuzachila haMbetele, nakuzata  mulimo wakulisakila Wakutunga jiZuvo jaWangana, nawakutunga vihela vyakukunguluka chachihanda nachangalila. Kaha vakulwane vamwe vali nakuzata mujiKomiti jaKulivwasana naVipatela najize jatala hakukunguluka changalila. Mwatela kutachikiza ngwenu Yehova eji kumisakwililanga chikuma hakulisuula chenu, kaha keshi kukavulyama chuma kanako.—Hepe. 6:10.

15. Tunahase kutachikiza ngachilihi ngwetu katweshi natwima yakuzachila Yehovako?

¹⁵ Tuvosena twatela kulihulisa ngwetu: ‘Kutala ngweji kwechelelanga vakwetu vazate milimo yayivulu muliuka tahi? Kutala ngwahaka mangana chikuma kukufwila luheto kuhambakana kuzachila Kalunga tahi? Kutala ngweji kuzachisanga kala vyuma nguli navyo mangana nguzachile Yehova ngana muze alingile Mbalake, naNdevola, naYayele navaze malunga 10,000 tahi? Kachi nge nguli nakusaka kwalukila kulifuchi limwe nakutonda vyuma vyakulikafwa navyo, kutala ngweji kulombanga nakushinganyeka omu vyuma kana vinahase kukwata hatanga yami navandumbwami muchikungulwilo tahi?’ *

16. Hakuwana nge Yehova akwechi vyuma vyosena, kutala kuli vyuma vyeka vize twatela kumuhana tahi?

¹⁶ Yehova atuvumbika chikuma hakutuhana mulimo wakukundwiza wata wenyi. Hakuwana nge Satana Liyavolo ahungumwishile vatu mangana vamukundwize, ngocho nge namupwa kusali yaYehova nachisolola nge muli nakwimanyina Satana nakole. Yehova eji kwivwanga kuwaha hamuchima wenu wakulisuula. (Vishi. 23:15, 16) Kulisuula chenu cheji kumukafwanga mangana akumbulule Satana uze eji kumutombanga. (Vishi. 27:11) Ngocho kulisuula chapwa hikuhana Yehova wana wakulipwila, kaha cheji kumwivwisanga kuwaha chikuma.

17. Uno mukanda waVaka-Kuyula 5:31 wasolola vyuma muka vili nakwiza kulutwe?

¹⁷ Kalinwomu hamavu hosena hapwenga vatu vaze vetavila wata waYehova kuhambakana kala chuma chamuno mukaye. Tunakutalilila chikuma likumbi kana. Ngana mwaNdevola naMbalake nayetu tweji kwimbanga ngwetu: “Ove Yehova, vaka-kole jove vosena vanonge, oloze vaze vakuzanga vapwenga nge likumbi lize lili nakututuka naupahu walyo.” (Kuyu. 5:31) Yehova mwakakumbulula kulomba kanechi omu mwakanongesa kaye kaSatana kakuhuka. Omu nayikepuka jita yaAlamangetone, vatu kaveshi kukalisuula kwazana mujita kanako. Elu nalukapwa lwola lwetu ‘lwakwimana ndundulu mangana tukamone omu Yehova mwakatulwila.’ (Miji. 2, 20:17) Oloze oholyapwanyi, tufwilenu kuzata milimo yayivulu yize tunahase kuzata mangana tukundwize Yehova natwima.

18. Uno kulisuula chenu chinahase ngachilihi kukafwa vatu veka?

¹⁸ Ndevola naMbalake vembile mwaso wakufungulula hakwalisa Yehova keshi vatuko, vembile ngwavo: “Mwalisenunga Yehova, mwomwo vanalisuula nakuya kujita.” (Kuyu. 5:1, 2) Namakumbi ano nawa, fwilenu kulisuula mangana mukafwe vatu vavavulu ‘vamwalise Yehova.’